Ki but la vie?
KIFER LI IMPORTANT KI NOU ROD REPONSE POU SA QUESTION-LA? Parmi bann kitsoz ki plus troublé l’esprit bann dimoune, ena sa l’idée ki la vie pena okenn sens, ki li pena okenn but. Parkont, kan enn dimoune ena enn but bien precis dan so la-vie, li pa perdi courage. Viktor Frankl, enn neurologue ki ti sapé kan bann Allemand ti massacré bann Juif, ti ecrire: “Pou enn dimoune survive dan bann condition pli difficile ki kapav existé, mo pou dire ki nanyin pa kapav aide li plus ki sentiment ki li ena ki so la-vie ena enn sens.”
Mais beaucoup dimoune pa d’accord lor sa point-la, sakenn ena zot l’opinion. Certain pensé ki c’est chaque dimoune ki bizin decidé pou li-mem si la vie ena enn but. Lot coté, certain ki croire dan l’evolution, enseigné ki la vie pena okenn vrai sens.
Mais en realité, fason pli logik pou konn but la vie, c’est pou aprann sa avek Jéhovah, sa Kikenn ki donne la vie-la. Reflechi lor seki so Parole dire lor sa sujet-la.
Seki la Bible dire
La Bible montré ki kan Jéhovah ti crée nou bann premier parent, Li ti crée zot dan enn but precis. Li ti donne zot sa commandement-la:
Genèse 1:28. “Gagne beaucoup zenfant, multiplié, rempli la terre ek ena control lor li; ena control lor bann poisson dan la mer, lor bann creature ki envolé dan le ciel, ek lor tou creature vivant ki bougé lor la terre.”
Bondié ti souhaité ki Adam ek Ève ek zot bann zenfant faire la terre entier vinn enn paradi. Li pa ti envie ki bann dimoune vinn vié ek mort, ni Li ti envie ki zot gate zot l’environnement. Mais a cause bann mauvais choix ki nou bann premier parent ti faire, nou finn herite peché ek la mort. (Genèse 3:2-6; Romains 5:12) Mais malgré sa, projet Jéhovah pa finn changé. Bientot la terre pou vinn enn paradi.—Isaïe 55:10, 11.
Jéhovah ti crée nou avek capacité physik ek aussi capacité intellectuel pou nou kapav realise so projet. Li pa ti crée nou pou nou amenn enn la-vie independant. Guetté couma sa bann verset la Bible enba-la explik projet Bondié pou nou.
Ecclésiaste 12:13. “Conclusion, apré ki’nn fini tann tou kitsoz, c’est: Ena la crainte pou vrai Bondié ek garde so bann commandement. Parski c’est sa tou l’obligation ki enn dimoune ena.”
Mika 6:8. “Ki Jéhovah pé demann toi, sinon pou pratik la justice, pou content la bonté, ek pou marche avek to Bondié dan enn fason modeste?”
Matthieu 22:37-39. “ ‘To bizin content Jéhovah to Bondié avek tou to leker ek avek tou to nâme ek avek tou to l’esprit.’ Sa-mem pli grand ek premier commandement. Deuxieme commandement ki pareil, c’est: ‘To bizin content to prochain couma to-mem.’ ”
Bann reponse ki la Bible donné faire nou gagne vrai la paix l’esprit
Pou ki n’importe ki l’appareil ki compliké marche bien, nou bizin servi sa dan mem but ek dan mem fason ki sa dimoune ki ti invente sa-la ti envie. Li pareil pou nou. Si nou pa envie faire nou-mem di-tort lor plan spirituel, mental, affectif ou-soit physik, nou bizin servi nou la-vie dan fason ki nou Createur ti envie. Guetté couma kan nou konn projet Bondié, sa kapav faire nou gagne la paix l’esprit dan deux-trois domaine nou la-vie.
Kan zot decidé ki kitsoz ki pli important dan zot la-vie, zordi beaucoup dimoune choisir pou passe zot la-vie pou gagne plus richesse. Mais la Bible donne sa l’avertissement-la: “Bann ki bien decidé pou vinn riche tombe dan tentation, dan enn piege ek dan beaucoup desir ki pena sens, ki faire di-tort.”—1 Timothée 6:9, 10.
Lot coté, bann ki aprann content Bondié plutot ki l’argent decouvert secret contentement. (1 Timothée 6:7, 8) Zot comprend l’importance pou travail dur ek zot koné ki c’est zot devoir pou occupe zot bann prop besoin physik. (Éphésiens 4:28) Mais zot prend aussi bien compte sa bann parole Jésus-la: “Personne pa kapav travail couma enn esclave pou deux maitre; parski soit li pou ena la haine pou enn, ek li pou content lot-la, soit li pou attache-li ar enn ek li pou meprise lot-la. Zot pa kapav travail couma bann esclave pou Bondié ek pou la Richesse toulé-deux.”—Matthieu 6:24.
A cause sa-mem, pou bann ki content Bondié, faire volonté Bondié passe en premier dan zot la-vie au lieu ki zot faire zot travail ou-soit galope derriere bann richesse vinn zot priorité. Zot koné ki si pou zot, faire volonté Bondié sa-mem kitsoz ki pli important dan zot la-vie, Jéhovah pou prend zot soin. Avredir, pou Jéhovah sa li enn l’obligation.—Matthieu 6:25-33.
Dan zot relation avek lezot, beaucoup dimoune faire zot-mem passe en premier. Zordi si pena la paix dan le monde, c’est surtout parski beaucoup inn vinn bann dimoune ki ‘content zot-mem, ek . . . ki pena okenn affection naturel.’ (2 Timothée 3:2, 3) Kan enn kikenn pa agir dapré seki zot attann ou-soit pa d’accord avek zot, zot ‘faire la rage, zot en colere, zot criyé, ek zot insulté dimoune-la.’ (Éphésiens 4:31) Kan bann dimoune pa konn control-zot coumsa, au lieu ki sa faire gagne la paix l’esprit, sa plutot “leve la guerre.”—Proverbes 15:18.
Parkont, bann ki suive commandement Bondié pou content zot prochain couma zot-mem, zot ‘bon sakenn envers so prochain, zot ena enn tendre compassion, zot pardonné avek tou zot leker.’ (Éphésiens 4:32; Colossiens 3:13) Mem kan lezot pa traite zot avek consideration, zot faire enn zeffort pou imite Jésus ki, kan dimoune ti insulté li, li “pa ti insulté zot pareil.” (1 Pierre 2:23) Pareil couma Jésus, zot comprend ki nou gagne enn vrai satisfaction kan nou servi lezot, mem si bannla pa montré zot reconnaissance. (Matthieu 20: 25-28; Jean 13:14, 15; Actes 20:35) Jéhovah donne so l’esprit bann ki imite so Garson, ek sa l’esprit-la faire zot ressenti enn vrai la-paix dan zot la-vie.—Galates 5:22.
Mais couma fason ki ou considere ou l’avenir kapav ena enn l’influence lor ou la-paix l’esprit?