Fevriye

Kouma landirans kapav fini so “travay” dan nou? Li ed nou pou “vinn konple ek san defo dan tou, san ki [nou] mank nanye.” (Zak 1:4, NW.) Kan nou travers bann leprev, kitfwa nou pou remarke ki nou bizin ena plis pasians, rekonesans, ek lamour. Amezir ki nou andir bann leprev, nou pou aprann kouma pou manifeste sa bann kalite-la ankor plis, ek koumsa nou pou amelior nou personalite antan ki Kretien. Landirans kapav fer nou vinn bann meyer Kretien. Akoz sa, nou pa pou anvi viol lalwa Zeova zis pou ki nou leprev fini. Par exanp, si to pe lite kont bann panse imoral, pa les twa tom dan tantasion! Demann Zeova so led pou rezet sa bann move panse-la. Eski ena enn manb dan to fami ki pe persekit twa? Pa bes lebra! To bizin bien determine pou kontign servi Zeova. Rapel: Pou ki nou gagn faver Bondie, nou bizin andire.​—Rom. 5:3-5; Zak 1:12. w16.04 2:15, 16

Nou kone ki Zeova pa konsider enn dimounn ouswa enn group dimounn pli meyer ki lezot. Pou Li, zot tou ena mem valer. Biensir, Zeova finn kree nou diferan ar nou kamarad, ek nou kapav profit ek apresie sa diferans-la. Li pa anvi ki nou abandonn nou kiltir. Me Li pa anvi osi nou panse ki nou pli meyer ki lezot. (Rom. 10:12) Fode zame nou tro fier nou pei ouswa nou nasion ki nou panse nou pli meyer ki lezot. Si nou pans koumsa, li kapav vinn bien difisil pou nou gard nou netralite. Se samem ki ti arive dan premie siek. Sertin frer Ebre ti mal azir anver bann vev Grek. (Zist. 6:1) Kouma nou pou kone si nou pe koumans devlop sa kalite fierte-la? Fer koumadir enn frer ouswa enn ser ki sorti dan enn lot pei donn nou enn sigzesion. Eski deswit nou pou pans koumsa: ‘Nou fer bann kitsoz pli bien isi,’ ek apre nou rezet so sigzesion? Si wi, rapel sa konsey inportan ki ena dan nou text pou zordi la. w16.04 4:12, 13

Zezi ti pres “bonn nouvel Rwayom Bondie,” ek li anvi ki so bann disip osi fer parey. Ki group dimounn ki pe pres sa mesaz-la ar tou dimounn? (Mat. 28:19) Se zis bann Temwin Zeova! Enn pret misioner ki’nn viv dan plizir pei ti dir enn Temwin Zeova ki, dan sak pei, li ti demann bann Temwin Zeova ki mesaz zot pe prese. Pret-la ti dir: “Zot tou telman bet ki zot ti donn mem repons: ‘Bon nouvel lor Rwayom Bondie.’” Seki sa pret-la finn dir montre ki nou pa bet, me ki nou ini antan ki bann vre Kretien. (1 Kor. 1:10) Rwayom Bondie, se osi mesaz prinsipal ki ena dan Latour Degard Pe Anons Rwayom Zeova. An mwayenn inprim 59,000,000 kopi sak nimero sa magazinn-la dan 254 lang. Akoz sa, li’nn vinn magazinn ki pli distribie dan lemond antie! w16.05 2:6

Kitfwa to anvi fer pionie. To finn fer sertin sanzman dan to lavi pou ki to kapav pas plis letan dan to minister. Me to ankor ena dout tansion to pa kontan ek satisfe ar pli tigit kas ek pli tigit kitsoz. Biensir, Labib pa dir nou ki nou bizin fer pionie pou servi Zeova. Nou kapav kontign servi Li fidelman antan ki enn proklamater. Me dan enn lot kote, Zezi ti dir ki Zeova beni bann ki fer sakrifis pou So Rwayom. (Lik 18:29, 30) Labib dir osi ki Zeova kontan kan nou fer tou seki nou kapav pou loue Li, ek Li anvi ki nou servi Li dan lazwa. (Ps. 119:108) Kan nou priye ek medit lor sa bann kitsoz-la, nou kapav pran enn desizion ki pou pratik pou nou ek ki Zeova pou beni. w16.05 3:13

