Sapit Vin

Kontiyn Mazinn Zur Zeova

1. Ki u ti resanti kan pu premye fwa u ti aprann ki tu bann sufrans sa vye sistem la pre pu fini?

ENN bann premye kitsoz ki u finn aprann dan Labib se ki Zeova ena proze ki later antye vinn enn paradi. Dan sa nuvo lemond la, pu nepli ena lager, krim, lamizer, sufrans ek lamor. Mem bann mor pu regayn lavi. Bann posibilite vremem extraordiner, pa vre? Nu kone ki tusala byin pre parski bann fe pruve ki Zezi pe reyne enn fason invizib depi 1914 ek ki depi sa nu finn rant dan bann dernye zur sa move lemond la. Alafin sa bann dernye zur la, Zeova pu detrir move sistem ki egziste zordi ek lerla so nuvo lemond ki Li ti promet nu, pu kumanse!

2. Ki ete “Zur Zeova”?

² Labib apel sa lepok destriksyon ki pe vini la “zur Zeova.” (2 Pyer 3:10) Sa mem “zur koler Zeova” kont lemond antye ki domine par Satan. (Sefanya 2:3) Sa zur la pu konn so pwin pli for dan “lager gran zur Bondye Tu-Pwisan . . . , ki an Ebre apel Ar–Magedonn [Armagedonn],” kot “bann lerwa lor later antye” pu disparet pu tuletan. (Revelasyon 16:14, 16) Eski u fason viv montre ki u sir ki “zur Zeova” li deryer laport?—Sefanya 1:14-18; Zeremi 25:33.

3. (a) Kan eski zur Zeova pu vini? (b) Kifer eski li bon ki Zeova pa finn fer konn “sa zur la, uswa sa ler la”?

³ Labib pa revel nu dat egzak kan Zezi Kris pu vini kuma sa Kikenn ki Zeova finn swazire pu detrir sistem Satan la. Zezi ti dir: “Konsernan sa zur la, uswa sa ler la personn pa kone, ni bann anz dan lesyel ni Garson la, me selman Papa.” (Mark 13:32) Bann ki pena vre lamur pu Zeova pu ena tandans pu repus sa zur la dan zot lespri, ek turn zot ver bann laktivite lemond. Me, bann ki vremem kontan Zeova pu servi Li avek tu zot leker, ninport kan lafin sa move sistem la vini.—Psom 37:4; 1 Zan 5:3.

4. Ki lavertisman Zezi ti done?

⁴ Zezi averti bann ki kontan Zeova par sa bann parol la: “Fer atansyon, kontiyn veye, parski zot pa kone kan ler fixe la pu arive.” (Mark 13:33-37) Li konsey nu pu pa les manze-bwar uswa bann “traka lavi” okip telman nu lespri ki nu bliye nu pe viv enn lepok grav.—Lik 21:34-36; Matye 24:37-42.

5. Dapre seki Pyer finn explike, ki zur Zeova pu amene?

⁵ Pareyman, Pyer konsey nu pu kontiyn mazinn “prezans zur Zeova, kot bann lesyel ki pe pran dife pu fonn ek bann eleman ki finn byin sofe, zot usi zot pu fonn.” Tu bann guvernman lor later—“bann lesyel”—pu detrir, move sosyete imin—“later”—ek so “bann eleman,” setadir bann lide ek bann aktivite sa move lemond la, kuma par egzanp so lespri lindepandans vizavi Bondye, ek so lavi imoral ek materyalis, zot usi zot pu detrir. Tusala pu ranplase par “bann nuvo lesyel [Rwayom Bondye ki dan lesyel] ek enn nuvo later [enn nuvo sosyete lor later]” kot “lazistis pu reste.” (2 Pyer 3:10-13) Sa bann levennman ki pu bulvers lemond la pu kumanse enn ku, dan enn zur ek enn ler ki personn pa pe atann.—Matye 24:44.

Pran Kont Siyn

6. (a) Ziska ki pwin, repons ki Zezi ti donn so bann disip ti aplik ar lafin sistem Zwif? (b) Ki bann parti dan repons Zezi atir latansyon lor bann levennman ek latitid ki ena depi 1914 ziska zordi?

⁶ Akoz sa letan kot nu pe viv la, nu bizin byin konn bann detay bann diferan eleman sa siyn ki idantifye bann dernye zur la—“lafin sa sistem ki egziste la.” Rapel ki kan Zezi ti reponn kestyon so bann disip, ki nu truve dan Matye 24:3, sertin kitsoz ki li ti’nn dekrir dan verse 4 ziska 22 ti konn enn ti realizasyon mem lor sistem Zwif ant lane 33 ek 70 N.L. Me sa profesi la pe konn so pli gran realizasyon depi 1914, pandan ‘prezans Kris ek lafin sa sistem ki egziste la.’ Matye 24:23-28 dir seki ti pu arive depi lane 70 N.L. ziska lepok prezans Kris. Bann levennman ki dekrir dan Matye 24:29–25:46 pe arive dan lepok lafin.

