¿Mbäät mnëjkxy Macedonia?
1. ¿Tiko Pablo mëdë myëguˈuktëjk ojts nyëjkxtë Macedonia?
1 Mä jëmëjt 49, apostëlë Pablo tsyoˈony Antioquía de Siria, parë tyuˈudëjkë mä ja myëmajtskˈokpë byäjë, jamë nety nyëjkxäˈäny Éfeso ets mä ja yˈit nyaxwinyëdë Asia Menor. Per mët yëˈëgyëjxmë espiritë santë yaˈˈanmääy: “Min Masedonyë”. Pablo mët ja myëguˈuktëjk ojts tkupëktë ets jantsy jotkujk ojts nyayjawëdë ko ojts dyajnaxkëdäˈäktë ja tim jawyiimbë naymyujkën jam Macedonia (Apos. 16:9, 10; 17:1, 2, 4). Tyam, mä nyajmujkëm ja pëjtaˈaky nan tëgoyˈäjtpë tuumbë abëtsemy nyaxwinyëdë (Mat. 9:37, 38). ¿Mnayˈawanëyanëp mä tadë tuunk?
2. ¿Tiko näägë nmëguˈukˈäjtëm wyinmaytyë ko kyaj mbäät nyëjkxtë wiink paˈis?
2 Waˈan xymyëdatyë duˈumbë tsojkënë extëmë apostëlë Pablo parë mdunäˈäny misioneerë, per kyajnëm xytyimtukniwinmayë parë mjantsy nyëjkxët wiink paˈis. Mbäät kyaj mnëjkxy mä Escuela de Galaad mët ko kyajnëmë mjëmëjt tpääty, o jamë mˈuˈunk mˈënäˈk xyˈakˈyajˈyeeky o mët ko mgiixyëty. Waˈan kyaj xytyimwinmaynyëm mnëjkxäˈäny wiink paˈis mët ko tsip mwinmay xyjatëdë wiinkpë ayuk o mët ko kyaj nëgoo meeny sentääbë ets pääty tsip parë jatëgok mjëmbitët mä mbaˈis. Per ko mnuˈkxtäˈägët ets yajxon xypyawinmayët, mbäät xypyekyë kuentë ko mijts mbäät mnëjkxy mä tyëgoyˈatyë naybyudëkë.
3. Parë oy mdunët wiink paˈis, ¿tiko kyaj tyimjëjpˈamëty ets xynyiˈëxpëkët parë mdunët misioneerë?
3 ¿Jëjpˈamdaa niˈëxpëjkëm parë nduˈunëm misioneerë? ¿Ti diˈib pudëjkë Pablo mët ja myëguˈuktëjk parë yˈoybyëtseemy tijaty tyuundë? Yëˈë ko tmëbëjktë Jyobaa ets ja yˈespiritë santë (2 Kor. 3:1-5). Pääty, oy xykyaniˈëxpëkët parë mdunët misioneerë, mbäät mëjwiin kajaa mduny ko mnëjkxët wiink paˈis. Jamyats nanduˈun ko diˈib kajaa mbudëkëyanëp, yëˈë mä Yajniˈëxpëkë Diosë Tyuunk ets nanduˈun mä Yajniˈëxpëkë wiˈix ngäjpxwäˈkxëm. Ets pën të xytyukniwinmayë mnëjkxäˈäny Galaad o mä wiinkpë eskuelë, ko mnëjkxët wiink lugäär ta ogäˈän xynyijawët wiˈixën yˈixëtyë tadë tuunk ets yëˈë nëjkx mbudëkëty ko nety xypyaaty ja kursë.
4. ¿Tiko mëjjäˈäytyëjk kyaj mbäät wyinmaytyët ko kyaj mbäät nyëjkxët käjpxwäˈkxpë wiink paˈis?
4 Pënaty të myëjjäˈäyëndë. Nmëguˈukˈäjtëm diˈib tam myëjjäˈäyëndë ets diˈib jantsy oy Dios mëduundëp ets oy mëk yajpäättë, mbäät mëjwiin kajaa tyundë ko nyëjkxtët wiink paˈis mä tyëgoyˈatyë käjpxwäˈkxpë. Ets mijts, ¿jeˈeyë mëjjuy mˈijnë? Ta näägë nmëguˈukˈäjtëm diˈib kyaj yˈoktuunë jeˈeyë mëjjuy yˈijnë ets mëdë tadë meeny diˈib wanaty yˈaxäjëp tyukpattëp yajxon ko yˈittë mä paˈis diˈib kyaj nëgoo myëkjäˈäyëty, per tapë doktoor oyatypyë ets kyaj nëgoo tijaty tsyooxëty extëm mä ja pyaˈis.
