LESON 20
Kouma Nou Lasanble Organize?
Zeova enn Bondie ki organize. (1 Korintien 14:33) Alor, li lozik ki so bann serviter osi bien organize. Kouma bann lasanble organize? Ek ki nou kapav fer personelman pou ki tou pas bien dan lasanble?
1. Kisannla ki sef lasanble?
“Lekris limem sef lasanble.” (Efezien 5:23, NW) Depi lesiel, Zezi pe diriz bann laktivite tou bann Temwin Zeova dan lemond antie. Zezi inn osi swazir enn “lesklav fidel ek saz.” Se enn ti group ansien ki ena lexperyans, ek nou osi apel zot Komite Santral. (Lir Matie 24:45-47, NW.) Parey kouma bann zapot ek bann ansien dan premie siek ki ti dan Zerizalem, Komite Santral pe diriz bann lasanble ki ena dan lemond antie. (Zistwar Bann Apot 15:2) Me sa bann zom-la, zot pa sef nou lorganizasion. Zot lir Labib pou kone seki Zeova anvi zot fer ek zot swiv direksion ki Zezi donn zot.
2. Kisannla bann ansien ek ki zot responsabilite?
Bann ansien se bann frer ki fidel depi plizir lane. Zot servi Labib pou ansegn pep Zeova, pou ed zot, ek ankouraz zot. Personn pa pey zot pou sa travay-la. Okontrer, zot fer sa travay-la ‘par amour; par devouman e non pa par lintere.’ (1 Pier 5:1, 2) Bann asistan ministeryel ed bann ansien. Ek avek letan, zot osi zot kapav ranpli bann kondision pou servi kouma ansien.
Komite Santral swazir sertin ansien pou servi kouma responsab sirkonskripsion. Zot vizit bann lasanble pou ankouraz zot ek donn zot bann instriksion. Bann responsab sirkonskripsion servi bann kondision ki ena dan Labib, pou gete si enn frer kapav servi kouma ansien ouswa asistan ministeryel.—1 Timote 3:1-10, 12; Tit 1:5-9.
3. Ki responsabilite sak Temwin Zeova ena?
Nou tou dan lasanble nou “loue nom Zeova.” (Lir Psom 148:12, 13, NW.) Savedir ki pandan renion, nou donn bann repons, nou fer bann size ouswa bann demonstrasion, ek nou sant bann kantik. Nou loue Zeova osi kan nou prese otan ki nou kapav.
ANOU GET INPE PLIS
Aprann ki kalite sef Zezi ete, kouma bann ansien esey imit so lexanp, ek kouma nou kapav obeir Zezi ek travay ansam avek bann ansien.
4. Zezi li enn bon sef
Zezi donn nou enn zoli linvitasion. Lir Matie 11:28-30, ek apre sa, get sa kestion-la ansam:
Ki kalite sef Zezi ete ek kouma li anvi ki nou santi nou?
Kouma bann ansien kapav imit lexanp Zezi? Zwe VIDEO-la.
Labib ansegne kouma bann ansien bizin fer zot travay.
Lir Izai 32:2 ek 1 Pier 5:1-3, NW, ek apre sa, get sa bann kestion-la ansam:
Kan ou kone ki parey kouma Zezi, bann ansien fer boukou zefor pou rekonfort lezot, ki ou resanti?
Dan ki lezot fason ankor bann ansien kapav imit Zezi?
5. Bann ansien donn lexanp
Kouma eski Zezi anvi ki bann ansien konsider zot responsabilite? Zwe VIDEO-la.
Zezi ti donn bann instriksion pou ki bann ansien kone kouma zot bizin diriz lasanble. Lir Matie 23:8-12, ek apre sa, get sa kestion-la ansam:
Dan Labib ena bann prinsip lor kouma bann ansien bizin ete. Ki diferans ou remarke ant sa bann prinsip-la ek kouma bann sef relizie ete?
Bann ansien ena enn bon relasion avek Zeova ek ed zot fami osi pou fer parey
Bann ansien gagn traka zot tou dan lasanble
Bann ansien prese regilierman
Bann ansien ansegn nou. Zot osi ede pou netwaye ek pou fer bann lezot kitsoz
6. Li inportan ki nou travay ansam avek bann ansien
Labib explik nou kifer li inportan ki nou travay ansam avek bann ansien. Lir Ebre 13:17 ek apre sa, get sa kestion-la ansam:
Eski ou panse li rezonab ki Labib demann nou pou obeir ek soumet ar bann ansien? Kifer ou pans sa?
Lir Lik 16:10, ek apre sa, get sa kestion-la ansam:
Kifer li inportan ki nou soutenir bann ansien mem dan bann ti kitsoz?
SERTIN DIMOUNN DIR: “Li pa neseser ki to dan enn relizion.”
Dapre ou, ki bienfe enn dimounn gagne kan li ador Bondie ansam avek bann lezot dimounn?
SEKI NOU’NN APRANN
Zezi li sef lasanble ek bann ansien pe servi anba so lotorite. Nou kontan pou travay ansam avek bann ansien parski zot rekonfort nou ek donn nou lexanp.
Eski Ou Rapel?
Kisannla ki sef lasanble?
Kouma bann ansien ed lasanble?
Ki responsabilite sak serviter Zeova ena?
DEKOUVER
Gete kouma Komite Santral ek bann lezot ansien gagn traka nou bann frer ek ser.
Dekouver ki travay bann responsab sirkonskripsion fer.
Lavi enn Responsab Sirkonskripsion dan enn Teritwar Izole (4:51)
Dekouver ki responsabilite bann madam ena dan lasanble.
Gete kouma bann ansien travay bien dir pou ankouraz zot bann frer ek ser.
“Bann Ancien—‘Travail Ensam pou Nou la Joie’” (Latour Degard, 15 Zanvie 2013)