October

Nega haida emu ai e aukamu ma haida edia hereva ba badina, a? King David enai na e vara, una dainai ia na Dirava e ḡuriḡuri henia, eto: “Oi baina badinamu urana na lau lalogu ai ba havaraia.” (Sal. 51:​12, NWT) David na Iehova e lalokau henia. To, nega haida na e hekwarahiva Dirava baine badinaia, bona ita danu unu bamona. Dahaka dainai? Badi ginigunana na, ita na Adam besena dainai gwau-edeede urana na ita lalodai. Badi iharuana na, Satana na nega iboudiai e uramu ita baine koida unu amo ia bamona baita gwau-edeede. (2 Kor. 11:3) Badi ihatoina na, ita na gwau-edeede taudia bogaraḡidiai ta nohomu. Baibul na e gwaumu, “laumana bunai gwau-edeede memerodia lalodia ai e ḡaukaramu.” (Efe. 2:2) Namona na baita hekwarahi kara dika ikarana urana, Diabolo bona ina tanobada baita dadaraidia, unu amo Iehova bona ia ese siahu e henidia taudia baita badinadia. w23.10 rau 6 par. 1

Iesu ese hoa dalana ai ranu na wain ai e halaoa karana amo dahaka ta dibamu? Manau karana ta dibaiamu. Iesu na una hoa karana e karaia neganai se heaḡi. Momokani, ia na e haḡuḡuru ḡaudia iboudiai daidiai na se heaḡi. To, nega iboudiai mai manauna ida Tamana mo ladana e abia isimu bona e imodaiamu. (Ioa. 5:​19, 30; 8:28) Bema Iesu ena manau karana baita tohotohoamu, baita karamu ḡaudia na basita heaḡilaimu. Namona na dia siboda baita heaḡi, to ta hesiai heniamu Diravana baita heaḡilaia. (Ier. 9:​23, 24) Ia sibona baita imodaia na namo. Badina iena heduru amo hesiai ḡaukaradia ta haḡuḡurumu. (1 Kor. 1:​26-31) Baita manaumu neganai, haida idurudiai ta karamu ḡau namodia daidiai na basita heaḡi. Ta moalemu badina ta dibamu Iehova ese ta karamu ḡaudia na e itamu bona e lalo badamu. (Mataio 6:​2-4 ba haheḡereḡerea; Heb. 13:16) Momokani, Iesu ta tohotohoamu bona manau karana ta hahedinaraiamu neganai, Iehova ta hamoaleamu.—1 Pet. 5:6. w23.04 rau 4 par. 9; rau 5 par. 11-12

Lauma helaḡa ena heduru amo, aposetolo Paulo ese Kristen taudia e hagoadadia ma haida edia namo bae lalo. Hebou lalodiai una sisiba be ede baita badinaia toma? Baita helalotao, haida danu e uramu bae haere. Mani ina a laloa: Turamu ida bo herevaherevamu neganai, oi mo bo hereva momomu dainai idia na asi edia nega bae hereva, a? Lasi. Oi na bo uramu idia danu bae hereva. Una heḡereḡerena, hebou ai, ita na ta uramu momo bae haere. Momokani, iseda tadikaka taihu baita hagoadadia dalana ta na, nega baita henidia edia abidadama bae herevalai. (1 Kor. 10:24) Una dainai iseda haere baita hakwadoḡidia, unu amo momo bae haere diba. Ena be emu haere na kwadoḡi, to point momo basio herevalai. Bema paragraf lalonai point iboudiai bo herevalaimu, haida na asi edia haere herevadia. w23.04 rau 22-23 par. 11-13

Namona na baita helalotao eda haroro ḡaukarana amo ma haida baita durudia na mai anina bada. Haroro ḡaukara ai, eda haroro daladia baita haidau na namo. Badina ta davaridiamu taudia edia mauri daladia, e abi daemu ḡaudia bona edia kara na idauidau. Aposetolo Paulo ese ena haroro daladia na e haidauva, bona iena haheitalai amo ḡau haida baita diba. Iesu ese Paulo na e abia hidi ‘aposetolo tauna bese idau-idau ediai” ela. (Roma 11:13) Una dainai, Paulo ese Iuda taudia, Grik taudia, aonega taudia, ogoḡami taudia, gavamani taudia, bona king e haroro henidia. Paulo na taunimanima idauidau iboudiai ‘edia ḡau idau-idau iboudiai ela,’ kudoudia baine hamarere totona. (1 Kor. 9:​19-22) Ia ese taunimanima edia kastom, noho daladia, bona e abi dae ḡaudia e haerodia bona una heḡereḡeredia ai e haroro henidia. Ita danu ta haroro henidiamu taudia ta ta edia noho daladia baita haerodia bona una heḡereḡerena baita durudia. w23.07 rau 23 par. 11-12

