DILONGI 52
Mumwilegi du fwe vada kega guyidiga mwila pimbu?
Kosu mudu ma gukalanga yi pila yendji y’aguzolanga guvada kega guyidiga mwila. Mbi mu dunalaba mishigu mi Bible, mu mi’adusadisa mu guvada mu pila yiduguzolanga kega mu pila yo yigusepedisanga Yehowa. Dudadidi ndambu yi mishigu beni.
1. Mishigu miki mi fe gudusadisa mu guvada kega guyidiga mwila pimbu?
Du fwe vada “miledi mio mifwana, gukonda guhidjisa ndjilu kega yi mabanza ma pimbu.” kega du fe kala dangu di kima ukedji mumwila hadu a ba dudala eshiyi mbi mu dweni “gugandamana gwena Nzambi.” (1 Timoteo 2:9, 10) Dudadidi mishigu miwana: (1) Miledi miedu mi fe kala “mio mifwana.” Pila yi u gudalanga mu malugudaganu ma dibundu, edu asadi a Yehowa lō du guvadanga pila yimoshi. Gashi pila yedu yiguvada kega yiguyidiga sugi, yigulesanga mbi mu dugujidjisanga Nzambi wedu. (2) Guvada “gukonda guhidjisa ndjilu” gu ba dendula mbi pila yedu yiguvada kega yiguyidiga mwila, lō yifwe pusa hadu ega mu guguma yi mangindu ma guvugisa mwila, to gu’apusa mu gududala-dala. (3) Gukala yi “mabanza ma pimbu” gu na dendula mbi, lō du fe laba pila hadu engi a naguma guvada kega guyidiga mwila. (4) Kosu dangu dufe vada kega guyidiga mwila, mu pila yo yinalesa mbi mu du “gugandamananga gwena Nzambi,” mumwila hadu a dadi gukonda pashi mbi du gusambilanga Nzambi u giediga.—1 Bakorinto 10:31.
2. Mumwilegi du fe yindula apangi edu, dangu di du nasola miledi kega di dunayidiga mwila?
Ada dwena yi swa yigusola miledi mi du nazola guvada, gashi du fe yindula pila hadu ega a le gudifa, mbi mudu mi vada. Du guhanganga yigesa mu “guhwa apangi [edu] gieshi mumwila yi mapimbu mowu kega mumwila mu gu’ahwa gigesa” gashi lō mu gu’ahwa pashi.—Danga Baroma 15:1, 2.
3. Mumwilegi du guvadanga kega du guyidiganga mwila pimbu?
Kosu dangu du guvadanga pimbu. Gashi du guvadanga pimbu gibeni guhida, dangu di du nagwenda gu malugudaganu ma dibundu kega dangu di du nalonga sangu ji pimbu. Mu du guhanganga yigesa, mumwila hadu a shi digebi mu sangu ji pimbu gashi lō mu pila yedu yiguvada kega yiguyidiga mwila. Ada gio, mu du guvadanga kega mu du guyidiganga mwila pimbu mumwila gu le gupusa hadu mu gusepela yi malongi ma Bible, kega mumwila mu gweni “gudomisa malongi ma Ngulushi wedu.”—Tito 2:10.
WISHIYA KEGA MAMBU MENGI
Dudadidi mambu ma le gudusadisa mu guvada kega guyidiga mwila mu pila yo y’asadisa hadu ega mu gwishiya mbi dwena Akristu a giediga.
Pila yedu yi guvada kega guyidiga mwila yi gulesanga mbi mu dugujidjisanga afumu to lowu. Yehowa ma gudalanga mambu mo mena gu mudjima wedu, gashi pila yedu yi guvada kega yi guyidiga mwila yi fe lesa mbi mu dugumujidjisanga
4. Mbi mu duvada pimbu du gulesanga mbi du gujidjisanga Yehowa
Giguma gigi gi gudupusanga mu guvada pimbu? Dangenu Nkunga 47:2, gudima hanenu mamvudu mu miwu mi:
Pila yi dweshiya mbi guvada gwedu gu le pusa hadu mu gudadila Yehowa mu pila yi pimbu to yi mbi, miledi mi pila yiki du fe vada?
