LEKSION 34
¿Wiˈix mbäädë Jyobaa ndukˈijxëm ko ntsojkëm?
Desde ko xyˈëxpëjktsondakyë Biiblyë, ¿mjäˈäwëp ko të niˈigyë Jyobaa xymyëwingony, ets mnaymyaaybyëkanëp mëët? Jamyats ko pën mdukˈijxypyë Jyobaa nuˈunën xytsyoky tuˈuk tuˈugë xëëw, ta nanduˈun mas niˈigyë mtsokäˈänyëty ets mguentëˈatäˈänyëty. ¿Wiˈix mbäät xytyukˈixy ko mtsojkypy?
1. ¿Wiˈix mbäät ndukˈijxëmë Jyobaa ko ntsojkëm?
Ko nmëmëdoˈowëm Jyobaa duˈunë nety nyajnigëxëˈkëm ko ntsojkëm (käjpxë 1 Fwank 5:3). Per kyaj xytyukˈaguanëˈäjtëm, këˈëmën mbäät nwinˈijxëm pën nmëmëdowäˈänëm. ¿Tiko? Jaˈko tsyojkypy ets ‘ëmumduˈukjot’ nmëmëdoˈowëm (Romanos 6:17, TY). O ja tuk pëky njënäˈänëm, Jyobaa tsyojkypy ets nmëmëdoˈowëm mët ko ntsojkëm ets kyaj mët ko nyajtukˈaguanëˈäjtëm. Mä myëdëgëk pëkypyë etsë myëmäjtaxk pëkypyë mëdiˈibë miimp mä yäˈädë liibrë, xynyijawëyaˈany wiˈix mbäädë Jyobaa xytyukˈixy ko mtsojkypy: ko xytyunët tijaty kyupëjkypy ets ko xyjyëjpkudijët tijaty kyaj tˈoyˈixy.
2. ¿Tiko näˈäty tsyiptaˈaky ets ndukˈijxëmë Jyobaa ko ntsojkëm?
Biiblyë jyënaˈany: “Jantsy mayë yˈamay jyotmayë oyjyaˈay” (Salmo 34:19). Kom pokyjyaˈay nyajpatëm, ta nnayajtëjkëm jotmayoty, ets abëkyë net yˈaktimymyinyë jotmay extëm ko yˈamääytyaˈagyë meeny sentääbë o ko jam pën axëëk xytyuˈunëm. Ko nbatëmë amay jotmayë mëjwiin kajaabë, mbäät tsyiptaˈaky nduˈunëm mëdiˈibë Jyobaa tsyojkypy etsë net kyaj nekymyëmëdoˈowëm. Per pën mduumpy tijatyë Jyobaa mdukˈanaˈamëp, duˈunë nety xytyukˈixy ko mas niˈigyë xytsyoky ets ko ninäˈä xykyamastuˈudäˈäny. Jyobaa xëmë yajpäädäˈäny mët mijts, pes duˈun mˈanëˈëmxëty: “Ninäˈä nganaˈixët [ets] ninäˈä ngamastuˈudët” (Ebreeʉsʉty 13:5).
AK NIJÄWË NIˈIGYË
Min nˈokˈijxëm tiko jyëjpˈamëty etsë Jyobaa nmëmëdoˈowëm, ets ti xypyudëkëyäˈänëm parë ninäˈä ngamastutëm.
3. Mijts mniwäämbajtëbë Satanás
Mä liibrë mëdiˈibë xyëwˈäjtypy Job, jap tnimaytyaˈaky ko Satanás nyiwäämbajtë Job, per kyaj yëˈëyë tniwäämbejty, nanduˈunën niˈamukë pënatyë nety myëdunandëbë Dios. Käjpxtë Job 1:1 etsë 1:6-2:10, ets nimaytyäˈäktë mëdiˈibë yä yajtëëpy:
¿Wiˈixë Satanás jyënany tiko netyë Job tmëmëdoyë Jyobaa? (Ixtë Job 1:9-11).
¿Wiˈixë Satanás mniwäämbetyëty ets nanduˈun niˈamukë naxwinyëdë jäˈäy? (Ixtë Job 2:4).
Käjpxtë Job 27:5b ets nimaytyäˈäktë mëdiˈibë yä yajtëëpy:
¿Wiˈixë Job dyajnigëxëˈky ko jyantsy tsyojkypyë netyë Jyobaa?
Ko Job tmëmëdooyë Jyobaa, ta dyajnigëxëˈky ko tsyojkypyë nety.