Fode pa ki bann adilt tro fier pou lir bann lartik ki’nn ekrir pou bann zenn. Boukou bann problem ki fer mansion dan sa bann lartik-la konsern tou bann Kretien. Par exanp, nou tou bizin defann nou bann krwayans, kontrol nou bann santiman, rezet presion bann kamarad, ek evit bann move frekantasion ek bann move divertisman. Alor, mem si finn ekrir sa bann piblikasion-la pou bann zenn, bann kitsoz ki ena ladan sorti dan Labib ek tou Kretien kapav tir profi. Bann piblikasion ki finn ekrir pou bann zenn kapav osi ed zot pou fer zot lamitie avek Zeova vinn pli solid. Ek mem bann adilt osi kapav tir profi.​—Ekle. 12:13. w16.05 5:15, 16

“Zeova nou Bondie Li enn sel Zeova.” Se vremem bann parol bien pwisan! Sa rapel-la finn donn lafors bann Izraelit pou andir bann difikilte kan zot ti rant dan Later Promiz ek ti pran sa pei-la. Sa bann parol-la kapav donn nou’si lafors pou ki nou reisi travers gran detres ek antretenir lape ek linite dan Paradi ki pou vini biento. Anou kontign res atase zis ar Zeova tousel. Nou bizin kontan Li ek servi Li avek tou nou leker, tou nou nam ek tou nou lafors. Nou bizin osi fer bann gran zefor pou prezerv lape ek linite ki ena parmi nou. Si nou kontign fer sa bann kitsoz-la, Zezi pou konsider nou kouma bann mouton ek nou pou trouv so bann parol realize: “Vini, zot ki mo papa finn beni. Resevwar rwayom ki Bondie finn prepare pou zot depi kreasion lemonn.”​—Mat. 25:34. w16.06 3:2, 20

Lorgey kapav pous nou pou defann nou move kondwit. Si nou fer sa, nou pou nepli enn larzil ki fasil pou travay. Eski enn frer ouswa enn ser inn deza ofans twa? Eski to ti sagrin kan to ti perdi sertin privilez? Kouma to ti reazir? Eski to ti koumans ena lorgey? Ouswa seki ti pli inportan pou twa se fer lape avek to frer ek res fidel ar Zeova? (Ps. 119:165; Kol. 3:13) Kan enn kikenn kontign fer pese ek mem kasiet seki li pe fer, kitfwa sa kapav vinn difisil pou li aksepte bann konsey ki Zeova done. Sa vinn pli fasil pou li fer pese. (Ekle. 8:11) Enn frer, ki pandan enn tan ti ena labitid get pornografi, ti dir: “Deplizanpli, mo ti kritik bann ansien.” Sa labitid-la ti gat so relasion avek Zeova. Kan lezot ti dekouver seki li ti pe fer, bann ansien ti ed li. Li vre ki nou tou nou inparfe. Me si nou vinn enn kikenn ki kontan kritik bann ki donn nou konsey ouswa si nou rod bann exkiz olie ki nou rod led Zeova, sa kapav fer nou leker vinn dir. w16.06 2:5, 6

