Iehova Bona Iesu Edia Lalohadai Dalana Ba Tohotohoa

1-2. Edena dala ai Iehova baita lalokau henia, bona edena dala ai Iesu ese e hahedinaraia mai lalona idoinai ida Iehova e lalokau henia?

“LOHIABADA emu Dirava ba lalokau henia mai lalomu idoinai, mai laumamu idoinai, mai goadamu idoinai, mai daramu idoinai.” (Luka 10:27) Iesu ese e hahedinaraia ḡoevaḡoeva Mose ena Taravatu lalonai ina na mai anina bada haheḡanina. Iehova ta lalokau heniamu mai kudouda idoinai ida anina na eda ura ḡaudia, hemami bona ta karamu ḡaudia amo baita hahedinaraia. Eda goada bona darada idoinai ida danu. Momokani ita ese Iehova ena lalohadai ibounai basita lalopararalaia dibamu. To Iehova ena lalohadai na baita lalopararalai dibamu bema “Keriso darana [baita] abia,” badina Iesu ese Tamana ena lalohadai na e hahedinaraia ḡoevaḡoeva.—1 Kor. 2:16.

² Iesu na mai lalona idoinai ida Tamana e lalokau henia. Ia na mai dibana Dirava ena ura ia enai be dahaka. Una dainai mai lalo goadana ida e badinaia, ena be hisihisi momo be davarimu. Iesu na Tamana ena ura ikarana e laloa badava dainai, se urava ḡau ta ese ena ḡaukara baine hadikaia.

3. Aposetolo Petro be Iesu ena amo dahaka e diba, bona ia ese Kristen taudia e hagoadadia dahaka bae kara? (1 Petro 4:1)

³ Petro bona bamona aposetolo taudia na Iesu ida e noho daudau. Una dainai Iesu ena hahediba daladia na e dibadia namonamo, una na hahenamo idia ediai. Petro ese revareva ginigunana e torea neganai Kristen taudia e hagoadadia, namona na edia lalohadai na Keriso ena ida baine heḡereḡere. (1 Petro 4:1 ba duahia.) Baibul e torea gadodia ai Petro na ina hereva “tuari kohudia ba kara” e atoa. Una hereva ese e hahedinaraiamu tuari tauna na tuari kohudia iboudiai e rio bona e heḡaeḡae baine ha tuari. Una dainai bema Kristen taudia na Iesu ena lalohadai dalana be tohotohoamu, idia na be heḡereḡeremu kara dika urana be hadarereamu.—2 Kor. 10:​3-5; Efe. 6:12.

4. Edena dala ai ina atikol ese be durudamu Petro ena sisiba baita badinaia?

⁴ Ita na Iesu ena lalohadai dalana bona ia baita tohotohoa dalana baita herevalaimu. Baita itaiamu edena dala ai ita ese (1) Iehova ena lalohadai dalana baita tohotohoa, badina una ese be durudamu lalotamona ai baita nohomu, (2) baita manau, bona (3) baita lalo-maoromaoro anina na ḡuriḡuri amo Iehova enai baita tabekau.

IEHOVA ENA LALOHADAI DALANA BAITA TOHOTOHOA

5. Nega ta ai edena dala ai Petro ese Iehova ena lalohadai se badinaia?

⁵ Nega ta ai Petro ese Iehova ena lalohadai na se badinaia. Iesu ese ena aposetolo e hamaorodia, ia na Ierusalem be laomu, unuseniai dubu e gunalaiamu taudia ese ia na do bae dabaia tao, bae hahisia, bona bae hamasea. (Mat. 16:21) Iehova ese Iesu baine mase karana na se koua, bona Petro ese una na se abia dae badina e lalo Iesu na gwauhamata Mesiana, bona Iehova ena taunimanima be hamauridiamu. (Mat. 16:16) Una dainai Petro ese Iesu na e hakaua siri bena e gwa, “Lohiabada e, dia unuheto; unu basie karamu toma.” (Mat. 16:22) Una negai Petro na Iesu ena hereva ai se lalotamona, badina Petro ena lalohadai na dia Iehova ena heḡereḡerena.

6. Edena dala ai Iesu ena lalohadai na Iehova ena heḡereḡerena?

⁶ Iesu bona Tamana edia lalohadai na heḡereḡere. Iesu ese Petro e hamaoroa, eto: “Satana e, murigu kahana aola: o hahekwakwanaigumu; badina be emu lalo-hadai na dia Dirava ena, to taunimanima edia.” (Mat. 16:23) Petro na e ura Iesu baine durua toho, to Iesu na mai dibana Iehova ena ura baine haḡuḡurua dalana na bae hahisia bona bae hamasea, una dainai Petro ena heduru e dadaraia. Unu amo Petro na e diba ḡau badana na ena lalohadai na Iehova ena ida baine heḡereḡere. Ita edai una na mai anina bada.

