September

Dirava ese Iesu na siahu e henia taunimanima edia hekwakwanai iboudiai baine hamaoromaorodia. Iesu na hoa karadia e kara neganai, e hahedinaraia ita ese basita haoredia diba hekwakwanaidia na ia ese baine haoredia diba. Heḡereḡere, ia na mai ena siahu iseda hekwakwanai e havaramu ḡaudia baine kokidia—unu na kara dika bona kara dika dainai e varamu hisihisidia idauidau, gorere bona mase danu. (Mat. 9:​1-6; Roma 5:​12, 18, 19) Iena hoa karadia ese e hamomokanimu, ia ese gorere “idau-idau” baine hanamodia bona mase taudia danu baine hatoredia isi lou diba. (Mat. 4:23; Ioa. 11:​43, 44) Danu, ia na mai ena siahu lai gubadia baine koudia bona lauma dikadia baine hadareredia. (Mar. 4:​37-39; Luka 8:2) Iehova ese Natuna e henia siahuna ta dibamu dainai, una ese e hagoadada badamu! Ta diba momokanimu vaira negai Dirava ena Basileia ese baine havara hahenamodia na be vara momokanimu. Iesu ese tanobada ai e kara hoa karadia amo ta dibamu, ia na Dirava ena guba Basileia Pavapavana dainai tanobada heḡeḡemadai unu hoa karadia na ma be karamu. w23.04 rau 3 par. 5-7

Bema oi na kongrigeisin badana ta ai o nohova, pablisa na momo bona nega momo imamu o abia isimu to haere taudia na momo dainai oi na basie abimu hidimu, reana bo lalomanokamu bona basio uramu haere ba heni. To emu haere karana na basio hadokoa. Dala ta na haere momo ba heḡaeḡaelai. Bena stadi matamana ai haere ihenina totona se abimu hidimu neganai, oi na mai emu dala kaha ma haida ai haere ba heni. Gima Kohorona Stadi o heḡaeḡaelaiamu neganai, paragraf ta ta ese stadi ena point badana e hahedinaraiamu dalana ba haeroa. Unu bo kara tomamu neganai, stadi lalonai haere namodia bo henimu. Danu, ba heḡaeḡae hereva momokani dobudia e herevalaimu paragraf ai haere ba heni totona. Dahaka dainai? Badina paragraf unu bamodia ai haere taudia na dia momo. To, bema nega momo haere ihenina ai na se abimu hidimu be ede bamona? Hebou do se hematama lalonai, stadi inarina tadikakana ba hereva henia , oi be edena henanadai o uramu ba haerelaia. w23.04 rau 21-22 par. 9-10

Iosef na mai ena ura ida Iehova ena hahekau dalana e badinaia, bona una ese e durua tau namona ai ela. Nega toi Iosef na ena ruma bese dainai Dirava ena amo hahediba herevadia e abi. Unu nega toiosi lalodiai, ia ese unu hereva na e badinadia haraḡa, ena be ia enai na auka. (Mat. 1:20; 2:​13-15, 19-21) Iosef na Dirava ena hahekau dalana e badinaia dainai, Maria e gimaia, e durua bona e naria namonamo. Mani a laloa, Iosef ena kara dainai Maria ese ena lalokau bona hemataurai Iosef enai na e habadaia! Tatau, Iosef ba tohotohoa, emui ruma bese ba naria namonamo totona Baibul ena sisiba ba tahu. Ena be una na auka to Baibul ena sisiba bo badinamu neganai bo hahedinaraiamu adavamu na o lalokau heniamu bona emui headava na bo hagoadaiamu. Vanuatu ai taihu ta, ena headava laḡanidia 20 mai kahana na e gwa: “Adavagu na Iehova ena hahekau dalana e tahuamu bona e badinaiamu neganai, egu hemataurai ia enai na e badamu. Egu noho na e namomu, bona iena abi hidi na asina daradaralaimu.” w23.05 rau 21 par. 5