Zezi ti kone ki so bann disip ti trakase konsernan seki zot pou manze, bwar, ek mete. Akoz sa dan so Sermon lor Montagn, li ti dir zot: “Pa fatig zot ar zot lavi.” Zezi ti anvi ed zot pou konpran kifer fode pa zot trakase konsernan sa bann kitsoz-la. Li ti kone ki si zot trakase plis ki bizin, mem pou bann kitsoz ki zot ti vremem bizin, sa kapav fer zot bliye seki pli inportan dan lavi. Zezi ti telman trakase pou so bann disip ki li’nn rapel zot sa danze-la, kat fwa ankor dan so Sermon lor Montagn. (Mat. 6:27, 28, 31, 34) Zezi ti kone ki bann dimounn bizin. Li ti kone ki “dan bann dernie zour,” so bann disip ti pou konn bann moman bien difisil. (2 Tim. 3:1, NW.) Azordi, boukou dimounn pa pe reisi gagn enn travay, ek bann kitsoz pe vinn deplizanpli ser. Dan boukou landrwa, bann dimounn bien pov ek zot ena bien tigit manze ouswa pena mem manze. Me Zezi ti kone osi ki lavi enn dimounn pli inportan ki manze, ek lekor pli inportan ki linz. w16.07 1:8, 9

Parski nou pa kapav obeir Bondie dan enn fason parfe, nou pa merit okenn faver ar Bondie. Ofet, nou merit lamor. Lerwa Salomon ti dir: “Lor sa later-la, pena enn zom ki drwat, ki touletan fer seki bon ek ki zame pa fer pese.” (Ekle. 7:20) Plitar, lapot Pol ti dir: “Tou dimounn inn fer pese ek zot pa reisi ariv ziska laglwar Bondie,” ek “saler pese, li lamor.” (Rom. 3:23, NW; 6:23a) Zeova telman kontan bann dimounn ki Li’nn avoy “so Sel Garson” pou mor pou nou. Se samem pli gran aksion ki Zeova finn fer pou donn limanite so faver ki personn pa merite. (Zan 3:16) Pol ti dir ki Zezi “asterla finn gagn kouronn laglwar ek loner parski li’nn soufer ek li’nn mor, pou ki gras-a Bondie so faver ki personn pa merite, li gout lamor pou tou dimounn.” (Ebre 2:9, NW.) Wi, “don Bondie li lavi eternel dan Zezi Kris nou Segner.”​—Rom. 6:23b. w16.07 3:3, 4

Maryaz se enn kitsoz normal. Me kouma maryaz finn existe, ek ki so lobzektif? Repons sa de kestion-la pou permet nou ena enn bon fason panse lor maryaz ek lor so bann bienfe. Bondie ti kree premie zom, Adan, ek ti demann li pou donn nom bann zanimo. Adan ti remarke ki tou zanimo ti ena zot per, “me pou zom, pa ti ena enn led ki ti pou al bien ar li.” Alor Bondie ti fer Adan tom dan enn profon somey, Li ti tir enn kot ar li ek ti form enn fam. Zeova ti amenn li ar Adan, ek li ti vinn so madam. (Zen. 2:20-24) Kouma nou trouve isi, maryaz se enn kado ki Zeova inn done. Boukou lane plitar, Zezi ti redir seki Zeova ti dir dan zardin Edenn: ‘Enn zom pou kit so papa ek so mama, li pou atas li ar so fam e toulede pou vinn enn sel laser.’ (Mat. 19:4, 5) Parski Bondie finn pran enn kot ar Adan pou kree premie fam, sa koup-la finn bizin konpran ki zot bizin res atase ar zot kamarad kouma enn sel laser. Zeova zame pa ti anvi ki mari-fam divorse ouswa ki zot ena plis ki enn konzwin. w16.08 1:1, 2

