Nayˈawäˈänëdë xondaˈakyˈää xondaˈakyjyot parë tyunäˈändë Taiwán

CHOONG Keon mëdë Julie, diˈibë netyë jyëmëjtëty naa 35, japë nety tyundë prekursoor regulaar Sydney (Australia) myëgoxk jëmëjtëp. Choong Keon jyënaˈany: “Tukkujkxyëëjëtsë nety ndundë ets oyëtsë nxëë ndiempë nyajnaxtë. Jap agujk jotkujkë jäˈäy jyukyˈattë ets jantsy oyë tiempë. Nan wingonëtsë netyë nfamilyë tsyëënëdë etsë nmëtnaymyaayëbëty, päätyëts ja lugäär nˈoyjawëdë”. Per tam diˈibë nety kyaj oy yajnayjawëdë. ¿Tii? Ko wyinmaytyë ko mbäät niˈigyë tmëdundë Jyobaa, per kyaj netyë wyinmäˈäny tpëjtäˈäktë parë dyajtëgatstëdë jyukyˈäjtën.

Ko tyuunë asamblee 2009, ta tmëdoodë tuˈugë diskursë diˈib jotjäjtëdë. Mä ojts yajmëgäjpxtë pënaty yajmëjwindëkëyandëbë Diosë tyuunk, ja nmëguˈukˈäjtëm jyënany: “Tuˈugë tsyofeer kyaj mbäät twiˈtminy twiˈtxëpyë kyarrë pën kyaj jawyiin dyajˈyoˈoytsyoony. Nanduˈun ëtsäjtëm, kyaj mbäädë Jesus xytyuˈumoˈoyëm pën kyaj nduˈunëmë mëjää ets nduˈuntsondakëm diˈib të nduknibëjtakëm”.a Choong Keon mëdë Julie, duˈun tjäˈäwëdë extëm yëˈë jyawë yajmëgäjpxtëp. Mä tyäˈädë asamblee, ta nanduˈun yaˈentrebistaräjttë tuˈugë kasäädë jäˈäy diˈibë nety tuundëp misioneerë Taiwán, ets tnimaytyaktë ko jyantsy tyukxondaktëbë Diosë tyuunk ets ko kajaanëmë tuunk. Choong Keon mëdë Julie, ta tjäˈäwëdë ko yëˈë jatëgok yajmëgäjpxtëp.

Julie jyënaˈany: “Ko ja asamblee nyajxy, tajëtsë Jyobaa nmënuˈkxtaktë parëts xymyoˈoytyëdë jotmëkˈäjtënë etsëts nëjkxtët Taiwán”. Ta yˈakjënäˈäny: “Per duˈunyëmtsë nety ntsëˈëgëdë. Duˈunëts njäˈäwëdë extëmxyëpts tim ogäˈän ngubutëdë kom nëëjoty”. Tuˈugë tekstë diˈib pudëjkëdë yëˈë Eclesiastés 11:4: “Diˈib jeˈeyë yˈijxy tyuumpy ja poj kyaj nyiˈibäˈäny; ets diˈib jeˈeyë yˈijxypyë yaak yoots kyaj dyajpëdëˈëgäˈänyë kyojy pyëjtaˈaky”. Choong Keon jyënaˈany: “Kyajëts jeˈeyë nˈijx njäˈäwëdë, nbëjtaktëtsë nwinmäˈäny parëts niˈibäˈän ngojäˈändë etsëts nyajpëdëˈëgäˈändë ja nbëjtaˈaky”. ¿Ti tyuundë? Janääm jatsojk tmënuˈkxtaktë Jyobaa, ojts tkäjpxtë mä yajnimaytyäˈäktë misioneerë, ttuknigajxtë correo pënaty tuundëp Taiwán, ta ttoˈktë kyarrë ets tijaty myëdäjttëp jyënoty tyëgoty. Ko nyajxy tëgëk poˈo mä tyuunë asamblee, tapë nety yajpatnëdë Taiwán.

TTUKXONDÄˈÄKTË NIˈIGYË MÄ KYÄJPXWÄˈKXTË

Tyam, ja 100 naxyë nmëguˈukˈäjtëm diˈib tsoˈondëp wiink paˈis, tyundë Taiwán mä tyëgoyˈatyë naybyudëkë. Tap diˈib tsoˈondëp Australia, Canadá, Corea, España, Estados Unidos, Francia, Gran Bretaña ets Japón, jaa jyëmëjtëty 21 axtë 73. Ets 50 naxy, yëˈë toˈoxyˈënäˈk. ¿Ti të pyudëkëdë parë të nyëjkxtë Dios mëduumbë wiink paˈis? Min nˈokˈijxëm.