Babulono e rakatani Iuda taudia na edia Dirava ena “bese helaḡana” ai baela taudia. (Deu. 7:6) To, dounu sensi bae kara Iehova bae hamoalea totona. Iuda taudia momo na Babulono ai e vara, toana na idia ese Babulono taudia edia lalohadai bona taravatu haida e badinava. Laḡani momo muridiai Iuda taudia ginigunadia na Israel e lou lao neganai, Gavana Nehemia na e kamonai Israel ai e vara natu na Iuda gadona asie dibaia dainai e hoa. (Deu. 6:​6, 7; Neh. 13:​23, 24) Dirava ena hereva na Heberu gado ai e torea dainai, bema natu na una gado asi dibadia, edena dala ai Iehova ilalokau henina bona itomadiho henina karana bae dibaia? (Esr. 10:​3, 44) Una dainai unu Iuda taudia na sensi badadia bae kara na namo, to Israel ai unu bae kara toma na haraḡa, badina unuseniai tomadiho ḡoevana na taina ruana e haginia lou.—Neh. 8:​8, 9. w23.05 rau 15 par. 6-7

Ena be eda tahua ḡauna baita haḡuḡurua urana na goada eiava baita boga-aukamu, to ḡau haida ese dounu be koudamu. Heḡereḡere, ‘e vara kavamu’ ḡaudia ese eda nega be haoreamu dainai, ita na asi eda nega eda tahua ḡauna baita haḡuḡurua. (Koh. 9:11) Reana hekwakwanai ta dainai baita lalomanokamu o eda goada na be oremu. (Her. 24:10) Danu ita na dia ḡoevadae dainai, kerere baita karamu bona eda tahua ḡauna ihaḡuḡuruna na be aukamu. (Roma 7:23) Eiava baita hesikumu. (Mat. 26:43) Dahaka ese baine duruda ita e koudamu ḡauna baita hanaia? Oi e koumumu ḡauna ta dainai basio laloa emu tahua ḡauna na basio haḡuḡuruamu. Baibul na e gwaumu hekwakwanai o metau na baita davari louloumu. To danu e hahedinaraimu, Iehova ena heduru amo eda tahua ḡauna na baita haḡuḡurua diba. Oibe, ena be hekou ḡaudia bae vara, to emu tahua ḡauna ihaḡuḡuruna totona bo hekwarahimu neganai, o hahedinaraiamu oi na o uramu Iehova ba hamoalea. Iehova ese emu hekwarahi be itaiamu neganai be moale badamu! w23.05 rau 30 par. 14-15

Painia ḡaukara ese matamata tadikakana ta na be duruamu taunimanima idauidau ida baine ḡaukara hebou. Danu, ia na be duruamu ena moni baine ḡaukaralai namonamo. (Fili. 4:​11-13) Ful-taim hesiai ḡaukarana ba hamatamaia dalana namona na heduru painia ḡaukara ba karaia una ese be haheḡaeḡaemumu regula painia ḡaukarana ba karaia. Painia ḡaukara ese dala e kehoamu ful-taim hesiai ḡaukara idauidau, heḡereḡere konstraksen eiava Betele ḡaukara lalodiai ba vareai. Namona na Kristen tadikakadia na bae ḡaukara goada elda ai baela. Baibul na e gwaumu una maduna dainai e ḡaukara goadamu tadikakadia na “ḡaukara namona e ura heniamu.” (1 Tim. 3:​1, NWT) Ginigunana, tadikaka ta na baine ḡaukara goada hesiai tauna ena maduna baine huaia guna. Hesiai taudia na elda ida e ḡaukara heboumu kongrigeisin taudia e durudiamu. Elda taudia bona hesiai taudia na mai edia manau ida tadikaka taihu e durudiamu bona haroro ḡaukara e goadalaiamu. w23.12 rau 28 par. 14-16

King Iosia na laḡanina 16 ai Iehova e tahua matama. Ia na e ura Iehova baine dibaia namonamo bona ena ura baine karaia. To, una negai taunimanima momo na dirava koikoidia e tomadiho henidiava, una dainai Iosia na tomadiho momokanina baine badinaia totona baine lalo goada na namo. Bona ia na unu e kara toma! Iosia na laḡanina 20 do se abia neganai, Israel amo tomadiho koikoi e haorea matama. (2 Sis. 34:​1, 2) Bema oi na matamata, namona na Iosia heḡereḡerena Iehova ba tahua bona ena kara namodia ba dibadia. Unu bo kara tomamu neganai, bo uramu emu mauri na Iehova enai ba gwauhamatalaia. Una gwauhamata ba karaia anina be dahaka? Laḡanina 14 ai e bapatiso merona, Luke, na ena mauri Iehova enai e gwauhamatalaia dinana ai, e gwa: “Hari amo, egu mauri ai Iehova ena hesiai ḡaukara baina atoa guna, bona baina hekwarahi ia baina hamoalea.” (Mar. 12:30) Bema oi na unu bo kara tomamu, una na abi hidi maorona. w23.09 rau 11 par. 12-13

