Kot-sa nou sorti?

KIFER LI IMPORTANT KI NOU ROD REPONSE POU SA QUESTION-LA? Beaucoup dimoune inn aprann ki la vie lor la terre inn commencé par hasard. Zot inn aprann ki a travers enn serie l’evenement ki preské impossible pou arrivé par accident, l’evolution inn produire bann dimoune avek tou zot bann capacité affectif, intellectuel ek spirituel.

Mais mazinn enn coute: si vrai-mem nou existé grace a l’evolution ek pena enn Createur, dan enn certain sens bann dimoune ti pou bann orphelin. Nou pa ti pou ena okenn pli grand source sagesse vers ki nou ti pou kapav tourné—nou pa ti pou ena personne pou aide nou reglé nou bann probleme. Nou ti pou bizin compte lor sagesse bann dimoune pou evite bann catastrophe dan la nature, pou reglé bann probleme politik, ek pou guide nou kan nou gagne bann probleme personnel.

Eski kan ou mazinn tousala, sa faire ou ena la paix l’esprit? Si non, mazinn enn lot possibilité. Li pa zis enn possibilité ki plus attire nou, mais li aussi pli logik.

Seki la Bible dire

La Bible montré ki bann dimoune finn crée directement par Bondié. Nou pa resultat enn l’evolution kot pena okenn sentiment ek ki pa’nn bien reflechi. Au contraire, nou bann zenfant ki ena enn Papa ki bien content nou ek ki intelligent. Note sa bann point bien clair ki ena dan la Bible-la:

Genèse 1:27. “Bondié ti crée zom dan so ressemblance, dan ressemblance Bondié Li ti crée li; Li ti crée zot male ek femelle.”

Psaume 139:14. “Mo pou loué toi parski to finn faire moi dan enn fason extraordinaire ki faire gagne la crainte. Tou seki to faire, li extraordinaire, ek mo nâme konn sa bien.”

Matthieu 19:4-6. “Eski zot pa finn lire ki celui ki ti crée zot, depuis commencement, ti faire zot enn zom ek enn femme, ek Li ti dire: ‘A cause sa-mem enn missié pou quitte so papa ek so mama ek li pou attache-li avek so madame, ek toulé-deux pou vinn enn sel la-chair’? Oui, zot nepli deux, mais enn sel la-chair. Alors, seki Bondié finn mette enba enn sel joug, fodé ki personne pa separe sa.”

Actes 17:24, 25. “Bondié ki finn faire le monde ek tou bann kitsoz ki ena ladan, Li, en tant ki Seigneur le ciel ek la terre, Li pa reste dan bann temple ki’nn faire ar la main bann dimoune; Li pa bizin aussi ki bann dimoune servi Li avek zot la-main, coumadir Li ti bizin kitsoz, parski c’est Li ki donne tou dimoune la vie ek souffle ek tou kitsoz.”

Révélation 4:11. “To digne, Jéhovah, oui nou Bondié, pou gagne la gloire, l’honneur ek pouvoir, parski to finn crée tou kitsoz, ek a cause to volonté ki zot existé ek ki zot finn crée.”

Bann reponse ki la Bible donné faire nou gagne la paix l’esprit

Parski nou koné ki “tou famille . . . lor la terre doit zot nom” ar Bondié, sa faire nou considere lezot dan enn fason different. (Éphésiens 3:15) Sa ena aussi enn l’influence lor fason ki nou considere nou-mem ek nou bann probleme. Nou maniere pensé pou influencé dan sa bann fason-la.

Kan nou ena bann decision difficile pou prend, nou pa pou casse la tête plus ki bizin ar different pensée bann dimoune ki pa d’accord entre zot. Nou pou plutot mette tou nou confiance dan bann conseil la Bible. Kifer? Parski “tou l’Ecriture finn inspiré par Bondié, ek li utile pou enseigné, pou corrigé, pou mette bann kitsoz en ordre, pou discipliné dan la justice, pou ki dimoune ki servi Bondié kapav bien qualifié, bien equipé pou tou bon travail.”—2 Timothée 3:16, 17.

Li vrai ki nou bizin faire zeffort ek ena discipline pou mette en pratik bann conseil la Bible. Parfois pou suive sa bann conseil-la, nou bizin mem al kont nou bann tendance. (Genèse 8:21) Mais, si nou accepté ki nou finn crée par enn Papa ki content nou, li pou logik pou pensé ki Li koné ki pli bon chemin nou bizin suive. (Isaïe 55:9) A cause sa so Parole donne nou sa l’assurance-la: “Faire Jéhovah confiance avek tou to leker ek pa fié lor to prop l’intelligence. Dan tou seki to faire, prend Li compte, ek Li, Li pou faire to bann chemin vinn droite.” (Proverbes 3:5, 6) Si nou mette sa conseil-la en pratik, nou pou nepli ena sa quantité stress-la kan nou faire face ar bann probleme ou-soit kan nou ena pou prend bann decision.

Kan nou faire face ar bann prejugé, nou pa pou senti-nou inferieur ek pensé ki nou ena moins valeur ki enn dimoune enn lot race ou-soit culture. Nou pou plutot estime nou-mem couma bizin. Kifer? Parski nou Papa, Jéhovah, “pa faire preference, mais dan n’importe ki nation, dimoune ki ena la crainte pou Li ek ki pratik la justice, [Li] accepté li.”—Actes 10:34, 35.

Kan nou comprend sa, nou pa pou laisse bann prejugé affecté nou l’attitude envers lezot. Nou pou comprend ki pena okenn raison valable pou nou pensé ki nou superieur ar bann dimoune enn lot race, parski “avek enn sel zom [Bondié] inn faire tou bann peuple pou zot reste partout lor la terre.”—Actes 17:26.

Vrai-mem, kan nou koné ki ena enn Createur ki finn crée nou ek ki Li interessé ar nou, sa pose enn base pou nou gagne la paix l’esprit. Mais bizin plus ki sa pou ki nou kapav garde la paix dan nou.

[L’encadré lor page 4]

Eski bann dimoune inn evolué?