DILONGI 53
Sola mansaga mo ma gusepedisanga Yehowa
Yehowa ena “Nzambi u gieshi.” (1 Timoteo 1:11) Aguzolanga mbi du kadi mu gieshi kega du sepedi mu lujingu. Mbi mu duba senda dangu di guhululuga kega di guhanga mansaga, Yehowa ma gusepelanga. Mu dilongi di, mu dwa dala pila yi du le hangila dangu diedu di guhanga mansaga mu pila yi pimbu—kega yi gusepedisanga Yehowa.
1. Yigi du fe gamba gwishiya dangu di duba sola mansaga ma guhidjishila dangu?
Nsaga jigi wena zola guhidjishila dangu? Hadu ega ena zola guhidjisa dangu o beni gu nzu mu gihani gi konda mudu—mumbandu mumwila mu gudanga muganda, gulaba mijigi, gudala videyo to gwingila mu Internet. Hadu ega a guzolanga guhidjisa dangu yi andugu owu—mumwila mu gudala to gubula balon, gudala mateyatre to guhanga mansaga mega. Kosu nsaga jo ji dwena zola guhidjishila dangu, du fe gamba tegu gwishiya mbi “Fumu ma gugumbulanga nsaga beni.” (Baefezo 5:10) Gwishiya mambu ma gwena mfunu mumwila mansaga mengi mo hadu a guzolanga mwaniowu, mena kala yi mambu mo Yehowa a gumenganga, mumbandu mubulu, pite to yisalu y’apeve a mbi. (Danga Nkunga 11:5.) Gashi yigi yi fe gudusadisa mu gusola mansaga ma pimbu?
Mbi mu duba da gindugu yi hadu’aguzolanga Yehowa, ma gadusadisa mu guhanga mambu ma pimbu kega mu gusola mansaga ma pimbu. Pila yi dugalongugidi mu dilongi 48, “mudu yo u gugandamananga yi hadu’amayela a gugumanga mayela.” Gashi mbi mu duba da gindugu yi hadu o ena konda jidjisa shigu ji Nzambi “du gasuga mbi.”—Bingana 13:20.
2. Mumwilegi du fe konda hidjisa dangu dingi mu mansaga?
Ada mansaga ma duba sola mena gibeni ma pimbu, du fe kala mayela kega gukonda hidjisa dangu dingi mu mansaga beni. Mbi lowu, lō du’akala yi dangu di guhanga mambu ma guhida mfunu. Bible di gudulombanga mu “guhangila dangu [diedu] pimbu gibeni.”—Danga Baefezo 5:15, 16.
WISHIYA KEGA MAMBU MENGI
Dudadi mambu ma du le hanga mu gusola mansaga ma pimbu.
3. Duna mansaga ma mbi
Mumwilegi du fe sola pimbu mansaga medu? Dalenu VIDEYO, gu dima hanenu mamvudu mu miwu mi laba:
Mumwilegi mansaga mo ma gahanganga hadu gu Rome di tunda ma fwanana yi mansaga mega mwaniowu?
Pila yi lesa videyo, dilongi digi Danny a gasendjidi mumwila yi mansaga?
Dangenu Baroma 12:9, gu dima hanenu mvudu mu muwu wu:
Pila yigi verse di dile gugusadisa mu gusola mansaga ma pimbu?
Ndambu yi mambu megi Yehowa a gumenganga? Dangenu Bingana 6:16, 17 kega Bagalatia 5:19-21. Gu dima di gudanga kosu verse, hanenu mvudu mu muwu wu:
Mambu megi u dala mu maverse ma, ma u gudalanga mu mansaga ma yilumbu yedu?
Miwu mio mi le gugusadisa mu gusola mansaga ma pimbu
Dihudi mbi:
Nsaga jigi yahanga? Jena yi mambu mo Yehowa a gumenganga?
Dangu digi yahanga nsaga beni? Mujakanda mbuga yi guhanga mambu ma guhida mfunu?
Y’anani yahanga nsaga beni? Mujapusa mu gu da gindugu yi hadu o ena konda zola Yehowa?
Gwena kala pimbu mu gukala gudadi gibeni yi gihani gio giena gigonsa. Pila yi moshi kega, du fe duna mansaga makima mo ma le kala gigonsa mumwila yi edu
4. Hangila pimbu dangu diayi
Dalenu VIDEYO, gu dima hanenu mvudu mu muwu u laba:
Ada pangi u yala yu’ududala mu videyo lō’agadalanga mansaga ma mbi, yigi yigakedi pashi mumwila yi ye?
Dangenu Bafilipi 1:10, gu dima hanenu mvudu mu muwu wu:
Pila yigi verse di dile gudusadisa mu gwishiya gitesu gi dangu gi du fe hidjisa mu mansaga?
5. Sola mansaga ma pimbu
Mansaga mega lō ma gusepedisanga Yehowa, gashi mansaga mega mu ma gumusepedisanga. Danga Longi 8:15 kega Bafilipi 4:8, gu dima hanenu mvudu mu muwu wu:
Nsaga jigi ji pimbu u guzolanga guhanga?
U le hanga to gudala mansaga ma pimbu ma guhidjishila dangu
HADU EGA ENI GUHOSA MBI: “Lō gwena mbi mu gudala mansaga ma mubulu, mambu ma ufudu to yisalu y’apeve a mbi, mumwila lō yiguhanganga mambu beni.”
Ayi yigi u le hosa?
MU KUFI
Yehowa a guzolanga mbi du sodi, du hangi kega dudadi mansaga ma pimbu.
Mvudugilu
Mansaga megi Akristu a fe duna?
Mumwilegi lō du fe hidjisa dangu dingi mu mansaga?
Mumwilegi u ba zola gusola mansaga mo ma gusepedisanga Yehowa?
DALA KEGA
Dala mbi nani wena yi mukumba wu gusola mansaga mumwila yi ayi.
“Ambangi a Yehowa a gadunisa mafilme, miganda to migunga miega?” (Disolu dio diena mu jw.org)
Dala pila yi u le sola mansaga ma pimbu ma guhidjishila dangu.
“Mansaga mayi ma gukalanga ma pimbu?” (Nzozulu ya Nkengi 15/10/2011)
Mu disolu “M’iganungidi kutu gikalulu gi guduna gugumbula hadu a kulere diega di mwila,” dala mambu ma gapushidi yala u moshi mu guduna mansaga ma mbi.
“Bible mu digusobanga lujingu lu hadu” (Nzozulu ya Nkengi 1/2/2010)
Dala pila mawu mu moshi a gasendjidi luganu lu pimbu dangu di’agabagishidi mbi filme dio di’agadalanga di galesanga yisalu yi ampeve a mbi.