Aposetolo Paulo ese 1 Tesalonika e torea neganai, Tesalonika kongrigeisin na matamata. E abidia hidi tataudia edia diba na dia bada bona ḡau haida na asie kara namonamova. To, kongrigeisin taudia ese bae matauraidia na maoro. Hisihisi bada hereana e kahikahimu lalonai, namona na iseda elda taudia edia hahekau daladia baita badina namonamo. Badina una dina be kaumu neganai, hedkota bona brens ofesi tadikakadia amo hahekau herevadia na basita abi dibamu; una dainai hari na nega namona elda taudia baita lalokau henidia bona baita matauraidia. Herevana dahaka baine vara, to namona na baita lalo maoromaoro, bona unu abidadama tadikakadia edia kerere basita lalodia bada, to Iehova ese Keriso amo idia e hakaudiamu dalana baita laloa. Tuari tauna na kwara ḡauna ese e gimaiamu heḡereḡerena, eda hahemauri helarona ese eda lalohadai e gimaiamu. Ta dibamu ina tanobada ena lalohadai na asi anina. (Fili. 3:8) Eda helaro ese be durudamu basita lalohekwarahimu bona baita lalo mainomu. w23.06 rau 11-12 par. 11-12

“Kavakava hahinena” ena boiboi e kamonaimu taudia na abi hidi ta bae karaia: Idia be iena boiboi bae abia dae eiava lasi? Badi namodia daidiai matabodaḡa karadia baita dadarai na namo. Baibul na e gwaumu “kavakava hahinena” na e tomu: “E henaoa ranuna na mai gaihona.” (Her. 9:17) Una “e henaoa ranuna” anina be dahaka? Baibul ese headava taudia e mahuta heboumu karana na ranu ḡoevana ida e haheḡereḡerea. (Her. 5:​15-18) Taravatu heḡereḡerena ai e headava taudia sibodia ese mahuta hebou karana bae moalelaia. To, “e henaoa ranuna” anina na matabodaḡa karadia e herevalaimu. Nega momo unu kara na hehuni ai e karamu, henaohenao tauna na hehuni ai ḡau e henaomu na heto. Matabodaḡa karadia e karamu taudia na be lalomu ta ese basie davaridiamu, una na vaitani “e henaoa ranuna” na mai gaihona. To idia na sibodia e hekoimu! Badina Iehova ese ḡau iboudiai na e itamu. Bema Iehova ena lalo namo baita haboioamu, una na dika herea, idita o asi gaihona.—1 Kor. 6:​9, 10. w23.06 rau 22 par. 7-9

Oi be dahaka ba kara bema o mamiamu emu ḡuriḡuri na dia mai kudoumu ibounai ida o gwauraiamu eiava haroro ḡaukara na so moalelaiamu? Basioto Iehova ese ena lauma helaḡa na oiemu amo vada e kokia. Ita na dia ḡoevadae tauda dainai, nega haida be baita moalemu nega haida be lasi. Bema emu hesiai ḡaukara na so moalelaiamu aposetolo Paulo ena haheitalai ba laloa. Ia na e urava Iesu baine tohotohoa to nega haida na e hekwarahiva sivarai namona baine harorolaia totona. Paulo na e gwa:“Badina be sibogu egu ura dainai bama karaia, ahugu bama abia; to dia sibogu egu ura dainai, hahedua dainai na karaia.” Iena hereva ese e hahedinaraiamu, herevana iena hemami na edeheto to lalona e hadaia ena hesiai ḡaukara baine haḡuḡurua. Paulo heḡereḡerena, o uramu ḡau ta ba karaia neganai dia namo oiemu hemami ese baine biagumu. Una dainai herevana emu hemami na edeheto namona na lalomu ba hadaia kara maorona ba karaia totona. Bema unu bo kara tomamu, emu hemami na be namo loumu.—1 Kor. 9:16. w24.03 rau 11-12 par. 12-13

