Eski reste tigit le temps pou la terre?

Ki reponse ou pou choisir parmi sa trois-la?

Eski bientot bann condition lor la terre pou

(a) amelioré?

(b) reste pareil?

ESKI ou essaye garde enn l’attitude positif concernant l’avenir? Li dan nou l’avantage pou ena sa l’attitude-la. Bann l’etude inn montré ki bann dimoune ki ena enn l’attitude positif, zot pli bien lor plan mental ek physik. Enn l’etude ki’nn faire pendant plusieurs l’année inn montré ki, comparé ar bann zom ki ena enn l’attitude negatif, bann ki ena enn l’attitude positif ena moins chance gagne bann probleme cardiak. Resultat sa l’etude-la, li en accord avek seki la Bible ti dire ena plusieurs siecle: “Enn leker joyeux li enn bon medecine, mais [enn] l’esprit deprimé mine la santé.”—Proverbes 17:22, La Bible du Semeur.

Mais, avek seki bann expert scientifik pé annoncé concernant l’avenir la Terre, beaucoup dimoune trouve sa bien difficile pou reste joyeux ek pou ena enn l’attitude positif. Anou guette certain kitsoz ki faire peur ki zot inn annoncé ek ki nou pé tendé zordi.

Enn planete ki en danger

En 2002, dan enn rapport, l’Institut de l’environnement de Stockholm ti averti ki si bann dimoune contigne faire developpement economik couma zot pé faire, pena doute ki sa pou amenn “bann evenement ki pou kapav change climat la terre ek so bann systeme ecologik net.” Sa rapport-la ti dire aussi ki pauvreté dan le monde, l’injustice ki pé contigné, ek destruction bann ressource naturel kapav faire le monde sorti “dan enn probleme l’environnement, social ek securité, pou tombe dan enn lot.”

En 2005, Nations Unies inn publié enn l’etude ki’nn faire pendant quatre an lor situation l’environnement dan le monde entier. Sa rapport-la appel “Evaluation bann systeme ecologik pou nou millenaire.” Plus ki 1,360 expert ki sorti dan 95 pays inn participe dan sa l’etude bien profond-la, ek zot donne sa l’avertissement-la: “L’activité bann zom pé tellement abuse bann fonction naturel la terre ki nepli sur ki so bann systeme ecologik pou kapav donne bann generation ki pé vini seki zot bizin.” Sa rapport-la dire ki pou evite sa catastrophe-la, pou bizin faire “bann grand changement dan bann methode ek bann l’organisation ki’nn bien etabli ek dan bann l’habitude, mais ziska zordi pankor commence faire sa bann changement-la.”

Anna Tibaijuka, directrice programme Nations Unies pou bann l’habitation bann dimoune faire enn resumé lor seki bann scientifik pli allé pé croire. Li dire: “Si nou contigne faire coumadir pena okenn probleme, enn catastrophe pé attann nou dan l’avenir.”

Enn raison pou ena enn l’attitude positif

Bann Témoins de Jéhovah, ki publié sa periodik-la, croire zot aussi ki bientot pou ena bann grand changement lor la terre. Mais, zot sur ki sa bann l’evenement-la pa pou amenn enn catastrophe pou l’avenir, mais plutot bann condition extraordinaire ki le monde jamais pa finn koné avant. Kifer zot ena enn l’attitude positif coumsa? Parski zot ena confiance dan bann promesse ki ena dan Parole Bondié, la Bible. Remark enn parmi sa bann promesse-la: “Enn tigit le temps encore, ek mauvais dimoune nepli pou existé; oui, to pou rod li dan so place, mais li pa pou la. Mais bann ki ena l’humilité pou herite la terre, ek vrai-mem zot pou trouve enn grand la joie dan l’abondance la paix.”—Psaume 37:10, 11.

Eski sa l’espoir-la, li zis enn rêve? Avant ki ou reponn sa question-la, reflechi lor enn kitsoz: ena bann millier l’année, la Bible ti annonce beaucoup grand probleme ki nou trouvé zordi ek ki pé accablé la terre ek bann dimoune, ek li ti annonce sa dan enn fason exact. Nou invite ou pou lire bann verset ki cité dan prochain lartik, ek pou compare seki zot dire avek seki ou trouvé pé arrivé dan le monde. Sa pou faire ou ena plus confiance ki la Bible predire l’avenir dan enn fason exact.