E Uramu Dirava Bae Dibaia Taudia Ba Durudia Haraḡa

1. Sivarai namona e kamonaiamu taudia be dahaka e karamu? (Apostol Edia Kara 13:​47, 48; 16:​14, 15)

APOSTOL edia negai, taunimanima ese sivarai namona e kamonaia neganai, e moale bona maoromaoro e abia dae. (Apostol Edia Kara 13:​47, 48; 16:​14, 15 ba duahidia.) Hari ina negai danu, haida ese nega ginigunana sivarai namona e kamonaimu neganai e moalemu. Haida be matamanai asi e uramu bae kamonai, to gabeai Basileia sivaraina e abia daemu. Haroro ḡaukara ai [“kudou-maoro taudia,” NWT] ta davarimu neganai, dahaka baita kara na namo?

2. Dahaka dainai haroro ḡaukara na biru tauna ena ḡaukara ida baita haheḡereḡerea diba?

² Eda haroro ḡaukara na biru tauna ena ḡaukara ida baita haheḡereḡerea diba. Biru tauna ese e hadoa uhedia anidia e varamu neganai, e kokidiamu. To anidia do se vara uhedia na do unu e dairidiamu. Una heḡereḡerena, ta davariamu tauna ese sivarai namona e kamonaimu neganai, ta uramu ia baita durua haraḡa Keriso ena hahediba tauna ai bainela. To danu, lalodia do se hadai taudia na do unu baita durudia, unu amo bae itaia Dirava bona Baibul ena hereva bae dibaia na namo. (Jon 4:​35, 36) Haida ese sivarai namona e abi dae haraḡamu bona haida be gabeai, to ita na mai dibada ede baita durudia toma. Ina atikol ai baita dibamu, nega ginigunana ai ta haroro heniamu tauna ese sivarai namona e abia daemu neganai dahaka baita kara. Danu, edena dala ai unu bamona taudia na do unu baita durudia Iehova turana ai baela bona ia bae tomadiho henia.

SIVARAI NAMONA E KAMONAIMU TAUDIA IDURUDIA DALANA

3. Haroro ḡaukara ai kamonai taudia ta davaridiamu neganai, dahaka baita kara? (1 Korinto 9:26)

³ Haroro ḡaukara ai kamonai taudia ta davaridiamu neganai, ta uramu maoromaoro baita durudia Iehova bae dibaia bona ia bae tura henia. Una dainai, Baibul bae stadilaia dalana baita hahedinaraia bona baita boiridia iseda hebou baema.—1 Korinto 9:26 ba duahia.

4. Hahine ta na maoromaoro Baibul stadi e abia dae sivaraina ta a gwauraia.

⁴ Baibul bae stadilaia dalana ba hahedinaraia. Ta hereva henidiamu taudia haida na maoromaoro Baibul stadi e abia daemu. Heḡereḡere, Canada ai e nohomu hahinena ta na Thursday ai eda haroro troli ai Mauri Ba Moalelaia Hanaihanai! buklet ta e abia. Una troli badinai e gini taihuna ese e hamaoroa una buklet amo Baibul stadi baine karaia diba, asi davana. Bona una hahine ese ena fon namba na taihu e henia. Hora haida muridiai, una hahine na meseij amo e henanadai edena negai bae stadi. Bena taihu ese e hamaoroa wiken ai baine vadivadi henia neganai, una hahine na ma e henanadai: “Kerukeru baoma diba, a?” Bena Friday ai stadi e hamatamaia, una wiken ai hebou ela matama, una nega amo Iehova ida ena hetura karana na do ini e hagoadaiamu.

5. Dahaka dainai ta enai Baibul istadilaina dalana ta herevalaiamu karana na baita haheroa namonamo? (Laulau danu ba itadia.)

⁵ Momokani, dia taunimanima iboudiai na Baibul stadi be abia daemu una hahine heḡereḡerena. Haida be hereva momokani basie abia dae haraḡamu. Reana ita na nega ginigunana ai idia ese e ura heniamu topik ta baita herevalaiamu. To bema dounu baita duruamu bona baita kara namo heniamu, reana basine daudau Baibul stadi be abia daemu. Ta enai Baibul baine stadilaia dalana ta hahedinaraiamu neganai, dahaka hereva baita gwaurai? Tadikaka bona taihu haida ese Baibul stadi e hamatamamu daladia ai una henanadai e haerelaia dalana aita herevalai.