Eda tadikaka taihu baita lalokau henidia dalana na, turadia ai baitala bona nega baita ato baita bamodia. (2 Kor. 6:​11-13) Iseda kongrigeisin lalodiai tadikaka taihu edia mauri daladia bona kara na idauidau. Idia iboudiai baita lalokau henidia dalana na, edia kara namodia baita lalodia bada. Haida na Iehova ese e lalodiamu dalana heḡereḡerena baita lalodiamu neganai, ta hahedinaraiamu idia na ta lalokau henidiamu. Hisihisi bada hereana lalonai lalokau na mai anina bada. Una hisihisi be matamamu neganai, Iehova ese ita be ede be gimada tomamu? Idaunega Babulono na inaina ese e tuari henia neganai, Iehova ese ena taunimanima e hadibadia dahaka bae kara, eto: “Egu bese taumui e, emui daiutu ai ba raka vareai, iduaramui ba kou; nega taina ba komu, ela bona badu baine ore.” (Isa. 26:20) Toana na hisihisi bada hereana lalonai ita danu unu hahediba hereva tamodia baita badinamu. w23.07 rau 6-7 par. 14-16

Taunimanima na bae diba oi na lalo maoromaoro taumu. Sibomu ba henanadai: ‘Taunimanima ese lau e itagumu be na lalo maoromaoromu bona na manaumu, a? Eiava na kara aukamu bona asina uramu ta ena hereva baina kamonai? Haida edia lalohadai na kamonaimu bona edia ura na badinamu, a?’ Ita ese lalo maoromaoro karana ta hahedinaraiamu neganai, Iehova bona Iesu ta tohotohodiamu. Eda noho daladia e idaumu neganai, namona na baita lalo maoromaoro. Unu senisi daidiai asita lalomu hekwakwanaidia na be varamu. Heḡereḡere, gorere badana ta, moni ena hekwakwanai eiava gavamani edia heiriheiri karadia daidiai, eda mauri na be aukamu. (Koh. 9:11) Eiava eda asainmen e haidaumu bona gabu ta e siaidamu neganai, reana una baita abia daemu na auka. Eda noho daladia e idaumu neganai ini poin 4 ese be durudamu: (1) Eda mauri ai e idaumu ḡaudia na baita abi dae, (2) vairai baita kara ḡaudia baita lalo, (3) ḡau namodia baita lalodia, bona (4) haida baita durudia. w23.07 rau 21-22 par. 7-8

Peroveta tauna Daniel na eregabena ai Babulono taudia ese Ierusalem amo e abia mauri bona Babulono e laohaia. Ia na Babulono taudia ese e ura heniava, badina e itaia ia na mero namona bona “raho-namo,” bona iena ruma bese na e matauraidiava. (1 Sam. 16:7) Unu badi daidiai, Babulono taudia ese treinin e henia, unu amo king ena ruma ai baine ḡaukara. (Dan. 1:​3, 4, 6) Iehova ese Daniel na e lalokau henia badina Daniel ese Iehova e badinaiava. Daniel laḡanina na reana 20 heḡereḡerena neganai, Iehova ese ia na kara maoromaoro taudia Noa bona Iobu ida e gwauraia hebou; idia na laḡani momo lalodiai Iehova e badinaia. (Gen. 5:32; 6:​9, 10; Iobu 42:​16, 17; Esekiel 14:14) Bona Iehova ese Daniel na dounu e lalokau heniava.—Dan. 10:​11, 19. w23.08 rau 2 par. 1-2

Bema oi na o uramu ruma ta ba hoia, oi na bo uramu ba hoia rumana ba itaia namonamo. Una heḡereḡerena, Baibul o duahiamu bona o stadilaiamu neganai, ena kaha ibounai ba haeroa namonamo. Bema Baibul bo duahia haraḡa-haraḡamu, reana “Dirava ena hereva badidia” mo bo dibamu. (Heb. 5:12) To ruma ai bo vareaimu bona kahana ibounai bo itaia namonamomu heḡereḡerena, Baibul ba lalopararalaia totona kahana ibounai ba stadilaia namonamo. Unu ba kara toma dalana ta na, ba tahua edena dala ai Baibul ena hereva ta ta na e heduru hehenimu. Danu namona na ba laloparara oi o abi daemu ḡaudia be dahaka bona dahaka dainai o abidia daemu. Dirava ena Hereva baita lalopararalaia namonamo totona, namona na ena hereva dobudia baita stadilaidia. Aposetolo Paulo ese Kristen tadikaka taihu e hagoadadia Dirava ena Hereva bae stadilaia namonamo, unu amo “lababana bona rohana bona harana-latana bona dobuna” bae lalopararalaia namonamo. Bena edia abidadama ai bae “gini tutuka-tutuka” bona bae “goada momokani.” (Efe. 3:​14-19) Ita danu unu baita kara toma. w23.10 rau 18 par. 1-3

