Nou pou Jéhovah—Enn faveur ki nou pa merité

“Nou pou Jéhovah.”—ROM. 14:8.

1, 2. (a) Ki privilege nou ena? (b) Ki bann question nou pou examiné?

NATION Israël ti gagne vrai-mem enn grand privilege kan Jéhovah ti dire zot: “Vrai-mem zot pou vinn mo di-bien special parmi tou bann lezot peuple.” (Ex. 19:5) Zordi, bann membre congregation chretien aussi ena enn grand privilege ki zot pou Jéhovah. (1 Pierre 2:9; Rév. 7:9, 14, 15) C’est enn privilege ki kapav faire nou gagne bann bienfait pou touletan.

² A part ki c’est enn privilege, kan nou pou Jéhovah c’est aussi enn responsabilité. Certain kapav demann zot-mem: ‘Eski mo pou reussi faire seki Jéhovah demann moi? Si jamais mo faire enn peché, eski Li pou rejette moi? Kan mo pou vinn pou Jéhovah, eski mo pa pou perdi mo liberté?’ Li vaut la peine ki nou examine sa bann question-la. Mais d’abord, ena enn lot question ki nou bizin bien examiné: Ki bienfait nou gagné kan nou pou Jéhovah?

Nou pou Jéhovah—sa faire nou heureux

3. Couma Rahab ti gagne bann bienfait parski li ti prend decision pou servi Jéhovah?

³ Eski nou gagne bann bienfait kan nou vinn pou Jéhovah? Prend l’exemple Rahab, enn prostitué ki ti vive dan ancien la ville Jéricho. Surement so famille ti elevé li pou pratik l’adoration immoral bann bondié cananéen. Pourtant, kan li ti tann bann victoire ki Jéhovah ti donne Israël, li ti realisé ki Jéhovah Li-mem vrai Bondié. Alors, li ti riské so la vie pou protege bann messager ki ti forme partie dan peuple ki Bondié ti choisir ek coumsa li ti mette so l’avenir dan zot la main. La Bible dire: “Eski Bondié pa ti declare Rahab, enn prostitué, couma enn dimoune juste par bann action, apré ki li ti recevoir bann messager avek hospitalité ek li ti faire zot passe par enn lot chemin?” (Jacq. 2:25) Mazinn bann bienfait ki li ti gagné kan li ti forme partie dan peuple Jéhovah—enn peuple ki ti pratik enn l’adoration ki pur ek ki ti ena la Loi Bondié ki ti enseigne zot l’amour ek la justice. Nou kapav maziné ki quantité li ti content ki li ti’nn abandonne fason ki li ti pé vive avant! Li ti marié ar enn Israélite ek li ti gagne enn garson, Boaz. Li ti elevé li pou li vinn enn serviteur Jéhovah ki ti ena enn grand la foi.—Jos. 6:25; Ruth 2:4-12; Mat. 1:5, 6.

4. Ki bann bienfait Ruth ti gagné parski li ti choisir pou servi Jéhovah?

⁴ Ruth ki ti sorti Moab ti decidé li aussi pou servi Jéhovah. Surement kan li ti tipti, li ti adore Kemosh ek lezot bondié ki ti ena dan Moab. Mais avek le temps, li ti’nn arrivé konn Jéhovah, vrai Bondié, ek li ti marié ar enn Israélite ki ti vinn rod secours dan so pays a cause la famine. (Lire Ruth 1:1-6.) Plitar, kan Ruth ek so belle-soeur, Orpa, ti pé quitte zot pays avek zot belle-mere, Naomi, pou al Bethléhem, Naomi ti suppliye sa deux jeune femme-la pou retourne kot zot. La vie pa ti pou facile pou zot en Israël. Orpa “ti retourne vers so peuple ek so bann bondié,” mais Ruth, non. Li ti agir dapré so la foi ek li ti koné pou ki Bondié li ti pou content été. Li ti dire Naomi: “Pa suppliye moi pou abandonne toi, pou quitte toi; parski kot to pou allé, mo pou allé, ek kot to pou passe la nuit, mo pou passe la nuit. To peuple pou vinn mo peuple, ek to Bondié mo Bondié.” (Ruth 1:15, 16) Parski li ti choisir pou servi Jéhovah, Ruth ti gagne bann bienfait grace a la Loi Bondié. Dan sa la Loi-la ti ena bann disposition special pou bann veuve, bann dimoune misere ek bann ki pa ti ena la terre. Enba protection Jéhovah, li ti heureux ek en securité.

