Mars

Telman bann frer Yifta ti zalou li ek ti ena laenn pou li, ki zot finn fors li pou kit later ki pourtan ti pou li legalman. (Ziz 11:1-3) Me, li ti ed zot kan zot ti sipliy li pou gagn so led. (Ziz 11:4-11) Pou Yifta, lager pou nom Zeova ek pou so pep ti pli inportan ki so bann santiman personel. Li ti bien deside pou res fidel anver Zeova. So bon latitid ti fer li ek bann Izraelit gagn benediksion Zeova. (Ebre 11:32, 33) Eski nou pou aprann ar lexanp Yifta? Ki nou pou fer si nou bann frer desevwar nou ouswa si nou ena linpresion ki zot pa tret nou bien? Fode pa nou les sa bann santiman-la anpes nou servi Zeova. Zame pa aret al renion ouswa aret pas letan avek bann frer ek ser dan kongregasion. Anou imit Yifta ek obeir Zeova. Sa pou ed nou pou sirmont bann sitiasion difisil pou ki nou kapav vinn enn bon lexanp.​—Rom. 12:20, 21; Kol. 3:13. w16.04 1:7, 9, 10

Nou bizin andire, pa zis pou enn peryod letan, me ziska lafin. Mazinn enn bato ki pe koule. Pou ki bann dimounn gagn lavi sov, zot bizin naze pou ariv lor lakot. Si enn kikenn koumans naze ek deswit li arete, li pou nwaye. Parey, si enn dimounn aret naze, alor ki li pre pou ariv lor lakot, li osi li pou koule. Si nou anvi viv dan lemond nouvo, nou bizin kontign andire. Anou fer zefor pou ena mem latitid ki lapot Pol, ki ti dir: “Nou pa bes lebra.” (2 Kor. 4:16, NW.) Parey kouma Pol, nou pena okenn dout ki Zeova pou ed nou pou andire ziska lafin. Pol ti dir: “Dan tou sa bann kitsoz-la, nou gagn enn viktwar total gras-a sa Kikenn ki’nn kontan nou la. Parski mo ena sa lasirans-la, ki ni lamor, ni lavi, ni bann anz, ni bann gouvernman, ni bann kitsoz ki existe zordi ouswa ki pou existe dan lavenir, ni bann ki ena pouvwar, ni oter, ni profonder, ni okenn lezot kreatir pa pou kapav separ nou ar lamour Bondie ki trouv an Kris Zezi, nou Segner.”​—Rom. 8:37-39, NW. w16.04 2:17, 18

Demann Zeova sazes pou rekonet enn sitiasion ki kapav anpes twa gard to netralite. Ek demann Li so led pou ki to fer seki bizin dan sa sitiasion-la. Kitfwa to kapav al dan prizon ouswa gagn lezot pinision parski to’nn res fidel anver Zeova. Si to dan sa ka-la, priye pou gagn kouraz pou ki to kapav explik lezot dan enn fason kler kifer to pe gard to netralite. To kapav sir ki Zeova pou ed twa pou andire. (Zist. 4:27-31, NW.) Zeova finn donn nou Labib pou ki nou gagn lafors. To kapav medit lor bann verse ki pou ed twa pou gard to netralite. Esey aprann sa bann verse-la par-ker, parski zot kapav ed twa si zame arive ki to pena enn Labib ar twa. Labib kapav osi fer to lespwar dan bann promes Bondie pou lavenir vinn pli solid. Nou bizin sa lespwar-la pou ki nou kapav andir bann persekision. (Rom. 8:25) Swazir bann verse ki dekrir sirtou seki twa to pe atann dan lemond nouvo, ek esey imazinn twa deza laba. w16.04 4:14, 15