6. Kamonai tauna ida ma ba herevahereva lou totona, dahaka hereva baita gwaurai?

⁶ Tadikaka taihu haida na Baibul stadi ihamatamadia daladia e nanadailaidia neganai, idia na e gwa tano haida ai Baibul stadi ta herevalaiamu neganai, ini hereva “baita stadi,” “Baibul kos,” eiava “baina hadibadibamu” na basita gwauraidiamu. E itaia, ini hereva “Baibul ba dibaia” bona “herevahereva karana” e ḡaukaralaimu na mai edia namo. Kamonai tauna ida ma ba herevahereva lou totona, reana ini ba gwau toma, “Baibul ese henanadai badadia e haerelaimu na hoa ḡauna,” eiava “Baibul na dia tomadiho bukana ta sibona; to dala idauidau ai ita e durudamu.” Danu ba gwau diba: “Nega sisina; reana miniti 10 ela 15 lalonai, mai anina bada ḡaudia bo dibadiamu, una ese emu mauri be duruamu.” Reana basita gwa “wiki ta ta bainama,” unu amo basie laloamu idia ta doridiamu baita hedavari loulou.

7. Edena nega ai haida na hereva momokani e lalopararalaiamu? (1 Korinto 14:​23-25)

⁷ Kongrigeisin hebouna ta ai ba boiridia. Reana apostol Paulo ena nega ai, haida na nega ginigunana Kristen hebouna ela neganai, hereva momokani e lalopararalaia. (1 Korinto 14:​23-25 ba duahidia.) Hari ina negai danu unu e vara tomamu. Kamonai taudia momo na eda hebou e lao henidia matamamu negana amo Iehova ida edia hetura karana e goada e laomu. To, edena negai ta baita boiria diba? Mauri Moalelaia Hanaihanai! bukana ena lesen 10 ai, ta ba boiria hebou bainela karana e herevalaiamu, to dia namo ba nari ela bona una kaha ba stadilaia murinai ba boiria hebou bainema. Emu herevahereva ginigunana ai, kamonai tauna ba boiria diba wiken hebouna ai bainema, reana ia enai pablik tok sinadona eiava una wiki ai ba karaia Gima Kohorona Stadi ena poin ta ba herevalaia.

8. Kamonai tauna o boiriamu neganai, dahaka ba herevalai na namo? (Isaia 54:13)

⁸ Kamonai tauna o boiriamu neganai, ia enai ba hahedinaraia eda hebou ta karaiamu dalana na ena dubu ai e karaiamu dalana amo be idaumu. Baibul stadi na nega ginigunana wiken hebouna ela neganai, e stadi henia taihuna e hamaoroa, eto, “Gima Kohorona Stadi e hakauamu tauna be iboudiai ladadia mai dibana?” Taihu ese e hahedinaraia ita na ta uramu eda kongrigeisin ai ta ta ladadia baita dibadia, badina kongrigeisin na ruma bese ta heḡereḡerena. Bena Baibul stiuden na e gwa edia dubu ai taunimanima momo ese ta ta ladadia na asi dibadia. Una heḡereḡerena, momo ediai eda hebou ta karamu daladia na matamata. (Isaia 54:13 ba duahia.) Ita na Iehova itomadiho henina totona ta heboumu, ia amo diba ta abimu, bona ta hahegoada hehenimu. (Heb. 2:12; 10:​24, 25) Una dainai, eda hebou na e heau namonamomu, ḡau momo ta dibamu, bona kastom karadia na asita badinadiamu. (1 Ko. 14:40) Danu eda Kingdom Hall e karaia neganai, lalo bae veri ḡaudia se atomu, unu amo eda hakala karana na ḡau ta ese basine hadikaia. Bona ita na politikol karadia ai asita vareaimu bona asita herevalaidiamu. Danu edia heiriheiri eiava lalohadai na asita durudiamu. Bona stiuden enai ina vidio Kingdom Hall ai be Dahaka E Karamu? ba hahedinaraia guna, unu amo ia na be dibamu hebou ai be dahaka be varamu.