7. (a) Kifer eski nu bizin personelman pran kont kuma bann kondisyon ki ena asterla pe realiz sa siyn la? (b) Reponn bann kestyon alafin sa paragraf la ek montre kuma siyn la finn kumans realize depi 1914.

⁷ Nu bizin personelman swiv bann levennman ek bann latitid ki pe realiz sa siyn la. Si nu fer enn rapor ant sa bann kitsoz la ek profesi Labib, sa pu ed nu pu kontiyn mazinn zur Zeova. Li pu permet nu usi konvink bann dimunn kan nu averti zot ki sa zur la pre. (Izai 61:1, 2) Avek sa bann lobzektif la dan nu lespri, anu egzaminn asterla bann kestyon ki vini apre ek ki atir latansyon lor bann diferan parti sa siyn la, parey kuma mansyone dan Matye 24:7 ek Lik 21:10, 11.

Dan ki fason extraordiner profesi ki ti anonse ki pli ale ‘nasyon pu kont nasyon ek rwayom kont rwayom,’ finn kumans realize depi 1914? Konsernan lager, ki finn arive depi sa dat la?

An 1918, ki gran maladi finn pran plis lavi ki Premye Lager Mondyal? Malgre konesans ki zom ena dan domenn medikal, ki bann maladi pe ankor tuy plizir milyon dimunn?

Ki kantite lafaminn finn afekte later malgre bann progre syantifik dan sa syek ki finn pase la?

Ki konvink u ki 2 Timote 3:1-5, 13 pa pe dekrir manyer ki lavi finn tuzur ete, me plito manyer ki bann move kondisyon pe plis ogmante amezir ki nu koste ar lafin sa bann dernye zur la?

Separasyon Bann Dimunn

8. (a) Ki lot kitsoz, ki dekrir dan Matye 13:24-30, 36-43, Zezi ti asosye ar lafin sa sistem ki egziste la? (b) Ki vedir sa legzanp ki Zezi ti pran la?

⁸ Ena bann lezot devlopman inportan ki Zezi ti asosye avek lafin sa sistem ki egziste la. Enn ladan se separasyon “bann garson Rwayom” ar “bann garson sa kikenn ki move la.” Zezi ti koz sa dan so parabol karo dible kot enn lennmi finn sem move zerb kot finn deza fini sem dible. Dan sa legzanp la, “dible” reprezant bann vre Kretyin ki Bondye finn swazire avek so lespri. “Move zerb” reprezant bann ki deklar Kretyin, me ki avredir zot “bann garson sa kikenn ki move la” parski zot atase ar lemond ki dirize par Dyab. Zot separe ar “bann garson rwayom [Bondye]” ek zot finn gayn mark pu destriksyon. (Matye 13:24-30, 36-43) Eski finn kumans fer sa separasyon la?

9. (a) Apre Premye Lager Mondyal, ki gran separasyon finn fer pu tu bann ki ti pretann ki zot Kretyin? (b) Kuma eski bann Kretyin ki’nn swazire par lespri Bondye finn montre ki zot bann vre serviter Rwayom?

⁹ Apre Premye Lager Mondyal, tu bann ki ti pretann ki zot Kretyin ti separe an de grup: (1) Bann pret Lakretyinte ek bann ki swiv zot, ki ti montre an piblik ki zot ti sutenir Sosyete Bann Nasyon (zordi Nasyon Zini) ek an mem tan res fidel ar zot nasyon, ek (2) bann vre Kretyin dan sa peryod apre lager la, ki finn kontinye sutenir Rwayom Bondye olye bann nasyon sa lemond la. (Zan 17:16) Sa bannla finn montre ki zot bann vre serviter Bondye par zot travay predikasyon “labonn nuvel lor Rwayom” dan lemond antye. (Matye 24:14) Avek ki rezilta?

10. Ki premye rezilta travay predikasyon Rwayom ti done?

¹⁰ Premyerman, finn ena rasanbleman bann manb 144,000 ki reste lor later ek ki ena lesperans pu reyn avek Kris dan Rwayom dan lesyel. Mem si sa bann manb la ti truv zot inpe partu parmi bann nasyon, zot finn rasanble dan enn lorganizasyon ini. Sa bann manb la pu sele ofisyelman, ek sa pre pu al fini.—Revelasyon 7:3, 4.

11. (a) Ki travay rasanbleman pe kontinye fer, ek an akor avek ki profesi? (b) Pwiski sa profesi la pe realize, ki sa vedir?