Bann pret pa pe pres lor Rwayom Bondie. Si zot koz lor Rwayom Bondie, boukou parmi zot dir ki se enn santiman ki dan leker bann dimounn. (Lik 17:21) Zot pa ansegn bann dimounn ki Rwayom Bondie se enn gouvernman ki dan lesiel ek ki pe dirize par Zezi. Olie sa, zot abitie koz lor Zezi kan ena Nwel ouswa Pak. Zot pa explike ki Rwayom Bondie pou rezoud tou bann problem limanite ek ki biento li pou tir tou lemal ki existe lor later. (Rev. 19:11-21) Li kler ki bann pret pa kone seki Zezi pou fer antan ki Lerwa dan Rwayom Bondie. Ek zot pa konpran kifer zot bizin prese. Fode pa ki fer travay predikasion pou gagn kas ouswa pou aranz bel-bel batiman. Fode pa osi nou fer travay predikasion vinn enn biznes. (2 Kor. 2:17) Fode pa ki bann disip Zezi demann enn lapey pou zot travay predikasion.​—Zist. 20:33-35. w16.05 2:7, 8

Fer koumadir to bien kontan enn sertin stil labiyman, me to kone ki sertin dan kongregasion kapav soke si to abiy koumsa. Labib pa dir nanye lor sa stil labiyman-la. Alor, kouma to pou kone ki Zeova panse? Labib dir nou: “Ki bann fam abiy bien, dan enn fason modes ek avek bon zizman, pa avek bann fason tres seve, ni avek lor, ouswa perl ouswa bann linz ki kout extra ser, me kouma li bizin ete pou bann fam ki dir ki zot ador Bondie avek respe.” (1 Tim. 2:9, 10, NW.) Biensir, tou bann serviter Zeova, mem bann misie, kapav aprann ar sa bann parol-la. Kan nou modes, nou reflesi ki lezot kapav panse si nou swazir pou met tel ou tel linz. Ek parski nou kontan nou bann frer, nou evit trouble zot ouswa sok zot.​—1 Kor. 10:23; Fil. 3:17. w16.05 3:14

Kan Adan ti rebel kont so Kreater, li ti nepli enn garson Bondie. Me boukou parmi bann desandan Adan finn swazir Zeova kouma zot Dirizan. (Ebre 12:1) Kan zot obeir zot Kreater avek limilite, zot montre ki zot anvi ki Li vinn zot Papa ek zot Potie, pa Satan. (Zan 8:44) Zot fidelite anver Bondie rapel nou seki bann Izraelit, ki ti repanti, ti dir. Nou trouv zot bann parol dan nou text pou zordi. Azordi osi, bann vre adorater Zeova fer boukou zefor pou ena limilite ek pou obeir Li. Zot konsider sa kouma enn loner pou apel Zeova zot Papa, ek zot anvi ki Li vinn zot Potie. Eski nou pre pou vinn kouma enn larzil ki mou, pou ki Bondie kapav form nou pou vinn enn resipian ki ena valer? Eski nou trouv sak frer ek ser kouma enn travay ki pankor fini, ki Bondie ankor pe forme? w16.06 1:2, 3

Nou bien pre ar lemond nouvo, ek nou lafwa pe pas par bann test. Alor, nou bizin examinn noumem ek gete si nou lafwa for. Kouma? Nou kapav examinn bann parol Zezi ki trouv dan Matie 6:33. Demann tomem: ‘Eski mo bann lobzektif ek mo bann desizion montre ki mo vremem krwar seki Zezi inn dir? Eski mo pou rat bann renion ouswa predikasion pou gagn plis kas? Ki mo pou fer si mo bizin pas plis letan ek depans plis lenerzi dan mo travay? Eski mo pou les sa lemond-la form mwa ek kitfwa mem fer mwa aret servi Zeova?’ Si nou pa swiv seki Labib dir konsernan bann move frekantasion, bann ki’nn exkli, ouswa bann divertisman, nou leker kapav vinn dir. Ki to bizin fer si to dan sa ka-la? To bizin examinn to lafwa san tarde! To bizin onet ar tomem, ek servi Parol Bondie regilierman pou koriz to fason panse. w16.06 2:8, 9

Lor later, ena enn lorganizasion kot ena bann dimounn ki kontan Zeova ek ki anvi servi Li. Sa bann dimounn-la se bann Temwin Zeova. Mem si zot ena bann defo ek zot fer bann erer, Zeova gid so pep avek so lespri sin. An 1914, ti ena bien tigit dimounn ki ti ador Zeova. Me Zeova ti beni travay predikasion. Gras-a sa, plizir milyon dimounn finn aprann konn bann verite ki sorti dan Labib ek finn vinn So bann Temwin. Zeova ti predir sa lakrwasman extraordiner la kan Li ti dir bann parol nou trouve dan nou text pou zordi, ek Li ti azoute: “Mwa, Zeova, mo pou akseler sa dan so ler.” Azordi, nou trouv bien ki sa profesi-la finn realize. Pep Zeova kouma enn gran nasion. Ofet, boukou pei dan lemond antie ena enn popilasion ki pli tigit ki pep Zeova. w16.06 4:1, 2

