Na̱sa kuu kuni-ní nde kuu nda cristiano nda̱a̱

Kuaʼa tuni millón nda ñayí ka kachi-ji ja ka kuu-ji cristiano, de ma sú ndɨʼɨ nda-ji ka saʼa-ji ja iyo vaʼa de ma sú ɨn ni̱ tuʼun ja ka kandija-ji. Nusaá, ¿na̱sa kuu kuni-yo nde kuu nda cristiano nda̱a̱?

1. ¿Naguá kuu ɨn cristiano nda̱a̱?

Nda cristiano kuu nda ñayí ja ndiki̱-ji Jesucristo (kaʼvi-ní Hechos 11:26). ¿Na̱sa ka steʼen-ji ja ka ndiki̱ ndija-ji? Jesús ni kachi-de: “De tú cuiñi ni̱ʼin ro jíín tu̱ʼun stéʼe̱n ni nu̱u̱ ro, de cuu ndija ro nchivi̱ scuáʼa jíín ni̱” (Juan 8:31). Yaʼa kúni kaʼan ja nda cristiano nda̱a̱ jiniñuʼun kandija nda tuʼun ja steʼen Jesús. Nda cristiano nda̱a̱ ka kandija-ji nda tuʼun ja steʼen Biblia, tanu ni saʼa Jesús ja ni steʼen-de nda tuʼun ja vaji nu̱u̱ Biblia (kaʼvi-ní Lucas 24:27).

2. ¿Na̱sa steʼen nda cristiano nda̱a̱ ja kundaʼvi ini-ji nda taʼan-ji?

Jesús ni kachi-de nu̱u̱ nda discípulo-de: “Cundáʼví ini̱ ro táʼán ro, tá cúu nu̱u̱ cúndáʼví ini̱ ni ndá máá ro” (Juan 15:12). ¿Na̱sa ni steʼen Jesús ja kundaʼvi ini-de nda discípulo-de? Ni jeʼe-de tiempo-de nu̱u̱ nda-ji, ni jeʼe-de tuʼun ndeé ini ji ni chindeé-de, ji nde jeʼe-de ja teku-de ja sɨkɨ nda-ji (1 Juan 3:16). Tanu Jesús, nda cristiano nda̱a̱ ma sú ni̱ ja ka kaʼan-ji ja kundaʼvi ini-ji nda taʼan-ji; chi ka steʼen-ji jín tiñu ja ka saʼa-ji.

3. ¿Na tiñu kánuu ka kuu ja ka saʼa nda cristiano nda̱a̱?

Jesús ni jeʼe-de ɨn tiñu nu̱u̱ nda discípulo-de, “ni̱ ntají ya̱ ndá de̱ ja̱ nacani de̱ tu̱ʼun na̱sa tátúni̱ Ya̱a̱ Dios” (Lucas 9:2). Nda cristiano xinañuʼun ni ka kaʼan-de Tuʼun Yandios nu̱u̱ veʼe ka ndutútú-de, suni ni ka kaʼan-de Tuʼun Yandios nu̱u̱ iyo kuaʼa nda ñayí ji nu̱u̱ veʼe nda ñayí (kaʼvi-ní Hechos 5:42; 17:17). Kɨvɨ mita nda cristiano nda̱a̱ suni ka kaʼan-ji nda tuʼun ja steʼen Biblia nu̱u̱ iyo kuaʼa nda ñayí. Sɨkɨ ja ka kundaʼvi ini-ji nda taʼan-ji, ka jatiñu sii-ji tiempo-ji ja ndakui-ji tágua ka kaʼan-ji tuʼun ndeé ini ji ja kachi Biblia (Marcos 12:31).

NÁ KUTUʼVA KA-YO SƗKƗ TUʼUN YAʼA

4. Ka nandukú-ji tuʼun nda̱a̱ ja kachi Biblia

Ma sú ndɨʼɨ nda ñayí ja kachi-ji ja kuu-ji cristiano teya̱ʼvi-ji nda tuʼun ja steʼen Biblia. Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:

VIDEO: Na̱sa ni tivi̱ cristianismo (5:11)

• Sava nda veñuʼun ja ka kachi ja kuu cristiano ni ka jasi̱ tágua nda ñayí ma ka kutuʼva-ji nda tuʼun ja ni steʼen Jesús, ¿de na̱sa ni ka saʼa-ji?

Jesús ni steʼen-de tuʼun nda̱a̱ ja vaji nu̱u̱ Tuʼun Yandios. Ka kaʼvi-ní Juan 18:37 de ka ndatuʼun-ní sɨkɨ nda tuʼun yaʼa:

• Tanu ni kachi Jesús, ¿na̱sa kuu kuni-yo nde kuu nda cristiano ja jetaʼvi “tu̱ʼun nda̱a̱”?