Laura, diˈib tuump prekursoora ets tsyoony Canadá, jap tyam tyuny Taiwán. Myäjk jëmëjtëp kyaj nety ttukxondaˈaky ko kyäjpxwaˈkxy. Jyënaˈany: “Jeˈeyëts ijty nëjkxy tuk ratë käjpxwäˈkxpë ets kyajts ndukxondaˈaky”. Per ta ja myëtnaymyaabëty diˈib Canadá wyoojëdë tuˈuk poˈo Nëwinm. Laura jyënaˈany: “Jaanëmëts ndukxondaky, kojëts jekyë tiempë nyajnäjxy mäjëts ngäjpxwaˈkxy. Ets jantsy oyëts nnayjäˈäwë, ¡kyajtsë nety duˈun ndimwinmay!”.

Ko Laura jyëmbijty Canadá, ta ojts nyijkxy mä tuˈugë naymyujkën diˈib wiink ayuk. Ta tniˈëxpëjkë chino, ets tuk tiempë tyuuny mä tuˈugë grupë diˈib käjpxtëp chino. Ta tpëjtakyë wyinmäˈäny parë nyëjkxäˈäny Taiwán ets septiembrë 2008, ta ojts nyijkxy. Laura jyënaˈany: “Ja nyajxy naa tuk jëmëjtën parëts ojts nˈijxwëˈëmy. Per tyam kyajts nekywyinmay njëmbitäˈäny Canadá”. ¿Wiˈix nyayjawëty ko kyäjpxwaˈkxy? Jyënaˈany: “Njantsy tyukxondakypyëts. Kojëts nˈixy wiˈix tuˈugë jäˈäy dyajtëgatsyë jyukyˈäjtën mët ko tˈixyˈatyë Jyobaa... ¡yëˈë diˈibëts niˈigyë xyajxondakp! Ets yä Taiwán, nbatypyëtsë jotkujkˈäjtën kojëtsë jäˈäy nbudëkë”.

TSIPTAKP NJÄJTËM TUˈUGË AYUK

Brian mëdë Michelle, ja jyëmëjtëty naxy 30 ets jap tsyoondë Estados Unidos, tyuktujk jëmëjtëp ojts nyëjkxtë Taiwán. Tim jawyiin wyinmääytyë ko kyaj nëgoo jäˈäy tpudëkëdë. Per ta tuˈugë misioneerë diˈib jeky kujk Dios mëduunë, yˈanmääyë: “Oy jeˈeyë tuˈugë trataadë xykyëyaktët, jamyatstë ko waˈanë jäˈäy apenënëm tmëdoy pënën Jyobaa. ¡Pääty diˈib mduundëp kajaa tsyobääty!”. Tyäˈädë yëˈë pudëjkëdë parë kyaj yˈëxtëkëwäˈktë. Jatuˈugë nmëguˈukˈäjtëm yˈanmääyëdë: “Parë kyaj mˈëxtëkëwäˈäktët, kyaj xyˈixtët nuˈun xyjattë chino tuˈuk tuˈugë xëë, ixtë nuˈun xyjattë koogoo tyunyëtyë asamblee”. Ets duˈun ttuundë. Tyam jantsy oy tyundë prekursoor.

¿Ti mbäät mbudëkëty parë xyjatëdë wiink ayuk? Ixyˈat ja paˈis mä xyjatsojkënyëˈaty mnëjkxäˈäny. Nëjkx mä ja naymyujkën, yajnaxë mdiempë mët ja nmëguˈukˈäjtëm ets jamyëdattë mä kyäjpxwäˈkxtë. Brian jyënaˈany: “Ko këˈëm xyˈixët wiˈix mayë jäˈäy tˈoymyëdowdë Diosë yˈayuk ets ko xyjawët ko mtsojkëdëbë nmëguˈukˈäjtëm, yëˈë mbudëkëyanëp parë mnëjkxët wiink paˈis”.

¿WIˈIX TPÄÄTTË MYEENY SYENTÄÄBË?

Näägë prekursoorëty diˈib të nyëjkxtë Taiwán, yëˈë jäˈäy tyukniˈˈijxëdëbë inglés parë tpäättë myeeny syentääbë. Kristin mëdë Michelle äjkx toˈktëp. Kristin jyënaˈany: “Ninäˈänëmtsë nety ngaˈäjkxtooky, per yëˈëts xypyudëjkëdëp parëts nˈittë mä tyäˈädë paˈis”. Ok, ta tpaty kanäägë jäˈäy diˈib xëmë yajtoˈkëp. Kom jeˈeyë tukujkxyëë tyundë parë tpäättë myeeny syentääbë, ta tmëdattë tiempë parë ttundët diˈib mas jëjpˈam: tyundët prekursoor parë jäˈäy dyaˈëxpëktë.