Zezi pa ti ena okenn dout ki si so Papa pran swin bann zwazo, Li pou osi pran swin bann dimounn. (1 Pier 5:6, 7) Me biensir, parey kouma bann zwazo, fode pa nou pares. Nou bizin travay dir pou plante ek rekolte ouswa pou gagn kas pou aste manze. Zeova kapav beni nou bann zefor. Ek kan nou pena ase kas ouswa manze, Li kapav donn nou seki nou bizin. Par exanp, lezot kapav partaz seki zot ena avek nou. Zeova donn osi bann zwazo enn plas pou reste. Li finn donn zot kapasite pou ranz bann nik, ek Li finn fer bann kitsoz ki zot kapav servi pou ranz zot nik. Li parey pou nou osi, Zeova kapav ed nou pou trouv enn plas pou ki nou ek nou fami reste. Kan Zezi ti dir bann parol ki dan nou text pou zordi, sirman li ti pe pans seki biento li ti pou fer, setadir, donn so lavi pou tou dimounn. (Konpar avek Lik 12:6, 7.) Zezi pa’nn mor pou bann zwazo. Li’nn mor pou nou, pou ki nou kapav viv pou touletan.​—Mat. 20:28. w16.07 1:11-13

Kifer nou fer pese ek nou mor? Labib dir ki “akoz fot sa sel zom-la lamor finn regne kouma enn lerwa par li.” Alor, parski nou bann desandan Adan, nou inparfe ek nou mor. (Rom. 5:12, 14, 17, NW.) Kanmem sa, nou ankor kapav deside pou pa les pese manifeste so pouvwar lor nou, ouswa kontrol nou. Kouma? Kan nou montre nou lafwa dan sakrifis Zezi Kris, nou gagn Zeova so faver ki personn pa merite. (Rom. 5:20, 21) Mem si nou touzour inparfe, nou pa oblize les pese kontrol nou. Kan nou fer seki pa bon, nou demann Zeova pardon. Me, kouma eski nou kapav gagn bann bienfe gras-a Bondie so faver ki nou pa merite? Pol ti dir: “Bondie so faver ki personn pa merite . . . ansegn nou pou rezet seki Bondie pa kontan ek bann dezir sa lemond-la, ek pou viv avek bon sans ek lazistis ek res atase ar Bondie, dan sa sistem-la.”​—Tit 2:11, 12, NW. w16.07 3:5, 6

Premie maryaz finn gate kan Adan ek Ev ti dezobeir Zeova. “Serpan orizinel,” Satan Lediab, ti anbet Ev ek ti dir li ki si li ti manz frwi ki ena lor “pie konesans bon ek move,” li ti pou gagn enn konesans spesial. Satan ti pretann ki si Ev ti manz frwi sa pie-la, sa ti pou permet li deside ki kitsoz bon ek ki kitsoz move. Kan Ev ti desid pou manz sa frwi-la san koz ar Adan avan, li pa ti respekte so mari kouma sef fami. Ek kan Adan ti aksepte frwi ki so fam ti donn li, li ti dezobeir Bondie. (Rev. 12:9; Zen. 2:9, 16, 17; 3:1-6) Kan Zeova ti demann zot seki’nn arive, Adan ti zet tor lor so fam. Ev li, li’nn zet tor lor serpan ki ti anbet li la. (Zen. 3:12, 13) Adan ek Ev finn donn bann rezon bien bet kifer zot inn dezobeir Zeova, ek Zeova ti konsider zot kouma bann rebel. Zot lexanp se enn lavertisman pou nou! Pou ki enn maryaz reisi, mari ek fam bizin obeir Zeova ek sakenn bizin responsab so prop aksion. w16.08 1:1, 4, 5