5. Ka steʼen-ji tuʼun nda̱a̱ ja vaji nu̱u̱ Biblia

Ta nchaʼa ka ndikó Jesús andɨvɨ́ ni jeʼe-de ɨn tiñu nu̱u̱ nda discípulo-de ɨn tiñu ja ka saʼa-ji nde kɨvɨ mita. Ka kaʼvi-ní Mateo 28:19, 20 ji Hechos 1:8, de ka ndatuʼun-ní sɨkɨ nda tuʼun yaʼa:

• ¿Ndenu ji nde na tiempo ka kaʼan-ji Tuʼun Yandios?

6. Ka saʼa-ji ja ka steʼen-ji

¿Nakú ni ñúʼun ka̱jí ini ɨn teé nani Tom ja ni ndaniʼi-de nda cristiano nda̱a̱? Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:

VIDEO: Nduu ni taʼa̱n ini-sa ja ni ndaniʼi-sa nu̱u̱ religión (5:20)

• Tanu kachi video, ¿nakú nduu ni taʼa̱n ini Tom ja ni ndaniʼi-de nu̱u̱ religión?

• ¿Nakú ni ñúʼun ka̱jí ini Tom ja ni ndaniʼi-de ja nda̱a̱?

Nda tuʼun ja kaʼan-yo ná steʼen-yo jín tiñu ja saʼa-yo. Ka kaʼvi-ní Mateo 7:21 de ka ndatuʼun-ní sɨkɨ nda tuʼun yaʼa:

• ¿Naguá kuu ja kánuu ka nu̱u̱ Jesús: a nda tuʼun ja kaʼan-yo, axi nda tiñu ja saʼa-yo?

7. Ka kundaʼvi taʼan ini-ji

¿A ka skáku nda cristiano nda̱a̱ nda ñani̱-ji? Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:

VIDEO: Ni skáku-de ñani̱-de (2:55)

• ¿Naguá kuu ja ni saʼa ja ñani̱ Lloyd tágua skáku-de ñani̱-de Johansson?

• ¿A káʼán-ní ja ni saʼa-de tanu ɨn cristiano nda̱a̱?

• ¿Na̱sa jiniñuʼun kundeʼe nda discípulo Jesús —nda cristiano nda̱a̱— nu̱u̱ nda ñayí ja ka kuu-ji inka ñuu?

• ¿De na̱sa kuu ka saʼa-ji sukua ta iyo ja kana̱á ñayí?

JA NI KUTUʼVA-YO

Nda cristiano nda̱a̱ ka ndiki̱-ji nda tuʼun ja steʼen Biblia, ka kundaʼvi ini taʼan-ji de ka steʼen-ji tuʼun nda̱a̱ ja vaji nu̱u̱ Biblia.

Tuʼun núku̱n ini

• ¿Ndenu ka tava̱ nda cristiano nda̱a̱ tuʼun ja ka kandija-ji?

• ¿Na ja vaʼa ini ka nevaʼa nda cristiano nda̱a̱?

• ¿De na tiñu ka saʼa-ji?

NU̱U̱ NDANIʼI KA-NÍ TUʼUN

Kuni vaʼa ka-ní ɨn grupo ja chuʼun ini kundiki̱ ejemplo ji nda tuʼun ja ni steʼen Jesucristo.

¿Na ñayí ka kuu nda testigo Jeová? (1:13)

Kaʼvi-ní na̱sa kuu ja ɨn ñaʼan ja ni kuu-ña monja ni ndaniʼi-ña “nda ñayí ja kuu tanu taʼan veʼe-ña”.

“Ni ka xndikó ndɨʼɨ-de nda tuʼun ja jikatuʼun-sa jín Biblia” (La Atalaya, 1 yo̱o̱ abril kuiya 2014)

Kundeʼe-ní na̱sa nda cristiano nda̱a̱ ka steʼen-ji ja ka kundaʼvi ini-ji nu̱u̱ nda ñani̱-ji ta iyo tundoʼo.

Ka chíndeé-yo nda ñani̱-yo ta kenda ɨn tundoʼo (fragmento) (3:57)

Jesús ni kachi-de na̱sa ka saʼa nda ñayí ja ndiki̱ nu̱u̱-de. Kutuʼva-ní na̱sa ni ka saʼa nda cristiano xinañuʼun sukua ji suni na̱sa ka saʼa nda cristiano nda̱a̱ kɨvɨ mita.

“¿Naguá kuu ja saʼa ja kuu ndakuni nda cristiano nda̱a̱?” (La Atalaya, 1 yo̱o̱ marzo kuiya 2012)