5. Nimaytyäˈäk ja nmëguˈukˈäjtëmë yˈeksperiensyë diˈib ojts nyijkxy wiink paˈis.
5 Tuˈugë nmëguˈukˈäjtëm diˈib jubilaadë ets tyuny mëjjäˈäy mä naymyujkën ets prekusoor, ojts nyijkxy mä tuˈugë lugäär diˈib Asia mä mayë jäˈäy jyäˈttë diˈib tsoˈondëp wiink paˈis, parë tpudëkëyaˈany ja nidaxtujkpë käjpxwäˈkxpë diˈib jap tuundëp, yëˈko jyajtypyë inglés. Mä tadë lugäär ja jap yajpäättë 30,000 jäˈäy diˈib kyäjpxtëbë inglés. Ets ko nyajxy majtsk jëmëjt ja nety 50 jäˈäy tyuˈukmuktë. Tyäˈädë nmëguˈukˈäjtëm jyënaˈany: “Mëjwiin kajaajëts nyajkunuˈkxy kojëts ojts nëjkxy mä tyäˈädë lugäär ets tiempë tsojkëp parëts nnimaytyaktäˈäyët”.
6. Nimaytyäˈägë yˈeksperiensyë tuˈugë kiixyë diˈib ojts nyijkxy wiink paˈis mä nety tyëgoyˈatyë käjpxwäˈkxpë.
6 Toxytyëjk diˈib kyajnëm pyëktë. Jyobaa mëjwiin kajaa dyajtunyë toxytyëjkëty parë tkäjpxwäˈkxtë ja oybyë ayuk mä tyëgoyˈatyë naybyudëkë (Sal. 68:11). Tuˈugë kiixy pyëjtakë wyinmäˈäny parë nyëjkxäˈäny wiink paˈis ets dyajmëjwindëkëyaˈanyë Diosë tyuunk, per ja tyääk tyeety kyaj kyaxanëdë mët ko myëmay myëdäjëdë. Pääty ja kiixy ojts twinˈixy tuˈugë paˈis mä kyaj jyaˈˈatyë jotmay mëdë gobiernë ets mä kyaj yˈamääytyaˈagyë meeny sentääbë, ta ojts tkexy tuˈugë neky Betel, mä yajtukmëtmaytyaky tijaty mbäät pyudëkëty. Nuˈun yˈijty tëdujk jëmëjt mä tadë paˈis mëjwiin kajaa ojts tˈaxäjë kunuˈkxën. Yëˈë tnimaytyaˈaky: “Mätsë nbaˈis kyajtsë nety nëgoo pën nyaˈëxpeky, per kojëts ojts nëjkxy mä tyëgoyˈatyë naybyudëkë nimayëts nbaty pënëts nyaˈëxpëkëp ets niˈigyëts ojts njaty wiˈixëtsë jäˈäy nyaˈëxpëkët”.
7. Nimaytyäˈäk ja familyë yˈeksperiensyë diˈib ojts nyëjkxtë wiink paˈis.
7 Familyë. Pën jamë mˈuˈunk mˈënäˈk, waˈan mwinmay ko kyaj mbäät mnëjkxy wiink paˈis ëwäˈkx käjpxwäˈkxpë. Tuˈugë nmëguˈukˈäjtëm diˈib nimajtskë yˈuˈunk, tuˈugë jyëmëjt tuktujk ets jatuˈuk mäjk ojts nyëjkxtë parë tˈijxmatsäˈändë. Ja uˈunktääk jyënaˈany: “Jantsy agujk jotkujkëts nayjawëdë kojëtsë nˈuˈunk nˈënäˈk yä të yaaktë, pes duˈun të nyaymyayëdë mëdë misioneerëty ets diˈib tuundëp prekusoor espesial. Duˈunë duˈun, mëjwiin kajaa nbatëmë kunuˈkxën ko nduˈunëm mä tyëgoyˈatyë käjpxwäˈkxpë”.
8. ¿Mbäädaa wiink paˈis nduˈunëm oy ngajäjtëmë wiinkpë ayuk? Nimaytyäˈäk.