7. Edena dala ai Petro ese e hahedinaraia ena lalohadai na Iehova ena ida baine heḡereḡere? (Laulau ba itaia.)

⁷ Gabeai Petro na e ura ena lalohadai na Iehova ena lalohadai ida baine heḡereḡere. Iehova ese bese idauidau baine veridia mai iena taunimanima ai baela negana na vada e kau. Una negana ai, Petro na Dirava ese e siaia Korenelio baine haroro henia. Idau bese taudia edia amo ia na Kristen tauna ginigunana ta. Iuda taudia ese idau bese taudia na asie lalodia badava. Una dainai Petro ese ena lalohadai baine haidaua na namo, unu amo idau bese taudia baine haroro henidia. Gabeai, Dirava ese idau bese taudia e lalodia badava karana na Petro ese e lalopararalaia neganai, ena lalohadai dalana e hamaoromaoroa. Una dainai, Korenelio ese e noia ena ruma bainela neganai, Petro ese una na e abia dae. (Apos. 10:​28, 29) Ia ese Korenelio bona ena ruma bese e haroro henidia bona iboudiai e bapatiso.—Apos. 10:​21-23, 34, 35, 44-48.

8. Edena dala ai baita hahedinaraia eda lalohadai na Iehova ena ida heḡereḡere? (1 Petro 3:8)

⁸ Laḡani haida muridiai, Petro ese Kristen taudia e hagoadadia eto “lalomui bae tamona.” (1 Petro 3:8 ba duahia.) Bema ita na Iehova ena lalohadai dalana, Baibul amo baita badinamu, bona baita tohotohomu neganai tadikaka bona taihu ida lalotamona ai baita nohomu. Heḡereḡere, Iesu ese ia murinai e rakamu taudia na e hamaorodiamu edia mauri ai Basileia bae atoa guna. (Mat. 6:33) Una dainai bema emu kongrigeisin ai pablisa ta na be uramu painia o fultaim hesiai ḡaukara ma ta baine karaia, namona na ena abi hidi baine haḡuḡurua dalana baita herevalaia bona baita durua.

BAITA MANAU

9-10. Edena dala ai Iesu ese manau karana e hahedinaraia?

⁹ Iesu do asie hamasea hanuaboina ai, manau karana ai ia ese Petro bona aposetolo taudia ediai mai anina bada ḡauna ta e hahedinaraia. Iesu ese Petro bona Ioane e siaidia guna edia aniani hebou orena dainai ḡau haida bae heḡaeḡaelai. Bae ato heḡaeḡae ḡaudia na disi ta bona tauel haida, unu amo e vavedia taudia na aedia bae huri guna bena bae aniani. To una aniani neganai, daika be manaumu bena e vavedia taudia aedia be hurimu?

¹⁰ Iesu na se hesiku una ḡaukara ikarana ai, unu amo e hahedinaraia ia na manau herea. Aposetolo taudia na e hoa, badina e itaia Iesu ese e karaia karana na vaevae hesiai taudia ese bae karaia ḡaukarana. Iesu na e karaia dabua badana e kokia, tauel ta e abia gabana ai e kwatua, bona disi ta ranu amo e hahonua bena aedia e huri matama. (Ioa. 13:​4, 5) Reana aposetolo 12 aedia ihuridia ai nega taina bada e haorea. Iuda, ia taona be toreamu tauna aena danu e huria, to Iesu na mai manauna ida una ḡaukara e haḡuḡurua. Bena Iesu na mai haheaukana ida e hamaorodia: “Vada na karaiamu karana anina be dibamui a? Umui ese o gwauraigumu ‘Hahediba tauna’ bona ‘Lohiabada’. Una be o hereva maoromu, badina be unuheto. Benaini, lau binai emui Lohiabada bona emui hahediba tauna, to aemui name huri, umui danu aemui do ba hehuri heheni.”—Ioa. 13:​12-14.

11. Edena dala ai Petro ese manau karana e dibaia? (1 Petro 5:5) (Laulau danu ba itaia.)

¹¹ Petro na Iesu ena amo manau karana e dibaia. Iesu e lou guba murinai, Petro ese hoa dalana ai tau ta e vara negana amo ia na ae hedairike tauna, e hanamoa. (Apos. 1:​8, 9; 3:​2, 6-8) Una hoa karana dainai taunimanima hutuma na Petro dekena ela. (Apos. 3:11) To Petro na se ura taunimanima ese ia bae imodaia, ena be ia na e matauraidiava besena amo ema. Petro na e manau dainai heimodai na Iehova bona Iesu e henidia, e gwa: “[Iesu] ladana e abidadama henia tauna, o itaiamu bona umui dibamui tauna, ia ladana ese vada e hagoadaia.” (Apos. 3:​12-16) Petro ena revareva ai Kristen taudia e hagoadadia bae manau. Una revareva ai e ḡaukaralai herevadia ese be durudamu Iesu ese mai manauna ida aposetolo aedia e huri karana baita laloatao.—1 Petro 5:5 ba duahia.