9-10. Ta o boiriamu bainema hebou neganai, dahaka ba gwaurai unu amo basine gari? (Laulau danu ba itaia.)

⁹ Haida na asie uramu hebou baema badina e laloamu baita noidiamu Iehova ena Witnes ai baela totona. O boiriamu tauna ba hadibaia, ita na ta moalemu vadivadi taudia baita hedavari henidia bona asita doridiamu ḡau haida bae kara, bae haere, eiava eda orea ai bae vareai. Ruma bese mai natudia ida danu a boiridiamu. Hebou lalonai natu na tama sina edia amo asie hapararadiamu, to gabu tamona ai e helaimu bona ḡau tamona e dibaia heboumu. Unu amo tama sina na bae diba natudia be dahaka e dibamu bona idia be edeseniai. (Deut. 31:12) Hebou ai moni na asia gogomu. To Iesu ena hereva a badinaiamu, e gwa: “Vada o abi doa, vada ba heni doa.” (Met. 10:8) Danu ba hadibaia basine lalohekwarahi bema asi ena hebou dabuadia namodia, badina Dirava na dia taunimanima toana e itaiamu, to kudouna e itaiamu.—1 Sa. 16:7.

¹⁰ O boiriamu tauna na hebou e maimu neganai, mai moalemu ida ba welkam henia. Elda taudia haida bona tadikaka taihu haida ba hamaorodia ia bae hedavari henia. Bema be itaiamu haida ese ia e laloa badamu, reana gabe heboudia ai ma be maimu. Hebou lalonai bema asi ena Baibul emu baine ḡaukaralaia diba bona ta heboumu dalana ba hahedinaraia.

STADI O HAMATAMAIAMU NEGANAI

11. Edena dala ai ba hahedinaraia kamonai tauna ena nega na o laloa badamu?

¹¹ Ita ese ta ta stadi heniamu neganai, dahaka baita lalotao? Ba hahedinaraia kamonai tauna ena nega na o laloa badamu. Heḡereḡere, bema emui stadi negana ta o abia hidi, namona na nega korikori ai baola, ena be emu gabu ai momo ese nega na se laloa badamu. Danu, namona na emui stadi negana ginigunana na ba hakwadoḡia. Taunimanima momo ida Baibul stadi e kara tadikaka taihu haida na e gwa stadi negana baita hakwadoḡia na namo, ena be kamonai tauna na e uramu dounu baine kamonai. Danu mai anina bada ḡauna ta na basio hereva momo. Nega bada na emu Baibul stiuden ba henia ena lalohadai bona hemami baine herevalai.—Prov. 10:19.

12. Ta o stadi henia matamamu neganai, dahaka be emu tahua ḡauna ai ba halaoa?

¹² Ta o stadi henia matamamu neganai, emu tahua ḡauna na ia ba durua Iehova bona Iesu baine dibadia bona baine lalokau henidia. Una baita karaia totona namona na hanaihanai Baibul ena hereva baita hahedinarai, dia iseda lalohadai. (Apos. 10:​25, 26) Apostol Paulo na nega momo ena hahediba lalonai Iesu e herevalaia, unu amo ia e siaia Tauna, Iehova, baita dibaia bona baita lalokau henia. (1 Ko. 2:​1, 2) Danu Paulo ese hahediba taudia matamatadia e durudia kara namodia bae hahedinarai na mai anina bada, unu kara na gold, silver, bona dava bada nadidia ida baita haheḡereḡeredia diba. (1 Ko. 3:​11-15) Unu kara haida na abidadama, aonega, lalo-parara, bona Iehova imatauraina. (Sal. 19:​9, 10; Prov. 3:​13-15; 1 Pi. 1:7) Paulo ena hahediba dalana ba tohotohoa, unu amo emu stiuden ba durua ena abidadama bona ena hetura karana Iehova ida baine hagoadaia.—2 Ko. 1:24.

13. Kudou-maoro taudia ta durudiamu neganai, edena dala ai haheauka bona lalo-maoromaoro karana baita hahedinaraia? (2 Korinto 10:​4, 5) (Laulau danu ba itaia.)