Baibul ese haheauka taudia e herevalaidia. Namona na sibomu emu stadi ai sivaraidia ba stadilai. Haheitalai bina, David na maraḡinai e horoa Israel ena king ai bainela to laḡani momo ma e nari gabeai king ai ela. Simeon bona Ana na gwauhamata Mesiana e nariava lalonai mai edia abidadama ida Iehova e tomadiho heniava. (Luka 2:​25, 36-38) Sivarai unu bamodia o stadilaimu neganai, ini henanadai haeredia ba tahu: Dahaka ese ina tau o hahine e durua e haheauka? E haheauka dainai dahaka namo e davari? Lau ese ia be ede baina tohotohoa toma? Asie haheauka taudia sivaraidia amo danu diba bo abimu. (1 Sam. 13:​8-14) Reana ba henanadai: ‘Dahaka dainai se haheauka? Dahaka dika e davari?’ w23.08 rau 25 par. 15

Aposetolo Petro na dounu Iesu e badinaia. Heḡereḡere, nega ta hahediba taudia ese Iesu ena hereva ta se lalopararalaia neganai, Petro na Iesu e badinaia. (Ioa. 6:68) Unu hahediba taudia momo na Iesu ena hereva anina asie tahua, to Iesu e rakatania. A Petro ese Iesu na se rakatania. Ia ese Iesu e hamaoroa, eto: “Mauri hanaihanai herevadia na oiemu ai.” Iesu na e diba Petro bona aposetolo ma haida ese ia na bae rakatania. To, Iesu ese Petro e hamaoroa ia na be goada loumu bona dounu ia be badinaiamu. (Luka 22:​31, 32) Iesu na e diba “Petro lalona na e uramu, to tauanina na e manoka.” (Mar. 14:​38, NWT) Una dainai, ena be Petro ese Iesu e ḡorea, to Iesu ese ia na se rakatania. Iesu e tore isi lou murinai, ia na Petro enai e hedinarai—una negai Petro na sibona noho. (Mar. 16:7; Luka 24:34; 1 Kor. 15:5) Una ese Petro na e hagoadaia. w23.09 rau 22 par. 9-10

Dirava ese ia e abidadama heniamu taudia edia dika na e gwautaomu, bona e lalodia boiomu. (Sal. 32:​1, 2) Idia edia abidadama dainai Dirava matanai idia na asi edia kerere. Ena be Abraham, David, bona abidadama taudia ma haida na Dirava ese maorodia e gwaurai, to idia na dounu dia ḡoevadae. A edia abidadama dainai, Dirava matanai idia na asi edia kerere, Dirava asie abidadama heniamu taudia be dia unuheto. (Efe. 2:12) Aposetolo Paulo ese ena revareva ai e hahedinaraia, Dirava turana ai baitala totona baita abidadama na mai anina bada. Abraham bona David na Dirava e abidadama henia dainai ia turana ai ela, ita danu unu baita kara tomamu neganai, Dirava turana ai baita laomu. w23.12 rau 3 par. 6-7

Hari ina negai, Kristen taudia iboudiai ese Iehova enai edia boubou bae heni daladia haida bini: Idia ese edia nega, goada, bona kohu amo Dirava ena Basileia bae durua. Bona mai laloda idoidiai eda hesiai ḡaukaradia ta karamu ese e hahedinaraiamu Iehova itomadiho henina karana na ta laloa badamu. Aposetolo Paulo ese Iehova itomadiho henina ai basita laloboio ḡaudia e herevalai. (Heb. 10:​22-25) Heḡereḡere, Iehova baita ḡuriḡuri henia, ta diba ḡaudia na ma haida baita hadibalaidia, kongrigeisin heboudia baitala bona baita hahegoada heheni, “badina be, [ta] itaiamu, [Iehova ena] dina badana eme kahikahi.” Apokalupo bukana dokona kahana ai, Iehova ena aneru na nega rua e gwa: “Dirava ba toma henia diho.” (Apok. 19:10; 22:9) Una dainai Iehova ena lauma dubu badana anina na baita laloatao bona eda Dirava hereadaena itomadiho henina karana na baita laloa bada! w23.10 rau 29 par. 17-18

