DILONGI 51
Wagula mu pila yo yiguhwanga Yehowa lugumu
Dangu di gadugangidi Yehowa, a gaduhwedi gapu di dipimbu—gwagula. Pila yi du guhangilanga gapu di, gwena gibeni funu gu mesu ma Nzambi? Ee! (Danga Yakobo 1:26.) Dudadi pila yi du le hangila gapu di mu pila yo yena sepedisa Yehowa.
1. Pila yigi du le hangila gapu di gwagula?
Bible diena dwambila mbi “labenu guhanagana gikesa kega gudungagana.” (1 Batesalonika 5:11) M’uba gwishiya hadu o ena yi funu yi gikesa? Yigi u le hanga owu mu gudifa pimbu? U le ambila mbi wena gu’asenda mu valere. U le ebusa mambu ma pimbu mo m’aguhanganga. M’uba gwibuga verse di moshi dio di le hwa mudu mu moshi u wishi gikesa? Maverse mena mengi. Lō gubila mbi pila yayi yi gwagula, yile hwa gibeni hadu ega gikesa. Hohana, kosu dangu di’uba gwagula, hanga yigesa mu guhosa mu mawete kega mu pila yi pimbu.—Bingana 15:1.
2. Mambu ma pila yigi du fe konda gwagula?
Bible di ba hosa mbi: “Ganu dienu di kondji dusa ata ngogu yimoshi yi bola.” (Danga Baefezo 4:29.) Guba dendula mbi lō du fe hosa mambu ma mbi, mambu maba lemigisa hadu ega to gu’ahwa pashi kega lō du fe gu’aduga. Kega lō du fe hosa mambu ma mbi mu jina di mudu mbi mudu beni lō’ena to gu mufudjigila mumwila mu gubebisa lugumu lwendji to gumugoda sogi.—Danga Bingana 16:28.
3. Yigi du le hanga mu guhosa mambu mo ma le hwa hadu ega gikesa?
Mbala jingi, mambu ma du guhosanga ma gulesanga gibeni mambu mo mena gu mudjima kega mu mudu wedu. (Luka 6:45) Tunda du fe hanga yigesa mu guguma guhosa mambu mo ma gudunganga—gisongidila ma pimbu, ma ukedji, ma ba pusa mu guzola, kega mambu ma fana mu gusenda lugumu. (Bafilipi 4:8) Mumwila mu guguma guyindula mambu ma, du fe sola pimbu andugu edu kega mansaga ma du ba hidjishila dangu. (Bingana 13:20) Kega du fe yindula pimbu gu twala yi gwagula. Hohana, yindula pila y’adifa hadu ega dangu di’agwifa mambu mo ma u ba zola guhosa. Bible di ba hosa mbi: “Guhosa gukonda guyindula gwena nga mbi gulemigisa mudu yi pogu y’idumba, gashi ludimi lu hadu a mayela mu lu gubelulanga.”—Bingana 12:18.
WISHIYA KEGA MAMBU MENGI
Dudadi pila yigi du le gwagula mu pila yo yiguhwanga Yehowa lugumu kega guhwa hadu ega gigesa.
4. Geba mu mambu ma u ba gwagula
Madangu mega, edu’akima mu duguhosanga mambu mo mena guduhanga pashi gu dima. (Yakobo 3:2) Dangenu Bagalatia 5:22, 23, gu dima hanenu mamvudu mu miwu mi:
Mu gadji d’igalulu yi, gigalulu gigi u le lomba Yehowa mumwila a gusadishi mu guguma gwagula mu pila yi pimbu? Pila yigi yigalulu yi, yi fe gugusadisa?
Dangenu 1 Bakorinto 15:33, gu dima hanenu mvudu mu muwu wu:
Andugu yi mansaga ma du gusolanga, ma le gudupusa mu guguma guhosa pila yigi?
Yigi yi le gugupusa mu guguma guhosa mu pila yimoshi gina?
Dangenu Longi 3:1, 7, gu dima hanenu mvudu mu muwu wu:
Dangu digi di le kala pimbu edu mu gumena dangu di pimbu di guhosa to gukonda hosa gima gi moshi?
5. Hosa mambu ma pimbu mumwila yi hadu ega
Yigi du le hanga mu gukonda hosa mambu ma mbi mo ma le lemigisa hadu ega to gu’ambila mambu ma mbi? Dalenu VIDEYO, gu dima hanenu mamvudu mu miwu mi milaba:
Pila yi dudala mu videyo di, mumwilegi pangi yala yu a gasendjidi luganu lu guyidiga pila yendji yi gusolula yi hadu ega?
Yigi a gahangidi mu guguma guhosa mu pila yi pimbu?
Dangenu Longi 7:16, gu dima hanenu mvudu mu muwu wu:
Yigi du le konda bila dangu di du ba zola guhosa mambu ma mbi mumwila yi mudu mwega?
Dangenu Longi 7:21, 22, gu dima hanenu mvudu mu muwu wu:
Pila yigi guyindula mambu ma ba hosa maverse ma gu le gugusadisa mu gukonda gwifa kabu mbi mudu mwega ma hosa mambu ma mbi mumwila y’ayi?
6. Kala mawete dangu di’uba solula yi hadu’adibuda diayi
Yehowa ena zola mbi dusoludi y’apangiedu’adibuda mu mawete kega mu zola. Dalenu VIDEYO, gu dima hanenu mvudu mu muwu wu:
Yigi yi le gusadisa mu guhosa gibeni mu mawete yi hadu’adibuda diayi?
Dangenu Baefezo 4:31, 32, gu dima hanenu mvudu mu muwu wu:
Guhosa gu pila yigi gu le hwa hadu’adibuda gigesa?
Yehowa ma galeshidi gieshi gi’agefidi mumwila yi Munendji Yezu. Dangenu Matayo 17:5, gu dima hanenu mvudu mu muwu wu:
Pila yigi u le laba mbandu yi Yehowa, dangu di’ubasolula yi hadu’adibuda diayi?
Kala yi gikalulu gi gushigisa hadu’ega
HADU EGA ENI GUHOSA MBI: “Yiguhosanga mambu makima mo ma gungishilanga, mbi lō ma sepedisa hadu ega lō gutadila ami.”
Guhosa pila yi gwena pimbu? Mbi gwena gio to lowu mumwilegi?
MU KUFI
Mambu ma duguhosanga ma le hwa hadu ega kieshi to pashi, tunda du fe yindula tegu pimbu mambu ma du ba zola guhosa, pila yi duba mahosa, kega dangu di duba mahosa.
Mvudugilu
Yigi u fe hanga mu guguma gwagula mambu ma ba hwa hadu ega gigesa?
Mambu ma pila yigi du fe konda hosa?
Yigi yi le dusadisa mu gwagula dangu di kima mu mawete kega mu pila yi ba hana gigesa?
DALA KEGA
Dala mambu mo ma le gudusadisa mu guhosa mambu mo ma ba hwa hadu ega gigesa
Dala mambu ma le gugusadisa mu gukonda gwagula mambu ma mbi.
“Mumwilegi du fe duna gibeni guhosa mambu ma mbi?” (Disolu dio diena mu jw.org)
Dala mambu ma u le hanga mu gukonda guhosa mambu ma mbi mumwila yi hadu ega.
Pila yigi yi le duna guhosa mambu ma mbi mu jina di mudu mbi ye lō’ena? (2:36)
Dala pila Yehowa a gasadishidi yala u moshi yo u gahanganga yigesa mu gwega guhosa mambu ma mbi.
“Yigadihulanga mbi lujingu lwami lu gayanga kwi” (Nzozulu ya Nkengi 1/8/2013)