LEKSION 05
Mä Biiblyë japë Dios xymyëgäjpxëm
Jyobaa të xymyoˈoyëm tuˈugë regalë, yëˈë Biiblyë mëdiˈibë myëmiimpy 66 liibrë. Per waˈan mjënäˈäny: “¿Mä të tsyoonyë Biiblyë? ¿Pën të dyajjäˈäyëty?”. Parë nnijäˈäwëm, min nˈokˈijxëm wiˈix të xynyijäjtëm ja Diosë yˈääw yˈayuk.
1. Pënë Biiblyë yëˈë naxwinyëdë jäˈäy jyaaytyë, ¿wiˈixën ko njënäˈänëm ko yëˈë Dios të dyajjäˈäyëty?
Nijuxytsyikxyë yetyëjk tjääytyë Biiblyë. Yäˈädë yetyëjkëty tiiyëm tyuunkˈäjttë, tamˈäjttë borreegë kuentëˈäjtpë, äjkx mäjtspë ets tam mëdiˈibë tuundë yajkutujkpë. Ja yajjääytsyondaky mä jëmëjt 1513 mä kyajnëm myinyë Jesus ets yajjääytyaay mä jëmëjt 98 mä Jesus të myiny. Ja yajtuunkˈäjty naa 1,600 jëmëjtën parë yajjääytyaay. Per oy duˈun jeky yajjääy, tuˈugyëp ja myaytyaˈaky ets nëˈëwijts tuˈuwijtsp. ¿Tiko dyuˈunëty? Jaˈko yëˈë Dios ojts dyajjäˈäyëty (käjpxë 1 Tesalónikʉ 2:13). Ja yetyëjkëty mëdiˈibë jyaaytyë Biiblyë kyaj tkujäˈäyëdë kyëˈëm winmäˈäny, “espiritë santë winmäˈänymyooyëdë” (2 Peedrʉ 1:21).a Dios yëˈë yajtuun ja espiritë santë parë twinmäˈänymyooyë yäˈädë yetyëjkëty ets yajkujayët ja jyot wyinmäˈäny (2 Timotee 3:16).
2. ¿Pënaty mbäät nyaytyukpudëkëtyë Biiblyë?
Mbäät nyaytyukpudëkëdë ja oybyë ääw ayuk mëdiˈibë miimp mä Biiblyë, ‘oy tyim pën jäˈäyëty ets tukëˈëyë mëdiˈibë ja ääw ayuk kyäjpxtëbën’ (käjpxë Apocalipsis 14:6, TY). Dios yëˈë të dyajkäjpxnaxyëty kanäk ayuk, ets nituˈuknëm duˈunë liibrë kyayajkäjpxnaxy extëmë Biiblyë. Niˈamukë jäˈäy mbäät tkäjpxtë oy mä tsyëënëdët ets oy ti ayuk tkäjpxtët.
3. ¿Wiˈixë Jyobaa të tkuentëˈatyë Biiblyë parë tyam nmëdäjtëm?
Biiblyë yajjääy mä ja nekyxyaatsy mëdiˈibë nety të yˈoyë mëdë jëyujkˈak ets mëdë ujts teky mëdiˈibë xyëwˈäjtypy papiro, jeˈeyë ko pojënë nety wyindëgoy. Per ja yetyëjkëty mëdiˈibë jyantsy tsyojktë Diosë yˈAyuk, jyaaynyäjxtë oyˈixyë jantsy kanäkˈok. Ets oy jyamˈäjtyë wintsëndëjk etsë yajkutujkpëty mëdiˈibë jyayajkutëgoyandë, tamˈäjtë jäˈäyëty mëdiˈibë nyitsiptuundë oy ttimykyuˈoogëdët. Jyobaa kyaj tnasˈijxë ets pën yˈawäˈktukëdët parë xymyëgäjpxëm mët yëˈëgyëjxmë Biiblyë, mä jyënaˈany: “NDiosˈäjtëmë yˈayuk, winë xëëw yˈity” (Isaías 40:8).
AK NIJAWË NIˈIGYË
Min nˈaknijäˈäwëm wiˈixë Dios twinmäˈänymyooy ja yetyëjkëty parë tjääytyë Biiblyë, ets wiˈix të tkuwäˈäny parë mbäädë naxwinyëdë jäˈäy tyam tmëdaty.
4. Biiblyë nyigajpxypy pën japë yˈääw yˈayuk miimp
Ixtë BIDEO. Ta net xykyäjpxtëdë 2 Timotee 3:16 ets xynyimaytyäˈäktët mëdiˈibë yä yajtëëpy:
Pënë Biiblyë yëˈë jyaayë naxwinyëdë jäˈäy, ¿tiko njënäˈänëm ko yëˈë Diosë yˈAyuk?
Wiˈix mˈokwinmay, ¿mbäät nmëbëjkëm ko Dios yëˈë wyinmäˈänymyooy ja naxwinyëdë jäˈäy mëdiˈibë jyaaytyë Biiblyë?