Kifer sertin koup konn bann problem bien grav? Pou sertin, zot maryaz finn desevwar zot ek zot ankoler parski zot maryaz pa pe pas kouma zot ti anvi. Bien souvan, ena bann problem parski bann dimounn finn elve dan diferan fason, ek zot pa reazir parey parski zot pena mem santiman. Bann difikilte avek belmer-boper, kouma pou depans kas ouswa kouma pou elve bann zanfan, tou sa bann kitsoz-la osi kapav kree bann problem. Me, li bon nou kone ki boukou koup Kretien reisi trouv bann solision pou zot bann problem parski zot les Bondie gid zot. Kan ena bann problem grav, bann koup bizin al rod led ar bann ansien. Sa bann zom-la ena boukou lexperyans ek zot kapav ed bann koup pou aplik bann konsey Biblik dan zot lavi. Ek kan bann konzwin demann Zeova so lespri sin, sa kapav ed zot pou met an pratik bann prinsip Biblik ek pou manifeste bann kalite Kretien.​—Gal. 5:22, 23. w16.08 2:11-13

Zezi ti bien okipe. Me kan bann dimounn ti dispoze pou ekout li, li ti pran letan pou ansegn zot boukou kitsoz. Par exanp, enn zour enn lafoul ti rasanble lor laplaz pou ekout Zezi. Alor Zezi ti mont dan enn bato avek Pier ek li ti ansegn bann dimounn ki ti lor laplaz. Apre sa, li ti anvi ansegn Pier osi enn leson. Zezi ti fer enn mirak kan li ti fer Pier lapes enn gran kantite pwason. Apre li ti dir Pier bann parol ki ena dan nou text pou zordi. Deswit Pier ek bann ki ti avek li “kit tou, zot swiv Zezi.” (Lik 5:1-11) Nikodem osi ti anvi aprann plis ar Zezi. Me parski li ti enn manb Sanedrin, li ti per seki lezot ti pou dir si zot ti trouv li pe koz avek Zezi. Alor, li ti al get Zezi aswar. Zezi pa ti fer li retourn kot li, okontrer, Zezi ti pran letan pou explik li bann verite inportan. (Zan 3:1, 2) Zezi ti touletan dispoze pou servi so letan pou ansegn bann dimounn laverite ek pou fer zot lafwa vinn pli for. Nou osi parey kouma Zezi, nou bizin dispoze pou vizit bann dimounn dan moman ki pli bon pou zot, ek nou bizin pran letan pou ed zot konpran seki ena dan Labib. w16.08 4:10, 11

Avek limilite, nou rekonet ki Zeova Li pir ek Li sin ek ki so bann prinsip, se meyer gid ki ena. Si nou anvi ena limilite ek si nou rekonet nou limit, nou pou swiv so bann prinsip dan nou lavi ek nou pou respekte santiman ek lopinion lezot. Nou labiyman bizin montre dan enn fason bien kler ki nou bann serviter Zeova. Nou kontan pou swiv bann prinsip Bondie, parski zot bien pli siperyer ki nou bann prinsip. Nou bann frer ek ser an zeneral merit bann felisitasion pou zot laparans ek zot bon kondwit. Sa atir bann dimounn sinser ar mesaz Labib ki sov bann lavi, ek donn laglwar Zeova ek fer Li kontan. w16.09 3:18-20

Zakob ti bien deside, ek li ti prouve ki li ti dispoze pou fer boukou zefor pou gagn enn benediksion! (Zen. 32:24-26) Zeova ti beni Zakob parski li ti persevere ek ti apel li Izrael, seki vedir enn “Dimounn Ki Lite, Ouswa Ki Persevere, ar Bondie.” Zakob ti gagn rekonpans ki nou osi nou pe rode, setadir, faver ek benediksion Bondie. Rashel, madam ki Zakob ti bien kontan, ti bien anvi trouve kouma Zeova ti pou tini promes ki Li ti fer ar so mari. Me Rashel pa ti kapav gagn zanfan. Dan lepok Biblik, bann fam ki ti dan sa sitiasion-la ti bien soufer. Kouma eski Rashel inn kontign lite malgre sa sitiasion dekourazan la? Zame li pa’nn perdi lespwar. Okontrer, li’nn kontign lite kan li’nn priye Zeova ankor plis. Zeova ti tann so bann lapriyer, ek Rashel finn santi benediksion Zeova kan li ti gagn zanfan.​—Zen. 30:8, 20-24. w16.09 2:6, 7

