¿Wiˈixë Biiblyë jyënaˈany ko jäˈäy nyaytyuˈukˈaty ets ko kyasäädëˈaty?

Mä näägë lugäär, duˈunë jäˈäy wyinmääytyë ko net jyotkujkˈatët pën pëjktëp. Per kyaj niˈamukë jäˈäy mëdiˈibë të pyëktë yˈagujkˈat jyotkujkˈattë ets mëdiˈibë naytyuˈukˈäjtp kyaj nanduˈun niˈamukë yajpäättë mon tuk. Biiblyë jyënaˈany ko ak oy, duˈun ko jäˈäy nyaytyuˈukˈaty ets ko kyasäädëˈaty.

1. ¿Wiˈixë jäˈäy ttukˈoyˈaty ko nyaytyuˈukˈaty?

Biiblyë jyënaˈany: ‘Pën të [pyeky] extëmë ënaty të ttuknibëjktäägën oy jëduˈun; ets pën käˈäp të [pyeky] waanë oy ënaty tii ttuny’ (käjpxë 1 Corintios 7:​32, 33, 38, TY). ¿Ti myaytyäˈägaampy ko jyënaˈany ko pënaty kyaj pyëktë ‘waanë oy ënaty tii ttuny’? Tuˈugë Diosmëduumbë mëdiˈibë naytyuˈukˈäjtp kyaj jyotmaytyunyëty wiˈix tˈokˈyajjotkujkˈatët ja myëmëjjäˈäy o ja kyudëjk, pes awäˈätstum yajpääty. Pääty mbäät mas niˈigyë dyajmëjwindëkë Diosë tyuunk, extëm ko nyëjkxët wiink lugäär ëwäˈkx käjpxwäˈkxpë. Ets ja tuk pëky, yëˈë ko naytyuˈuktëjk myëdäjttëp niˈigyë tiempë parë tmëwingondëdë Jyobaa.

2. ¿Wiˈixë jäˈäy ttukˈoyˈaty ko kyasäädëˈaty?

Ko jäˈäy kyasäädëˈaty tyukˈoyˈajtypy nanduˈun. Pesë Biiblyë jyënaˈany ko “niˈigyë yˈoyëty nimajtsk ets kyaj dyuˈunëty naytyuˈuk” (Eclesiastés 4:9). Ets jantsy duˈun, per net ko ja kasäädë jäˈäy tpadundë ja ëwij käjpxwijën mëdiˈibë miimp mä Biiblyë. Ko jäˈäy syëbilpëky, ta nyaytyukwandäˈägëdë ko xëmë nyaytsyokäˈänëdë, nyaywyingutsëˈëgëyäˈänëdë ets nyaygyuentëˈatäˈänëdë. Pääty niˈigyë kyopkpëky ja tsyënäˈäy jyukyˈäjtën këdiinëm ja jäˈäy mëdiˈibë duˈunyë tsënääytyëp ets ja yˈuˈunk yˈënäˈk agujk jotkujk nanduˈun yaak pyattë.

3. ¿Wiˈixë Jyobaa tˈixyë pëjk ukën?

Ko Jyobaa dyajpëjky ja tim jawyiimbë naxwinyëdë jäˈäy, duˈun jyënany: “Ta yëˈë yeˈeytyëjk tˈixmäjtsnëty yëˈë tyeety ets yëˈë tyääk ets tpuwäˈägëty yëˈë tyoˈoxytyëjk [o kyudëjk]” (Génesis 2:​24, MNM). Jyobaa tsyojkypy etsë kasäädë jäˈäy nyaytsyokëdët ets tuˈugyë yˈittët nuˈun ja xyëëw jyukyˈäjtënëty. Jaayë dyajnigutukë yaˈˈajääywyäˈkxtët ko niduˈuk pyokytyuny mëdë wiinkpë. Ja mëdiˈibë të yajmëdëgoy, yëˈë mbäät tˈixy pën yaˈˈajääywyäˈkxäämp o pën kyaj (Matewʉ 19:9).a Jyobaa kyaj tkupëky ets pënaty mëduunëp tpëkët kanäägë toxytyëjk o yetyëjk (1 Timotee 3:2).