Manau karana na lalo goada karana. Una kara e hahedinaraiamu tauna na hekwakwanai negadiai e lalo-mainomu. Manau na “lauma huahuana ta.” (Gal. 5:​22, 23) Greek gado ai ina hereva “manau” e ḡaukaralaia neganai, nega haida una na daḡedaḡe hosina ta e hamanadaiamu karana e herevalaiamu. Mani e hamanadaia hosina aita laloa, ia na e manada to mai goadana. To, ita taunimanima be edena dala ai baita manau bona baita lalo goada? Dirava baita noia ena lauma helaḡa amo baine duruda unu kara baita hahedinarai. Tadikaka taihu momo na unu e kara toma. Idia na haida ese e habadudia neganai manau karana e hahedinaraia, unu amo ma haida e durudia Witnes taudia ediai lalohadai maorona e abia.—2 Tim. 2:​24, 25. w23.09 rau 15 par. 3

Aposetolo Ioane na matahanai ta lalonai e itaia elda 24 na guba ai Iehova e tomadiho henia. Idia ese Dirava e imodaia bona eto ia ese “hairai bona hemataurai bona siahu” baine abi na maoro. (Apok. 4:​10, 11) Kamonai anerudia danu badi momo daidiai Iehova e imodaiamu. Idia na guba ai bona mai dibadia namonamo ia. Ia ese e kara ḡaudia e itamu neganai ena kara namodia e dibamu. Oibe, Iehova ena kara e haerodiamu neganai e imodaiamu. (Iobu 38:​4-7) Ita danu eda ḡuriḡuri lalonai Iehova baita imodaia, baita hamaoroa dahaka dainai ia ta lalokau heniamu bona ta matauraiamu. Baibul o duahiamu bona o stadilaiamu neganai, Iehova ena kara namodia, oi ese o moalelaimu karadia, ba tahudia. (Iobu 37:23; Roma 11:33) Bona unu kara namodia daidiai emu hemami na Iehova ba hamaoroalaia. Danu, Iehova baita imodaia badina ia ese ita bona eda tadikaka taihu na e durudamu.—1 Sam. 2:​1, 2. w23.05 rau 3-4 par. 6-7

Laḡani 1919 ai, Babulono Badana ese Dirava ena taunimanima na asie biagudia lou. Una laḡani ai, “hesiai tauna mai ena kamonai bona mai ena kara maoromaoro” na e ḡaukara matama, kudou maoro taudia e durudia “Dala Helaḡana” ai e raka. (Mat. 24:​45-47; Isa. 35:8) Ta moalemu badina guna una “dala ihanamona ḡaukarana” e karaia taudia edia ḡaukara dainai ma haida na una dala ai e raka matama bena Iehova bona ena ura e dibadia namonamo. (Her. 4:18) Danu edia mauri na Iehova ena ura heḡereḡerenai e haidaua. Iehova na se laloa ena taunimanima na nega tamona edia kara bae haidau haraḡa, to taina ruana e durudia. Baita karamu ḡaudia iboudiai amo Iehova baita hanamoamu neganai baita moalemu! Dala iboudiai na hanaihanai bae hanamodia na namo. Laḡani 1919 amo, “Dala Helaḡana” ihanamona ḡaukarana na dounu e karaiamu, unu amo ma taunimanima momo ese Babulono Badana bae rakatania. w23.05 rau 17 par. 15; rau 19 par. 16

Gavanin Bodi ena komiti idauidau e durudiamu tadikakadia danu treinin e henidiamu, una dainai idia ese edia maduna na e huadia namonamomu. Oibe, idia na heḡaeḡae Keriso ena mamoe ireḡuna ḡaukarana bae karaia. Hisihisi badana dokona kahanai horoa taudia oredia na guba be laomu neganai, tanobada ai Iehova ena taunimanima na dounu ia be toma henia dihomu. Ta moalemu badina Iesu Keriso ena hahekau henunai una na be varamu. Una negai, Gog, Magog tauna o tanobada idoinai gavamanidia iboudiai ese Dirava ena taunimanima be tuari henidiamu. (Esek. 38:​18-20) To idia na basie kwalimumu bona Iehova Dirava itoma diho henina karana na basie kouamu. Iehova ese ena taunimanima na be hamauridiamu! Aposetolo Ioane na matahanai ta lalonai, Keriso ena mamoe idaudia e itadia, idia na “hutuma bada-herea.” Bona “hisihisi badana amo vada ema.” (Apok. 7:​9, 14) Ta dibamu, Iehova ese idia na be naridiamu! w24.02 rau 5-6 par. 13-14

