DILONGI 02

Bible di guhananga givuvu

W'adusa mu Papie

Mu gifudji gikima hadu’aguwanagananga yi mambu mo menigu’a gumisa kenda-kenda, adi yangishi, kega a dadi mapashi. U gadifa gadi pila yi? Mbala jega muweni gudala pashi mumwila m’uguyinzanga to mudu mu moshi u ugazolanga ugafwa. U le gudi’ula mbi, ‘lujingu lu, mu lugabonga?’ Bible di guhananga mvudu yipimbu mu muwu wu.

1. Givuvu giki Bible dieni guduwa mumwila yi mafugu magesa?

Bible mu diena dendula mumwilegi mapashi mena mengi a wulu di manu kega mu dieni gudulesa sangu ji pimbu mbi tunda lō Nzambi m’agadula mapashi makima. Mambu mo meniguhosa Bible, ma le gugusadisa mu gukala yi lujingu lu pimbu mu mafugu magesa kega guguhwa “givuvu.” (Danga Yeremia 29:11, 12.) Givuvu gieni, gi le gudusadisa mu guganda mudjima mu mapashi medu, gukala mu gieshi yandjiga mwaniowu kega mvula yi mvula.

2. Bible dina hosa mbi lujingu lugakala ki mu mafugu magesa?

Bible dina hosa mbi mu mafugu magesa “lufwa lō lugakala kega; kenda, yidilu yi pashi lō jigakala kega.” (Danga Kusonga 21:4.) Mambu mo ma le hanga mbi hadu a dadi pashi mwaniowu. Mumbandu: gisugami, gugonda lunungu, makashi, yi lufwa lō magakala kega. Bible dina hosa mbi hadu a gajinga mu gieshi mvula yi mvula mu paladisu a wulu di manu.

3. Yigi yi le gugusadisa mu gugwigila mbi malushilu ma Bible mu ma galungana?

Hadu’engi eni gumena mambu ma pimbu mu mafugu ma gesa, ada gio, lō eni gugumbula mbi mu ma gahangamana. Gashi malushilu ma Bible mu ma galungana gibeni. Du le gumisa lugwigilu lwedu ngolu mu mambu mana hosa Bible mbi mu duba “longuga pimbu-pimbu Masonugu.” (Bisalu 17:11) Gulonguga gu Bible mu gwa gusadisa mu gusōla ayimweni mbi mu wa gumbula mambu meni guhosa Bible mumwila yi mafugu ma gesa to lowu.

WISHIYA KEGA MAMBU MENGI

Dudadidi mambu ma pimbu mo mena hosa Bible mumwila yi mafugu ma gesa. Kega dala pila givuvu giguhananga Bible giena sadisa hadu mwaniowu.

Gimvuga gi mafoto: mafoto mo mana lesa luswaswanu lo lwena mu lujingu lu mwaniowu yi lujingu lu pimbu lo lweni guhoshila Bible mu mwila yi mafugu magesa. A hongulugila mambu beni aha a mashina.

4. Bible dina hosa mbi mu du gajinga mvula yi mvula gugonda gudaala pashi

Dala mambu mo ma gahangamana mu mafugu ma gesa mo mena hosa Bible. Diambu diki mu gadji ga mambu ma digusepedisa? Mumwilegi?

Dangenu ma verse ma mena gu mashina, gudima hanenu mamvudu mu miwu mi:

Muna gumbula gibeni mbi mambu ma hosa maverse ma, ma le guguneyila mapimbu? Muna gumbula kega mbi ma le neyila hadu a dibuda dieyi yi andugu’ayi mapimbu mbi ma malonguga?

Yindula pila lujingu lu gakala mu manu dangu

ADA MUDU LO . . .	HADU AKIMA . . .
agadūsa sanga, aga nuna, to agafwa.—Yezaya 25:8.	ma gadala lufudumugu lu hadu’agazolanga ngolu to guhonguluga gowu mu lujingu a wulu di manu.—Yoane 5:28, 29.
aga yinza to agakala yi gifu mu mwila.—Yezaya 33:24; 35:5, 6.	ma gakala yi sante di pimbu yi ngolu nga dulengi.—Yobi 33:25.
aga dala pashi mumwila yi mambu ma mbi.—Yezaya 32:16, 17.	ma gakala yi yima yi gudia yingi, manzu ma pimbu kega yisalu yi pimbu.—Nkunga 72:16; Yezaya 65:21, 22.
aga nioguga mumwila yi yidumba.—Nkunga 46:9.	ma gaguma gu jinga gibeni mu ngemba.—Nkunga 37:11.
aga yindula to gwibuga mambu mena hana pashi.—Yezaya 65:17.	ma gajinga mvula yi mvula gugonda gudala pashi.—Nkunga 37:29.