AK NIJAWË NIˈIGYË

4. Yajtun yajxonë mdiempë mä mnaytyuˈukˈaty

Jesus duˈun tˈijxy extëmë Diosë kyunuˈkxën ko jäˈäy nyaytyuˈukˈaty (Mateo 19:​11, 12, TNM). Käjpxtë Matewʉ 4:​23 ets nimaytyäˈäktë mëdiˈibë yä yajtëëpy:

• Ko Jesus nyaytyuˈukˈäjty, ¿wiˈix mas niˈigyë tmëduunyë Tyeety ets tpudëjkë jäˈäy?

Diosmëduumbë mëdiˈibë naytyuˈukˈäjttëp, mbäät nanduˈun jyukyˈattë agujk jotkujk ko tpanëjkxëdë Jesusë yˈijxpajtën. Ixtë BIDEO ets nimaytyäˈäktë mëdiˈibë yä yajtëëpy:

BIDEO: Naytyuˈuktëjk mëdiˈibë pyanëjkxëdëbë Jesusë yˈijxpajtën (3:​16)

• ¿Tijaty mbäät niˈigyë ttundë pënaty naytyuˈukˈäjttëp?

¿Mnijäˈäwëp?

Mä Biiblyë kyaj mä tnigajpxy nääk mbäädë jäˈäyë jyëmëjt tmëdaty parë pyëkët. Per jënäämp ko mbäät pyeky mä ‘jyëmëjt të tpatnë’, pes mä ja xyëëw jyëmëjt tkapäätynyëm mëk ja tsojkën tyukminyëty ets mbäät alokë tijaty ttuny (1 Corintios 7:​36, TY).

5. Winˈix yajxon pën mbëkaampy

Yajxon mbäät xywyinˈixy pën mbëkaampy. Käjpxtë Matewʉ 19:​4-6, 9 ets nimaytyäˈäktë mëdiˈibë yä yajtëëpy:

• Mä tuˈugë Diosmëduumbë kyapëkynyëm, ¿tiko jyëjpˈamëty ets yajxon twinmayët?

Biiblyë mbudëkëyanëp parë xynyijawët wiˈix mbäät jyaˈayˈaty ja mixy o ja kiixy mëdiˈibë mbëkaampy. Per mëdiˈibë niˈigyë mbäät xyˈixy, yëˈë pën tsyojkypyë Jyobaa.b Käjpxtë 1 Korintʉ 7:​39 etsë 2 Korintʉ 6:​14, ta net xynyimaytyäˈäktët mëdiˈibë yä yajtëëpy:

• Pën tuˈugë Diosmëduumbë pëkäämp, ¿tiko jyëjpˈamëty ets yëˈëyë tpëkët ja mëdiˈibë nanduˈun Diosmëduump?

• Pën yëˈë pyejkypy mëdiˈibë kyaj ttsokyë Jyobaa, ¿wiˈixëdaa nëjkx dyajnayjyawëty?

6. Ix ja pëjk ukën extëmë Jyobaa tˈixy

Nääk ja israelitëty ojts yaˈˈajääywyäˈkxtë mët ja kyudëjk mët ko tpëjktë ja wiink toxytyëjk. Käjpxtë Malaquías 2:​13, 14, 16 ets nimaytyäˈäktë mëdiˈibë yä yajtëëpy:

• ¿Tiko Jyobaa kyaj tˈoyˈixy ko kasäädë jäˈäy nëgoogyëjxm yaˈˈajääywyäˈkxtë ets kyaj mët ko niduˈuk të tyëgoy mëdë wiinkpë?

