Diˈib nnayajtëˈëwëm

◼ ¿Mbäät mä Internet ndukmëtmaytyakëmë Diosë yˈayuk diˈib kyaj nˈixyˈäjtëm o nyaˈëxpëjkëm diˈib wiink paˈis?

Näägë nmëguˈukˈäjtëm yajtuundëbë Internet parë jäˈäy tˈawanëdë ets tˈëxpëktëdë Biiblyë diˈib tsënääytyëp wiink paˈis mä kyubokyë Diosë tyuunk o mä kyaj nëgoo Testiigë. Ets näˈäty oy wyimbëtsëmy. Per kujotmay ko nyaymyoˈoyëdë correos electrónicos o ko kyäjpx myaytyäˈäktë mëdë jäˈäy diˈib kyaj tˈixyˈattë. Oy diˈib jyatunandëp, ttuknijawëyäˈändë Diosë yˈayuk ja diˈib oyë jyot kyorasoon, per mbäät tyëkëdë käjpx maytyakpë mëdë jäˈäy diˈib mbäät yajmäˈädëdë o axtë diˈib të ttukpëtsëëmduˈuttë Diosë kyäjpn (1 Kor. 1:19-25; Kol. 2:8). Ets mä lugäär mä kyubokyë Diosë tyuunk, mbäädë kuduunktëjk tˈixtë tijatyë jäˈäy naytyuknijäˈäyëdëp. Tyäˈädë mbäädë net tpëjtaˈaky jotmay jëjpˈam ja nmëguˈukˈäjtëm diˈib tsënääytyëp mä tadë it lugäär. Pääty kyaj yˈoyëty ets mä Internet nˈëxtäˈäyëmë jäˈäy diˈib tsënääytyëp wiink paˈis parë ndukmëtmaytyakëmë oybyë yˈayuk.

Ko muumë jäˈäy ndukmëtmaytyakëmë Diosë yˈayuk diˈib tsoˈomp wiink paˈis, ko jyëmbijnët, kyaj yˈoyëty ets duˈunyëm nbudëjkëm. Per mbäät ndukniˈˈijxëm wiˈix tyunyë jw.org parë tpäädëdë ëxpëjkpajn o ja sukursal diˈib yajpatp mä pyaˈis. Pën mä tsyëënë japë Tëjk mä nmëguˈukˈäjtëm yˈëxpëktë, mbäät nˈanmäˈäyëm parë nyëjkxët. Ets pën tsyejpy parë tuˈugë Testiigë nyinëjkxëdët, mbäät nyajtëˈëwëm mä tsyëënë pën nyigäjpxaampy. Ets ja sukursal diˈib nyikëjxmˈäjtypy ja pyaˈis, yëˈë diˈib mbäät pyudëkëty, pes nyijäˈäwëp yajxon wiˈix ja lugäär (ix Wiˈix nduˈunëmë Diosë Tyuunk diˈib junië 2014, pajina 7, ets diˈib nobiembrë 2011, pajina 2).

Pën ja jäˈäy diˈib kanäkˈok kujk nguˈijxëm nëjkxnëp wiink paˈis, o pën yëˈë nyaˈëxpëjkëm tuˈugë jäˈäy diˈib tsënaapy wiink paˈis ets jeˈeyë nˈixyˈäjtëm mä Internet, duˈun mbäät nduˈunëm extëm të yajnigajpxy mä parrafo 2. Per mbäät duˈunyëm nˈakpudëjkëm axtë koonëm tuˈugë nmëguˈukˈäjtëm nyinëjkxëdët diˈib mä yˈit lyugäär. Pën ja jäˈäy jap tsyëënë mä tuˈugë paˈis mä kyubokyë Diosë tyuunk, tsojkëp mëk nnaygyuentˈäjtëm pën nmaytyäˈägäˈänëmë Biiblyë ko nnijäˈäyëm, ko nmëgäjpxëm mä telefënë o ko nduknigajxëmë mensajes electrónicos (Mat. 10:16).