Enn le temps pou choisir

“Bondié ti crée zom dan so ressemblance, dan ressemblance Bondié Li ti crée li; Li ti crée zot male ek femelle.”—Genèse 1:27.

SA BANN parole ki beaucoup dimoune koné-la trouve dan bann premier page la Bible. Zot montré nou enn parmi bann kitsoz pli extraordinaire ki Bondié ‘inn faire joli dan so le temps’—Li’nn crée enn couple parfait, Adam ek Ève. (Ecclésiaste 3:11) En tant ki zot Createur Jéhovah ti dire zot: “Gagne beaucoup zenfant, multiplié, rempli la terre ek ena controle lor li; ena controle lor bann poisson dan la mer, lor bann creature ki envolé dan le ciel, ek lor tou creature vivant ki bougé lor la terre.”—Genèse 1:28.

Par sa bann parole-la, Bondié inn faire nou premier parent konn so projet. Zot ti bizin multiplié ek occupe la terre ek transforme li net en paradis pou ki zot ek zot bann descendance vive lor la. Pa ti’nn fixé enn ler kot zot ti pou mort. Au contraire, Bondié ti mette devant zot enn l’avenir extraordinaire. Si zot ti choisir pou faire seki bon setadir suive seki Bondié ti demann zot, zot ti pou kapav vive dan la paix ek la joie pou touletan.

Malheureusement, zot finn faire enn mauvais choix, ek consequence ki sa finn ena: tou bann dimoune vinn vié ek mort. Pou sa raison-la, Job ti reconette: “Enn dimoune ki enn femme inn donne naissance, vive pou enn tigit le temps, ek so la vie rempli ar difficulté.” (Job 14:1) Ki finn mal passé?

La Bible dire: “Par enn sel zom, peché finn rente dan le monde ek peché finn amenn la mort, ek coumsa tou dimoune passe par la mort parski zot tou ti’nn faire peché.” (Romains 5:12) Sa ‘enn sel zom-la’ bien sur ti Adam, ki ti choisir volontairement pou desobeir enn commandement Bondié ki ti bien simple ek bien clair. (Genèse 2:17) Par choix ki li’nn faire, Adam inn perdi possibilité pou vive pou touletan lor enn la terre transformé en paradis. Li finn aussi prive so descendance enn heritage ki ti ena enn grand valeur ek li’nn transmette zot condamnation peché ek la mort. So situation ti parette sans okenn l’espoir—mais eski vrai-mem pa ti ena okenn l’espoir?

Enn le temps pou refaire bann kitsoz nouveau

Plusieurs centaine l’année plitar, enn psalmiste ti inspiré pou ecrire: “Bann dimoune juste pou possede la terre, ek zot pou reste lor la pou touletan.” (Psaume 37:29) Pou donne enn garantie ki promesse ki Bondié ti faire dan jardin Éden pou realisé, Parole Bondié montré seki bientot Li pou faire: “Li pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.” Apré sa, Bondié Li-mem dire: “Guetté! Mo pé faire tou kitsoz nouveau.”—Révélation 21:4, 5.

Parski ena enn le temps fixé pou tou kitsoz, question logik ki nou kapav pose-nou c’est: Kan eski sa le temps kot pou refaire tou kitsoz nouveau-la pou arrivé, pou ki promesse extraordinaire ki Bondié inn faire realisé? Bann Témoins de Jéhovah, ki publié sa magazine-la, pé faire beaucoup zeffort pou attire l’attention bann dimoune ki nou pé vive enn lepok ki la Bible appel “bann dernier jour” ek ki le temps kot Bondié pou agir pou faire “tou kitsoz nouveau,” li bien pré. (2 Timothée 3:1) Nou encourage ou pou examine la Bible ek aprann lor bann bienfait extraordinaire ki ou pou kapav profité. Nou aussi encourage ou pou accepté sa invitation-la: “Rod Jéhovah tant ki nou encore kapav trouve Li. Appel Li tant ki Li encore pré.” (Isaïe 55:6) Ou la vie ek ou l’esperance pou vive pou touletan li depann lor ou, pa lor destin.

[Zimage lor page 8]

“Guetté! Mo pé faire tou kitsoz nouveau”