Li inportan osi ki to ansegn to zanfan ki li pou pli ere kan li obeir seki Labib dir. (Ps. 1:1-3, NW.) Par exanp, to kapav dir li fer koumadir li pe al res lor enn lil ek ki li bizin swazir bann dimounn ki li anvi amenn ar li. Apre, to kapav demann li: “Ki kalite dimounn to ti pou amenn ar twa si to anvi ki zot tou viv bien ansam?” Alafin, to kapav lir Galat 5:19-23 pou montre li ki kalite dimounn Zeova anvi met dan lemond nouvo. Dan sa fason-la, to pou kapav ansegn to zanfan de leson inportan. Premierman, Zeova montre nou kouma pou viv bien depi asterla-mem ek pou res anpe avek lezot. Deziemman, Li pe prepar nou pou viv dan lemond nouvo. (Iza. 54:13; Zan 17:3) To kapav osi montre to zanfan kouma Labib finn ed nou bann frer ek ser. Par exanp, rod enn biografi dan enn parmi nou bann piblikasion, kitfwa dan seri “Labib Sanz Bann Dimounn” dan Latour Degard. w16.09 5:13, 14

Kitfwa nou extra okipe, me kanmem sa, nou bizin trouv letan pou nou letid personel ek nou ladorasion an fami. (Efe. 5:15) Fode pa ki nou lobzektif se zis lir enn kantite kitsoz ouswa prepar enn komanter pou renion. Nou bizin ena lobzektif pou les Parol Bondie ena enn lefe lor nou ek fer nou lafwa vinn pli for. Nou bizin ena enn bon lekilib. Kan nou etidie, fode pa nou reflesi zis lor seki lezot bizin, me osi lor seki nou, nou bizin. (Fil. 1:9, 10) Nou bizin konsian ki, kan nou prepar nou predikasion, nou renion ouswa enn size, kitfwa nou pa aplik seki nou lir ar noumem. Par exanp, mem si enn kwizinie bizin gout seki li’nn kwi avan ki li servi sa, li pa kapav viv zis ar sa tigit ki li’nn goute la. Si li anvi res an bonn sante, regilierman li bizin prepar bann bon manze pou li osi. Dan mem fason, si nou anvi ki nou relasion avek Zeova vinn pli for, nou bizin etidie Labib regilierman. Bann letid profon koumsa pou donn nou seki nou bizin lor plan spiritiel. w16.10 2:10, 11

Dan Ebre 11:1 (NW), Labib dir ki ete lafwa. (1) Lafwa se “kan nou sir ki bann kitsoz ki nou pe atann pou arive.” Parmi bann kitsoz ki nou pe atann, ena bann promes Bondie konsernan lavenir. Par exanp, nou sir ki lemal nepli pou existe ek ki pou ena enn nouvo lemond. (2) Lafwa se enn “prev sir ki bann kitsoz ki pourtan nou pa trouve, zot enn realite.” Nou kone ki Zeova, Zezi Kris, bann anz, ek Rwayom dan lesiel zot existe, mem si nou pa kapav trouv zot. Kouma nou kapav montre ki vremem nou ena lafwa dan bann promes Bondie ek dan bann kitsoz ki nou pa kapav trouve? Nou montre sa par nou fason viv, nou bann parol ek nou bann aksion. w16.10 4:6

Zeova ek Zezi apresie tou seki nou fer pou zot, mem si nou pa reisi fer otan ki nou ti anvi. (Lik 21:1-4; 2 Kor. 8:12) Par exanp, nou kone ki pou nou bann frer ek ser aze, sa demann zot boukou zefor pou vinn renion ek pou al prese regilierman. Eski nou ankouraz zot ek nou felisit zot pou tou seki zot pe fer? Wi, ankouraz lezot pli souvan ki to kapav. Ninport kan to remark bon aksion ki enn dimounn inn fer, pa bliye felisit li. Kan Pol ek Barnabas ti dan Antios, dan Pisidi, bann sef dan sinagog ti dir zot: “Mo bann frer, si zot ena kik mesaz pou ankouraz bann dimoun ki la, zot kapav koze.” Pol, ti profit sa lokazion-la pou ankouraz bann ki ti la. (Zist. 13:13-16, 42-44) Kan nou ankouraz lezot, lezot osi pou ankouraz nou.​—Lik 6:38. w16.11 1:3, 15, 16

