LECCIÓN 12
¿Naguá kuu chindeé nu̱u̱-ní tágua skuaʼa ka-ní Biblia?
Ja skuaʼa Biblia kuu ɨn ja vii tuni. De iyo ji̱chi ja víjin kuu. Sanaa koo ji̱chi ja katuʼun-ní maa-ní nú kuu skuaʼa ka-ní Biblia. ¿Nakú kánuu chuʼun ini-ní skuaʼa ka-ní? ¿Naguá chindeé nu̱u̱-ní skuaʼa ka-ní vese iyo tundoʼo nu̱u̱-ní?
1. ¿Nakú kánuu chuʼun ini-ní skuaʼa ka-ní?
“Chi tu̱ʼun Ya̱a̱ Dios chi técu̱ de íyó poder” (Hebreos 4:12). Biblia kuu ɨn libro ja kánuu tuni ja kachi ja jani ini Yandios ji ja kuu ini-Ya nu̱u̱ maa-ní. De chindeé tágua kutuʼva vaʼa ka-ní ji suni chindeé ja ka̱ji vaʼa ka-ní ja saʼa-ní ji ja kundetu-ní ja vaʼa ja ku̱ú ichi nu̱u̱. De ja kánuu ka, Biblia kuu chindeé ka nu̱u̱-ní ja kuu kitaʼan ini-ní jín Jeová. Ta skuaʼa-ní Biblia, jeʼe-ní tuʼun ja poder-ji kuu chíndeé nu̱u̱-ní nu̱u̱ nda̱ká kɨvɨ ndee-ní.
2. ¿Nakú kánuu ndakuni-ní ja yiya̱ʼvi tuni nda tuʼun nda̱a̱ ja steʼen Biblia?
Nda tuʼun nda̱a̱ ja steʼen Biblia kuu tanu nda tesoro ja yiya̱ʼvi tuni. Ja ñukua kuu ja Biblia kachi nda tuʼun yaʼa nu̱u̱-yo: “Kueen tuʼun nda̱a̱ de ma xíkó-ro” (Proverbios 23:23, TNM). Nú tíin kuenta-yo ja nda tuʼun nda̱a̱ ja steʼen Biblia yiya̱ʼvi tuni, chuʼun ini-yo skuaʼa ka-yo vese kenda tundoʼo (kaʼvi-ní Proverbios 2:4, 5, TNM).
3. ¿Na̱sa chindeé Jeová nu̱u̱-ní tágua skuaʼa ka-ní Biblia?
Sɨkɨ ja Jeová kuu Ya̱a̱ ja ndakui tuni ja ni saʼa ndɨʼɨ ja iyo ji ja kitaʼan ini-ní jín-Ya, jíni̱ vaʼa-Ya maa-ní ji kúni-Ya chindeé-Ya tágua kutuʼva ka-ní sɨkɨ-Ya. Chi Ya̱a̱ Dios sáʼá ya̱ “jíín ndá ro ja̱ cúu ini̱ ro sa̱ʼá ro tiñu váʼa” (kaʼvi-ní Filipenses 2:13). Ja ñukua kuu ja, nú iyo ji̱chi ja jiniñuʼun-ní ja chindeé nu̱u̱-ní tágua skuaʼa ka-ní axi tágua saʼa-ní ja kutuʼva-ní, maa-Ya chindeé-Ya nu̱u̱-ní. De nú, jiniñuʼun-ní ja koo ndakui ka-ní tágua kundeé-ní nu̱u̱ ɨn tundoʼo, maa-Ya chindeé Ya̱a̱-ní. Ma sndoo̱-ní ja kakan-ní nu̱u̱ Jeová ja na chindeé-Ya nu̱u̱-ní tágua skuaʼa ka-ní Biblia (1 Tesalonicenses 5:17).
NÁ KUTUʼVA KA-YO SƗKƗ TUʼUN YAʼA
Ná kundeʼe-yo naguá kuu saʼa-ní tágua skuaʼa ka-ní Biblia vese iyo ñayí ja kúni-ji kasi̱-ji nu̱u̱-ní axi kuteñu tuni-ní. Ji ñukua de kundeʼe-yo naguá kuu saʼa Jeová tágua chindeé-Ya nu̱u̱-ní.
4. Chuʼun ini-ní ja ja skuaʼa-ní Biblia kuu ɨn ja kánuu tuni ka nu̱u̱-ní
Iyo ji̱chi ja víjin tuni kuu níʼi̱n-yo tiempo tágua skuaʼa-yo Biblia. ¿Naguá kuu saʼa-yo? Ka kaʼvi-ní Filipenses 1:10 de ka ndatuʼun-ní sɨkɨ nda tuʼun yaʼa:
De nu̱u̱ maa-ní, ¿“na tiñu kuu ja kánuu tuni ka”?
¿Naguá kuu saʼa-ní tágua ja skuaʼa-ní Biblia kuu ɨn ja kánuu tuni ka nu̱u̱-ní?
Nú saʼa chitú-ní ñuti nu̱u̱ ɨn ndatiñu, ñukua de chuʼun-ní yu̱u̱, ma kanda kuʼun.
De nú xinañuʼun chuʼun-ní nda yu̱u̱, ñati ndɨʼɨ ñuti kanda kuʼun. De suni sukua, nú xinañuʼun saʼa ka-yo “tiñu kánuu ka nu̱u̱ nda kɨvɨ ndee-yo”, jinú-yo saʼa-yo ji suni kindoo ka tiempo tágua kuu saʼa ka-yo sava ka tiñu.