Zezi pa ti touletan koz avek bann lafoul dimounn. Souvan li ti koz avek enn dimounn tousel ek li ti fer sa dan enn fason bien amikal. Par exanp, li ti gagn enn konversasion bien interesan avek enn madam ki ti vinn tir delo dan pwi pre ar lavil Sishar. (Zan 4:5-30) Zezi ti koz osi avek Matie Levi, enn kikenn ki ramas tax, ek li ti invit li pou vinn so disip. Matie ti aksepte ek plitar li ti invit Zezi ek lezot pou vinn manze kot li. Laba, Zezi ti koz avek boukou dimounn. (Mat. 9:9; Lik 5:27-39) Zezi ti koz osi dan enn fason bien amikal avek Natanael, mem si Natanael ti dir bann kitsoz negatif lor bann dimounn ki res Nazaret. Parski Zezi ti koz dan enn fason amikal ar li, Natanael ti sanz so fason panse lor Zezi, ki ti sorti Nazaret. Ek Natanael ti anvi aprann plis ar Zezi. (Zan 1:46-51) Lexanp Zezi montre ki, kan nou koz avek bonte ek dan enn fason amikal ar bann dimounn, kitfwa zot pou pli dispoze pou ekout nou. Kan nou form bann nouvo pou koz dan sa fason-la, zot pou pli kontan predikasion. w16.08 4:7-9

Kan bann koup pa reisi regle zot bann problem grav, zot kapav desid pou separe ouswa pou divorse. Sertin koup kapav panse ki zot bann problem telman grav ki zot bizin separe. Me Zezi ti montre ki kantite li grav kan separe. Li ti repet seki Bondie ti dir o-koumansman konsernan maryaz ek apre li ti dir: “Fode pa dimoun separ seki Bondie finn met ansam.” (Mat. 19:3-6; Zen. 2:24) Alor, Zeova anvi ki mari-fam res ansam. (1 Kor. 7:39) Nou tou nou bizin rapel ki nou ena pou rann kont Zeova pou nou bann aksion. Sa kapav ed nou pou regle bann problem pli vit posib avan ki zot vinn pli grav. w16.08 2:10, 11

Touletan nou bizin lor nou gard. Kifer? Parski nou bann lennmi kapav atak nou kan nou pa atann, ouswa kan nou feb. Si nou kontign lager kont lemal, nou kapav gagne! Selman, si nou nepli res lor nou gard ek nou aret lager, Satan, so lemond ek nou bann prop febles kapav dominn nou. Alor, zame pa bes lebra. Pa dekouraze ek pa les to lame tonbe! (1 Pier 5:9) Pou nou gagn laviktwar, nou bizin rapel kifer nou pe lite. Nou pe lite parski nou anvi gagn faver ek benediksion Bondie. Ebre 11:6 (NW) dir: “Enn dimounn ki apros ar Bondie, bizin krwar ki Li existe, ek ki Li vinn Bondie ki rekonpans bann ki fer gran zefor pou rod Li.” Fer bann gran zefor pou rod Zeova vedir ki nou bizin fer boukou zefor si nou anvi gagn so faver.​—Zist. 15:17. w16.09 2:4, 5

Labib ed nou dan enn fason pratik pou ki nou kapav fer bann bon swa ek donn Bondie loner. Kanmem sa, nou kapav met linz ki nou kontan. Tou dimounn pena mem stil abiye, ek tou dimounn pena mem bidze. Selman, nou linz bizin touletan bien repase, prop, modes, apropriye, ek konvenab dapre landrwa kot nou ete. Li pa touzour fasil pou trouv enn linz ki konvenab ek modes. Boukou magazin vann zis bann linz ki bien alamod. Alor, sa pou demann nou plis letan ek zefor pou trouv bann zip, bann rob, bann blouz, ouswa pou swazir bann kostim ek bann pantalon ki pa tro plake. Me nou bann frer ek ser pou remark ek apresie bann zefor ki nou fer pou met bann zoli linz ki konvenab. Noumem nou pou kontan ki nou’nn donn laglwar nou Papa ki dan lesiel. Alor, li vo lapenn ki nou fer ninport ki sakrifis pou donn Li laglwar. w16.09 3:15, 16

