Wena u guyilamana mu gusenda mbodjiga?

Mu gulonguga gwayi gu Bible u longugidi mambu mengi madadila Yehowa. Mbala jega, malongi beni ma gupushidi mu gwega mambu ma mbi kega mu guguma guhangila mambu ma u longuga. Ada gio, mbala jega gwena yi gima giega gio gi naguganda mbuga mu gudihana gwena Yehowa kega gusenda mbodjiga. Dilongi di dinahoshila mapashi mo hadu engi eniguwanagana momu gutwala yigusenda mbodjiga kega mambu ma u le guhanga mu gununga mapashi beni.

1. gugulombanga gwishiya mambu makima mo mena mu Bible gutwala yigusenda mbodjiga?

Mumwila mu gusenda mbodjiga, u fwe kala yi “nzayilu yi giediga.” (1 Timoteo 2:4) Ada gio, lō gu nadendula mbi u fe gwishiya mamvudu makima mu miwu mi Bible gutwala yigusenda mbodjiga. Ada Akristu o a gasendjidi mbodjiga yandjiga mamvula mengi mahida, ma gulabanga gaga gulonguga. (Bakolosai 1:9, 10) Gashi gu ba dendula mbi u fwe gwishiya malongi ma Bible mo, gugulombanga tegu mbi mudu eshiyi. Mbi wena yi madute kega u nadihula mbi weshinini gibeni mambu ma Bible mu gitesu gi fwana, solula yi ankulutu.

2. Yigi u fwe hanga gutwala yigusenda mbodjiga?

Gutwala yigusenda mbodjiga, u fwe “gwalumuna mudjima . . . kega gwalumuga.” (Danga Bisalu 3:19.) Gu nadendula mbi, u fe gwifa pashi jingi gu mudjima mumwila yi kosu disumu dio di’ugahangidi, kega gulomba Yehowa mu gugulolula. U fe gwega mambu ma mbi kega gujinga mu pila yo yigusepedisanga Nzambi. Kega, u fwe yandjiga gwenda gu malugudaganu kega guguma nsamuni yo u gakonda gusenda gadi mbodjiga, mumwila u yandjigi gulonga sangu ji pimbu yi apangi a dibundu.

3. Mumwilegi lō u fe gwega mbi woma wugugandji mbuga yigusenda mbodjiga?

Hadu ega ma gwifanga woma mbi, lō’aguga gulungisa lushilu lwawu lu’agahangidi gwena Yehowa. Gugigidi, madangu mega m’ugahanga yifu, ada hadu a gwigama o Bible diguhoshilanga, ma gahangidi yifu. Gashi Yehowa lō’agulombanga asadi endji mu guhanga mambu nga hadu a gukonda masumu. (Danga Nkunga 103:13, 14.) Ma gwifanga gieshi dangu di weni guhanga ngolu mu gumusepedisa! Gugigidi, Yehowa m’agusadisa. Kutu, ma nadulesa mbi ada gima gimoshi lō “gigaguga gudugapula yi zola [diendji].”—Danga Baroma 8:38, 39.

WISHIYA KEGA MAMBU MENGI

4. Longuga mu gwishiya Yehowa pimbu-pimbu

Mu gidesu gigi u fwe gwishiya Yehowa gutwala yi gusenda mbodjiga? U fwe mwishiya pimbu-pimbu mu gidesu gio gigagusadisa mu gumuzola kega mu gumusepedisa. Dalenu VIDEYO mu gudala pila alongogi a Bible mu gifudji gi kima a gahangidi. Gudima hanenu mvudu mu muwu’a wu:

VIDEYO: Mambu ma u fwe hanga mu gusenda mbodjiga (3:56)

• Mu videyo di, yigi yigasadishidi hadu ega, mu guyilamana mu gusenda mbodjiga?

Dangenu Baroma 12:2, gudima hanenu mamvudu mu miwu mi:

• Mu gukalanga yi ndambu yi madute mu mambu mo ma gulonganga Bible, to mu gudihulanga mbi Ambangi a Yehowa ma gulonganga gibeni giediga?

• Mbi gio, yigi u le hanga mu gugadula madute?

