Yigi yena giswegi mu gukala yi lujingu lu gieshi mu dibuda?

MAMBU MO MENA HOSA BIBLE

Gieshi gwena hadu’o a gwifinga ndanga yi Nzambi kega gu yilemfugila!”​—Luka 11:28, Mbalula ya Nsi-Ntoto ya Mpa.

GUBA DENDULA YIGI MUMWILA YI AYI?

Mu wa dala zola di giediga.​—Baefezo 5:28, 29.

Mu wa gwifa gieshi yi lujidu lu masonga.​—Baefezo 5:33.

Mu wa kala mu ludaninu lu giediga.​—Marko 10:6-9.

DU FEDJI GUGWIGILA GIBENI MAMBU MO MENA HOSA BIBLE?

Giogiogi, Mumwila yi yiguma yadi:

• Nzambi ena mu gishina gi dibuda. Bible dibahosa mbi “kosu dibuda . . . di gasenda jina diodi” gwena Yehowa Nzambi. (Baefezo 3:14, 15) Mu mangogu mega, dibuda diena mumwila Yehowa u gadigangidi. Mumwilegi gwena funu yingi?

  Mu mbandu: Mbi mu dia madongu ma moshi ma mpimbu kega mu nazola gwishiya pila yigi a lambidi, na wa guhula? Gu gigidi, wa guhula mudu ayo u lambidi madongu meni.

  Pila yimoshi kega, mumwila mu gwishiya mambu mo ma guhanganga mbi hadu a jingi mu gieshi mu dibuda, du fe gamba ludwadisu gwena Yehowa, mudu ayo wena mu gishina gi dibuda.​—Kuyantika 2:18-24.

• Nzambi ma gudiyangigisanga mumwila yi ayi. Mabuda ma fedji gugamba jindongishila ji Yehowa, ajo j’eniguhana mu mbuga yi Ndaga yendji. Mumwilegi? “Mumwila ye ma gudiyangigisanga mumwila yi ayi.” (1 Piere 5:6, 7) Yehowa ma gudiyangigisanga mumwila yi mapimbu mayi​—kega jindongishila jendji mu ji gununganga dangu di kima—Bingana 3:5, 6; Yezaya 48:17, 18.