Dahaka baita kara lauma helaḡa baita abia totona? Namona na baita ḡuriḡuri, Dirava ena Hereva baita stadilaia, bona iena lauma helaḡa ese e hakauamu oreana baita badinaia. Unu baita kara tomamu neganai, be durudamu “lauma huahuana” baita hahedinaraiamu. (Gal. 5:​22, 23) Lalohadai namodia e abimu bona kara namodia e karamu taudia na Dirava ese ena lauma helaḡa e henidiamu. A bema lalohadai mirodia baita abimu bona kara dikadia baita karamu lauma helaḡa na basine henidamu. (1 Tes. 4:​7, 8) Danu, lauma helaḡa baita abia totona, “peroveta herevadia” basita dadarai na namo. (1 Tes. 5:20) “Peroveta herevadia” anina na Dirava ese ena lauma helaḡa amo e henidamu herevadia, idia haida na Iehova ena dina bona iseda nega oromana dokona. Basita lalo Aramagedono na dia iseda negai be varamu. To, una na kahirakahira be kaumu, una dainai Dirava ibadinana karadia baita hahedinarai bona eda kara na bae ḡoeva.—2 Pet. 3:​11, 12. w23.06 rau 12 par. 13-14

Ita na Kristen taudia dainai, dahaka baita kara bema eda fon o tablet ai ponografi laulauna ta e hedinaraimu? Basita itaia to baita dadaraia haraḡa na namo. Unu baita kara tomamu bema eda hetura karana Iehova ida na ta laloa badamu. Ena be laulau haida na dia ponografi laulaudia, to unu ese matabodaḡa lalohadaidia bae havara diba. Dahaka dainai baita dadaraidia? Badina asita uramu lalohadai dikadia baita abi bona karadia baita kara. (Mat. 5:​28, 29) Thailand ai, elda ta ladana David na e gwaumu: “Lau na sibogu na henanadaimu: ‘Ena be laulau haida na dia ponografi laulaudia, to dounu ba itamu neganai Iehova be moalemu eiava?’ Henanadai unu bamona ese e durugumu kara maorona baina karaia.” Kara maorona baita karaia totona Iehova garina baita gari bona ihabaduna karana ta basita karaia. Dirava igari henina na “aonega matamana.” w23.06 rau 23 par. 12-13

Ina hereva “daiutu” anina na reana eda kongrigeisin e herevalaidiamu. Hisihisi bada hereana lalonai, Iehova na ena gwauhamata heḡereḡerena be gimadamu bema tadikaka taihu ida lalotamona ai baita nohomu. Una dainai, namona na hari baita hekwarahi dia tadikaka taihu edia kara mo baita haheaukalai, to baita lalokau henidia danu. Unu amo baita roho mauri dibamu! “Iehova ena dina badana” ai taunimanima ediai mauri na be auka hereamu. (Sef. 1:​14, 15) Iehova ena taunimanima danu hekwakwanai idauidau be davarimu. To bema hari baita heḡaeḡaemu, basita lalohekwarahimu bona ma haida baita durudiamu. Baita davarimu hekwakwanaidia iboudiai baita haheaukalai dibamu. Eda tadikaka taihu na dika be davarimu neganai, hebogahisi dainai baita ḡaukara goadamu idia baita durudiamu bona edia dabu ḡaudia baita henimu. Bona bema hari eda tadikaka taihu baita lalokau henidiamu, vaira negai una lalokau na dounu baita hahedinaraiamu. Unu baita kara tomamu neganai, Iehova ese ina tanobada ai mauri hanaihanai be henidamu, unuseniai disasta bona hisihisi iboudiai na baita lalodia boiomu.—Isa. 65:17. w23.07 rau 7 par. 16-17