8 ¿Tsip xyjawë wiink ayuk? ¿Mtsiptakxëp xyjatëdë wiinkpë ayuk? Mbäät jyaˈˈatyë paˈis diˈib nanduˈun käjpxtëp extëm mijts mä tyëgoyˈatyë käjpxwäˈkxpë. Tuˈugë kasäädë jäˈäy diˈibë inglés kyäjpxtëp ojts nyëjkxtë mä tuˈugë paˈis mä jäˈäy tkäjpxtë amxan, per mä tadë paˈis may jam tsyëënëdë diˈib kyäjpxtëbë inglés. Betel të netyë tyuknigaxëdë tuˈugë listë mä myiindäˈäy kujayë ja naymyujkën diˈib kyäjpxtëbë inglés mä tyëgoyˈatyë käjpxwäˈkxpë. Tyäˈädë nmëguˈukˈäjtëm ojts twinˈixtë tuˈuk ja naymyujkën ets ta yˈojtstë majtskˈok. Ta jyëmbijttë mä tyëjk, ets tpuwijtstë wanaty nuˈun dyajtundë ja meeny sentääbë poˈo boˈo ets tnikoonbajttë tuk jëmëjt. Ko ojts tsyoonanëdë, ta ja nmëguˈukˈäjtëm diˈib jap tsënääytyëp mä ja paˈis tˈëxtääytyë tuˈugë kuartë diˈib kyaj nëgoo tsooxë yaˈˈajuytyuky.
9, 10. ¿Ti diˈib mbäät tniwinmayë pënaty të tnikaˈaktë pyaˈis, ets tiko?
9 Diˈib nëjkxtëp wiink paˈis tsënaabyë. ¿Kyajnëmë nety xynyijawë Diosë yˈayuk ko mtsoˈony mä mˈit mlugäär? Waˈan jam tyëgoyˈaty pën ja pëjtaˈaky yajmukëp. ¿Të xynyiwinmayë parë jatëgok mjëmbitäˈäny ets jam mgäjpxwäˈkxäˈäny? Waˈan kyaj mtsiptakxëdët parë xypyäädëdë mduunk etsë mjäjtakn extëmë nmëguˈukˈäjtëm diˈib wiink paˈis tsoˈondëp ets seguurë ko mjäjtypy ja mˈayuk. Ets mbäät niˈigyë jäˈäy tmëdooˈitäˈänët ko mijts xymyëtmaytyäˈägët ets kyaj dyuˈunëty ko myëtmaytyäˈägëdët diˈib wiink lugäär tsoˈomp.
10 Tuˈugë yetyëjk diˈib tsoˈon Albania ojts nyijkxy tsënaabyë Italia. Jap ojts tpäätyë tyuunk mä tsooxë yajmëjuy ets ttuknigexyë meeny sentääbë fyamilyë. Ok, ta ojts tnijawë Diosë yˈayuk, ko ja tiempë nyajxy ta ttukniˈˈixëdë yˈayuk albanés tuk grupë prekusoor espesial diˈib Italia diˈibë nety nëjkxandëp käjpxwäˈkxpë mä tadë paˈis. Tyäˈädë nmëguˈukˈäjtëm duˈun tkujäˈäyë: “Ja prekusoorëty jamë nety nyëjkxtë mäjëts ja nˈit nlugäär, jyantsy it jyantsy xyondë oy tkajattë ja ayuk. Ets ëjts ¿titsë nety jam nduumpy Italia? Pes njäjtypyëtsë albanés ets nnijäˈäbëts ja kostumbrë”. Tyäˈädë nmëguˈukˈäjtëm ta tniwinmäˈäyë parë jyëmbitäˈäny mä pyaˈis ets kyäjpxwäˈkxäˈäny. Yëˈë jyënaˈany: “Ninäˈäts axëëk nganayjawëty kojëts nmastutyë nduunk ets ja meeny sentääbë diˈibëtsë nety nbatypy Italia”. Ta yˈakjënäˈäny: “Yä Albania, të nbäätyëtsë mas oybyë nduungëts ets nwinmayëts ko yëˈë tadë tuunk diˈib mas tsobatp ets diˈib yajkypyë jotkujkˈäjtënë winë xëë, ko nmëduˈunëmë Jyobaa amumduˈukjot”.
11, 12. ¿Ti mbäät ttundë pënaty wyinmääytyëp nyëjkxäˈändë wiink paˈis?
