Moisés yaˈijxë tsojkën
¿TI YˈANDIJPY TSOJKËN? Ko pën mëk njantsy tsyojkëm. Tuˈugë jäˈäy diˈib tsojkp, ja dyajnigëxëˈëky mä yˈää yˈayuk ets mä tijaty tyuumpy, oy tsyiptakxëdët duˈun ttunët.
¿WIˈIXË MOISÉS DYAˈIJXË TSOJKËN? Moisés yajnigëxëˈk ko tsyojkë Dios. ¿Wiˈix dyajnigëxëˈky? Ko xëmë tmëmëdooy. 1 Fwank 5:3 jyënaˈany: “Ko ntsojkëm ja Dios, nguytyuˈunëmë naty yëˈë yˈanaˈamën”. Oy ti Dios tyukˈanaˈamë, duˈun meerë ttuundääy, oy myëjwiin kyajaajëty extëm twinguwäˈägët ja rey diˈib Egipto o ttunët diˈib kyaj tsyipëty extëm tkäjptëwëdë tyäjk mä ja mejnyë Tsaptspë (Éxodo 40:16).
Moisés nan yajnigëxëˈk ko tsyojkë israelitëty. Ets ja israelitëty yˈëxkäjptë ko yëˈë Jyobaa yajtuunëp parë tyuˈumoˈoyëdët, pääty ak jam ijty nyëjkxtë ko amay jotmay tpäättë. Biiblyë jyënaˈany: “Ja jäˈäyëty mëdiˈibë jam ja jyotmayëtyën tukxëëw duˈun jam yajxon tyënääytyë” (Éxodo 18:13-16, MNM). Okpawinmay wiˈixë Moisés ojts yˈanuˈkxë ko ja jäˈäyëty xënaxy tyukmëtmaytyakëdë yˈamay jyotmay. Per xondaˈakyˈää xondaˈakyjyot tpudëjkë, yëˈko mëk ttsojktë.
Moisés kyaj jeˈeyë tmëdooˈijty wiˈix yaˈˈanmääy, nanduˈun ojts tninuˈkxtäägëdë. Ets axtë nyinuˈkxtakë pënaty axëëk tuunë. Extëm nˈokpëjtakëm, ko ja myëgaˈax Míriam kyäjpxpatë, ta yajtukumëdooy mëdë leprë päˈäm. Moisés kyaj ttukxondaky, niˈigyë ojts tninuˈkxtäägë: “Wintsën, tun yëˈë mayˈäjtën yajtsoˈok yajˈagëdäˈäk yäˈädë toˈoxytyëjk” (Números 12:13, MNM). Moisés tsyojk ja myëgaˈax, pääty ojts tninuˈkxtäägë.
¿TI XYTYUKNIˈˈIJXËMË YˈIJXPAJTËN? Ko jëjpˈam nyajkëktëjkëmë tsojkën mä Jyobaa, diˈib mbäät xymyëjämoˈoyëm parë nmëmëdoˈojëmë yˈanaˈamën amumduˈukjot (Romanʉs 6:17). Ko nmëmëdoˈojëm, yëˈë diˈib agujk jotkujkë Jyobaa yajnayjäˈäwëp (Proverbios 27:11). Nan ndukˈoyˈäjtëm ko nmëduˈunëmë Dios mët ko ntsojkëm, pes jotkujk xyajnayjäˈäwëm ko nduˈunëm tijaty yëˈë tyukjotkëdakypy (Salmo 100:2).
Nan jëjpˈam nyajmëjwindëjkëmë tsojkën mä nmëguˈukˈäjtëm ets nmëmäˈäy nmëdäjëm. Ko nmëdäjtëmë duˈumbë tsojkën, yëˈë diˈib mbäät xypyudëjkëm ko tuˈugë mëtnaymyaayëbë o jiiky mëguˈuk xytyukmëtmaytyakëmë yˈamay jyotmay 1) parë yajxon nmëdooˈijtëm, 2) njaygyujkëm wiˈix nyayjawëty ets 3) nyajnigëxëˈkëm ko nnaytyukjotmaytyuˈunëm.
Duˈun extëmë Moisés, nan mbäät ninuˈkxtakëmë nmëguˈukˈäjtëm. Näˈäty kyaj nnijäˈäwëm ti mbäät nduˈunëm parë nbudëjkëm ets jeˈeyë nˈanmäˈäyëm: “Mëkëts njawë ko duˈun mjaty, per mbäät ninuˈkxtäägë”. Nˈokjamyajtsëm ko nyuˈkxtaˈaky “tuˈugë jäˈäy diˈibë jikyˈäjtp tëyˈäjtën mëët, yëˈë kyäjxtakën [o nyuˈkxtakën] myëdäjtypy niˈigyë ja mëkˈäjtën” (Santya̱ˈa̱gʉ 5:16). Ko nuˈkxtakëm mbäät tyuny parë Jyobaa tpudëkët ja jäˈäy diˈibë nety kyaj të twinmay. Pääty, mbäät kajaa nbudëjkëmë jiiky mëguˈuk ko ninuˈkxtakëm.a
¿Këdii mëjwiin kajaa diˈib xytyukniˈˈijxëmë Moisésë yˈijxpajtën? Oyë nety pyokyjyaˈayëty extëm ëtsäjtëm, yäjk mëjwiin kajaa ijxpajtën ko tmëdäjtyë mëbëjkën, yˈijty yujy tudaˈaky ets tmëdäjtyë tsojkën. Pääty, nˈoktuˈunëmë mëjää axtë nuˈun nmadakëm parë nbanëjkxëmë yˈijxpajtën. Mëjwiin kajaa nëjkx ndukˈoyˈäjtëm ets nanduˈun nëjkx ttukˈoyˈaty pënaty mëët nyajpatëm (Romanʉs 15:4).
[Notë]
a Parë Dios tmëdooˈitëdë nuˈkxtakën, tsojkëp nduˈunëmë mëjää parë nguytyuˈunëm extëmë yˈanaˈamën jyënaˈany. Pën mˈaknijawëyaampy niˈigyë, ixë liibrë ¿Ti tëyˈäjtën jantsy tukniˈijxëbë Biiblyë? kapitulo 17, diˈibë Jyobaa tyestiigë yajpëtsëëmdëp.
[Dibujë diˈib mä pajina 6]