Baibul ese Dirava e hesiai henia taudia na e gwauraidiamu abidadama taudia. To nega haida idia na e hemamiva idia na asi goadadia. Heḡereḡere, King David na nega haida e hemamiva ena goada na “ororo aukana na heto,” a nega haida be e gariva dainai ‘kudouna e hetahava.’ (Sal. 30:7) Samson na Dirava ena lauma helaḡa ena heduru dainai, ena goada na e bada herea, to e laloparara bema Dirava ena heduru na lasi ia na bema manoka “taunimanima iboudiai heḡereḡeredia.” (Hah. 14:​5, 6; 16:17) Unu abidadama tataudia na Iehova ena heduru dainai e goada. Aposetolo Paulo danu e laloparara Iehova ena amo goada baine abi na namo. (2 Kor. 12:​9, 10) Paulo na e gorereava. (Gal. 4:​13, 14) Nega haida kara namo ikarana na e urava, to se heḡereḡereva. (Roma 7:​18, 19) Bona nega haida be e lalohekwarahiva badina asi dibana ia enai be dahaka be varamu. (2 Kor. 1:​8, 9) To Paulo na ena manoka negadiai e goadava. Edena dala ai? Iehova ese Paulo na goada e henia ena hekwakwanai baine haheaukalaidia. w23.10 rau 12 par. 1-2

Bema nega haida ta hemamimu ita na asi anida, namona na baita helalotao ita na Iehova sibona ese e boirida. (Ioa. 6:44) Iehova ese iseda kara namodia na e lalo badamu bona ia na mai dibana ita kudouda ai be dahaka ta lalomu. (2 Sis. 6:30) Una dainai bema ia na e gwaumu, ita na e lalokau henidamu, baita abia dae na namo. (1 Ioa. 3:​19, 20) Hereva momokani do asita diba neganai ta karava ḡaudia daidiai, hari ita haida na doini ta lalo-hisihisimu. (1 Pet. 4:3) Ena be haida na laḡani daudau Iehova vada e hesiai henia, to edia manoka ḡaudia daidiai doini e hekwarahimu. Oi emu ai unu e vara tomamu, a? O laloamu Dirava ese emu dika be gwautaomu, eiava? Namona na ba diba Iehova e hesiai heniava taudia haida danu unu e hemami tomava. Heḡereḡere, Paulo na ena kara gunadia e lalova dainai ina hereva “ihabaigu” e ḡaukaralaia. (Roma 7:24) Ena be Paulo na ena kara dika amo e helalo-kerehai bona e bapatiso. To ia na e gwa: “Aposetolo iboudiai ese lau e hereagumu” bona ma eto kara dika taudia padadiai ia na “dika hereana.”—1 Kor. 15:9; 1 Tim. 1:15. w24.03 rau 27 par. 5-6

King Ioasa ena abi hidi kererena amo ta dibaiamu ḡauna ta na, namona na Iehova e lalokau heniamu bona e uramu ia bae hamoalea taudia baita bamodia. Danu, laḡanidia idauidau taudia—matamata taudia bona burukadia—baita bamodia. Ba helalotao, Ioasa laḡanina be maraḡi, a ia turana Iehoiada laḡanina be bada. Bema oi na o uramu turamu bavabidia hidi, sibomu ba henanadai: ‘Idia ese lau be durugumu egu abidadama Iehova enai baina hagoadaia, a? Idia ese lau be hagoadagumu Dirava ena taravatu baina badinadia, a? Idia be Iehova bona iena hereva momokanidia e herevalaimu, eiava? Dirava ena taravatu e matauraidiamu, a? Idia be lau be durugumu egu kerere baina hamaoromaorodia, a?’ (Her. 27:​5, 6, 17) Bema turamu na Iehova asie lalokau heniamu, basio bamodia. To bema Iehova e lalokau heniamu, ba bamodia, badina idia ese oi na be durumumu.—Her. 13:20. w23.09 rau 9-10 par. 6-7

Grik gado ena alfabet ai alefa na leta ginigunana bona omega be leta ginigabena. Iehova na e gwa “Lau na Alefa bona Omega” neganai, ita e hadibadamu ia ese e hamatamaia ḡauna na baine haḡuḡurua. Iehova ese Adam bona Eva e hanamodia, eto, “Besemui ba havaradia, ba hutuma; tanobada ba hahonua bona ba biagua.” (Gen. 1:28) Iehova na una hereva e gwauraia neganai, vaitani e gwa: “Alefa.” Gabeai Adam bona Heva natudia ḡoevadaedia ese tanobada be hahonuamu bona paradaiso ai be halaoamu. Una nega ai Iehova ena ura vada be ḡuḡurumu, bena Ia na vaitani be gwaumu, “Omega.” Iehova ese “guba bona tanobada mai anidia idoidiai” e karadia murinai, e gwauraia herevana ta ese e hahedinaraia iena ura na baine haḡuḡurua vaitani. Anina na dina namba 7 dokonai, Iehova ese ena ura taunimanima bona tanobada totodia na baine haḡuḡurua vaitani.—Gen. 2:​1-3. w23.11 rau 5 par. 13-14