Se vremem enn gran loner pou form parti dan lorganizasion Zeova ek pou kone seki Zeova atann nou fer! Biensir, parski nou kone ki kitsoz fer Bondie plezir, nou ena responsabilite pou obeir Li ek pou fer seki bon. Ek mem si boukou dimounn kontan fer seki move, nou, nou bizin “deteste lemal,” parey kouma Zeova. (Ps. 97:10) Fode zame nou resanble bann ki panse ki “seki bon, li move ek seki move, li bon.” (Iza. 5:20) Nou anvi fer Zeova plezir, alor nou determine pou res pir dan tou domenn nou lavi. (1 Kor. 6:9-11) Seki Zeova dir nou dan Labib se pou nou prop bien. Nou kontan Li ek nou anvi res fidel ar Li. Se pou sa rezon-la ki nou aplik So bann konsey kan nou kot nou, dan kongregasion, dan travay, dan lekol, ouswa ninport kotsa nou ete. w16.11 3:13

Bann Etidian Labib ti sinser. Zeova ti donn lord pou obeir bann gouvernman. Me zot pa ti bien konpran ki Zeova ti pe rod dir. Akoz sa, zot pa ti touletan gard zot netralite kan ti ena lager. Par exanp, le 30 Me 1918 kan prezidan l’États-Unis ti demann bann dimounn pou priye pou lape, Latour Degard osi ti ankouraz bann Etidian Labib pou fer parey. Sertin frer ti donn larzan pou soutenir lager, ek sertin parmi zot ti mem vinn bann solda ek ti al lager. Li vre ki bann Etidian Labib ti bizin sertin koreksion. Me li pou fos pou panse ki se akoz sa ki zot ti vinn prizonie Gran Babilonn. An realite, zot ti’nn preske separ zot net ar lanpir mondial bann fos relizion kan ti ena Premie Lager Mondial.​—Lik 12:47, 48. w16.11 5:9

Kifer Pol ti averti bann Kretien ki ena lesperans pou al dan lesiel kont danze pou viv “dapre laser”? Ek kifer tou bann Kretien zordi bizin sa lavertisman-la? Parski ninport ki serviter fidel Bondie kapav koumans donn boukou linportans so bann prop dezir. Par exanp, Pol ti ekrir ki sertin frer dan Rom ti esklav “zot prop vant.” Sirman li ti pe rod dir ki sex, manze, ouswa lezot plezir ti vinn bann kitsoz pli inportan dan zot lavi. (Rom. 16:17, 18; Fil. 3:18, 19; Zid 4, 8, 12) Pandan enn tan, dan kongregasion Korint ti ena enn frer ki ti ena enn relasion imoral avek “fam so papa.” (1 Kor. 5:1) Li kler ki sa bann premie Kretien-la ti bizin lavertisman Pol pou ki zot aret viv “dapre laser.” (Rom. 8:5, 6, NW.) Azordi sa lavertisman-la aplik pou nou osi. w16.12 2:5, 8, 9

Kan to koz fran avek enn kikenn ki to fer konfians, sa kapav ed twa kan to trakase. To konzwin, enn bon kamarad, ouswa enn ansien dan kongregasion kapav ed twa pou konpran to sitiasion pli bien. Labib dir ki nou bann plan pa pou reisi si nou pa demann konsey, me “zot reisi kan ena enn kantite konseye.” (Prov. 15:22) Nou bann renion ed nou pou diminie nou bann traka. Sak semenn, to pas letan avek bann frer ek ser dan kongregasion, ki gagn to traka ek ki anvi ankouraz twa. (Ebre 10:24, 25) Kan nou “ankouraz [sakenn] nou kamarad” sa pou fer twa gagn plis lafors ek li pou pli fasil pou to sirmont ninport ki traka.​—Rom. 1:12. w16.12 3:17, 18

