Nyijäˈäwëbë nety ja nëˈë tuˈu

GUY HOLLIS PIERCE, diˈibë nety nanduˈun tuump mä Diˈib wyooyoˈoytyëbë Jyobaa tyestiigëty, ja yˈoˈky 18 äämbë marsë ko netyë jyëmëjt 79. Ets kom yëˈë netyë Jesusë myëgaˈax, ta jyukypyejky jam tsäjpotm (Eb. 2:10-12; 1 Ped. 3:18, Traducción del Nuevo Mundo).

Guy Pierce jap myaxuˈunkˈäjty Auburn (California, Estados Unidos) 6 äämbë nobiembrë mä jëmëjt 1934, ets ja nyëbejty 1955. Ja pyejky mëdë Penny mä jëmëjt 1977, ets niganäägë yˈuˈunk ojts dyajˈyaaktë. Pääty jyaˈayˈajty extëmë uˈunkteety. Ets 1982, ta tyuundëjkë prekursoor mëdë nyëdoˈoxy. Mä jëmëjt 1986, ta tyuundëjkëdë sirkuitë jap Estados Unidos, mäjktuˈuk jëmëjt duˈun tyuundë.

Mä jëmëjt 1997, ta yajwoodë Betel jap Estados Unidos, ets tyuuny mä Departamento de Servicio. Ets 1998, ta tyuundëjkë mä Komitee diˈib pyudëjkëp Diˈib wyooyoˈoytyëbë Jyobaa tyestiigëty. Ets 2 äämbë oktuubrë mä jëmëjt 1999, ko nety tyunyëty ja reunyonk diˈib jëmëjt jëmëjt yajtuump Estados Unidos, ta ojts yajnigajpxy ko nmëguˈukˈäjtëm Pierce të yajwinˈixy parë nanduˈun tyunët Diˈib wyooyoˈoytyëbë Jyobaa tyestiigëty. Nuˈunë tiempë të yˈaknaxy, të tyuny mä kanäägë komitee extëm mä: de Personal, de Redacción, de Publicación ets de Coordinadores.

Guy Pierce jantsy axiˈik agäjpx ijty jyaˈayˈaty, pääty oypyënëty ojts myëyujˈyëty, oy yëˈëjëty diˈib tsoˈondëp wiink lugäär o diˈib wiˈixëm ja kostumbrë myëdäjttëp. Per diˈib niˈigyë yajtukmëyuj yëˈë ko tmëdäjtyë tsojkën, yˈijty yujy tudaˈaky, twintsëˈkë Jyobaa yˈanaˈamën etsë tyëyˈäjtën ets ko amumduˈukjot tmëbëjkyë Jyobaa. Yëˈë duˈun ijty jyënaˈany ko mbäät kyaj Xëë pyëtsëmy, perë Jyobaa yˈayuk seguurë yˈadëy, tyäˈädë tëyˈäjtën yëˈë diˈib tyuknijawëyan niˈamukë jäˈäy.

Yëˈë nmëguˈukˈäjtëm Pierce yëˈë ijty tuˈugë Dios mëduumbë diˈib kyaj pyoˈkxy. Jantsy tsojk pyëdëˈkojy ets tyuny axtë kootspäät. Ojts jyëdity abëtsemy nyaxwinyëdë parë tpudëjkë nmëguˈukˈäjtëm, ets ninäˈä kyakëxëˈky ko kyaj tiempë tmëdaty parë betelitëty o pënaty amdoojëdë naybyudëkë o käjpxwijën, o pënaty woojëdë parë jeˈeyë mëët xyiˈik xyondët. Oypyënëty ijty tˈagëˈë tˈaxäjë ets mëët nyaymyayëty, ets pënaty ixyˈäjtë kyaj tjäˈäytyëgoytyë wiˈix pyudëjkëdë mëdë Diosë yˈAyuk.

Seguurë ko mëk yajpaˈˈayowäˈäny, paˈˈayowanëbë nyëdoˈoxy, nidëdujkë yˈuˈunk, yˈokˈënäˈk, ets niˈamukë pënaty jäˈäwëdë extëmë tyeety. Ko yˈoˈkyë tyäˈädë nmëguˈukˈäjtëm, ta sääbëdë 22 äämbë marsë 2014, ojts nyaxyë dyiskursë mä Betel diˈib Brooklyn, ets yëˈë yajnäjxë Mark Sanderson, diˈib nanduˈun wyooyoˈobyë Jyobaa tyestiigëty. Kanäk pëky diˈib myaytyak, tuk pëky yëˈë ko nmëguˈukˈäjtëm Pierce jamë nety tˈawixy ja jyukyˈäjtënë tsäjpotm, ets ta ojts tkajpxyë tekstë mä Jesus jyënany: “Mätsë nDeety yˈity, may jam ja tsënääytyakn. [...] Nnejxyëts ëj nˈokˈëxkukë mä miits mˈittët. Es netëts nminët jatëgok es nyajnëjxtëdëts miits es mjikyˈattët mët ëj. Miits mnijäˈädëp mäts nnejxy es mnijäˈädëp ja tuˈu” (Fwank 14:2-4).

Yajpaˈˈayowäämbë nmëguˈukˈäjtëm Pierce. Per xyjotkujkmoˈoyëm ko yëˈë nyijäˈäwëbë nety ja nëˈë tuˈu mä yˈitäˈäny winë xëë winë tiempë.