Babulono amo Israel baela laolaona na hua 4 heḡereḡerena, to Iehova na e gwauhamata edia dala bae kou ḡaudia baine kokidia. Abidadama Iuda taudia ediai Israel bae lou lao hahenamona ese bae rakatani ḡaudia na e hereaidia. To hahenamo hereadaena na edia tomadiho karana.To Babulono ai Dirava itomadiho henina dubuna ta na lasi. Bona boubou patana ta na lasi Israel taudia ese Mose ena Taravatu heḡereḡerena, boubou ḡaudia bae heni totona. Danu hahelaḡa taudia na lasi, boubou ḡaudia bae heni. Dia una mo to dirava koikoidia e tomadiho henidiava bona Iehova bona ena taravatu asie lalova taudia na hutuma herea. Una dainai Dirava e gari heniava Iuda taudia tausen momo, na e ura dikadika edia tano bae lou lao tomadiho ḡoevana bae haginia lou totona. w23.05 rau 14-15 par. 3-4

Dahaka dainai Dirava ena lauma helaḡa ena heduru baita abia na mai anina bada? Badina ina tanobada dikana lalonai kara namodia baita hahedinarai na mai hekwarahina. (1 Tes. 4:​3-5, 7, 8) Una dainai lauma helaḡa ena heduru amo ina tanobada ena lalohadai na baita dadaraia diba. Danu “diari huahuadia” baita hahedinaraimu, heḡereḡere “lalohadai namodia” bona “kara maoromaorodia.” (Efe. 5:9) Dirava ese ena lauma helaḡa baine henida totona, ḡuriḡuri amo ia baita noia. Iesu na e gwa Iehova ese “Lauma Helaḡa inoina taudia” na baine henidia. (Luka 11:13) Bona eda Kristen heboudiai Iehova baita hanamoa heboumu neganai, lauma helaḡa na be henidamu. (Efe. 5:​19, 20) Unu dala idauidau ai Dirava ena lauma helaḡa ena heduru baita abiamu dainai, ia ihamoalena karadia baita karamu. w24.03 rau 23-24 par. 13-15

Baita haheauka totona baita ḡuriḡuri. Haheauka na Dirava ena lauma huahuana ta. (Gal. 5:​22, 23) Una dainai, Iehova baita noia ena lauma helaḡa baine henida una kara baita hahedinaraia totona. Bema eda haheauka e tohoamu hahetohona ta e varamu, baita “noinoi” loulou baine duruda baita haheauka totona. (Luka 11:13) Danu Iehova baita noia baine duruda ena lalohadai heḡereḡerena ai ḡau baita haero. Bona dina ta ta ai baita hekwarahi baita haheauka. Bema baita ḡuriḡuri louloumu bona baita hekwarahimu haheauka karana baita hahedinaraia, una kara na baita manadalaiamu. Baibul ai haheitalai namodia baita lalodia dobu. Baibul ese haheauka taudia momo e herevalaidia. Edia sivarai baita lalodia dobumu neganai, haheauka daladia baita dibamu. w23.08 rau 22 par. 10-11

Iesu ese aposetolo Petro e hamaoroa Iehova ese ia na be duruamu. Iesu ese Petro bona aposetolo ma haida e durudia gwarume momo herea ma e veri. (Ioa. 21:​4-6) Petro na una hoa karana amo e diba Iehova ese iena dabu ḡaudia na baine heni diba. Reana Petro na Iesu ena hereva e laloa lou, Iehova ese “Basileia” e tahua gunamu taudia na baine durudia. (Mat. 6:33) Una ese Petro e durua dainai, ena mauri lalonai haroro ḡaukarana e atoa guna, a haoda ḡaukarana be gabeai. Pentekost 33 C.E. ai, ia na e haroro goadagoada bona taunimanima momo e durudia sivarai namona e abia dae. (Apos. 2:​14, 37-41) Una murinai ia ese Samaria taudia bona Idau Bese taudia e durudia Keriso e abia dae. (Apos. 8:​14-17; 10:​44-48) Iehova ese Petro e ḡaukaralaia taunimanima idauidau e durudia kongrigeisin lalonai e vareai. w23.09 rau 20 par. 1; rau 23 par. 11

