DILONGI 01

Pila yiki Bible di le gugusadisa?

W'adusa mu Papie

Edu’akima mu dweni gudihula miwu mu mambu ma dadila lujingu, mapashi, lufwa kega mafugu magesa. Dwena kala kega yi funu yi lusadisu lu mbongu, mumwila gusumba yima yi dwena yoyi funu yi gukala mu gieshi mu dibuda. Hadu engi a gabagisa mbi, Bible mu diena gu’asadisa mu gusenda mamvudu mu miwu mi funu mi lujingu kega mu dienagu’ahwa mandongishila ma ale hangila kosu gilumbu. U yindula yigi, muwena gumbula mbi Bible di le gugusadisa?

1. Bible diena hana mvudu mu miwu migi?

Bible mu diena hana mamvudu mu miwu mi mifunu: pila yigi lujingu lu gayanjigidi? Luganu lu lujingu lwena yigi? Mumwilegi hadu a pimbu a gudalanga pashi? Yig’iguguminanga mudu mbi maa fwa? Mbi hadu akima mena zola gujinga mu ngemba, mumwilegi yidumba yena yingi? Manu ma gaguma pila yigi mu mafugu magesa? Bible dina dulomba mu gugamba mamvudu mu miwu mi, hadu engi a gagumbula mbi mamvudu ma Bible mena ma gigidi.

2. Pila yigi Bible di le gudusadisa mu gujinga mu gieshi kosu gilumbu?

Bible mu diena guduhwa mandongishila ma pimbu. Mumbandu, mu di gulonganga mabuda mu gujinga gibeni mu gieshi. Mu di gudulesanga mambu ma du le hanga mu dangu di masusi kega pila yi du le sepela yi gisalu giedu. Mu wa longuga mambu mengi mena hosa Bible mumwila yi masolu ma, kega mambu mega mengi dangu di du’abala longuga. Mu wa gumbula gibeni mbi “Masonugu makima [mambu ma agasoniga mu Bible] mena . . . funu.”—2 Timoteo 3:16.

Muganda wu lō uba senda gihani gi Bible. Gashi, mu wa gusadisa mu gudadila ayi beni mambu mo mena hosa Bible. Hohana, duba gulomba mu gudanga ma verse mo mena mu kosu dilongi kega ufwanigishi yi mambu mo ma uba longuga.

WISHIYA KEGA MAMBU MENGI

Dudadi pila yigi Bible diena sadisa hadu engi, pila yigi u le guma gudidanga yi gieshi kega mumwilegi gwena pimbu mu gugumbula mbi mudu agusadishi mu gubagisa Bible.

3. Bible di le gududwadisa

Bible diena nga mwinda wo uba zuma ngolu. Bible di le gudusadisa mu gusenda maluganu ma pimbu kega gudulesa mambu mo ma gahangamana mu mafugu magesa.

Dangenu Nkunga 119:105, gudima hanenu mamvudu mu miwu mi:

Mudu yo u gasonigidi mugunga wu, pila yigi a gadadilanga Bible?
Ayi, pila yiki u gudadilanga Bible?

Mudu mu moshi ena mu guhida mu mbuga yo yena yi mamani mengi mu mbimba yi mema mu piba, u zumishidi brakere diendji mumwila mu gudaala gihani gio gi’ana sa milu.

4. Bible di le hana mamvudu mu miwu miedu

Bible mudigahanini mamvudu mu miwu mi funu mio mi gadihulanga mugonusa mu moshi yanjiga mamvula mengi. Dalenu VIDEYO, gudima hanenu mamvudu mu miwu mi (mangiuvu):

VIDEYO: Lō gubidisa givuvu! (1:48)

Miwu migi mugonusa yu u dudala mu videyo a gadihulanga?
Pila yiki gulonguga Bible gugamusadishidi?

Bible mu diena dulesa mu guhulanga miwu. Dangenu Matayo 7:7, gudima hanenu mvudu mu muwu wu (ngiuvu):

Miwu migi ukwedji mio mi uba zola gusenda mamvudu mu Bible?

5. U le guma gudanga Bible yi gieshi

Hadu engi eni gudanga Bible yi gieshi kega agadisenjila mapimbu. Dalenu VIDEYO, gudima hanenu mamvudu mu miwu mi:

VIDEYO: Gudanga Bible. (2:05)

Pila yigi alengi a dudala mu videyo ena dadila gudanga miganda?
Ada lō’aga zolanga gudanga miganda, mumwilegi a gaguma gusepela gudanga Bible mwaniowu?

Mambu mo mena hosa Bible ma le dubwisa mudjima kega guduhwa givuvu. Dangenu Baroma 15:4, gudima hanenu mvudu mu muwa wu (ngiuvu):

U sepedidi gi weshiya mambu mengi mo mahosa verse di?

6. Hadu ega a le gudusadisa mu gubagisa Bible

Hadu engi’agadaala mbi gudanga Bible o mweni lō gufwana, gwena funu mbi alongugi Bible yi hadu ega. Dangenu Bisalu 8:26-31, gudima hanenu mvudu mu muwa wu (ngiuvu):

Pila yigi du le bagisa Bible?—Dala verse 30 yi 31.

Gimvuga gi mafoto: 1. Filipi yo wena mumwangi sangu ena mu gudendudila mudu wu Etshopi masonugu. 2. Mbangi u Yehowa mu moshi ena mu gulonguga Bible yi mawu mu moshi yi anendji mbadi. — Mudu wu Etshopi a gakedi yi funu yi lusadisu mumwila mu gubagisa mambu ma agadanganga. Mwaniowu kega, hadu engi’agagumbula mbi gwena funu mu gulonguga Bible yi mudu mwega

HADU EGA ENI GUHOSA MBI: “Gulonguga Bible gwena guhidjisa dangu.”

Ayi, yigi u le hosa? Mumwilegi?

MU KUFI

Bible mudiena duhwa mandongishila mumwila yi lujingu lu kosu gilumbu, mu diena guduwa mamvudu mu miwu mi funu, diena dubwisa mudjima kega guduhwa givuvu.