Tuˈugë sekretaaryë jeˈeyë tjäˈäy ja neky, per mëdiˈibë japë yˈääw yˈayuk nëjkxp, yëˈë ja wintsën. Nanduˈun jyaty mëdë Biiblyë, naxwinyëdë jäˈäy jyaaytyë, per yëˈë kyujäˈäyëdë ja Diosë yˈääw yˈayuk.
5. Të jäˈäy kanäkˈok tjayajkutëgoyäˈändë Biiblyë
Pënë Biiblyë jam tsyoony mä Dios, seguurë ko yëˈë të tkuwäˈäny. Nuˈunë tiempë të nyaxy, mayë anaˈambëtëjk të tjayajkutëgoyäˈändë Biiblyë ets pënaty nyiwintsënˈäjttëbë relijyonk kyaj nanduˈun të tjatsoktë etsë jäˈäy tkäjpxtët. Per oy duˈun të tmëtsipˈattë, mayë jäˈäy të tpëjktäˈäktë jyukyˈäjtën oˈkën jëjpˈam parë të tkuwäˈändë Biiblyë. Parë nˈixyˈäjtëm niduˈugë yäˈädë yetyëjk, ixtë BIDEO ets nimaytyäˈäktë mëdiˈibë yä yajtëëpy:
Ko të xynyijawë wiˈixë jäˈäy tkuˈayoˈowëdë Biiblyë, ¿jënäämbë net niˈigyë mˈääw mjot parë xykyäjpxäˈäny? ¿Ets tiko?
Käjpxtë Salmo 119:97 ets nimaytyäˈäktë mëdiˈibë yä yajtëëpy:
¿Tidaa ko mayë jäˈäy tpëjktaktë jyukyˈäjtën oˈkën jëjpˈam ko tkäjpxnäjxtë Biiblyë ets dyajpëtsëëmdë?
6. Tuˈugë liibrë mëdiˈibë mbäät oypyënëty tmëdaty
Nuˈun kujkë tiempë nyaxy, Biiblyë yëˈë mëdiˈibë niˈigyë të yajkäjpxnaxy ets të wyaˈkxy. Käjpxtë Apostʉlʉty o Hechos 10:34, 35 ets nimaytyäˈäktë mëdiˈibë yä yajtëëpy:
¿Tiko Dios ttsoky etsë Biiblyë yajkäjpxnaxët kanäk ayuk ets tmëdatët oytyim pënëty?
¿Ti të xyˈoymyëdoy extëm të yajnimaytyaˈagyë Biiblyë mä yäˈädë leksion?
Abëtsëmy nyaxwinyëdë
nimayë
jäˈäy
myëdäjttëp tuˈugë Biiblyë mëdiˈibë jyaygyujkëdëp
Ja kujk pyëtsëmy naxy
3,000
ayuk,
ta mëdiˈibë kaˈpxy o jeˈeyë tuk pëky
Ja kujk pyëtsëmyë Biiblyë naa
5,000 miyonk
Nituˈuknëmë liibrë duˈun kyakojy
NÄÄGË JÄˈÄY JYËNÄˈÄNDË: “Biiblyë të yajjääymyäˈtnë”.
¿Wiˈix mijts mˈokwinmay?
¿Ti mëdiˈibë mdukˈijxëp ko Biiblyë kyaj të yajjääymyaˈaty?
TI TË NJÄJTËM
Biiblyë yëˈë Diosë yˈAyuk, ets yëˈë të tkuwäˈäny parë mbäädë naxwinyëdë jäˈäy tmëdattë.
Ajamyatsë
¿Wiˈixë Dios twinmäˈänymyoˈoyë jäˈäyëty parë tjääytyë Biiblyë?
¿Ti mëjˈixy mëjmëdoy mjäˈäwëp mä wiˈixë Biiblyë të yajkuwäˈäny, të yajkäjpxnaxy ets të wyaˈkxy?
Ko xynyijawë tukëˈëyë mëdiˈibë Dios të ttuny parë xymyëgäjpxëm mä Biiblyë, ¿wiˈix myajnayjyawëty?
AK PAYEˈEY
Nijawë wiˈix yajnimaytyaˈagyë Biiblyë desde ko yajjääytsyondaky këˈam axtë mëdiˈibë pëtsëëmp mä ndiempëˈäjtëm.
“¿Wiˈixë Biiblyë të jyaˈty mä ndiempëˈäjtëm?” (¡Despertad!, nobiembrë 2007)
Nijawë ti tëgëk pëkyë Biiblyë të jyayajkutëgoyaˈanyëty ets wiˈix të yajkuwäˈäny.
“Yajnimaytyaˈaky wiˈixë Biiblyë të yajkuwäˈäny” (Diˈib Xytyukˈawäˈänëm num. 4 2016)
Ix wiˈix tkuˈayoˈonbatëdë näägë jäˈäy ko tkäjpxnäjxtë Biiblyë.
Kom jantsy kanäkˈokë Biiblyë ojts yajjääynyaxy ets të yajkäjpxnaxy. ¿Wiˈix mijts mbäät mˈity seguurë ko kyaj të yajjääymyaˈaty?