“TUKXONDÄˈÄK MIENTRËS MJÄˈTY MÄ TË XYTYUKNIWINMAYË”

William mëdë Jennifer, diˈib Estados Unidos, jyëxtujk jëmëjtëp jyäjttë Taiwán. William jyënaˈany: “Mbäät nmëˈanuˈkxëm ko njäjtëmë wiink ayuk, nduˈunëm prekursoor, nikëjxmˈäjtëm ja naymyujkën etsë net nduˈun nˈayoˈojëm”. ¿Ti pudëjkëdëp parë yˈittë agujk jotkujk ets ttundët tijaty nyikëjxmˈäjttëp? Ko tpëjtäˈäktë wyinmäˈäny parë ttunäˈändë diˈib mbäät tmëmadäˈäktë. Extëm ko tjäjttë chino nuˈun myadäˈäktë. Pääty kyaj yˈëxtëkëwäˈktë ko tjäˈäwëdë ko kyaj tnekyjattë.

William jyamyejtsypy ko duˈun ojts kyäjpxwijˈyëty tuˈugë sirkuitë: “Tukxondäˈäk mientrës mjäˈty mä të xytyukniwinmayë”. Diˈib myaytyäˈägan, yëˈë ko tsojkëp ndukxondakëm tijaty nduˈunëm mientrës njäjtëm mä të ndukniwinmäˈäyëm. William jyënaˈany ko tyäˈädë käjpxwijën yëˈë pudëjkëdë parë ojts tˈijxwëˈëmdë wiˈix tijaty yajtunët, kyupëjk wiˈix tyuˈumooyëdë pënaty nyikëjxmˈäjttëbë tuunk ets kyaj tijaty ttuuny extëmë nety të tˈijxwëˈëmy parë yˈoybyëtsëmët tijaty tyuun mä ja paˈis. Yˈakjënäˈäny: “Ets ja käjpxwijënë nan yëˈëjëts xypyudëjkëdë parëts njuˈttë tiempë etsëts ndukxondaktë ja isla diˈib jantsy tsuj”.

Megan, diˈib tuump prekursoora ets tsyoony Estados Unidos, tyuumbyë mëjää parë yajxon tkajpxyë chino. Ets tyukxondakypy ko duˈun tyuny, duˈun extëmë William mëdë Jennifer. Sääbëdë domingë xëmë nyijkxy mëdë nmëguˈukˈäjtëm diˈib nëjkxtëp käjpxwäˈkxpë Kaohsiung, tuˈugë mejnybyäˈä diˈib mas mëj jap Taiwán. Ko Megan nyijkxy mä tuˈuk tuˈugë barkë, ta tmëtmaytyaˈagyë äjkxmäjtspë diˈib tsoˈondëp Bangladés, Filipinas, India, Indonesia, Tailandia ets Vanuatu. Yëˈë jyënaˈany: “Komë äjkxmäjtspëty kyaj nëgoo tiempë tmëdattë ko jyäˈttë mä mejnybyäˈä, tajëts netyë nˈawanëdë tuˈugë ëxpëjkën. Ets parëts niˈamukë nyaˈëxpëjktäˈäytyët, tajëts nyajtuˈukmuktë nimäjtaxk o nimëgoxk”. ¿Ets jam kujk tjatyë chino? Megan jyënaˈany: “Njajataambyëts pojënë, per kyaj mbäät, tajëts njamyetsy extëmëts xyˈanmääy tuˈugë nmëguˈukˈäjtëm: Pën tuˈugë jäˈäy tyuumbyë mëjää, Jyobaa pudëkëyanëp”.

TYUNDË TOˈOXYˈËNÄˈK WIINK PAˈIS

Cathy diˈib Gran Bretaña jawyiin ojts tpayoˈoy diˈibë paˈis kyaj kyutsëˈëgëty parë tuˈugë kiixy. Ko tmënuˈkxtakyë Jyobaa, ta tkejxyë neky mä kanäägë sukursal parë dyajtëëy pën kyaj ja lugäär kyutsëˈëgëty. Ko yaˈˈatsoojëmbijty, ta yajxon wyinmääy ets ttuknibëjtakë nyëjkxäˈäny Taiwán.