Ita iboudai na ta uramu “baita heura heheni.” To, namona na baita helalotao Iesu na e gwa ‘diaḡau edia lalokau do baine keru.’ (Mat. 24:12) Iesu na se gwa iena hahediba taudia padadiai lalokau na baine keru, to bema basita henahua tohomu, tanobada taudia heḡereḡeredia ita padadai eda lalokau na be kerumu. Una dainai, ina henanadai baita laloa na ḡau badana: Ede baita diba toma bema iseda lalokau tadikakada ediai na goada? Dala ta na hekwakwanai e varamu negadiai ta karamu ḡaudia amo baita dibamu. (2 Kor. 8:8) Aposetolo Petro ese una na e herevalaia, eto: “A herea-daena binai: ba heura heheni mai lalomui idoidiai, badina be uraheni ese kara dika momo e tahunimu.” (1 Pet. 4:8) Una dainai ma haida edia manoka ḡaudia bona kara kereredia ese iseda lalokau na baine tohoa diba. w23.11 rau 10-11 par. 12-13

Bema kongrigeisin ai haida mo baita lalokau henidiamu, Iesu ena haheḡani na asita badinaiamu. Vaia haida na turada namodia ai baita halaodia dibamu, Iesu e kara heḡereḡerena. (Ioa. 13:23; 20:2) To aposetolo Petro ese e hadibadamu namona na baita hekwarahi tadikaka taihu iboudiai baita lalokau henidia, badina idia na iseda ruma bese na heto. (1 Pet. 2:17) Petro na e gwa: “Ba heura heheni mai lalomui idoidiai.” (1 Pet. 1:22) Ina hereva “mai lalomui idoidiai” anina na ta baita lalokau henia ena be una na auka. Heḡereḡere, bema tadikaka ta na dala haida ai ita laloda e hahisiamu, dahaka baita kara? Reana matamanai baita uramu ena dika baita hadava. To, Petro na Iesu ena amo e diba dika davana ihalouna na Dirava ese se moalelaiamu. (Ioa. 18:​10, 11) Petro na e gwa: “Kara dika bona ere dika basio hadava, a e hadikamuimu taudia ba hanamodia.” (1 Pet. 3:9) Mai lalomu idoinai ida lalokau ba hahedinaraia, ma haida ba lalodia bada bona ba kara namo henidia. w23.09 rau 28-29 par. 9-11

Ita na natu ta e tubu haraḡamu, taunimanima badana ai e laomu neganai ta hoamu. To una na se vara kavamu. Una heḡereḡerena, ta na ḡau haida baine kara na namo lo Kristen tauna ai bainela totona. (1 Kor. 13:11; Heb. 6:1) Anina na iena hetura karana Iehova ida na baine hagoadaia. Danu lauma helaḡa huahuadia baine hahedinarai, bae durua ḡaukaradia baine diba, bona vairai baine hua madunadia totona baine heḡaeḡae. (Her. 1:5) Iehova ese tau bona hahine e karadia. (Gen. 1:27) Dala momo ai idia na idau, heḡereḡere idia na ḡaukara idauidau bae kara diba. To unu ḡaukara ihaḡuḡurudia totona, namona na ikaradia daladia bae diba bona kara namodia bae hahedinarai.—Gen. 2:18. w23.12 rau 18 par. 1-2

Iesu e ura ma haida ese ia Tamana ladana bae ḡaukaralaia, a? Oibe. Iesu ena negai, tomadiho igunalaidia taudia haida na e laloava Dirava ladana na helaḡa herea dainai bae ḡaukaralaia na taravatu. To una taravatu ese Iesu na se koua Tamana ladana baine ḡaukaralaia. Gerasa taudia edia gabu ai, demoni ese e boloa tauna ta na Iesu ese e hanamoa negana a laloa. Unuseniai e nohova taudia na e gariva dainai Iesu e noia baine raka oho. Una dainai Iesu na una gabu e rakatania. (Mar. 5:​16, 17) To, ia na e urava una gabu taudia ese Dirava ladana na bae dibaia. Una dainai, e hanamoa tauna e hamaoroa Iehova ese ia dainai e karaia ḡauna na taunimanima baine hadibalaidia. (Mar. 5:19) Hari ina negai danu ia na e uramu ita ese ia Tamana ladana na tanobada ibounai lalonai baita herevalaia! (Mat. 24:14; 28:20) Unu baita kara tomamu neganai, eda King Iesu baita hamoaleamu. w24 rau 10 par. 10