5. Ki ou finn observé concernant bann dimoune ki servi Jéhovah avek fidelité?

⁵ Kitfois ou konn certain dimoune ki finn voué zot la vie ar Jéhovah ek ki pé contigne servi Li avek fidelité pendant plusieurs dizaine l’année. Demann zot ki bann bienfait zot inn gagné parski zot servi Jéhovah. Li vrai ki personne pa kapav dire ki li pena probleme, mais nou ena bann preuve ki confirme bien bann parole sa psalmiste-la: “Heureux le peuple ki ena Jéhovah pou Bondié!”—Ps. 144:15.

Jéhovah Li raisonnable

6. Kifer fodé pa nou peur pangar nou pa arrivé faire seki Jéhovah demann nou?

⁶ Surement ou finn demann ou-mem si ou pou kapav faire seki Jéhovah demann ou. Li facile pou pensé ki nou pa assez qualifié pou vinn enn serviteur Bondié, pou vive en accord avek so bann la loi, ek pou koz pou so nom. Par exemple, Moïse pa ti senti-li qualifié kan Jéhovah ti envoye li pou al koz ar bann Israélite ek le roi l’Égypte. Mais Bondié ti raisonnable dan seki li ti demann Moïse. Jéhovah ‘ti enseigne li seki li ti pou bizin faire.’ (Lire Exode 3:11; 4:1, 10, 13-15.) Moïse ti accepté l’aide Bondié, alors li ti ena la joie pou faire volonté Bondié. Zordi aussi, Jéhovah raisonnable dan seki Li demann nou faire. Li comprend ki nou imparfait, ek Li envie aide nou. (Ps. 103:14) Servi Bondié en tant ki enn disciple Jésus c’est pa enn fardeau. Au contraire, sa faire nou di-bien parski nou conduite faire lezot gagne bann bienfait ek faire leker Jéhovah content. Jésus ti dire: “Vinn vers moi, . . . ek moi mo pou reconforte zot. Prend mo joug lor zot ek aprann ar moi, parski mo ena enn caractere doux ek enn leker humble.”—Mat. 11:28, 29.

7. Kifer ou kapav sur ki Jéhovah pou aide ou pou faire seki Li demann ou faire?

⁷ Tant ki nou compte lor Jéhovah pou gagne la force, Li pou touletan donne nou l’encouragement ki nou bizin. Par exemple, Jérémie pa ti ena la parole facile. A cause sa, kan Jéhovah ti choisir li pou vinn so prophete, Jérémie ti dire: “Ayo! Souverain Seigneur Jéhovah! Mo pa mem koné couma pou kozé, parski mo encore enn jeune garson.” Plitar, li ti mem dire: “Mo pou arrete koz pou so nom.” (Jér. 1:6; 20:9) Pourtant, avek l’encouragement Jéhovah, pendant 40 an Jérémie ti kapav preche enn message ki bann dimoune pa ti envie tendé. Plusieurs fois, Jéhovah ti donne Jérémie l’assurance kan Li ti dire li: “Mo avek toi pou sauve toi ek pou delivré toi.”—Jér. 1:8, 19; 15:20.

8. Couma nou montré ki nou ena confiance en Jéhovah?

⁸ Pareil couma Jéhovah ti fortifié Moïse ek Jérémie, Li kapav aide nou pou faire seki Li demann bann chretien pou faire zordi. Pou nou arrivé faire sa, nou bizin ena confiance en Bondié. La Bible dire: “Faire Jéhovah confiance avek tou to leker ek pa fié lor to prop l’intelligence. Dan tou seki to faire, prend Li compte, ek Li, Li pou faire to bann chemin vinn droite.” (Prov. 3:5, 6) Nou montré ki nou compte lor Jéhovah kan nou profite l’aide ki Li donne nou par so Parole ek par la congregation. Si nou laisse Jéhovah guide nou dan nou la vie, nanyin pa pou empeche nou pou reste fidele envers Li.

Jéhovah prend compte so bann serviteur lor plan personnel

9, 10. Ki qualité protection Psaume 91 promette?

⁹ Pendant ki zot pé reflechi lor decision pou voué zot la vie ar Jéhovah, kitfois certain kapav demann zot-mem ki pou arrivé si zot faire enn peché, si zot perdi faveur Jéhovah ek lerla Li rejette zot. Heureusement, Jéhovah donne nou protection ki bizin pou garde nou bann bon relation avek Li. Anou guetté couma Psaume 91 montré sa.