¹³ Emu hahediba ai Iesu ena haheauka bona lalo-maoromaoro karana ba tohotohoa. Ta ena hemami baine hadikaia henanadaidia basio gwaurai. Bema o herevalaiamu poin ta na se lalopararalaiamu, namona na ba hanai poin ma haida ba herevalai, bena gabeai se lalopararalaia ḡauna ma ba herevalaia lou. Dia namo emu stiuden ba doria Baibul ena hahediba herevana ta baine abia dae, to namona na nega ba henia ia sibona ese baine haeroa. (Jon 16:12; Kol. 2:​6, 7) Ta uramu baita hanaidia hahediba koikoidia na Baibul ese kohoro ida e haheḡereḡerea. (2 Korinto 10:​4, 5 ba duahidia.) Ta ese nega daudau lalonai ena tomadiho ai e diba ḡaudia baine dadarai haraḡa na auka. Una dainai ia baita durua ena kohoro matamatana baine haginia, anina na ena abidadama Iehova enai baine hagoadaia. Unu amo guna e abi daeva ḡaudia na be dadaraimu bona Iehova na ena Roho-Mauri gabuna ai be halaoamu.—Sal. 91:9.

NEGA GINIGUNANA HEBOU EMA TAUNA BA DURUA

14. Nega ginigunana hebou e maimu taudia be ede baita kara henidia toma?

¹⁴ Iehova na e uramu taunimanima iboudiai baita kara namo henidia, herevana edia kastom o mauri daladia na i’idau. (Jei. 2:​1-4, 9) Una dainai, edena dala ai eme heboumu taudia ediai lalokau baita hahedinaraia?

15-16. Edena dala ai hebou e maimu taudia baita durudia?

¹⁵ Taunimanima haida na hebou e maimu badina e uramu bae diba eda hebou ai be dahaka e varamu. Una dainai eme hebou matamamu tauna na ba hedavari henia bona ba noia badimu ai baine helai diba. Emu Baibul bona ta stadilaiamu pablikeisin do ba henia baine itadia, eiava kopi haida ba henia. Danu, ena hemami ba laloa. Heḡereḡere, Kingdom Hall ela tauna ta ese tadikaka ta e hamaoroa ia na dia hebou dabuadia e kara dainai e hemaraiva. To una tadikaka ese e hamaoroa, ena be hebou dainai dabua namodia a kara, to iboudai na heḡereḡere. Una tau na e goada ela bona e bapatiso, ia ese una tadikaka ena hereva na se laloa boio. Una dainai, namona na baita helalotao ta na nega ginigunana hebou e maimu neganai ena hemami baine hadikaia henanadai basita heni.—1 Pi. 4:15.

¹⁶ Danu, eda herevahereva, haere ta henimu, bona tok ta henimu neganai, hebou emai matamamu taudia edia hemami baita lalodia. Heḡereḡere dia Witnes taudia bona idia ese e abi daemu ḡaudia ta herevalaimu neganai hemataurai karana baita hahedinaraia. Asi ta uramu ta gwauraimu herevadia ese lalodia bae hahisi bena hebou basiema lou. (Tit. 2:8; 3:2) Heḡereḡere, e abi daemu ḡaudia na basita hevasehalaidia. (2 Ko. 6:3) Una dainai, pablik tok e henimu tadikakadia na bae henari namonamo. Danu, idia ese dia Witnes taudia danu bae lalodia, edia tok ai pablik ese asie lalopararalaimu herevadia na bae hahedinarai namonamo.

17. Haroro ḡaukara ai “kudou-maoro taudia” ta davaridiamu neganai, eda tahua ḡauna be dahaka?

¹⁷ Hari ina negai hahediba taudia ai ba halaodia ḡaukarana baita habadaia, unu amo “mauri hanaihanai e uramu kudou-maoro taudia” baita durudia. (Apos. 13:48; NWT) Namona na ediai Baibul stadi baita hamatamaia eiava baita boiridia eda hebou baema. Unu ta kara tomamu neganai, idia baita durudiamu “mauri gabuna e laomu dalana” ai be rakamu.—Met. 7:14.