11 Wiˈix mbäät ttundë. Mä netyë espiritë santë kyatuˈumoˈoyëdë parë nyëjkxtët Macedonia, Pablo mëdë myëguˈuktëjk jatsoo nety nyëjkxäˈändë mä nyaxwinyëdë Asia, “per ja espiritë santë kyaj tkupejky”, ta pyatëjkëdë anikëjxytsyoo (Apos. 16:6). Ko nety jam jyäˈtanëdë Bitinia, ta Jesus yajtuˈudujkëdë (Apos. 16:7). Tyam nanduˈunë Jyobaa tˈixy wiˈix ngäjpxwäˈkxëm mët yëˈëgyëjxmë yˈUˈunk (Mat. 28:20). Pääty, pën mwinmaapy mnëjkxäˈäny wiink paˈis, mënuˈkxtäˈägë Jyobaa parë yëˈë mduˈumoˈoyëdët (Luk. 14:28-30; Sant. 1:5; ixë rekuäädrë “¿Wiˈixëts nnijawët pën mä ja paˈis mäjëts nëjkxäˈäny yajtëgoyˈajtypyë naybyudëkë?”).
12 Tukmëtmaytyäˈägë mëjjäˈäytyëjk diˈib mä naymyujkën o wiinkpë nmëguˈukˈäjtëm diˈib mbäät mbudëkëty, anëëmë ti diˈib mdukniwinmäˈäyëp ets yajtëw wiˈix wyinmaytyë (Pro. 11:14; 15:22). Käjpxë ëxpëjkpajn mä tnimaytyaˈaky wiˈix mbäät mDiosmëduny wiink paˈis ets payoˈoy wiˈixë tadë paˈis yˈixëty mä mnëjkxäˈäny. Mbäät axtë tuk tiempë nëjkx jap mˈity. Ets pën mjantsy nyëjkxäämp, ta xykyaxët tuˈugë neky Betel diˈib yajpatp mä tadë paˈis parë net yëˈë mduˈumoˈoyëdët. Ëxtäˈäyë direksion mä Anuario diˈib mas jemy. Per jawyiin xymyoˈoyëdë mëjjäˈäytyëjk diˈib mä mnaymyujkën mä xykyakexynyëm Betel parë jap tijaty tˈakkujayët (ixë liibrë Organizados para hacer la voluntad de Jehová, pajina 111 etsë 112).
13. ¿Wiˈix mbäät mbudëkëtyë Betel, per tijaty mbäät këˈëm xyˈijxtäˈäy?
13 Betel mbudëkëyanëp parë xynyijawët wiˈixë tadë paˈis etsë net xywyimayët pën mnëjkxäämp o kyaj. Per kyaj dyakäˈäny ni ti neky parë mdëkët mä ja paˈis extëmë visa o permisë parë jap mtsënääytyaknbëkët, ets nan kyaj myajmoˈoyaˈany tuˈugë neky mä yajnigäjpxët ko të myajkexy o ko myajpudëkëyäämp. Nan kyaj yaˈëxtäˈäyaˈanyë mjäjtakn. Mä mgatsoonyëm këˈëm xyˈijxtäˈäyët wiˈix mnëjkxäˈäny. Nan mijts mbatëp parë xyajnidëwët wiˈix mbäät myajmoˈoy ja visa ets ja permisë parë mdunët. Pënaty nëjkxandëp wiink paˈis oy ko këˈëm dyaˈoyëdët ja nyeky ets këˈëm tˈixtët wiˈix tijaty ttunäˈändë (Gal. 6:5).
14. ¿Ti mbäät xytyuny pën mnëjkxäämp mä paˈis mä tsyiptaˈaky ngäjpxwäˈkxëm?
14 Paˈis mä tsyiptaˈaky ngäjpxwäˈkxëm. Mä näägë paˈis, kyaj nmëguˈukˈäjtëm ttuunëdë Diosë tyuunk ijxnidëˈkxy (Mat. 10:16). Per näˈäty, mbäät ja nmëguˈukˈäjtëm diˈib jap nëjkxtëp ttundë ti diˈib niˈigyë yajnigëxëˈëgëdëp ja Dios mëduumbëty ets axtë mbäät dyajtëkëdë jotmayoty ja nmëguˈukˈäjtëm, oyë nety duˈun tkatsoktë. Pën mwinmaapy mnëjkxäˈäny mä duˈumbë paˈis, jäˈäy tuˈugë neky ets xymyoˈoyëdë mëjjäˈäytyëjk parë tkaxtët Betel diˈib yajpatp mä mbaˈis.