Kan nou ena bann problem lasante ouswa bann lezot difikilte, ek ki nou pa kapav fer nanye pou sanz sa, nou bizin zet tou nou traka lor Zeova ek ena konfians ki Li trakase pou nou. (1 Pier 5:6, 7) Nou bizin osi fer tou seki nou kapav pou tir profi ar nou bann renion ek bann lezot dispozision ki lorganizasion Zeova pran pou nou. (Ebre 10:24, 25) Paran, si ou zanfan finn aret servi Zeova, ki ou kapav fer? Profet Samiel pa ti kapav fors so bann garson, ki ti adilt, pou res fidel ar Bondie. (1 Sam. 8:1-3) Li ti bizin les sa sitiasion-la dan lame Zeova. Me kanmem sa, Samiel ti fer seki li ti kapav pou res fidel ar so Papa ki dan lesiel ek pou fer Li plezir. (Prov. 27:11) Azordi, boukou paran Kretien dan mem sitiasion ki profet Samiel. Zot ena konfians ki Zeova touletan pre pou akeyir bann peser ki repanti. (Lik 15:20) Antretan paran, fer tou seki ou kapav pou res fidel ar Zeova, ek gard lespwar ki ou bon lexanp pou ankouraz ou zanfan pou retourn ar Zeova. w17.01 1:15, 16

Enn dimounn ki ena limilite bien souvan li ena modesti osi. Li rekonet ki li ena bann limit, ek li rekonet so bann erer avek limilite. Li dispoze pou ekout lezot ek pou aprann ar zot. Zeova bien kontan bann dimounn ki ena limilite. Labib montre nou ki enn dimounn ki ena modesti li konn limem ek li rekonet ki ena bann kitsoz ki li pa kapav fer ouswa ki li pa gagn drwa fer. Sa ed li pou respekte lezot ek tret zot avek bonte. Me, li kapav arive ki nou koumans pans dan enn fason orgeye san ki nou rann nou kont. Kouma sa kapav arive? Nou kapav kitfwa santi nou pli inportan ki lezot parski nou ena sertin responsabilite, ouswa nou bien pros ar sertin ki ena bann responsabilite dan kongregasion. (Rom. 12:16) Ouswa kitfwa nou koumans atir tro boukou latansion lor noumem. (1 Tim. 2:9, 10) Nou kapav mem kitfwa koumans dir lezot seki zot bizin fer ouswa pa fer.​—1 Kor. 4:6. w17.01 3:6-8

Azordi, travay predikasion pe kontign ogmante, ek lorganizasion Zeova pe servi bann nouvo teknolozi pou ki maximum dimounn tann bonn nouvel. Me parfwa, li kapav difisil pou bann ki aze aprann bann nouvo fason fer. (Lik 5:39) Ek li normal osi ki lafors ek kouraz enn dimounn diminie pli li vinn vie. Alor, se enn dispozision ranpli ar lamour ek bien pratik kan bann ki aze form bann zenn pou pran plis responsabilite dan lorganizasion Zeova. (Ps. 71:18) Li pa touzour fasil pou bann frer ki ena enn lotorite pou deleg bann responsabilite ar bann zenn frer. Kitfwa sertin bien sagrin kan zot panse ki zot nepli pou ena sa privilez ki zot ti bien kontan la. Ouswa, zot kapav trakase parski zot panse ki si zot pa diriz travay-la, travay-la pou mal fer. Kitfwa zot panse osi ki zot pena ase letan pou form lezot. Me dan enn lot kote, bann zenn frer bizin ena pasians kan zot pa pe gagn plis responsabilite. w17.01 5:3, 4

Zezi ti vinn enn imin parfe, parey kouma Adan ti ete. (Zan 1:14) Me Zezi ti diferan ar Adan. Li ti fer seki Zeova ti atann ki enn zom parfe fer, setadir swiv So bann prinsip. Ek mem dan bann leprev bien difisil, zame Zezi pa finn dezobeir bann lalwa Zeova. Kan li’nn mor kouma enn zom parfe, Zezi finn kapav sov bann dimounn ar pese ek lamor. Zezi ti exakteman kouma Adan ti bizin ete. Zezi ti enn zom parfe, fidel, ek obeisan anver Bondie. (1 Tim. 2:6) Li’nn mor pou nou, ek so sakrifis donn tou dimounn, bann zom, bann fam, ek bann zanfan, posibilite pou viv pou touletan. (Mat. 20:28) Laranson samem lakle ki ouver laport pou ki proze Bondie realize.​—2 Kor. 1:19, 20. w17.02 1:15, 16