Babulono taudia ese Ierusalem e hadikaia bena laḡani rua mai kahana muridiai, King Nebukadnesara na ena nihi lalonai e itaia kaivakuku badana ta dainai e lalohekwarahi. Bona e haheḡani aonega tataudia iboudiai, Daniel danu, bae hamasedia bema iena nihi bona anina basie hamaorolaia. (Dan. 2:​3-5) Daniel na kara ta baine karaia haraḡa na namo, bema lasi, momo bae mase diba. Ia na “e raka vareai, hanua pavapavana e noia, nega ta baine gwaurai henia, nihi anina na hanua pavapavana baine hamaorolaia helaoreana.” (Dan. 2:16) Una ese e hahedinaraia Daniel na e lalo goada bona e abidadama. Baibul ese na se hahedinaraia Daniel na guna nihi anidia e gwaurai. Ia ese turana e noidia “guba Diravana ena hebogahisi bae tahua, una ḡau hehunina dainai.” (Dan. 2:18) Iehova ese edia ḡuriḡuri na e haerelai. Dirava ena heduru amo Daniel ese Nebukadnesara ena nihi anina e gwauraia hedinarai. Una dainai, Daniel bona turana na asie mase. w23.08 rau 3 par. 4

Haheauka ena namo ba laloa. Baita haheaukamu neganai, baita moalemu, basita lalohekwarahimu bona basita gorere momomu. Haida edia kara baita haheaukalaimu neganai turadia namodia ai baita laomu. Bona eda kongrigeisin taudia ida lalotamona ai baita nohomu. Bema ta ese laloda be hahisiamu to basita badulaia haraḡamu neganai, hekwakwanai na basine badamu. (Sal. 37:8; Her. 14:29) To mai anina bada ḡauna na, ita na Tamada guba ai ta tohotohoamu bona eda hetura karana ia ida na be goadamu. Haheauka na kara namona ta bona ita iboudai e durudamu karana! Ena be nega haida na auka una kara baita hahedinaraia, to Iehova ena heduru amo dounu baita haheauka diba. Bona mai haheaukada ida tanobada matamatana ta nariamu lalonai, baita abia dae “Iehova ese ia garina e garimu taudia na e itadiamu; iena hebogahisi e laroamu taudia ia ese e itadia taomu.” (Sal. 33:18) Namona na laloda baita hadai nega iboudiai baita haheauka. w23.08 rau 22 par. 7; rau 25 par. 16-17

Iakobo na e gwa, reana tau ta na be laloamu ia na mai ena abidadama, to iena kara amo una e hahedinaraiamu, eiava? (Iak. 2:​1-5, 9) Danu, Iakobo na e gwa, tau ta na tadikakana eiava taihuna ta baine itaia asi ena dabua eiava asi ana, to basine durua, ena be una tau na baine gwa ia na mai ena abidadama to ena kara ai basine hahedinaraia, iena abidadama na asi anina. (Iak. 2:​14-17) Iakobo ese abidadama mai ena kara e herevalaia neganai, Rahaba ena haheitalai namona e herevalaia. (Iak. 2:​25, 26) Rahaba ese Iehova sivaraina na e kamonai bona e diba ia ese Israel taudia e durudiava. (Ios. 2:​9-11) Iena abidadama na ena kara amo e hahedinaraia—ia ese Israel spai taudia rarua e gimadia. Una dainai, ena be ia na dia Israel hahinena bona dia ḡoevadae, to Dirava ese maorona e gwaurai, Abraham heḡereḡerena. Rahaba ena haheitalai amo ta dibamu eda abidadama na kara amo baita hahedinaraia na mai anina bada. w23.12 rau 5-6 par. 12-13

Ita na Kristen tauda dainai, Baibul ena hereva badadia mo baita diba na dia heḡereḡere. To namona na Dirava ena lauma ese baine duruda, “Dirava ena dobu ḡaudia” danu baita lalopararalaidia. (1 Kor. 2:​9, 10) Reana sibomu emu stadi projek ta ba karaia, unu amo emu hetura karana Iehova ida ba hagoadaia. Heḡereḡere, idaunegai Iehova ese ena hesiai taudia e lalokau henidia dalana baita itaiamu neganai, una ese e hamomokaniamu oi danu e lalokau henimumu. Danu, Israel taudia ese Iehova e tomadiho heniava dalana bona hari iseda negai Kristen tomadiho dalana ba haheḡereḡeredia. Eiava reana Iesu ena mauri bona haroro ḡaukara ai e ḡuḡuru peroveta herevadia ba stadilaidia. Unu topik istadilaidia karana ba moalelaia totona, Watch Tower Publications Index eiava Research Guide for Jehovah’s Witnesses ba ḡaukaralaidia diba. Baibul bo stadilaia dobumu neganai, emu abidadama na be goadamu bona be durumumu ‘Dirava bo dibaiamu.’—Her. 2:​4, 5. w23.10 rau 18-19 par. 3-5