15. Pën kyaj mbäät mnëjkxy wiink paˈis, ¿wiˈix mbäät niˈigyë xyajmëjwindëkë Diosë tyuunk?
15 ¿Ets pën kyaj mbäät mnëjkxy? Pën kyaj mbäät mnëjkxy wiink paˈis, kyaj axëëk mnayjawëdët. Waˈan jyaˈˈatyë wiinkpë “tuˈu” parë xytyuunëdë Diosë tyuunk (1 Kor. 16:8, 9). Waˈan ja sirkuitë tnijawë diˈibë naymyujkën yajtëgoyˈajtypyë naybyudëkë diˈib naa wingon wëˈëmp. Ets mbäät mduny mä tuˈugë naymyujkën o tuˈugë grupë diˈib kyäjpxtëbë wiink ayuk. O axtë mbäät niˈigyë xyajmëjwindëkë Diosë tyuunk japyë mä mnaymyujkën. Jamyats ko oy wiˈix myaˈix myajpäädët, diˈib mas jëjpˈam yëˈë ko Jyobaa xymyëdunët amumduˈukjot (Kol. 3:23).
16. Ko tuˈugë nmëguˈukˈäjtëm xyˈanmäˈäyëm ko nyëjkxäˈäny wiink paˈis, ¿wiˈix mbäät nˈanmäˈäyëm?
16 ¿Mˈixyˈajtypy tuˈugë nmëguˈukˈäjtëm diˈib jantsy oy Dios mëduump ets twinmay nyëjkxäˈäny wiink paˈis? Pën mˈixyˈajtypy, pudëkë ets anëëmë parë nyëjkxët. Ko Pablo tsyoˈony Antioquía de Siria, yëˈë nety ja myëdëgëëkpë siudad diˈib nanduˈun mëj, nuˈun ja yˈit nyaxwinyëdë romanë jäˈäyëty (abekyë Roma etsë Alejandría). Seguurë ko ja nmëguˈukˈäjtëm tsyojktëbë nety etsë Pablo pyudëkëdët parë dyaˈˈabëtsëmdët ja it naxwinyëdë. Perë Biiblyë kyaj jyënaˈany ko ja nmëguˈukˈäjtëm tˈanmääytyë Pablo ets wyëˈëmët. Pes yˈijxtë ko tëgoyˈäjtp ja naybyudëkë wiinktsoo, pes winmääytyë ko “ja naxwinyëdë jäˈäyëty yëˈë dëˈën ja kam” (Mat. 13:38).
17. ¿Tiko mbäät ndukniwinmäˈäyëm parë nëjkxëm Macedonia?
17 Pablo mët ja myëguˈuktëjk mëjwiin kajaa ojts yajkunuˈkxtë ko tkupëjktë ets ojts nyëjkxtë Macedonia. Mä Filipos käjpn jam tˈixyˈäjttë Lidia diˈibë Jyobaa yaˈˈawatsxë ja jyot kyorasoon “ko tmëdooˈity diˈibë Pääblë kyajxypy” (Apos. 16:14). Okpawinmay wiˈixë Pablo mëdë myëguˈuktëjk jantsy jotkujk nyayjäˈäwëdë ko ja Lidia mët niˈamukë diˈibë nety tsënääytyëp mä tyëjk nyëbajtääytyë. Ta mayë paˈis mä jäˈäy yajpäättë extëmë Lidia diˈib kyajnëm ttimmëdowdë wiˈixë Diosë yˈAnaˈamën yajnimaytyaˈaky. Pääty pën mijts myaˈˈanmaapy: “Min Masedonyë”, agujk jotkujk nëjkx mnayjawëty ko xypyäädëdë duˈumbë jäˈäy ets ko xypyudëkët.
[Letrë diˈib miimp mä rekuäädrë mä pajina 5]
“¿Wiˈixëts nnijawët pën mä ja paˈis mäjëts nëjkxäˈäny yajtëgoyˈajtypyë naybyudëkë?”
• Ixë Anuario diˈib jemy ets ix näägë jäˈäy pyäädëdë tuˈukpë käjpxwäˈkxpë.
• Yajtunë Índice parë xyˈëxtäˈäyëdë artikulo mä yajnimaytyaˈaky ja paˈis ets ja eksperiensyë.
• Yajtëw ja nmëguˈukˈäjtëm diˈib jam të yˈotstë o diˈib jam të tsyëënëdë mä ja paˈis.
• Pën mgäjpxwäˈkxäämp mgëˈëm ayuk, ëxtäˈäy mäjaty yajnimaytyaˈaky extëm mä Internet, parë xynyijawët pën mä tadë it lugäär nimayë jäˈäy tkäjpxtë mˈayuk.