¹⁰ Sa psaume-la commence coumsa: “Enn dimoune ki reste dan l’endroit secret sa Kikenn ki Pli Grand-la, pou gagne enn place pou resté enba l’ombrage Tout-Puissant. Mo pou dire Jéhovah: ‘To-mem mo refuge ek mo forteresse, mo Bondié en ki mo pou mette mo confiance.’ Parski Li-mem pou delivré toi dan piege sa kikenn ki maye zoiseau-la.” (Ps. 91:1-3) Remarké ki Bondié promette pou protege bann ki content Li ek ena confiance en Li. (Lire Psaume 91:9, 14.) Ki qualité protection Bondié donné? Dan le passé, Jéhovah ti protege certain parmi so bann serviteur lor plan physik—dan certain cas Li ti protege bann descendant ki ti pou amenn ziska le Messie ki Li ti promette. Parkont, beaucoup lezot serviteur fidele finn bizin supporte bann attak Satan kan zot finn emprisonné, finn gagne batté ek zot bann l’ennemi finn touye zot; tousala pou detourne zot ar zot fidelité envers Bondié. (Héb. 11:34-39) Zot ti gagne courage necessaire pou enduré parski Jéhovah ti protege zot lor plan spirituel pou zot pa vinn infidele. Alors, nou kapav comprend ki Psaume 91 li enn promesse ki Jéhovah pou protege nou lor plan spirituel.

11. Ki “l’endroit secret sa Kikenn ki pli Grand-la” representé, ek kisannla Bondié protegé ladan?

¹¹ Alors, “l’endroit secret sa Kikenn ki Pli Grand-la” ki sa psalmiste-la mentionné, c’est enn place symbolik kot nou gagne protection spirituel. Bann ki reste dan sa place-la couma bann invité Bondié, zot protegé ar n’importe ki kitsoz ou-soit n’importe ki dimoune ki kapav mette en danger zot la foi ek zot l’amour pou Bondié. (Ps. 15:1, 2; 121:5) C’est enn place secret parski bann ki pa servi Jéhovah, pa kapav trouve sa. Dan sa place-la, Jéhovah protege bann dimoune ki dire: ‘To mo Bondié ar ki mo pou mette mo confiance.’ Si nou reste dan sa place kot nou gagne enn protection-la, nou pa pou peur plus ki bizin pangar nou tombe dan piege Satan, “sa kikenn ki maye zoiseau-la,” ek coumsa perdi faveur Bondié.

12. Ki bann danger ki menace nou relation avek Bondié?

¹² Ki bann danger ki menace nou bann bon relation avek Bondié? Psalmiste-la mentionne plusieurs danger, parmi ena “l’epidemie ki marche dan noir, . . . [ek] destruction ki prend tou seki ena, en plein midi.” (Ps. 91:5, 6) “Sa kikenn ki maye zoiseau-la” piege beaucoup dimoune kan li faire zot ena enn desir egoïste pou vinn independant. (2 Cor. 11:3) Li maye lezot kan li faire zot ena enn desir pou gagne plus, li faire zot tombe dan piege l’orgueil ek materialisme. Ena lezot encore ki li embeté par bann philosophie couma l’amour pou zot pays, l’evolution ek fausse religion. (Col. 2:8) Li finn attire beaucoup dan piege l’immoralité sexuel. Tou sa bann piege-la zot couma bann plaie spirituel ki finn faire plusieurs million dimoune perdi zot l’amour pou Bondié.—Lire Psaume 91:7-10; Mat. 24:12.

Protege ou l’amour pou Bondié

13. Couma Jéhovah protege nou kont bann danger ki menace nou spiritualité?

¹³ Couma Jéhovah protege so peuple kont sa bann danger spirituel-la? Sa psaume-la dire: “Li pou donne so bann ange enn l’ordre ki concerne toi, pou veille lor toi dan tou seki to faire.” (Ps. 91:11) Bann ange dan le ciel guide nou ek protege nou pou ki nou kapav preche la bonne nouvelle. (Rév. 14:6) A part bann ange, bann ancien ki reste bien attaché ar la Bible dan zot l’enseignement, protege nou kont bann fausse raisonnement ki kapav embete nou. Zot kapav aide personnellement n’importe kisannla ki pé lutté pou zot kapav debarrasse-zot ar bann l’attitude sa le monde-la. (Tite 1:9; 1 Pierre 5:2) Enn lot disposition c’est “l’esclave fidele et avisé” ki donne nou nourriture spirituel pou protege nou kont l’enseignement l’evolution, bann desir immoral ki kapav attire nou, danger pou rod vinn riche ek pou gagne la gloire, ek encore beaucoup lezot mauvais desir ek l’influence. (Mat. 24:45) Ki finn aide ou pou resisté kont certain parmi sa bann danger-la?

14. Couma nou kapav gagne bann bienfait ar protection ki Bondié donné?

¹⁴ Ki nou bizin faire pou reste dan “l’endroit secret” Bondié kot nou gagne so protection? Pareil couma nou bizin touletan prend precaution pou protege nou-mem kont bann danger physik, couma par exemple bann accident, bann criminel ou-soit bann maladie, alors nou bizin aussi touletan protege nou-mem kont bann danger spirituel. Sa vedir ki nou bizin regulierement profite direction ki Jéhovah donne nou a travers nou bann publication, bann reunion ek bann l’assemblée. Nou rod conseil bann ancien. Eski nou pa profite aussi bann different qualité ki nou bann frere ek soeur manifesté? Oui, kan nou frequente congregation, sa aide nou pou vinn sage.—Prov. 13:20; lire 1 Pierre 4:10.