Aposetolo Petro ena hereva “ba heura heheni mai lalomui idoidiai,” anina na mai momokanida ida una kara baita hahedinaraia. Una siri dokonai, ina hereva ‘tahuni’ e ḡaukaralaia, anina na tadikaka taihu edia dika baita gwautao. Ini aita haheitalaia toma: Teibolo ta ai maka-maka na momo, oi na dabua ta bo tahoamu, dia maka tamona mo to maka iboudiai bo koudiamu. Dabua ese maka iboudiai e koumu heḡereḡerena, mai laloda idoinai ida tadikaka taihu baita lalokau henidiamu neganai, edia kara dika, dia ta o rua to iboudiai baita gwaudia taomu. Oibe, tadikakada ta lalokau henidia badamu dainai, edia dika na ta gwaudia taomu, ena be nega haida unu baita kara toma na auka. (Kol. 3:13) Tadikakada edia dika ta gwau taomu neganai, ta hahedinaraiamu eda lalokau idia ediai na goada bona ta uramu Iehova baita hamoalea. w23.11 rau 11-12 par. 13-15

King Iosia na laḡanina 26 ai dubu helaḡa e hanamoa lou. Una ḡaukara lalonai “Iehova ena taravatu bukana, Mose ena amo e heni ḡauna” e davaria. King na una taravatu bukana ai e heduahi herevadia e kamonai neganai, maoromaoro e badinadia. (2 Sis. 34:​14, 19-21) Oi be o uramu Baibul ba duahia hanaihanai, a? Reana dina ta ta ai do duahiamu, to o moalelaiamu, a? Oi e durumumu siridia be o lalotaomu, a? Iosia na laḡanina 39 neganai, ia na sibona ena diba ai e tabekau, bona Iehova ena heduru na se tahua. (2 Sis. 35:​20-25) Una ese ita na ḡau ta e hadibadamu. Herevana ita laḡanida na bada eiava maraḡi, o laḡani hida Baibul vada ta stadilaia, to hanaihanai Iehova baita tahua. Anina na ia enai heduru baita abi totona, hanaihanai baita ḡuriḡuri, Baibul baita stadilaia, bona lo Kristen taudia edia sisiba namodia baita badina. Unu amo ita na kerere badadia basita karamu, bona baita moalemu.—Iak. 1:25. w23.09 rau 12 par. 15-16

Baibul ai Iehova e lalokau heniava bona e hesiai heniava hahinedia momo sivaraidia bo davarimu. Idia na e “boga auka” bona ḡau iboudiai lalodiai e “heabidadama” o kamonai karana e hahedinaraia. (1 Tim. 3:11) Danu, taihu na edia kongrigeisin ai Iehova e lalokau heniamu lo Kristen taihudia edia haheitalai bae tohotoho diba. Matamata taihumui, emui kongrigeisin ai ba itaia ededia taihu be haheitalai namodia bona o uramu ba tohotohodia. Edia kara namodia ba ita, bona unu kara namodia ba tohotoho daladia ba lalo. Lo Kristen tauna ena kara badana na manau. Bema taihu na be manaumu, ena hetura karana Iehova bona ma haida ida na be moalelaiamu. Heḡereḡere, Iehova e lalokau heniamu hahinena na be manaumu dainai Iehova ese e atoa kwara dagina ena hahekau dalana be badinaiamu. (1 Kor. 11:3) Una hahekau herevana na mai anina bada kongrigeisin bona ruma bese lalonai. w23.12 rau 18-19 par. 3-5

Iehova na e uramu tau ese adavana na baine lalokau henia, tauani dalanai baine naria, turana namona ai baine halaoa, bona baine durua Iehova baine hetura henia. Ḡau bo haero namonamomu, hahine bo matauraidiamu, bona bo ḡaukara goadamu neganai, oi na tau namona bona ruma bese kwarana namona ai bo laomu. Matamata tadikakamui, bo headavamu murinai reana umui na tama ta ai bo laomu. Tama namona ai baola totona, Iehova ena haheitalai amo oi be dahaka bo dibamu? (Efe. 6:4) Iehova ese natuna Iesu na e hamaoroa e lalokau heniamu bona e lalonamo heniamu. (Mat. 3:17) Bema oi na tama ta ai bo laomu, namona na hanaihanai natumu na ba hadibadia o lalokau henidiamu. Bona edia ḡaukara namodia daidiai ba hanamodia. Tama ese Iehova ena haheitalai e tohotohoamu neganai, natudia na e durudiamu lo Kristen taudia ai e laomu. Una maduna totona ba heḡaeḡae dalana na, hari mai emu lalokau ida emu ruma bese bona kongrigeisin taudia ba kara henidia, bona ba hadibadia idia na o lalokau henidiamu bona o lalodia badamu.—Ioa. 15:9. w23.12 rau 28-29 par. 17-18

