Yigi du fe guhanga mumwila dibundu diedu di sepedishi Nzambi?

Pila yi dudadidi mu dilongi di hida, lō gwena mbi Nzambi ma gusepelanga yi mabundu makima. Ata gio du le gusambila ngangi wedu mu pila yo y’aguzolanga. “lusambu” lwigi to dibundu digi di gumusepedisanga? (Yakobo 1:27) Dudadidi mambu mo magulonganga Bible.

1. Malongi ma dibundu diedu ma fe gaduga kwiyi?

Malongi ma dibundu diedu ma fe gaduga mu Bible. Yezu agambididi Nzambi mbi: “Ndaga yayi yena giediga.” (Yoane 17:17) Mabundu meka mu magudunanga guhangila malongi ma Ndaga yi Nzambi Bible. Mu gihani gi guhangila malongi ma Bible, mabundu ma luvunu ma guhangilanga malongi kega mashigu ma hadu. Gashi Yehowa lō eni gusepela yi hadu’ana “eniguduna mashigu mendji.” (Danga Marko 7:9.) Kega, du guhwanga Nzambi gieshi mbi mu duna hangila malongi kega mandongishila ma Bible.

2. Pila yigi du fe gusambila Yehowa?

Du fe gusambila gaga Yehowa mumwila ena Ngangi wedu. (Kusonga 4:11) Gunadendula mbi du fe gumuzola kega gumusambila gaga ye, kega lō du fe guhangila yidegi to yifwanisu dangu di duna musambila.—Danga Yezaya 42:8.

Lusambu lwedu lu fe gukala “lu santu kega alo lugugumbulanga Yehowa.” (Baroma 12:1) Gunadendula mbi du fe gujidjisa mashigu mendji mu lujingu lwedu. Mumbandu, hadu’ana aguzolanga Yehowa aguzolanga kega agulemfuganga mu mashigu menji ma dadila waala. Kega lō’agu hanganga mambu ma mbi nga: gunwa magaya guhangila yima yo yigulawusanga to Magana mu pila yi mbi.a

3. Mumwilegi du fe gusambila Yehowa yi a pangi’edu Akristu?

Malugudaganu medu ma kosu posu ma gudusadisanga mu “gugumisa Yehowa . . . mu dibundu.” (Nkunga 111:1, 2) Dugugumisanga Nzambi dangu di dugu yimbanga migunga mumwila mu gumuhwa lugumu. (Danga Nkunga 104:33.) Yehowa ena dulomba mu gwenda gu malugudaganu mumwila ma guduzolanga kega meni gwishiya mbi mu ma gadusadisa mu gujinga mu gieshi mvula yi mvula. Dangu di dugwendanga gu malugudaganu, du guhanagananga gigesa yi a pangi’edu.

WISHIYA KEGA MAMBU MENGI

4. Lō du fe guhangila yidegi mu gusambila Nzambi

VIDEYO: Nzambi ma gugumbulanga guhangila yidegi mu gumusambila? (3:26)

• Mu dangu di tunda, yigi yi gaguminini asadi’a Nzambi dangu di’aga hangididi gidegi mu gumusambila?

Hadu’ega eni guyindula mbi guhangila yidegi mu gwagu’asadisa mu gwenda heyi-heyi yi Nzambi. Gashi guhangila yidegi mumwila mu gusambila Nzambi guguhanganga mbi Nzambi a’aduni gibeni! Dangenu Kubasika 20:4-6 kega Nkunga 106:35, 36, gu dima hanenu mamvudu mu miwu mi:

• Yima yigi to yidegi yigi yo y’ugudalanga yo yiguhangilanga hadu mu gusambila Nzambi?

• Pila yigi Yehowa a gudadilanga guhangila yidegi?

• Ayi, pila yigi u gudadilanga guhangila yidegi?

5. Gusambila gaga Yehowa gugudusadisanga mu gugaduga mu gihiga gi malongi ma luvunu

VIDEYO: Giediga gi gakadudidi mu gihiga (5:16)

Dangenu Nkunga 91:14, kega hanenu mvudu mu muwu’a wu:

• Yehowa ena hosa mbi yigi’agahanga mbi mu dunamuzola kega duna sambila kaka ye?

6. Du gusambilanga Nzambi mu malugudaganu ma dibundu

Dangu di duguyimbanga kega duguhananga mamvudu mu malugudaganu ma dibundu, du gugumisanga Yehowa kega du guhanagananga gigesa. Dangenu Nkunga 22:22, kega hanenu mamvudu mu miwu mi:

• M’ugusepelanga yi mamvudu’amo ma guhananga apangi mu malugudaganu?

• Mu wa zola guyilamana mumwila mu guhana mvudu?

7. Yehowa ma gusepelanga dangu di dugudelanga hadu’ega mambu ma dunalonguga

Dugukalanga yi mabaku mengi ma gulesa hadu’ega malongi ma Bible. Dangenu Nkunga 9:1 yi 34:1, kega hanenu mvudu mu muwu’a wu:

• Gima gigi gi’ulonguga mu Bible gio gi wa zola gudela hadu’ega?

MU KUFI

Du gusepedisanga Ngangi wedu mbi mu dunamusambila gaga ye, mu du gumuhwanga lugumu mu malugudaganu ma dibundu kega mbi mu dunalesa hadu’ega mambu ma dunalonguga.

Mvudugilu

• Mumwila Nzambi a gumbudi dibundu diedu, malongi ma dibundu diedu ma fe gaduga kwi?

• Mumwilegi du fe gusambila gaga Yehowa?

• Mumwilegi du fe gusambila Nzambi mu dibundu yi hadu o a guzolanga gumusepedisa?

DALA KEGA

Dala pila mugonusa mu moshi a gegidi guhangila yidegi mu disolu “Lō yi gusambilanga kega yidegi.”

“Bible mu di gusobanga lujingu lu hadu” (Nzozulu ya Nkengi 1/7/2011)

Dala mambu mo ma le gugusadisa mu guhana mamvudu mu malugudaganu ma dibundu.

“Gumisa Yehowa mu dibundu” (Nzozulu ya Nkengi 1/2019)

Dala mapimbu mo ma gasendjidi ngunza mu moshi gu malugudaganu ma dibundu ata gugakedi pashi ye mu gwenda gu malugudaganu.

Yehowa ma gudiyangisanga mumwila yi ami (3:07)

Hadu’engi a gununganga mbi Akristu a fe guhangila kulundji. Gashi mu gusambila Nzambi du fe guhangila kulundji?

“Mumwilegi Ambangi a Yehowa lō’a guhangilanga kulundji mu lusambu lowu?” (disolu dio diena mu jw.org)