Ixtë BIDEO ets nimaytyäˈäktë mëdiˈibë yä yajtëëpy:

BIDEO: Ko jäˈäy pyeky: yëˈë parë yˈamajtskˈattët nuˈun ja xyëëw jyukyˈäjtën (4:​30)

• Pën mijts yëˈë mëët mgasäädëˈaty tuˈugë jäˈäy mëdiˈibë kyaj ttsokyë Jyobaa, ¿ti mbäät xytyuny parë mˈitët jotkujk?

7. Mmëmëdow ja anaˈamën mëdiˈibë Jyobaa të tpëjktaˈaky parë kasäädë jäˈäy

BIDEO: Jyobaa xypyudëjkëm ets nmëmëdoˈowëm ja anaˈamën mëdiˈibë të dyajnaxkëdaˈaky parë kasäädë jäˈäy (4:​14)

Käjpxtë Ebreeʉsʉty 13:4 ets nimaytyäˈäktë mëdiˈibë yä yajtëëpy:

• Wiˈix mˈokwinmay, ¿mbäädëdaa kasäädë jäˈäy jyukyˈattë extëmë Jyobaa tniˈanaˈamë? ¿Ets tiko duˈun mwinmay?

Jyobaa tsyojkypy etsë Diosmëduumbëty dyajpëtsëmdët ja syëbil neky ets nanduˈun ja neky mä yaˈˈajääywyäˈkxtë, duˈun extëm ja kuduunktëjk dyajnigutukëdë. Käjpxtë Titʉ 3:1 ets nimaytyäˈäktë mëdiˈibë yä yajtëëpy:

• Pën mijts jamë mjamyëët, ¿të xyˈixy pën japë msëbilneky?

TI TË NJÄJTËM

Ko jäˈäy nyaytyuˈukˈaty o kyasäädëˈaty, yëˈë Jyobaa kyumäˈäyën. Ets mbäät agujk jotkujk nyajpatëm pën nduˈunëm tijaty extëmë Dios ttsoky.

Ajamyatsë

• ¿Tijaty mbäät niˈigyë ttundë pënaty naytyuˈukˈäjttëp?

• ¿Tiko Biiblyë jyënaˈany ko tuˈugë Diosmëduumbë yëˈë mbäät tpëky ja mëdiˈibë nanduˈun Diosmëduump?

• ¿Näˈä jeˈeyë Biiblyë dyajnigutukë etsë kasäädë jäˈäy yaˈˈajääywyäˈkxtët?

AK PAYEˈEY

¿Ti Biiblyë myaytyäˈägaampy ko jyënaˈany yëˈëyë nbëjkëm mëdiˈibë nanduˈun “myëbejkypy ja Jesukristë”?

“Mëdiˈibë nääk të nyayajtëwëdë” (Diˈib Xytyukˈawäˈänëm, 1 äämbë julië 2004)

Ix majtskë bideo mëdiˈibë mbudëkëyanëp parë xynyijawët ti mdunëp pën mmëdataambyë mnoobyë o mbëkäämp.

Wiˈix mbäät mnayjyëjpˈixyëty mä mgapëkynyëm (11:​53)

Nijawë tiko tuˈugë nmëguˈukˈäjtëm yˈity seguurë ko të Jyobaa myoˈoyëty mëdiˈibë mëjwiin kajaa tsobatp këdiinëm mëdiˈibë ojts tmastuˈuty.

Njatsojkëts ets ja kiixy tnijawët ja tëyˈäjtën (1:​56)

Mä tuˈugë kasäädë jäˈäy kyayaˈˈajääywyäˈkxtënëm o kyanaymyastuˈudëdënëm, ¿ti mbäät jawyiin twinmaytyë?

“Nˈokwintsëkën ja pëjk ukën diˈibë Dios të tpëjtaˈaky” (Diˈib Xytyukˈawäˈänëm, disiembrë 2018)