Ko nmëmëdoˈowëmë Jyobaa, ta nyajnigëxëˈkëm ko ntsojkëm.
4. Yajxondakë Jyobaa kyorasoon
Käjpxtë Proverbios 27:11 ets nimaytyäˈäktë mëdiˈibë yä yajtëëpy:
¿Wiˈixë Jyobaa nyayjyawëty ko xymyëmëdoy ets ko xytyuny mëdiˈibë oy? ¿Ets tiko?
5. Mijts mbäädë Jyobaa xëmë xymyëmëdoy
Ko ntsojkëmë Jyobaa, yëˈë yajjënäˈänaampy ja ääw jot ets nimaytyakëm.Ets ko xëmë nmëmëdoˈowëm, yëˈë xypyudëkëyäˈänëm parë nimaytyakëm oy tsyiptaˈaky. Ixtë BIDEO ets nimaytyäˈäktë mëdiˈibë yä yajtëëpy:
¿Mtsiptakxëp xytyukmëtmaytyäˈägëdë jäˈäy pënën Jyobaa?
Extëm të nˈijxëm mä bideo, ¿ti pudëjkë Grayson parë kyaj nyekytsyëˈkë?
Kyaj tsyiptäˈägäˈäny nmëmëdoˈowëmë Jyobaa pën nˈoyˈijxëm mëdiˈibë yëˈë yˈoyˈijxypy ets pën nˈaxëkˈijxëm mëdiˈibë yëˈë yˈaxëkˈijxypy. Käjpxtë Romanʉs 12:9 ets nimaytyäˈäktë mëdiˈibë yä yajtëëpy:
Nuˈun kujk xyˈëxpëkyë Biiblyë, ¿tijatyë Jyobaa yˈoyˈijxypy? ¿Ets tijaty yˈaxëkˈijxypy?
¿Ti mbudëkëyanëp parë xyˈoyˈixët mëdiˈibë oy ets xyˈaxëkˈixët mëdiˈibë axëëk?
6. Ndukˈoyˈäjtëm ko nmëmëdoˈowëmë Jyobaa
Ko nmëmëdoˈowëmë Jyobaa, xëmë ndukˈoyˈäjtëm. Käjpxtë Lukʉs 11:28 ets nimaytyäˈäktë mëdiˈibë yä yajtëëpy:
¿Nyijäˈäwëbëdaa Jyobaa ti mbäät ndukˈoyˈäjtëm? ¿Ets tiko duˈun mjënäˈäny?
¿Wiˈix kujk mbudëkëty ko xyˈëxpëkyë Biiblyë ets ko niˈigyë xyˈixyˈatyë Jyobaa, ja Diosë tëyˈäjtënbë?
NÄÄGË JAAY JYËNÄˈÄNDË: “¿Mbäädëtsëdaa Dios nyajnayjyawëty agujk jotkujk?”.
¿Mëdiˈibë tekstë mdukˈixëbë jäˈäy parë tpëkëdë kuentë ko tijaty tyuumpy mbäädë Jyobaa axëëk dyajnayjyawëty o agujk jotkujk?
TI TË NJÄJTËM
Mtsojkypyë netyë Jyobaa ko xymyëmëdowët ets ko kyaj xymyastuˈudët oy xypyäädëdë amay jotmay.
Ajamyatsë
¿Ti mdukniˈˈijxëbë yˈijxpajtënë Job?
¿Wiˈix xyajnigëxëˈëgäˈäny ko mtsojkypyë Jyobaa?
¿Ti mbudëkëyanëp parë kyaj Jyobaa xymyastuˈudët?
AK PAYEˈEY
Nijawë ti mbäät xytyuny parë kyaj Jyobaa xypyuwäˈktuˈudët ets ja nyax kyäjpn.
“Ja mëdiˈibë kyaj mmastuˈutyëty, mijts kyaj nanduˈun xymyastuˈudäˈäny” (16:49)
Ak nijawë wiˈixë Satanás tniwäämbejtyë Job.
“Job kyaj tmëduundëgooyë Dios” (Biiblyë, ¿ti xytyuknijäˈäjëm?, maytyaˈaky 6)
Ix wiˈix mbäädë ënäˈkuˈunk nanduˈun dyajnigëxëˈëktë ko tsyojktëbë Jyobaa.
Ix ti mbäädë ënäˈktëjk pyudëkëdë parë tmëmëdowdëdë Jyobaa ko ja myëguˈuktëjk tijaty tyuktunäˈänëdët.