Nzambi ena kala yihani yikima?
Mvudu yi Bible
Nzambi ena yi makuki ma gudala yihani yikima kega guhanga kosu gima gio, mu kosu gihani gio gi’azola. (Bingana 15:3; Baebreo 4:13) Ada gio, Bible lō dieni gulonga mbi Nzambi eni gukala yihani yikima—gunadendula mbi, kosu gihani gio to muyima yikima. Gashi mu gweni gudulesa mbi ena mudu kega wena yi gihani gio gi a gukalanga.
Nzambi ena pila yiki: Nzambi ena peve. (Yoane 4:24) Lō eni gumoniga gu mesu ma hadu. (Yoane 1:18) Mambona-mesu ma Nzambi mo meni guhoshila Bible meni gulesa mbi meni gukala gaga gihani gimoshi. Lō eni gu mumonisa ada ki nga mbi meni gukala yihani yikima.—Yezaya 6:1, 2; Kusonga 4:2, 3, 8.
Gihani gio gigukalanga Nzambi: Nzambi eni gujinga mu gihani gi gipeve, agio gi swaswana yi gihani gio gigujinganga hadu. Ago, Nzambi ena yi “gihani gio gi a gujinganga gu wulu.” (1 Bantotila 8:30) Bible dieni guhoshila dibaku dimoshi dio yigangwa yi gipeve “yigengididi mumwila mu gumoniga gutwala yi Yehowa,”a gunalesa mbi, gwena yi gihani gimoshi gio gi gujinganga Nzambi.—Yobi 1:6.
Mbi Nzambi lō eni gukala yihani yikima, u le gudiyangigisa gibeni mumwila yi ami?
Giogiogi. Nzambi meni gudiyangigisa ngolu mumwila yi kosu mudu. Ada a gukalanga gu wulu, Nzambi a gudalanga hadu’akima o ena mu manu awo eni gumusepedisa mu masonga makima, kega meni gu’asadisa. (1 Bantotila 8:39; 2 Bansangu 16:9) Du dadidi pila Yehowa a galeshidi mbi ma gashilanga hadu’o a gamusambilanga mu masonga makima digebi:
Mbi mu nasamba: Yehowa u le gwifa gisambu gieyi dangu di u nagihanga.—2 Bansangu 18:31.
Dangu di u nanioguga mu mabanza: “Yehowa ena heyi-heyi yi hadu’o ena mu kenda; meni gugulusa hadu’o eni gunioguga mu mabanza.”—Nkunga 34:18.
Dangu di wena yi funu yi ludwadisu: Yehowa “m’aguhwa mayela ma gubagisa mambu kega m’a gulonga” mu nsadisa yi ndaga yendji Bible.—Nkunga 32:8.
Mangindu ma luvunu mu mambu mo hadu eni guhosa mbi Nzambi ena yihani yikima
Ngindu ji luvunu: Nzambi ena yihani yikima mu lugangu.
Giediga: Nzambi lō eni gujinga mu manu to kosu gihani gieka mu gadji yi yima yo y’agahanga. (1 Bantotila 8:27) Gwena gigidi mbi mioda kega yima yeka ayo y’agahangidi mu yi “guzabisanga kembu ji Nzambi.” (Nkunga 19:1) Ada gio, Nzambi lō a gujinganga mu gadji ga yima yo y’agahanga. Gaga pila mudu yo weni guhanga yifwanisu lō eni gubida mu gadji yoyi, gashi yifwanisu yi le gudulesa mambu mengi ma dadila mudu yo u gayihangidi. Pila yimoshi, yima yo yeni gumoniga mu yeni gudulesa yigalulu yi Ngangi ayo weni “konda gumoniga,” mumbandu ngolu, mayela yi zola diendji.—Baroma 1:20.
Ngindu ji luvunu: Nzambi u fedji gukala yihani yikima mumwila mu gwishina mambu makima kega mumwila mu gukala mweni ngolu jikima.
Giediga: Peve santu yi Nzambi, yena ngolu ji Nzambi jo ji gumoniganga mu yisalu. Mu nsadisa yi peve santu yendji, Nzambi u le gudala to guhanga kosu gima gio, mu kosu gihani gio kega mu kosu dangu dio gukonda mbi ye beni a kadi gihani gio.—Nkunga 139:7.
Ngindu ji luvunu: Nkunga 139:8 di nalonga mbi Nzambi eni gukala yihani yikima mumwila di guhosanga mbi: “Mbi m’iganduga gu wulu, mu wakala go, kega mbi m’isa lagu diami gu Majamu, mu wakala go.”
Giediga: Verse di lō dieni guhoshila gihani gio gieni gujinga Nzambi. Mu dieni guhoshila mu pila yi gifwani mbi, lō gwena yi gihani gimoshi gio giena gudadi agio gi le guhanga mbi Nzambi akondji guga gudusadisa.
a Yehowa diena jina di Nzambi pila yi eni guyimonisa mu Bible.