Ita Iehova ena hesiai taudia danu taunimanima ese e davarimu hekwakwanaidia bona goreredia ta davarimu. Danu ita na inaida amo hisihisi bona daḡedaḡe ta davarimu. Ena be Iehova ese unu hekwakwanai na se laodia ahumu, to e gwauhamata ita na baine duruda. (Isa. 41:10) Iena heduru amo ita na baita moalemu, abi hidi maorodia, baita karamu, bona nega aukadiai ia baita badinaiamu. Iehova na e gwauhamata Baibul ese e gwauraiamu “Dirava ena maino” baine henida. (Fili. 4:​6, 7) Una na Iehova ida hetura karana amo e varamu mainona. Bona “eda diba idoinai e hereaiamu mainona.” Nega ta, mai kudoumu ibounai ida Iehova o ḡuriḡuri henia murinai emu hemami e namo, a? Una na “Dirava ena maino” ese e havaraiamu hemamina. w24.01 rau 20 par. 2; rau 21 par. 4

Dirava e lalokau heniamu abidadama taudia na mai kudoudia ibounai ida ia ladana e imodaiamu. King David na e laloparara Iehova ladana ta imodaiamu anina na Iehova ta hanamoamu. Iehova ladana ta kamonaiamu neganai, ena kara hereadaedia bona taunimanima daidiai e kara ḡaudia ta lalomu. David na e ura Tamana ladana helaḡana baine imodaia. Bona una na mai ‘kudouna idoinai’ ida e karaia. Levi taudia danu Iehova e imodaia. Idia na mai manaudia ida unu e kara toma, badina e laloparara Iehova ladana helaḡana ese heimodai iboudiai e hereadia. (Neh. 9:5) Oibe mai manaudia bona kudoudia ibounai ida Iehova e hanamoa karana ese ia na e hamoalea. w24.02 rau 9 par. 6

Ena be emu tahua ḡauna na basio haḡuḡuruamu, badina oi emu ai na dia heḡereḡere, Iehova na basine lalohisihisimu. (2 Kor. 8:12) Oi e koumumu ḡauna amo diba bavabi Guna o haḡuḡuru ḡaudia ba lalodia tao. Baibul na e gwaumu: “Dirava na asi ena kara gageva-gageva; emui ḡaukara . . . basine lalo boio.” (Heb. 6:10) Una dainai oi danu, guna o haḡuḡuru ḡaudia na basio lalo boio. Heḡereḡere emu hetura karana Iehova ida, ma haida ediai Iehova o herevalaia karana, eiava emu bapatiso. Iehova ihesiai henina ai o ato tahua ḡaudia o haḡuḡurudia heḡereḡerena, hari danu emu tahua ḡauna na bo haḡuḡurua dibamu. Iehova ena heduru amo emu tahua ḡauna na ba haḡuḡurua diba. Lauma dalanai o atomu tahua ḡaudia ihaḡuḡuruna ai o ḡaukara goadamu lalonai, Iehova ese oi e durumumu bona e hanamomumu daladia ba lalodia tao, unu amo bo moalemu. (2 Kor. 4:7) Basio hesikumu neganai, hahenamo momo bo abimu.—Gal. 6:9. w23.05 rau 31 par. 16-18

Iehova ese e lalokau henidiamu taudia na e hamaorodiamu ia ese e lalodia badamu. Baibul ai, nega rua Ia ese Iesu e hamaoroa eto: “Natugu binai, egu lalokau.” (Mat. 3:17; 17:5) Oi o uramu Iehova ese baine hamaoromu ia ese e lalokau henimumu? Ia na dia guba amo ita e hereva henidamu, to Baibul amo e hereva henidamu. Iesu ese ena hahediba taudia e hamaorodia eto: “Tamada ese e ura henimuimu.” Hereva unu bamodia ta duahimu neganai, ta lalo-pararamu Iehova ese ita na e lalokau henidamu. Iesu ese Tamana ena kara e hahedinarai ḡoevaḡoeva. Una dainai ena hahediba e hamaorodia “na lalokau henimuimu.” Hereva unu bamodia ta duahimu neganai, una na vaitani Iehova ese ita e hereva henidamu. (Ioa. 15:​9, 15) Bema hekwakwanai ta davari, nega unu bamodia ai, basitato Iehova ena lalo namo vada ta haboioa.—Iak. 1:12. w24.03 rau 28 par. 10-11