Ko netyë Cathy jyëmëjt 31, ta ojts nyijkxy Taiwán mä jëmëjt 2004, ets desde jaa këˈëm nyayˈixyëty. Jyënaˈany: “Nyajtëëwëts kanäägë nmëguˈukˈäjtëm mä yajtoogyë jeˈxy pëky naa kujënaky. Parëts kyaj nëgoo meeny sentääbë nyajtuny”. ¿Ti tyuumpy parë jotkujk nyayjawëty mët tijaty myëdäjtypy? Cathy jyënaˈany: “Nmënuˈkxtakypyëtsë Jyobaa parëts jotkujk nnayjawëdët mët ja käˈäy ukën diˈibëts xymyoopy, oy naa adëyë, ets mët ja wit xox diˈibëts nbëjtakypy, oy naa kujënaky. Etsë Jyobaa yˈatsoojëmbijtypyëtsë nuˈkxtakën. Yëˈëts xypyudëjkëp parë nˈixët tijatyëts nyajtëgoyˈajtypy ets jotkujkëts xyajnayjawëty oyëts ngamëdaty tukëˈëyë diˈibëts njatsejpy”. Ta yˈakjënaˈany: “Jotkujkëts nnayjawëty extëmëts njukyˈaty, pes yëˈëts xypyudëjkëp parëts aduˈugë Jyobaa nmëduny”.

Per ko adëyë jyukyˈaty, kyaj yëˈë tˈandijy ko kyaj jotkujk yajpääty. Cathy jyënaˈany: “Yää ta mayë jäˈäy diˈib yˈaxäjëdëbë oybyë ayuk. Ets yëˈëts ndukxondakypy”. Ko jyajty mä tuˈugë siudad diˈib Taiwán, jeˈeyë nety majtskë naymyujkën diˈib chino, ets tyam wyinˈaty jëxtujk. Cathy yˈakjënäˈäny: “Kojëts këˈëm nˈixy wiˈix nyimayë Dios mëduumbë ets kojëts nDiosmëduny, yëˈëts xyajxondakp tuˈuk tuˈugë xëë”.

“AXTË ËJTS MBÄÄDËTS NDUNY”

¿Ti tyam tyuundëbë Choong Keon mëdë Julie diˈib të yˈokˈyajmaytyakpë? Choong Keon wyinmääy ko kyaj nety mbäät nëgoo tpudëkë ja naymyujkën mët ko kyaj oy tkajpxyë chino. Per ja nmëguˈukˈäjtëm diˈib mä ja lugäär kyaj duˈun wyinmääytyë. Yëˈë jyënaˈany: “Ko ja naymyujkën ojts nyaywyaˈkxyëty, kanäk pëkyëtsë tuunk nyajtuknipëjky, extëm diˈib pyudëjkëbë mëjjäˈäy. Tajëts nˈijxy ko jamëtsë nduny mä tyëgoyˈatyë naybyudëkë”. Ta yˈakjënäˈäny: “¡Jantsy oyëts nnayjäˈäwë ko axtë ëjts mbäädëts nduny ets ko mbäädëts nbudëkë ja nmëguˈuktëjk!”. Tyamë Choong Keon tyuny mëjjäˈäy. ¿Ets wiˈix wyinmayë Julie? Jyënaˈany: “Ninäˈänëmtsë nety duˈun nganayjawëdë jotkujk. Të nmindëts parëtsë jäˈäy nbudëkëyäˈändë, per yëˈëts të xypyudëkëdë. Kyajnëmtsë nety duˈun ndimnayjawëdë. ¡Nmooytyëbëtsë dyoskujuyëmë Jyobaa kojëts yä xyajtundë!”

¿Jam xytyimˈyajkëxanë mˈëxpëjkënë mä eskuelë ets xywyinmay ti mdunaampy mä mjukyˈäjtën? ¿Mnaytyuˈukˈäjtp ets mdunäämp niˈigyë mä Diosë kyäjpn? ¿Mtsojkënyëˈäjtypy etsë mfamilyë kyëktëkëdë myëbëjkën ko tjamyatsët wiˈix mDiosmëduny? ¿Të myajjubilaräjnë ets mbäädë netë mjukyˈäjtën xyajtuny parë xypyudëkëdë wiinkpë? Ta kanäägë lugäär mä tyëgoyˈatyë naybyudëkë parë myukët ja pëjktaˈaky. Kajaa xyˈaxäjëyaˈanyë kunuˈkxën pën myajmëjwindëjkëbë Diosë tyuunk ets pën mnëjkxp mä tuˈugë lugäär mä tyëgoyˈatyë naybyudëkë.