Ita na ta moalemu badina ini nega dikadia lalodiai Iehova ena orea ai ta nohomu dainai. Oibe, mauri na e auka hereamu, to Iehova dainai ita na lalotamona ai ta nohomu. (Sal. 133:1) Ia ese e durudamu eda ruma bese ai baita moale. (Efe. 5:33–6:1) Danu, Iehova ese aonega bona laloparara e henidamu dainai asita lalohekwarahi momomu. Ena be Iehova ena orea lalonai ta nohomu, to baita hekwarahi nega iboudiai Iehova baita hesiai henia. Dahaka dainai? Badina reana nega haida ta ena hereva eiava kara dainai basita moalemu. Eiava ta lalomanokamu badina kerere haida na ta kara lou kara loumu. Iehova ena hesiai ḡaukara na baita goadalaia, ena be (1) kongrigeisin ai ta ese laloda e hahisimu, (2) adavada ese laloda e hahisimu, bona (3) eda kerere daidiai ta lalomanokamu negadiai. w24.03 rau 14 par. 1-2

Tadikaka taihu haida ese edia hesiai ḡaukara e habadaia sivaraidia na nega momo bo kamonaimu. Idia haida na Basileia Evanelia Skulina ai e vareai, haida be pablisa dia momo gabudia ai e nohomu. Bema emu noho dalana na heḡereḡere emu goal ai ba halaoa diba. Iehova ena taunimanima na e ura dikadikamu edia hesiai ḡaukara bae habadaia. (Apos. 16:9) To bema hari oi na dia heḡereḡere unu ba kara toma be ede bamona? Basioto oiemu hesiai ḡaukara na asi anina. Ḡau badana na mauri ena heau helulu lalonai mai haheaukamu ida ba heau. (Mat. 10:22) Bapatiso murinai Iesu dounu ba badinaia dalana badana ta na, emu goada bona noho dalana heḡereḡerena ai Iehova ba hesiai henia bona ia ese una na e laloa badamu.—Sal. 26:1. w24.03 rau 10 par. 11

Tamada guba ai na e gwauhamata bema ita na baita helalo-kerehaimu eda dika na be gwau taomu. (Sal. 86:5) Una dainai bema ita na mai kudouda idoinai ta helalo-kerehai, Iehova ena gwauhamata baita laloa, e gwa: “Iseda kara dika iboudiai vada e gwau tao.” Baita helalotao Iehova na mai dibana eda goada hetoana bona taravatu aukadia na se ato. Ia ese ita na se doridamu basita kara diba ḡaudia baita kara. To mai kudouda idoinai ta karamu ḡaudia na ia ese e moalelaimu. Danu, Baibul negadiai Iehova e hesiai henia taudia sivaraidia ba lalodia dobu. Heḡereḡere mani aposetolo Paulo sivaraina aita laloa. Ia na laḡani momo Iehova e hesiai henia goada goada, bona gabu momo ai kongrigeisin momo e hagini. To, gabeai ena noho dalana e idau dainai gabu idauidau ai se harorova. To Iehova ese dounu e lalo namo heniava, a? Oibe. Ia na ena noho dalana heḡereḡerena ai Iehova e hesiai henia dainai Iehova ese e hanamoa. (Apos. 28:​30, 31) Una heḡereḡerena, Iehova dainai ta karamu hesiai ḡaukaradia na nega haida be idaumu. To Iehova na ia ta hesiai heniamu badina hari e laloa badamu. w24.03 rau 27 par. 7, 9

Iesu na Iehova e ḡuriḡuri henia karana amo haheitalai namona e hahedinaraia, ena hahediba ese bae tohotohoa helaoreana. Iena hesiai ḡaukara lalonai, Iesu na e ḡuriḡuri loulou. Iesu na nega e ato baine ḡuriḡuri, badina nega momo e bisiva bona hutuma na ia dekena e maiva. (Mar. 6:​31, 45, 46) Ia na daba matana ai e nogava sibona baine ḡuriḡuri totona. Nega ta, ia na abi hidi badana ta baine karaia dainai hanuaboi ibounai lalonai e ḡuriḡuri. (Luka 6:​12, 13) Bona do se mase hanuaboina ai e ḡuriḡuri loulou, badina e ura una nega auka hereana lalonai ena hesiai ḡaukarana baine haḡuḡurua. (Mat. 26:​39, 42, 44) Iesu ena haheitalai ese e hadibadamu, ena be ta bisimu to nega baita ato baita ḡuriḡuri na namo. Iesu heḡereḡerena, reana daba matadia ai eiava hanuaboi ai baita ḡuriḡuri diba. Unu baita kara tomamu neganai, baita hahedinaraiamu Iehova ena harihari ḡauna ḡuriḡuri na ta laloa badamu. w23.05 rau 3 par. 4-5

