Anani a gwendanga gu wulu?
Mvudu yi Bible
Nzambi ma gusolanga ndambu y’akristu a gwigama, ana a gafudumuga mumwila mu gwe gujinga gu wulu gudima di lufwa lowu. (1 Piere 1:3, 4) Gudima di gu’asola, akristu’a a fe laba gukala yi lugwigilu lu ngolu kega yigalulu yi ukedji mu gulaba gukala hadu’o a fwana mumwila mu gwe gujinga gu wulu.—Baefezo 5:5; Bafilipi 3:12-14.
Mambu megi hadu’o agwendanga gu wulu a gahanga ago?
Ago gu wulu, ma gayala yi Yezu nga atodjila kega anganga-nzambi mu sungi yi jimvula 1 000. (Kusonga 5:9, 10; 20:6) Aga guma “wulu di pa,” to luyalu lu gu wulu a lo lu gayala “manu ma pa,” gisongidila hadu’o a gajinga a wulu di manu. Afumu’anga a gu wulu, a gasadisa hadu’o a gajinga a wulu di manu mu guguma yi lujingu lu pimbu shela, gi gaganini Nzambi banda mu dangu dio di’agagangidi hadu.—Yezaya 65:17; 2 Piere 3:13.
Hadu gwi a gafudumuga mumwila mu gwenda gu wulu?
Bible di nahosa mbi hadu 144 000 a gafudumuga mumwila mu gwe gujinga gu wulu. (Kusonga 7:4) Mu mbona-mesu a yo yena mu Kusonga 14:1-3, tumwa Yoane a gadadidi “Mwana-Dimema u niamugidi a muselu u Siyoni, kega a gakedi yi hadu 144 000.” “Mwana-Dimema” ayo w’agadadidi gu nalesa Yezu ayo u gafudumugidi. (Yoane 1:29; 1 Piere 1:19) “Muselu u Siyoni” u nalesa giyega gi neni agio gikwedji Yezu yi hadu 144 000, ana a gayala yi ye gu wulu.—Nkunga 2:6; Baebreo 12:22.
Hadu “o a’galendjiga yi o a’gasola” mu guyala yi Yezu, Bible di gu’alendjiganga mbi “gimvuga gi djigi-djigi.” (Kusonga 17:14; Luka 12:32) Gu nalesa mbi hadu’o a gayala yi Yezu ena ndambu, gashi mamema mega mena mengi shela.—Yoane 10:16.
Mangindu ma luvunu mumwila yi hadu’o a gwendanga gu wulu
Ngindu ji luvunu: Hadu a pimbu akima a gwendanga gu wulu.
Giediga: Nzambi a nahosa mbi hadu’a pimbu ma gajinga mvula yi mvula a wulu di manu.—Nkunga 37:11, 29, 34.
Yezu a gahoshidi mbi: “Ada mudu mu moshi lowu u gaganduga gu wulu.” (Yoane 3:13) Ma galeshidi mbi hadu akima apimbu o a gafidi gutwala yendji, mumbandu Abrahami, Moize, Yobi yi David, lō a gedi gu wulu. (Bisalu 2:29, 34) Gashi, agakedi yi givuvu gi gufudumuga mumwila mu gujinga a wulu di manu.—Yobi 14:13-15.
Bible dieni gulendjiga lufudumugu mumwila mu gwe gujinga gu wulu mbi “lufudumugu lu tegu.” (Kusonga 20:6) Gu nalesa mbi lufudumugu lwega mu lu gakala. Lu gakala lufudumugu mumwila mu gujinga a wulu di manu.
Bible di nahosa mbi dangu gifumu gi Nzambi gi gayala manu, “lufwa lō lugakala kega.” (Kusonga 21:3, 4) Lushilu’a lu, lu galungana awulu di manu mumwila gu wulu lufwa lō lweni gukala.
Ngindu ji luvunu: Gosu mudu u le gusola gihani gio gi agajinga: gu wulu to awulu di manu.
Giediga: Mu gadji g’akristu a gwigama, Nzambi weni gusola mbi anani a gasenda “lufudu lu gwenda gu wulu pila ye a g’alendjiga” gisongidila Nzambi u g’ahwa givuvu gi gujinga gu wulu. (Bafilipi 3:14) Nzambi lō a gusolanga mudu mu gwe gujinga gu wulu gaga mumwila mudu beni a gukalanga yi nzala yingi yi gwe gujinga ago.—Matayo 20:20-23.
Ngindu ji luvunu: Givuvu gi gujinga mvula yi mvula a wulu di manu lō giena funu yingi. Giena gaga mumwila yi hadu’o a gonda gufwana mu gwenda gu wulu.
Giediga: Nzambi a gulendjiganga hadu’o a gajinga mvula yi mvula a wulu di manu mbi “hadu’ami,” “hadu’a yigasola,” kega “hadu’o a gasagumuna Yehowa.” (Yezaya 65:21-23) Ma gakala yi dibaku di gulungisa luganu lu Nzambi mumwila yi hadu pila yi a gaganini banda mu luyandjigu gisongidila ma gajinga mvula yimvula yi sante di pimbu mu paladisu a wulu di manu.—Kuyantika 1:28; Nkunga 115:16; Yezaya 45:18.
Ngindu ji luvunu: Talu yi hadu 144 000 ayo yi nahoshila muganda u Kusonga, yena talu yi gifwani.
Giediga: Gu gigidi muganda u Kusonga mu weni guhoshila talu jega ajo ji gukalanga ji gifwani. Mumbandu, mu weni guhoshila “majina 12 m’atumwa 12 a mwana-dimema.” (Kusonga 21:14) Du dadidi mambu mo mena du gumbudisa mbi talu yi 144 000 lō yena yi gifwani.
Kusonga 7:4 u nahoshila “talu yi hadu’o a gashidi gidimbu [to ana a gasola mumwila mu gwe gujinga gu wulu] ena 144 000.” Maverse mo mena gudima di verse adidi, ma nahoshila gimvuga giega agio giswaswana yi gimvuga gi tegu: “gimvuga gimoshi gineni gi hadu, agio ada mudu lō a le guga gudanga talu yowu.” Nzambi ma gagulusa kega hadu a “gimvuga agi gi neni”. (Kusonga 7:9, 10) Hohana, mbi talu yi hadu 144 000 yena yi gifwani, kega mbi yi galesanga gimvuga gi hadu’o talu yowu lō yizabana, agio gu gangidi gukala pashi mu guhosa mbi yimvug’ayi yo yadi, yena yi guswaswana.a
Pila yimoshi, Robert Thomas Longi u ma nzu-kanda maneni, a gasonigidi mumwila yi talu yi hadu 144 000 a guhoshilanga muganda u Kusonga 7:4 mbi: “Yena talu yi moshi ayo yi zabana kega yi swaswana yi talu yo yigonda guzabana y’ahoshila mu Kusonga 7:9. Mbi mu duhosa mbi talu yi yena yi gifwani, aho mu gu’alesa mbi pila yi gudadila jitalu jega gaga pila yi jena lō gu’akala”—Kusonga 1-7: An Exegetical Commentary, gasa 474.
a Kega, Bible di nahosa mbi hadu 144 000 “ma g’asumbidi mu gadji ga hadu nga ndumba ji tegu.” (Kusonga 14:4) Jingogu “ndumba ji tegu” ji balesa mbi a g’asodidi hadu ndambu buna. Jingogu ji jifwanini shela mu guhoshila hadu’o a gayala yi Kristu gu wulu. Ena hadu ndambu, gashi a gayala hadu engi shela a wulu di manu.—Kusonga 5:10.