DIˈIB MIIMP MÄ NYIˈAK: ¿TI MYAYTYAKYPYË BIIBLYË?
¿Ti Dios tyuun parë dyaˈˈawäˈätspëtsëëmyë naxwinyëdë jäˈäy?
Dios tyukwandakë Abrahán ko ja “tëëm ääts” diˈib yajwandak, myinäˈäny mä fyamilyë. Ets mët yëˈëgyëjxm yajkunuˈkxäˈäny tukëˈëyë naxwinyëdë jäˈäy (Génesis 22:18). Ko tiempë nyajxy, ta Abrahángë yˈok, diˈib xëˈäjt Jacob, ojts nyëjkxnë tsënaabyë Egipto. Jap ojts jyantsy myayë ja fyamilyë axtë jyajty tuˈugë mëj nasionk, diˈib yajtijtë israelitëty.
Per ok, ta tuˈugë anaˈambë diˈib mëk axëkjäˈäy ttuumbëˈäjty ja israelitëty. Ta Dios yaˈˈawäˈätspëtsëëmëdë mët yëˈëgyëjxm ja kugajpxy Moisés, diˈib yajnaywyäˈkxë ja mejnyë Tsaptspë mëdë Diosë myëjää. Ok, ta ja israelitëty yajmooytyë ja Diosë yˈanaˈamën parë tyuˈumoˈoyëdët ets kyuwäˈänëdët. Duˈun yajmooytyë ja Mäjkpë Mandamientë ets nanduˈun wiˈix dyaktët ja wintsëˈkën ko pyokytyundët. Mët yëˈëgyëjxmë Moisés, Dios tˈanmääy ja israelitëty ko tkaxäˈänyë wiinkpë kugajpxy. Tyäˈädë kugajpxy yëˈë ja tëëm ääts diˈib yajwandak.
Ko nyajxy 400 jëmëjt, ta Dios ttukwandakyë rey David ko ja tëëm ääts tmëdatäˈänyë yˈanaˈamdakn winë xëë. Ets ko yëˈë ja Yajnitsokpë diˈibë Dios Winˈijxë parë dyaˈˈawäˈätspëtsëmëdë naxwinyëdë jäˈäy ets dyajjëmbitëdë Naxwinyëdë extëm tuˈugë lugäärë tsujpë.
Dios wanaty wanaty ttuknijäˈäwë David etsë wiinkpë kugajpxyëty pën diˈibë nety të tWinˈixy. Ojts yajnaskäjpxë ko yˈitäˈäny yujy tudaˈaky ets oyjyaˈay. Ets mä yˈanaˈamdakn kyaj jyamˈatäˈänyë yuu, tsip ets yajtunäämbë tëyˈäjtën, ets niˈamukë naxwinyëdë jäˈäy yˈitäˈändë tuˈugyë ets nanduˈun mëdë jëyujk animal. Kyaj nyekyjamˈatäˈänyë päˈäm, ayoˈon etsë oˈkën, diˈibë Dios ninäˈä tkatuknibëjtakë. Nan jukypyëkandëp yä Naxwiiny pënaty të yˈooktë.
Dios ojts tnaskäjpxë mët yëˈëgyëjxmë Miqueas ko diˈib Wyinˈijx myaxuˈunkˈatäˈäny Belén, etsë Daniel ojts tnaskäjpxë ko jäˈäy yaˈoogäˈänyëty. Per ko Dios yajjukypyëkanëp ets nyikäjpxpatäˈänyëty Rey jam tsäjpotm. Daniel yajwëˈëm jääybyety ko tyäˈädë Anaˈamën yëˈë wyingudëgatsˈataampy tukëˈëyë gobiernë diˈib jaˈäjtp. Per ¿jantsy miin ja diˈibë Dios Wyinˈijx extëmë nety të yajnaskäjpxë?
(Yajpääty mä Génesis 22 axtë 50 ets mä Éxodo, Deuteronomio, 2 Samuel, Salmos, Isaías, Daniel, Miqueas etsë Zacarías 9:9.)
[Rekuäädrë diˈib mä pajina 5]
DIOSË XYËË DIˈIB WÄˈÄTS
Mä Génesis 2:4, jap tim jawyiinë Diosë xyëë myiny, Jyobaa. Ko Biiblyë yajjääy ebreo ja nety jap myinyë Diosë xyëë naa jëxtujk mil okën. Ja nyikejy, “Yëˈë Tyuumpy ets duˈun Tyun Jyatëdët”, tyäˈädë yëˈë yˈandijpy ko yëˈë mbäät ttuny parë dyaˈˈadëwët diˈib tyuknibëjtakëp.
[Dibujë diˈib mä pajina 5]
[Dibujë diˈib mä pajina 5]