Mwana u yala mu moshi yo u yinzanga u godidi kega ena mu guyamba mawu wendji.

mudu mu moshi yo u gakedi mununu u hongulugidi ngunza kega ena mu gupusa bruwete dio diena yi ndunda mu gadji.

5. Givuvu gio giena hana Bible mumwila yi mafugu magesa gi le gugusadisa

Hadu engi meni guhelwa mwila to kutu meni gwifa kabu mumwila yi mambu mena hangamana mu gifudji. Hadu’ega meni guhanga yigesa yingi mumwila mu guyidiga mambu. Dala pila malushilu ma pimbu ma Bible mo mena hosa mbi mambu mu ma gabonga mana sadisa hadu mwaniowu. Dalenu VIDEYO, gudima hanenu mamvudu mu miwu mi.

VIDEYO: Yi gazolanga gu nwanisa gugonda lunungu (4:07)

Gimvuga gi mafoto: Mafoto mo mana lesa videyo ‘Yi gazolanga gunwanisa gugonda lunungu.’ 1. Rafika ena mu gugadula koton yi hadu-ndombi agwenu dangu di’agakedi galengi. 2. Rafika ena mu guyiduga mu gudala andombi yi amindedi awanaganini gihani gimoshi mu lugudaganu lu distrike lu’Ambangi a Yehowa, mu mbala yitegu yi agedi gu lugudaganu lu distrike.

Mu videyo di, mambu megi ma mbi ma gahwanga Rafika pashi?
Ada mambu ma mbi mo ma agadalanga lo ma gahwidi, pila yiki Bible di gamusadishidi?

Mbi mu duba gwigila mambu mo meni guhosa Bible mumwila yi mafugu magesa, du le nunga guhelwa gu mwila kega du le kala mu gieshi ada mu dwena wanagana yi mapashi. Dangenu Bingana 17:22 kega Baroma 12:12, gudima hanenu mamvudu mu miwu mi:

Mbi m’ugwigila mambu mo mena hosa Bible mumwila yi mafugu ma gesa, lujingu lwayi lu mwaniowu lu le bonga? Mumwilegi?

HADU EGA ENI GUHOSA MBI: “Mambu ma pimbu mo meni guhosa Bible mumwila yi mafugu ma gesa lō ma galungana.”

Mumwilegi gwena funu mbi ayimweni u dadidi yiguma yo yina lesa mbi mu ma galungana?

MU KUFI

Bible diena yi malushilu mengi mumwila yi lujingu lu pimbu mu mafugu magesa. malushilu mo mumena hana givuvu kega mumena yidiga lujingu lwedu yandjiga mwaniowu.

Mvudugilu

Mumwilegi gwena funu mbi hadu eshiyi mambu ma pimbu mo ma gahangamana mu mafugu ma gesa?
Bible di guhosanga yigi mumwila yi mafugu magesa?
Pila yiki gukala yi givuvu mumwila yi mafugu magesa gu le gugusadisa mwaniowu?

Dati di numanisa dilongi di:

Luganu

Mu gwishiya pimbu-pimbu mambu ma pimbu mo meni guhosa Bible mumwila yi mafugu ma gesa, danga kega maverse makima mo mena mu dilongi di.

Luganu lwega:

Luganu lwayi lwega

DALA KEGA

Dala pila gwishiya mambu ma pimbu mo ma gahangamana mu mafugu ma gesa ma le gugusadisa mu dangu di pashi.

“Kwi—du le zwa givuvu?” (Telama! 22/4/2004)

Dala pila yiki gwishiya mambu ma pimbu mo mena hosa Bible mumwila yi mafugu magesa gu le sadisa hadu o aguyinzanga makashi mo meni gonda guhwa.

“Bible dile gugusadisa mbi uguyinzanga—makashi mo mena gonda guhwa?” (Disolu dio diena mu jw.org)

Dangu di’una dala mugunga wu u videyo, yindula pila ayi yi dibuda dieyi gi nugajinga mu gieshi mu paladisu a wulu di manu.

Yindula dangu dina (3:37)

Danga disolu di mudu mumoshi yo u ganwaninanga mapimbu ma hadu ega kega dala pila lujingu lwenji lu gasobidi dangu di’agalongugidi mambu ma pimbu mo meni guhosa Bible mumwila yi mafugu ma gesa.

“Lō yiguyindulanga kega mbi yife soba manu ma” (Nzozulu ya Nkengi 1/7/2013)