Kan to servi bann lexanp, sa permet to zanfan servi so limazinasion. Sa pou ed li pou reflesi lor leson ki to pe ansegn li, pou bien konpran leson-la, ek osi pou rapel sa leson-la. Lerla, li pou kontan osi pou konn plis. To kapav servi bann lexanp pou ansegn to zanfan ki tou seki Labib dir touletan li exakt. Par exanp, to kapav examinn verse ki dan nou text pou azordi. Pa zis dir to zanfan ki seki finn ekrir dan sa verse-la, se Zeova ki’nn dir sa. Okontrer, ed li pou reflesi. To kapav dir li ki bann dimounn dan lepok Zob kitfwa pa ti krwar ki later tini dan vid. Zot ti kone ki ninport ki kitsoz, kouma par exanp enn boul ouswa enn ros, bizin tini lor kitsoz. Me sa lepok-la, personn pa ti ankor prouve ki later tini dan vid dan lespas. Dan sa lepok-la, pa ti ena ni teleskop ni navet spasial. Ki leson to kapav ansegn li par sa lexanp-la? Mem si finn ekrir Labib depi bien lontan, li touletan exakt parski se Zeova ki finn fer ekrir sa.​—Ne. 9:6. w16.09 5:9, 12

Kan nou ena lafwa an Zeova ek an Zezi, nou pa zis konn seki zot finn fer ek pou fer pou nou. Nou ena osi enn gran dezir pou viv dan fason ki zot finn ansegn nou. Ek nou bien anvi fer lezot konn Zeova ek Zezi. Pou ki nou kapav viv pou touletan dan lemond nouvo ki Bondie finn promet, nou bizin ena lafwa ek nou bizin fer sir ki li res for. Lafwa li kouma enn plant. Nou bizin aroz enn plant pou ki li res an bonn sante ek kontign grandi. Me si nou pa donn li ase delo, li pou sek ek li pou mor. Dan mem fason, nou bizin fer sir ki nou lafwa res “an bonn sante” ek ki li kontign “grandi.”​—Tit 2:2, NW; 2 Tes. 1:3, NW; Lik 22:32; Ebre 3:12. w16.10 4:4, 5

Kan Daniel ek so bann kamarad ti an exil dan Babilonn, bann Babilonien ti esey fors zot pou aksepte zot kiltir ek zot relizion. Kouma? Zot ti ansegn bannla “lang bann Kaldeen” ek ti donn zot bann nom Babilonien. (Dan. 1:3-7) Nom ki Daniel ti gagne ti fer referans ar Bel, bondie prinsipal bann Babilonien. Alor li posib ki Lerwa Neboukadnetsar ti anvi fer Daniel krwar ki bondie bann Babilonien ti pli for ki so Bondie Zeova. (Dan. 4:8) Dan Babilonn, Daniel ti gagn mem manze ki lerwa. Me li ti “bien deside dan so leker” ki li pa ti pou dezobeir lalwa Bondie. (Dan. 1:8) Daniel ti kontign etidie “bann liv sakre,” ki ti an Ebre, se akoz sa ki li ti kapav gard enn bon relasion avek Zeova, mem si li ti dan enn pei etranze. (Dan. 9:2, not) Ofet, mem apre 70 an ki li ti dan Babilonn, ti ankor touzour konn li par so nom Ebre, setadir Daniel.​—Dan. 5:13. w16.10 2:7, 8

Depi 1919, Zezi pe servi “lesklav fidel ek saz” pou ed pep Bondie konpran bann lansegnman Biblik ek pou aplik sa bann lansegnman-la. (Mat. 24:45-47) Kan nou obeir bann konsey ki ena dan Labib, nou gard kongregasion pir, ini, ek dan lape. Poz tomem sa kestion-la: ‘Eski mo pou res fidel anver Zezi ek swiv bann instriksion ki lesklav fidel ek saz done?’ Gras-a Labib, nou aprann ki bann serviter Zeova ki dan lesiel osi zot organize. Par exanp, dan enn vizion, Ezekiel ti trouv Zeova lor enn kales ki ti kapav al bien vit dan ninport ki direksion ki Zeova ti anvi. (Eze. 1:4-28) Biento Zezi Kris ek so bann anz pou detrir sa move lemond-la. Lerla, personn pa pou zet dezoner lor Zeova ek lor so nom, ni mem kritik so fason dirize! w16.11 3:9, 10