¹¹ Lerla, anba direksyon Zezi Kris, finn kumans ena rasanbleman “enn gran laful . . . dan tu bann nasyon, tribi, pep ek lang.” Zot form parti bann “lezot muton” ki pu sape dan “gran detres” ek ki pu rant dan lemond nuvo. (Revelasyon 7:9, 14; Zan 10:16) Sa travay predikasyon Rwayom Bondye avan ki lafin vini la pe kontinye fer ziska dan nu lepok. Gran laful bann lezot muton, ki par milyon zordi, pe ed fidelman leres bann manb 144,000 ki lor later pu fer konn mesaz Rwayom ki donn lavi. Tu bann nasyon pe tann sa mesaz la.

Ki Pu Arive dan Lavenir?

12. Ki kantite ankor nu pu bizin fer travay predikasyon avan ki zur Zeova arive?

¹² Tu seki nu finn fek gete montre ki lafin sa bann dernye zur la finn koste ek zur Zeova li deryer laport. Me, eski ena bann profesi ankor ki pu bizin realize avan ki sa zur ki fer per la kumanse? Wi. Premyerman, separasyon bann dimunn an rapor avek kestyon lor Rwayom pankor fini. Dan sertin landrwa kot pandan plizir lane ti ena buku persekisyon, zordi bann nuvo disip pe ogmante. Mem dan bann landrwa kot dimunn pe rezet labonn nuvel, nu montre pitye ki Zeova ena pu sa bann dimunn la kan nu donn zot temwaynaz. Alor, anu kontiyn sa travay la! Zezi donn nu lasirans ki kan travay la pu fini, lafin pu vini.

13. Parey kuma finn ekrir dan 1 Tesalonisyin 5:2, 3, ki levennman remarkab ankor pu bizin arive, ek ki sa pu vedir pu nu?

¹³ Enn lot profesi Labib byin inportan anons sa: “Ninport kan zot pu dir: ‘Lape ek sekirite!’ lerla mem enn destriksyon pu abat lor zot enn sel ku san ki zot atann, parey kuma duler enn fam ansint; ek pena semin zot sape.” (1 Tesalonisyin 5:2, 3) Nu pu bizin atann ankor pu truve kuma bann nasyon pu dir sa “lape ek sekirite” la. Me, sa pa pu vedir ki bann dirizan lemond finn vremem rezud bann problem limanite. Bann ki pe mazinn zur Zeova pa pu les zot anbete par sa proklamasyon la. Zot kone ki deswit apre, enn sel ku enn destriksyon pu vini.

14. Ki bann levennman ki pu arive pandan gran detres, ek dan ki lord sa pu arive?

¹⁴ Kan gran detres pu kumanse, bann dirizan lemond pu vir kont Gran Babilonn, pwisans mondyal fos relizyon, ek zot pu detrir li net. (Matye 24:21; Revelasyon 17:15, 16) Apre sa, bann nasyon pu vir kont bann ki sutenir suverennte Zeova, ek sa pu provok koler Zeova kont bann guvernman politik ek tu seki sutenir zot. Lerla, pu ena enn destriksyon total lor zot. Sa mem Armagedonn, pwin pli for dan sa gran detres la. Apre sa, Zezi pu lans Satan ek so bann demon dan enn tru sinbolik kot zot pu nepli kapav inflyans limanite. Sa mem ki pu terminn zur Zeova kan so non pu gayn laglwar.—Ezekyel 38:18, 22, 23; Revelasyon 19:11–20:3.

15. Kifer eski li pa pu saz si nu dir ar numem ki zur Zeova ankor lwin?

¹⁵ Lafin sa sistem ki egziste la pu vinn dan ler egzak, dapre kalandriye Bondye. Li pa pu anretar. (Abakuk 2:3) Rapel, destriksyon Zerizalem dan lane 70 N.L. ti vinn vit, dan enn ler ki bann Zwif pa ti pe atann, kan zot ti pe panse ki ti nepli ena danze. Rapel usi ansyin Babilonn. Li ti byin for, li ti konfyan, ek li ti fortifye ar bann gran-gran miray byin solid. Me, dan enn sel lanwit li finn tonbe. Alor, parey kumsa mem, enn sel ku pu ena enn destriksyon lor sa move sistem kot nu pe viv la. Anu fer enn manyer ki kan sa arive, nu pe ador Zeova dan linite ek nu pe kontiyn mazinn zur Zeova.

Kestyon Revizyon

• Kifer eski li byin inportan ki nu mazinn zur Zeova? Kuma eski nu kapav fer sa?

• Kuma eski nu konserne personelman par separasyon bann dimunn ki pe fer asterla?

• Ki pu arive ankor devan, avan ki zur Zeova kumanse? Alor, ki nu bizin pe fer personelman?

[Bann zimaz paz 180, 181]

Byinto bann dernye zur pu fini avek destriksyon sistem Satan