15. Kifer ou kapav sur ki Jéhovah kapav protege ou kont n’importe ki kitsoz ki kapav faire ou perdi so faveur?

¹⁵ Nou pena okenn raison pou douté ki Jéhovah kapav protege nou kont n’importe ki kitsoz ki kapav faire nou perdi so faveur. (Rom. 8:38, 39) Li finn kapav protege la congregation kont bann l’ennemi religieux ek politik bien puissant ki souvent ti ena l’objectif, pa pou touye nou, mais pou separe nou ar nou Bondié ki saint. Promesse ki Jéhovah ti faire, finn realisé: “N’importe ki zarme ki formé kont toi, pa pou reussi.”—Is. 54:17.

Kisannla ki donne nou liberté?

16. Kifer le monde pa kapav donne nou liberté?

¹⁶ Eski kan nou pou vinn pou Jéhovah sa pou faire nou perdi nou liberté? Non, au contraire, c’est kan nou pou le monde ki nou perdi nou liberté. Le monde li eloigné ar Jéhovah ek li dirigé par enn bondié cruel ki faire bann dimoune vinn so esclave. (Jean 14:30) Par exemple, systeme Satan servi bann pression economik pou faire bann dimoune perdi zot liberté. (Compare avek Révélation 13:16, 17.) Peché aussi ena pouvoir pou embete dimoune ek faire zot vinn esclave. (Jean 8:34; Héb. 3:13) Certain dimoune ki pa croire Bondié, promette lezot ki zot pou pli libre si zot amenn enn la vie ki contraire ar bann principe Jéhovah. Mais sa bann dimoune ki ecoute zot-la pou trouvé bien vite ki en realité, zot inn vinn esclave peché ek enn conduite immoral.—Rom. 1:24-32.

17. Ki liberté Jéhovah donne nou?

¹⁷ De lot coté, Jéhovah pou libere nou ar tou seki kapav faire nou di-tort si nou mette nou la vie dan so la main. Dan enn certain sens, nou situation ressemblé situation enn dimoune ki mette so la vie dan la main enn docteur bien qualifié ki kapav opere li ek gueri li ar enn maladie dangereux. Nou tou nou ena enn maladie dangereux—peché ki nou finn herité. C’est zis si nou confié Jéhovah nou la vie, lor base sacrifice Christ, ki nou kapav attann pou delivré ar peché ek pou vive pou touletan. (Jean 3:36) Pareil couma nou confiance dan enn docteur kapav grandi a mesure ki nou konn so reputation, pareil aussi, nou confiance en Jéhovah pou grandi a mesure ki nou contigne aprann lor Li. Sa vedir ki nou bizin contigne etudié Parole Bondié avek serieux parski sa pou aide nou pou content Li dan enn fason ki nou pa pou peur pou vinn pou Li.—1 Jean 4:18.

18. Ki resultat bann ki vinn pou Jéhovah, pou gagné?

¹⁸ Jéhovah donne tou dimoune liberté pou choisir. So Parole dire: “To bizin choisir la vie pou ki to contigne vive, toi ek to descendance, kan to content Jéhovah to Bondié.” (Deut. 30:19, 20) Li envie ki nou montré nou l’amour pou Li kan nou choisir par nou-mem pou servi Li. Kan nou vinn pou sa Bondié ki nou content-la, sa pa prive nou ar nou liberté. Au contraire, pena doute ki sa pou faire nou heureux ek pou aide nou pou reste heureux.

19. Kifer vinn pou Jéhovah c’est enn faveur ki personne pa merité?

¹⁹ En tant ki bann dimoune imparfait, nou pa merité pou vinn pou enn Bondié parfait. Zis faveur Bondié ki personne pa merité ki permette sa. (2 Tim. 1:9) A cause sa, Paul ti ecrire: “Si nou vive, nou vive pou Jéhovah, ek si nou mort, nou mort pou Jéhovah. Alors, ki nou vive ou-soit ki nou mort, nou pou Jéhovah.” (Rom. 14:8) Pena doute, jamais nou pa pou regretté ki nou finn choisir pou vinn pou Jéhovah.

Couma ou pou reponn?

• Ki bann bienfait nou gagné parski nou pou Jéhovah?

• Kifer nou kapav faire seki Bondié demann nou?

• Couma Jéhovah protege so bann serviteur?

[Zimage lor page 15]

Demann lezot ki bienfait zot inn gagné parski zot pou Jéhovah

[Zimage lor page 16]

Cite certain fason couma Jéhovah donne nou so protection