Fer koumadir to omilie enn long tinel bien nwar. Kitfwa to pe demann twa si to pou retrouv lalimier enn zour. Lavi kapav parey kouma sa vwayaz-la. Kitfwa to pou bizin pas par bann gran difikilte, ek kitfwa to kapav mem santi twa akable par to bann problem. Mem Zezi ti resanti sa. Kan li ti lor poto, li finn gagn enn imiliasion, avek enn douler terib. Sirman sa ti moman pli difisil ki li’nn kone dan so lavi! (Ebre 12:3) Me ki finn ed li pou andire? Zezi ti res konsantre lor rekonpans ki li ti pou gagne kan li andire. Pli inportan ankor, li’nn fer so par pou sanktifie nom Bondie ek pou soutenir drwa ki Bondie ena pou dirize. Li ti kone ki sa leprev-la ti tanporer ek ki so rekonpans dan lesiel pou dire pou touletan. Zordi, bann leprev ki to pe bizin fer fas, kitfwa boulvers twa ouswa fer twa bien soufer. Me rapel ki zot tanporer. w16.04 2:10

Azordi, boukou pa santi zot koupab kan zot fer pese, alor zot pa konpran kifer bann dimounn bizin laranson. Zot pa kone ki ete pese, kouma sa ena enn lefe lor nou, ek ki nou bizin fer pou ki nou nepli bann esklav pese. Enn fwa ki zot inn konpran ki ete pese, bann dimounn sinser ena rekonesans kan zot aprann ki Zeova finn avoy so sel Garson lor later pou liber nou ar pese ek lamor. Kifer Zeova finn fer sa? Se so gran lamour ek so faver ki personn pa merite ki’nn pous Li pou fer sa. (1 Zan 4:9, 10) Sakrifis Zezi Kris se pli gran prev ki montre lamour ki Zeova ena pou nou ek ki kantite So faver ki personn pa merite li gran. Nou soulaze kan nou kone ki, si nou montre nou lafwa dan sakrifis Zezi, Zeova pou pardonn nou bann pese ek nou pou ena enn konsians kler! (Ebre 9:14) Pena dout ki se enn bon nouvel pou partaz ar lezot! w16.07 4:6, 7

Zeova donn nou lasirans ki si nou ena lafwa dan laranson, Li kapav “efas” net nou bann pese. Li kapav pardonn nou bann pese. (Zist. 3:19-21) Gras-a laranson, Zeova kapav adopte sertin dimounn pou vinn so bann garson. Se zotmem ki Bondie finn swazire pou al dan lesiel. (Rom. 8:15-17) Zeova invit osi lezot dimounn, setadir bann “lezot brebi,” pou vinn bann manb so fami lor later. Apre ki zot pou vinn parfe, zot pou pas enn test final. Si zot res fidel ar Zeova, Li pou adopte zot osi kouma so bann zanfan. (Rom. 8:20, 21; Rev. 20:7-9) Zeova pou touletan kontan so bann zanfan. Laranson pou fer nou gagn bann bienfe pou touletan. Se Zeova ki finn donn nou sa kado ki ena boukou valer la, ek personn pa pou kapav pran sa ar nou. w17.02 2:15, 16

Kan premie fwa to ti vinn kamarad Zeova, Li ti kone ki to pou fer bann erer. Me kanmem sa, Zeova finn anvi ki to vinn so kamarad. Zeova telman kontan nou ki Li’nn donn nou enn kado ki ena enn gran valer. Li finn avoy Zezi lor later pou donn so lavi kouma enn ranson pou liber nou ar pese. (Zan 3:16) Kan nou fer enn erer, nou kapav demann Zeova pou pardonn nou. Ek gras-a laranson, nou kapav sir ki Li pou pardonn nou ek ki nou pou res so bann kamarad, mem si nou inparfe!​—1 Tim. 1:15. w16.05 4:6, 7