Dan nou bann renion, nou aprann konn Zeova pli bien ek nou ankouraz sakenn parmi nou. (1 Kor. 14:31) Mem bann ki pe servi Zeova depi boukou lane bizin lankourazman. Reflesi lor lexanp Zozwe. Kan bann Izraelit ti pre pou rant dan Later Promiz, Zeova ti swazir Zozwe pou gid zot. Pourtan, Zeova ti dir Moiz ankouraz Zozwe mem si li finn servi Zeova pandan boukou lane. Zeova ti dir Moiz: “Etabli Zozwe kouma gid lor zot, ankouraz li ek fortifie li, parski se limem ki pou travers Zourdin avek lepep deryer li ek se limem ki pou fer zot erit later ki to pou trouve.” (Det. 3:27, 28) Zozwe ti bizin lankourazman, parski plitar, nasion Izrael ti pou bizin fer plizir batay kont bann lezot nasion ek mem perdi omwin enn batay ladan. (Zozwe 7:1-9) Azordi, nou kapav ankouraz bann ansien ek bann sirveyan sirkonskripsion ki pe travay dir pou pran swin pep Bondie.​—1 Tes. 5:12, 13. w16.11 1:12, 13

Bann Etidian Labib ti konpran ki li pa ti ase ki zot dir zot bann fami, zot bann bon kamarad, ek bann manb zot legliz ki zot inn aret soutenir fos relizion. Zot ti anvi ki lemond antie kone ki Gran Babilonn li enn prostitie lor plan relizie! Alor, ant Desam 1917 ek koumansman 1918, sa de-trwa mil Etidian Labib ki ti ena sa lepok-la finn distribie 10 milyon trak. Dan sa trak-la, ti ena enn lartik ki ti apel « La Chute de Babylone. » San pas par kat-sink semin, sa trak-la ti dir laverite lor bann relizion ki swadizan Kretien. Sirman ou’nn fini devine, bann sef legliz ti extra ankoler! Me kanmem sa, bann Etidian Labib pa finn aret la. Zot ti bien deside pou kontign prese ek kontign obeir “Bondie kouma enn sef plito ki bann zom.” (Zist. 5:29, NW.) Ki sa montre nou? Sa montre nou ki pandan Premie Lager Mondial, sa bann Kretien-la pa ti pou vinn bann prizonie Gran Babilonn; okontrer, zot ti pe libere ar fos relizion ek zot ti pe ed lezot pou sorti ladan zot osi. w16.11 5:2, 4

Sertin panse ki Pol ti pe koz lor bann dimounn ki pa ti Kretien ek lor bann Kretien. Me isi, Pol ti pe ekrir bann Kretien, setadir bann ki Bondie finn “swazir pou vinn bann sin.” (Rom. 1:7, NW.) Savedir toulede kategori ti bann Kretien: bann ki ti viv “dapre laser” ek bann ki ti viv “dapre lespri.” Pol ti ekrir: “Kan nou ti pe viv dapre laser, bann move dezir provoke par Lalwa ti pe azir dan nou lekor.” (Rom. 7:5) Isi Pol ti explike ki enn dimounn ki viv “dapre laser,” se enn dimounn ki res konsantre lor so bann move dezir ek li pans zis lor la, ek li fer tou seki li anvi. w16.12 2:5, 7

