Diˈib nnayajtëˈëwëm

◼ ¿Pënaty mbäät ttukjayëdë cupón o tˈamdowdë mä Internet ja ëxpëjkpajn o parë yajninëjkxët?

Mayë ëxpëjkpajn myëmiimpy tuˈugë cupón parë jäˈäy tˈamdowëdë ëxpëjkpajn o parë nyinëjkxëdët tuˈugë Testiigë. Nan mbäät tˈamdowdë mä Internet www.watchtower.org tuˈugë ëxpëjkën. Mët yëˈëgyëjxmë tyäˈädë, mayë jäˈäy tnijawëdë tëyˈäjtën. Per taaˈäjtpë jotmay ko nmëguˈukˈäjtëm ttukjayëdë ets tpëjtäˈäktë jyiiky myëguˈugë xyëë o myëtnaymyaayëbë.

Extëm nˈokpëjtakëm, ko näägë jäˈäy yajtuknigaxtë ëxpëjkpajn diˈib kyaj të tˈamdowdë, ta jyotˈambëktë mët ko tjawëdë ko aguanë yajtuktunäˈäny diˈib kyaj ttseky ets ko yajmëdäjtp tuˈugë listë mä jäˈäyë dyireksion yajkujayë. Ets nan axëëk ja nmëguˈukˈäjtëm nyayjawëdë ko tninëjkxtë jäˈäy, ets ja jäˈäy jyotˈambëjktë mët ko kyaj të tˈamdoy yajninëjkxët. Pääty, këˈëm mbäät ja jäˈäy ttukjayë cupón o tˈamdowët mä Internet ja ëxpëjkpajn o parë yajninëjkxët, nituˈugë nmëguˈukˈäjtëm mbäät tkatukjayë ets tpëjtäˈägëdë wiink jäˈäyë xyëë. Ko jam Betel yajpekyë kuentë ko yëˈë tuˈugë nmëguˈukˈäjtëm të ttukjayë, kyaj yajmëjpëjtaˈaky.

Pääty, ¿ti mbäät xytyuny pën mtsejpy yˈëxpëkët tuˈugë mjiiky mmëguˈuk o tuˈugë jäˈäy diˈib mˈixyˈajtypy? Pën mmoˈoyaampy tuˈugë ëxpëjkpajn, ¿tiko mijts këˈëm xykyatuknigexy extëm tuˈugë regalë? Ets pën tuˈugë jäˈäy tsyojkënyëˈajtypy ja tëyˈäjtën ets tsyejpy yajninëjkxët, per kyaj xynyijawë pënaty tuump mëjjäˈäy diˈib patëbë tadë territooryë, ta xytyukjayëdë Sírvase visitar (S-43-S) ets xymyoˈoyëdë sekretaaryë diˈib tuump mä mnaymyujkën, yëˈë jawyiin yˈixëp parë net tkaxët Betel. Ja tuk peky, kyaj xykyaxëdë neky jam Betel mëdë jäˈäyë xyëë diˈib ijtp pujxndëgoty, mä nyiwij nyikajtë diˈibë bisië myëdäjttëp o mä tuˈugë hospital. Mas oy ko xyˈanëëmët ja jäˈäy parë myaytyäˈägët mëdë nmëguˈukˈäjtëm diˈib jap tëjkëdëp o yëˈë këˈëm tkaxët ja neky jam Betel.