5. Lō gwega ada gima gimoshi gi gugandji mbuga yigusenda mbodjiga

Dangu di du gusendanga luganu lu gudihana gwena Yehowa kega gusenda mbodjiga, edu’a kima mu du guwanagananga yi mapashi. Mumwila mu gudala mbandu yimoshi, dalenu VIDEYO, gudima hanenu mamvudu mu miwu mi:

VIDEYO: Zola diedu mumwila yi Yehowa di gudusadisanga mu gukonda gwega mbi ada gima gi moshi gi dugandji mbuga yigumuhangila (5:22)

• Pila yilesa videyo, pangi Narangerel a gagandjidi mudjima mu mapashi meki mumwila mu guhangila Yehowa?

• Pila yiki zola diendji mumwila yi Yehowa di gamusadishidi mu gukonda gwega mbi pashi beni ji mugandji mbuga yiguhangila Yehowa?

Dangenu Bingana 29:25 yi 2 Timoteo 1:7, gudima hanenu mvudu mu muwu’a wu:

• Yigi yiguduhwanga gigesa gigukonda gwega mbi, ada gima gimoshi gi dugandji mbuga yi guhangila Yehowa?

6. Sa mudjima mbi Yehowa ma gagusadisa

Yehowa ma gagusadisa mu guhanga mambu ma gu musepedisanga. Dalenu VIDEYO, gudima hanenu mamvudu mu miwu mi:

VIDEYO: Yehowa Nzambi ma gagusadisa (2:50)

• Mu videyo di, yigi yigagandanga longogi u Bible yu mu gusenda mbodjiga?

• Yigi a galongugidi yo yigamusadishidi mu gushila Yehowa mudjima ngolu guhida?

Dangenu Yezaya 41:10, 13, gudima hanenu mvudu mu muwu’a wu:

• Mumwilegi u fe sa mudjima mbi, m’ugalungisa lushilu l’ugahangidi mu guhangila Yehowa?

7. Hwa Yehowa madondu mengi mu zola di’agulesanga mumwila yi ayi

Mbi mu yindula zola di galeshidi Yehowa mumwila yi ayi, mu gaguma guzola gumuwha madondu mengi kega guzola gumuhangila mvula yi mvula. Dangenu Nkunga 40:5, gudima hanenu mvudu mu muwu’a wu:

• Malusagumunu meki ma Yehowa, ayi u guzolanga?

Mbigudi Yeremia ma gazolanga Yehowa yi ndaga yendji, kega a gasendanga dibaku diendji di gukala sadi u Yehowa mu valere dingi. A gahoshidi mbi: “Ndaga yayi yigagumini gieshi giami kega guyangalala gu mudjima wami, mumwila a ba ndedjiga mu jina diayi, O Yehowa Nzambi.” (Yeremia 15:16) Hanenu mamvudu mu miwu mi:

• Mumwilegi gukala Mbangi u Yehowa gwena lugumu lu neni?

• Mu nazola gusenda mbodjiga mumwila mu guguma Mbangi u Yehowa?

• Gwena yi gima gi naguganda mbuga mu gusenda mbodjiga?

• U yindula yigi, yigi u fwe hanga mu gusenda mbodjiga?

MU KUFI

Yi lusadisu lu Yehowa u le nunga kosu gima gio, gi le guguganda mbuga yigusenda mbodjiga.

Mvudugilu

• Ayi mu gusenda mbodjiga, gwena funu mbi wishiyi mambu makima mo mena mu Bible?

• Mambu meki u le soba gutwala mbi u sendji mbodjiga?

• Mumwilegi lō u fwe gwega mbi woma wugugandji mbuga yigusenda mbodjiga?

DALA KEGA

Dala yigi yi le gugupusa mu gusenda luganu lu gusenda mbodjiga.

“Wena u guyilamana mu gusenda mbodjiga?” (Nzozulu ya Nkengi 3/2020)

Dala pila yi u le nunga mambu mega ma pashi mo ma le guguganda mbuga yigusenda mbodjiga.

“Yigi yi ba kanda mbuga mu gusenda mbodjiga?” (Nzozulu ya Nkengi 3/2019)

Dala mapashi ma ngolu mo, mudu mu moshi a ganungidi mumwila a sendji mbodjiga.

‘Mumwilegi lō u gasenda gadi mbodjiga?’ (1:10)

Yigi yigapushidi pangi Ataa mu gusenda mbodjiga, ada lō a gazolanga tegu gusenda mbodjiga?

Yifwanini gibeni mu guhanga mambu ma makima? (7:21)