Parfwa bann dimounn trakase akoz bann erer ki zot inn fer dan lepase. Kitfwa zot ankor santi zot bien koupab pou seki zot finn fer, mem si plizir lane finn pase. Parfwa bann erer Lerwa David ti pez lour lor li. Li ti rekonet: “Mo leker pe soufer, mo nek plegne.” (Ps. 38:3, 4, 8, 18) Dan sa sitiasion-la, David ti azir avek sazes. Li ti ena konfians ki Zeova pou ena pitie pou li ek pou pardonn li. (Ps. 32:2, 3, 5) Parfwa li arive ki nou trakase pou seki pe arive asterla. Par exanp, kan David ti ekrir Psom 55, li ti pe gagn traka pou so lavi, tansion bann dimounn touy li. (Ps. 55:2-5) Mem dan sa sitiasion-la, li pa ti les traka fer li perdi so konfians an Zeova. David ti sipliy Zeova pou ed li dan so bann problem. Me li ti kone osi ki li inportan ki li pa res lebra krwaze. (2 Sam. 15:30-34) To kapav aprann enn leson ar lexanp David. Olie ki to les twa deborde ar traka, fer tou seki to kapav pou regle problem-la ek fer Zeova konfians ki Li pou pran twa swin. w16.12 3:14, 15

David ti aksepte koreksion ki Zeova ti donn li atraver profet Natann. David ti osi priye Zeova ek ti konfes so bann pese. Kan li ti fer sa, li ti montre ki li ti anvi regagn faver Zeova. (Ps. 51:1-17) Olie ki li ti dekouraze parski li ti santi li koupab, David ti tir bann leson ar so bann erer. Zame li pa ti refer sa bann pese-la ankor. David ti res fidel ziska so lamor. Ek se sa souvenir-la ki Zeova garde lor David. (Ebre 11:32-34) Ki nou kapav aprann ar lexanp David? Si nou fer enn pese grav, nou bizin repanti sinserman, konfes nou pese ar Zeova, ek rod so pardon. (1 Zan 1:9) Nou bizin osi koz ar bann ansien parski zot kapav ed nou pou regagn enn bon relasion avek Zeova. (Zak 5:14-16, NW.) Zeova promet ki Li pou pardonn nou. Kan nou aksepte so led, nou montre ki nou ena konfians dan sa promes-la. Anplis, nou bizin tir leson ar nou bann erer, met nou konfians an Zeova ek kontign servi Li.​—Ebre 12:12, 13. w17.01 1:13, 14

Ki ete enn aksion ki motive par lorgey? Se kan nou fer enn kitsoz ki nou pa gagn drwa fer ouswa ki nou pena lotorite pou fer, kitfwa parski nou tro fier ouswa nou pena pasians. Nou tou nou finn deza azir avek lorgey parski nou inparfe. Me kouma nou finn aprann ar lexanp Lerwa Sail, si sa vinn enn labitid, sa pa pou fer Zeova plezir. Psom 119:21 dir ki Zeova pou “koriz bann ki ena lorgey.” Kifer eski Zeova pou fer sa? Premierman, si nou fer enn kitsoz avek lorgey, nou pe mank respe anver Zeova, nou Bondie ek nou Sef. Deziemman, kan nou fer bann kitsoz ki nou pa gagn drwa fer, nou pou gagn diskision ek dezakor ar lezot dimounn. (Prov. 13:10) Ek trwaziemman, nou kapav pas pou enn bet si lezot al konn seki nou’nn fer. (Lik 14:8, 9) Sa bann rezon-la montre nou bien kifer Zeova anvi ki nou ena modesti. w17.01 3:4, 5

Adan ti nepli kapav imit bann kalite Zeova dan enn fason parfe. Li ti perdi enn zoli lavenir ek so bann zanfan osi ti perdi sa lavenir-la. Sel leritaz ki li’nn kapav donn so bann zanfan se linperfeksion, pese, ek lamor. (Rom. 5:12) Akoz Adan, zot ti nepli ena posibilite pou viv pou touletan. Adan ek Ev pa ti kapav gagn bann zanfan parfe, ek zot zanfan osi pa ti kapav gagn bann zanfan parfe. Depi ki Satan inn fer Adan ek Ev rebel kont Zeova, li finn esey inflians tou dimounn pou fer parey. (Zan 8:44) Zeova ankor kontan bann dimounn. Mem si Adan ek Ev ti rezet Li, Zeova ankor anvi ki bann dimounn ena enn bon relasion avek Li. Ek Li pa anvi ki okenn parmi zot mor. (2 Pier 3:9) Akoz sa, deswit Li ti pran bann dispozision pou ki bann dimounn kapav revinn so bann kamarad.​—Zan 3:16. w17.02 1:12-14