Mani dina siri ai ina hereva “vedaia” ba laloa. Baibul diksinari ta ese ini e herevalaia toma “latamai ai e bubuamu sinavai na heto.” Una diksinari ena hereva ese e hahedinaraiamu, Iehova ena lalokau horoa taudia ediai na bada herea! Horoa taudia na e dibamu idia na ‘Dirava ese e lalokau henidiamu.’ (Iuda 1) Aposetolo Ioane ese horoa taudia edia hemami na ini e herevalaia toma: “Mani a laloa, Tamada ese iura-henina bada herea vada e henida, Dirava natuna e gwauraidamu.” (1 Ioa. 3:1) Iehova ena lalokau be horoa taudia ediai mo e hahedinaraia, a? Lasi, Iehova ese ena lalokau na ita iboudai edai danu e hahedinaraia. Iehova ena lalokau oiemu ai be ede e hahedinaraia toma? Ia ese mauri davana amo ena lalokau e hahedinaraia!—Ioa. 3:16; Roma 5:8. w24.01 rau 28 par. 9-10

David e gari neganai ia na una siri ena hereva heḡereḡerena e kara. Ena be ia na bae hamasea diba, to Iehova ese gabeai ia dainai baine kara ḡaudia e lalodia dobu dainai se gari. David na mai dibana, Iehova ese ia na nega maorona ai baine hamauria. Iehova na e gwa King Saulo murinai Israel baine lohiaia tauna na David. (1 Sam. 16:​1, 13) Una dainai David enai, una gwauhamata na vaitani vada e ḡuḡuru na heto. Iehova na e gwauhamata oi daimuai dahaka baine kara? Dibada, ia ese hekwakwanai iboudiai na basine laodia ahumu. To baita helalotao, ta davarimu hekwakwanaidia na tanobada matamatana ai Iehova ese be haorediamu. (Isa. 25:​7-9) Ḡau iboudiai e Havara Tauna ena goada na heḡereḡere, mase taudia baine hatoredia isi, eda gorere bona hisihisi baine hanamodia, bona e daḡedaḡe henidamu taudia iboudiai baine haoredia.—1 Ioa. 4:4. w24.01 rau 6 par. 12-13

Emu gwauhamata bona bapatiso ba lalodia. Oi na unu kara ruaosi o kara badina o ura Iehova ba badinaia. Ba laloatao oi be dahaka ese e durumu bena o abia dae hereva momokani na vada o davaria. Iehova ena diba maoromaorona o abia dainai emu hemataurai bona lalokau ia enai na e bada. Emu abidadama o hagoadaia bona o helalo-kerehai. Kara dikadia o dadarai bona Dirava ena ura o badinaia. O laloparara Dirava ese emu dika e gwautao neganai o moale. (Sal. 32:2) Kristen heboudia ola bona o diba ḡaudia namodia na ma haida ediai o herevalai. Oi na gwauhamata bona bapatiso Kristen tauna dainai, mauri e lao heniamu dalanai o rakamu, bona lalomu na o hadaia una dala ai dounu ba raka. (Mat. 7:​13, 14) Iehova ba badinaia tarika-tarika, ia sibona ba tomadiho henia bona ena haheḡani ba badina. w23.07 rau 17 par. 14; rau 19 par. 19

Iehova enai o karaia gwauhamatana bo laloa dobumu karana ese be durumumu hahetoho idauidau ba hanaidia. Heḡereḡere, oi ese ta adavana ba ḡahusia be maoro, a? Lasi. Oi na Iehova o gwauhamata henia oto kara unu bamodia na basio kara. Oibe, gabeai hemami kereredia be varamu neganai, oi ese maoromaoro bo dadaraidiamu. Unu amo “kara dika taudia edia dala ai basio vareai.” (Her. 4:​14, 15 ) Iesu ena haheitalai ba laloa, ia na lalona e hadaia Tamana baine hamoalea. Iesu heḡereḡerena, ita danu Dirava enai ta gwauhamata dainai, una ese baine duruda ia lalona basita hahisia bona ia ese e inai henimu karadia baita dadarai. (Mat. 4:10; Ioa. 8:29) Hahetoho eiava hekwakwanai e varamu negadiai, oiemu kara ese be hahedinaraiamu, oi na dounu o uramu Iesu murinai ba raka. Namona na ba diba, nega unu bamodiai Iehova ese oi na be durumumu. w24.03 rau 9-10 par. 8-10