12. Edena dala ai Petro heḡereḡerena dounu baita manau?

¹² Petro ena haheitalai baita tohotohoa, unu amo manau karana baita diba. Manau anina korikori na dia hereva maorodia baita gwaurai karana mo. Petro ese ina hereva “lalo manau” e ḡaukaralaia anina na, kudouda ai e miamu hemamina. Haida ediai manau karana ta hahedinaraiamu badina na dia ita bae imodaida, to Iehova bona taunimanima ta lalokau henidiamu. Bema mai moaleda ida Iehova baita hesiai heniamu bona dala idauidau ai eda tadikaka baita durudiamu, ena be haida ese eda ḡaukara na asie laloa badamu, to ta hahedinaraiamu ita na manau tauda.—Mat. 6:​1-4.

BAITA “LALO MAOROMAORO”

13. Baita “lalo maoromaoro” anina be dahaka?

¹³ Baita “lalo maoromaoro” anina be dahaka? (1 Pet. 4:​7, NWT) Lalo maoromaoro Kristen tauna na e ḡaukara goadamu Iehova ena lalohadai heḡereḡerena ai abi hidi e karamu. Ia na mai dibana ena mauri ai, Iehova ihetura henina karana na ḡau badana. Sibona ena goada hetoana na mai dibana dainai e abia daemu ḡau iboudiai na basine lalopararalaimu. Mai manauna ida Dirava e ḡuriḡuri heniamu karana amo e hahedinaraiamu ia na Iehova enai e tabekaumu.a

14. Edena dala ai Petro na nega ta ai Iehova enai se tabekau?

¹⁴ Iesu do se mase hanuaboi ginigabena ai, ena hahediba e hamaorodia: “Iboumui ai lau daigu ai ba hekwakwanai.” Petro na mai lalogoadana ida ia e haere henia eto: “Ena be taunimanima iboudiai oi daimu ai bae hekwakwanai, to lau be lasi.” Iesu ese una hanuaboi ai ena hahediba haida e haḡanidia eto, “Ba gima, ba ḡuriḡuri.” (Mat. 26:​31, 33, 41) Bema matamanai Petro ese una haheḡani bema badinaia, ia na mai lalo goadana ida bema gwau ia na Iesu ena hahediba ta. To Petro ese Biaguna na e ḡorea, bona e lalohisihisi dikadika.—Mat. 26:​69-75.

15. Edena dalai Iesu na ena hanuaboi ginigabena ai lalo maoromaoro karana e hahedinaraia?

¹⁵ Iesu na Iehova enai e tabekau. Ena be ia na ḡoevadae tauna, to, ia na e ḡuriḡuri loulouva. Una ese e hagoadaia dainai baine kara ḡaudia na Iehova ena ura heḡereḡerenai e kara. (Mat. 26:​39, 42, 44; Ioa. 18:​4, 5) Petro ese Iesu ena ḡuriḡuri loulou karana na e itaia, bona una na se laloaboio.

16. Edena dala ai Petro ese lalo maoromaoro karana e hahedinaraia? (1 Petro 4:7)

¹⁶ Gabeai, Petro na ḡuriḡuri amo hanaihanai Iehova enai e tabekauva. Toreisi lou tauna Iesu ese Petro bona aposetolo ma haida na e hadibadia idia na lauma helaḡa bae abia, unu amo sivarai namona iharorolaina ḡaukarana be haḡuḡuruamu. To, Iesu ese e hamaorodia Ierusalem ai bae nari ela bona una baine vara. (Luka 24:49; Apos. 1:​4, 5) Petro be dahaka e kara e nariva lalonai? Petro bona ia bamona Kristen taudia na “mai lalodia tamona ida” e ḡuriḡuriva. (Apos. 1:​13, 14) Gabeai, Petro ena revareva ginigunana ai, ia ese Kristen taudia e hagoadadia bae lalomaoromaoro bona ḡuriḡuri amo Iehova enai bae tabekau. (1 Petro 4:7 ba duahia.) Petro na e diba Iehova enai baine tabekau bona ia ese Kristen tadikaka taihu e hagoadadia.—Gal. 2:9.

17. Dahaka ese baine duruda ta karamu ḡaudia baita haḡuḡuru? (Laulau danu ba itaia.)

¹⁷ Baita lalomaoromaoro totona, hanaihanai Iehova baita ḡuriḡuri henia. Ena be ta lalomu ita edai na heḡereḡere ḡau momo baita kara diba, to dounu Iehova baita ḡuriḡuri henia. Una dainai, bema mai anina bada abi hididia ta karamu, Iehova baita noia baine duruda bona baita abia dae ia na mai dibana ita be ede be duruda tomamu.

18. Edena dala ai eda lalohadai na Iehova ena ida baine heḡereḡere?

¹⁸ Ta moalemu badina Iehova ese e karada dalana amo iena kara ta tohotohomu. (Gen. 1:26) Momokani, Iehova na basita tohotohoa ḡoevaḡoeva dibamu. (Isa. 55:9) To Petro heḡereḡerena, namona na baita hekwarahi Iehova ena lalohadai dalana baita tohotohoa, baita manau, bona baita lalo maoromaoro.