Nou pou vinn pli modes kan nou rod seki ena de bon ar lezot, parey kouma Zeova fer. Olie ki touletan nou rod atir latansion lor noumem ouswa nou dir lezot seki zot bizin fer, nou pou demann zot konsey ek nou pou dispoze pou aksepte zot bann lide. Nou kontan kan nou bann frer ek ser gagn bann privilez spesial. Ek nou remersie Zeova parski Li permet ki sakenn parmi nou servi Li. (1 Pier 5:9) Kan nou aprann pou trouv bann kitsoz kouma Zeova trouve, nou pou kapav pran bann desizion ki fer Bondie plezir. Amezir ki nou etidie, priye ek aplik seki nou aprann, nou konsians pou vinn pli for. (1 Tim. 1:5) Nou pou aprann pou fer lintere lezot pas an premie. Si nou fer sa bann kitsoz-la, Zeova promet ki Li “pou fini [nou] formasion.” Sa inplik osi ki Li pou ed nou pou vinn pli modes.​—1 Pier 5:10, NW. w17.01 4:17, 18

Nou bann frer ek ser merite ki nou donn zot loner ek respe. Sirtou bann frer ki diriz nou, kouma bann ansien, bann sirveyan sirkonskripsion, bann manb Komite Biro Nasional, ek bann manb Komite Santral. Sa bann zom-la pran swin pep Bondie, ek Labib apel zot “bann don.” (Efe. 4:8, NW.) Alor li lozik ki nou donn zot loner ek respe mem si zot ena diferan nasionalite, ledikasion, ran sosial, ouswa ninport ki kantite larzan ki zot ena. Bann Kretien dan premie siek inn les nou enn bon lexanp. Zot ti donn loner bann zom ki ti pran latet, ek nou osi nou fer parey azordi. Kan nou avek sa bann zom-la, nou pa tret zot koumadir zot bann anz, setadir pli siperyer ki bann dimounn. Me nou respekte zot ek nou donn zot loner pou travay dir ki zot fer ek limilite ki zot manifeste.​—2 Kor. 1:24; Rev. 19:10. w17.03 1:13

Erod Agripa I ki ti vinn sef dan Zide ti ena enn latitid bien diferan ar Zezi. Enn zour, pou enn rasanbleman spesial, Erod ti met lor li enn zoli linz rwayal ki ti kout extra ser. Kan bann dimounn ti trouv li ek ti tann li koze, zot ti kriye: “Lavwa enn bondie sa, pa lavwa enn zom.” Erod ti bien kontan laglwar. Me “anplas enn anz [“Zeova,” NW] zet Erod anba parski li pa finn glorifie Bondie, me finn pran loner la pou li. Lever [ti] manz li e li [ti] mor.” (Zist. 12:21-23) Li kler ki Zeova pa ti swazir Erod kouma enn sef. Parkont, Zezi ti prouve ki Bondie ti swazir li. Li ti touletan donn loner Zeova antan ki Pli Gran Sef lor So pep. Zeova pa ti anvi ki Zezi vinn Sef zis pou de-trwa lane. Apre so rezireksion, Zezi ti dir so bann disip: “Mo’nn gagn tou pouvwar dan lesiel ek lor later.” Apre li ti dir: “Ek, gete! Mo avek zot toulezour ziska lafin sa sistem-la.”​—Mat. 28:18-20, NW. w17.02 3:20, 21