Ja skuaʼa-yo Biblia saʼa sii ini maa-yo nu̱u̱ tiñu Yandios, ji ja jiniñuʼun kuni yoʼo-Ya de chiñuʼun yoʼo-Ya. Ka kaʼvi-ní Mateo 5:3 de ka ndatuʼun-ní sɨkɨ nda tuʼun yaʼa:
Nú ja skuaʼa-yo Biblia kuu ɨn ja kánuu tuni nu̱u̱-yo, ¿na ja vaʼa níʼi̱n-yo?
5. Chuʼun ini-ní skuaʼa ka-ní vese iyo ñayí ja jási̱ nu̱u̱-ní
Koo ji̱chi ja sava ñayí kuu kaʼan-ji nu̱u̱-ní ja sndoo̱-ní ja skuaʼa-ní Biblia. Kundeʼe-ní ejemplo Francesco. Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
¿Naguá ni ka kachi nda taʼan veʼe-ji ji nda suchí kitaʼan jín Francesco ta ni kachi-ji sɨkɨ tuʼun kutuʼva-ji?
¿Nakú ni kuu ɨn ja vaʼa ja ni chuʼun ini-ji skuaʼa-ji?
Ka kaʼvi-ní 2 Timoteo 2:24, 25 de ka ndatuʼun-ní sɨkɨ nda tuʼun yaʼa:
¿Naguá jani ini nda taʼan-ní ji nda ñayí kitaʼan jín-ní sɨkɨ nda tuʼun ja kutuʼva-ní?
Tanu kachi nda versículo yaʼa, ¿naguá saʼa-ní nú ɨn ñayí nduu kúni-ji ja skuaʼa-ní Biblia? ¿De nakú?
6. Kuʼun ini-ní ja Jeová chindeé Ya̱a̱-ní
Ta ndu̱u̱ ndakui ka ja kitaʼan ini-yo jín Yandios, kúni-yo saʼa sii ka-yo ini-Ya. Vese sa, sanaa koo ji̱chi ja víjin kuu nu̱u̱-yo sa̱ma-yo maa-yo tágua kuteku-yo tanu kúni-Ya. Nú ɨn ji̱chi kuu ini-ní sukua, ma nuu ini-ní, Jeová chindeé Ya̱a̱-ní. Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
Tanu kachi video, ¿naguá ni jiniñuʼun sa̱ma Jim tágua saʼa-de tanu kachi Jeová?
¿Naguá kuu ja taʼa̱n ka ini-ní ja ni saʼa-de?
Ka kaʼvi-ní Hebreos 11:6 de ka ndatuʼun-ní sɨkɨ nda tuʼun yaʼa:
¿Naguá saʼa Jeová ji nda ñayí “ja̱ ndúcú ji candíja ji ya̱”, axi nda ñayí ja chuʼun ini tágua kuni-ji Ya̱a̱ ji saʼa-ji ja taʼa̱n ini-Ya?
¿Na̱sa káʼán-ní ja kuu ini Jeová ta ndeʼe-Ya ja chuʼun ini-ní tágua skuaʼa-ní Biblia?
JA KA JIKATUʼUN SAVA NDA ÑAYÍ: “¿De maa-ní nakú skuaʼa-ní Biblia?”.
¿Naguá kachi-ní?
JA NI KUTUʼVA-YO
Vese iyo ji̱chi ja víjin kuu ja skuaʼa-ní Biblia, chindeé nu̱u̱-ní koo sii ini-ní nɨkani. Nú ñúʼun ini-ní nu̱u̱ Jeová, maa-Ya taji-Ya ja vaʼa nu̱u̱-ní.
Tuʼun núku̱ʼun ini
¿Nakú teya̱ʼvi-ní nda tuʼun nda̱a̱ ja steʼen Biblia?
Ta ni jini-ní “na tiñu kuu ja kánuu tuni ka”, ¿naguá jiniñuʼun saʼa maa-ní?
¿Nakú jiniñuʼun ja kakan táʼvi-ní nu̱u̱ Jeová ja ná chindeé-Ya nu̱u̱-ní ja skuaʼa ka-ní Biblia?
NU̱U̱ NDANIʼI KA-NÍ TUʼUN
Kutuʼva-ní kumi nda tuʼun ja chíndeé nu̱u̱ kuaʼa ñayí tágua kuatiñu vaʼa ka-ji tiempo-ji.
“Na̱sa kuu kuatiñu vaʼa ka-yo tiempo” (¡Despertad!, febrero, 2014)
Ɨn ñaʼan ni kúni-ña saʼa sii-ña ini Yandios, de yɨɨ́-ña nduu ni jakuʼun ini-de ndɨʼɨ ja saʼa-ña. Na kundeʼe-yo na̱sa ni chindeé Jeová nu̱u̱ maa-ña.
Jeová taji-Ya tuʼun ndeé ini tágua kee vaʼa-yo nu̱u̱ tundoʼo (5:05)
Kundeʼe-ní na̱sa ni chindeé ɨn ñaʼan nu̱u̱ yɨɨ́-ña sɨkɨ ja ni iñi tu̱u̱n-ña.
Iyo ji̱chi ja ka kachi sava nda ñayí ja nda testigo Jeová ka saʼa siin-ji nda taʼan veʼe ñayí. ¿De a ja nda̱a̱ kuu?