U yindula yigi, gwena gibeni funu mu guvada kega guyidiga mwila pimbu dangu di dunagwenda gu malugudaganu ma dibundu kega di du nalonga sangu ji pimbu? Mbi gwena gio to lō mumwilegi?
5. Pila yi du fe vada kega guyidiga mwila pimbu
Ata miledi miedu miena mi talu to lowu, mi fe kala ukedji kega mio mi fana yi mambu ma duba hanga. Dangenu 1 Bakorinto 10:24 kega 1 Timoteo 2:9, 10. Gu dima, hoshilenu mumwilegi lō du fe vada miledi mio . . .
miena mi mvindu, uneni wingi to gisagasaga.
mi gulesanga yidjini yi mwila, to miena pusa hadu mu guguma yi mangindu ma guvugisa mwila.
Akristu lō’agukalanga kega mu dangu di Shigu ji Moize, gashi shigu beni ji gudusadisanga mu gwishiya mambu mo ma guzolanga Yehowa. Dangenu Kulonga 22:5, gu dima hanenu mvudu mu muwu wu:
Mumwilegi du fe duna guvada to guyidiga mwila mu pila yo yi le dusa amala nga agonusa to agonusa nga amala?
Dangenu 1 Bakorinto 10:32, 33 kega 1 Yoane 2:15, 16, gu dima hanenu mamvudu mu miwu mi:
Mumwilegi du fe gamba gwishiya mbi pila yedu yi guyidiga mwila to yi guvada mu yena yangisa apangi a dibundu to hadu a gihani gi dwena jinga?
Pila yigi hadu engi a guvadanga ke guyidiga mwila yi sugi gihani gi nu gujinganga?
U yindula yigi, miledi mi’aguvadanga yi pila y’aguyidiganga mwila yi sugi yile kala mbi mumwila y’Akristu? Mbi gwena gio to lowu mumwilegi?
Du le vada kega guyidiga mwila mu mapila ma guswaswana kega gusepedisa Yehowa
HADU EGA ENI GUHOSA MBI: “Yena yi nswa ji guvada kosu muledi wo w’izola.”
Ayi ke u fe hosa gio? Mbi gio to lowu mumwilegi?
MU KUFI
Mbi mu duvada kega mu duyidiga mwila pimbu, du gulesanga mbi mu dugujidjisanga Yehowa kega hadu ega.
Mvudugilu
Mumwilegi pila yedu yi guvada kega guyidiga mwila yena nfunu yingi mumwila yi Yehowa?
Danga mwa mishigu mio mi le gudusadisa mu guvada kega guyidiga mwila pimbu?
Pila yedu yi guvada kega guyidiga mwila yi le pusa hadu ega mu guguma gudadila lusambu lu Yehowa pila yigi?
DALA KEGA
Dala mambu mo hadu ega a le guma guyindula dangu di’adala miledi mio mi’uvada.
“Pila yami yi guvada yigulesanga yigi?” (Disolu dio diena mu jw.org)
Dala mumwilegi gwena funu mu guyindula pimbu-pimbu gu twala yi gubudisa makashe to tatuwage mu mwila.
“Bible di guhosanga yigi mumwila yi gubudisa makashe mu mwila?” (Disolu dio diena mu jw.org)
Dala mishigu miega mi Bible mio mi le dusadisa mu guvada kega guyidiga mwila pimbu.
“Guvada gwayi mu gwena hwa Nzambi lugumu?” (Nzozulu ya Nkengi 9/2016)
Dala pila mugonusa mu moshi u mudjima masonga a gagumini gudadila mu pila yi pimbu pila hadu’ega a gazolanga guvada.
“Y’igayindulanga mbi guvada kega guyidiga mwila pimbu gibeni gwena mbi” (Telama! 22/12/2003)