Servi bien ou la vie celibataire

“Si enn kikenn kapav accepté sa, ki li accepté sa.”—MAT. 19:12.

1, 2. (a) Couma Jésus, Paul ek lezot ti considere la vie celibataire? (b) Kifer li possible ki certain pa considere la vie celibataire couma enn don?

PENA doute ki mariage c’est enn parmi bann don ki ena beaucoup valeur ki Bondié inn donne bann dimoune. (Prov. 19:14) Pourtant, beaucoup chretien celibataire aussi amenn enn la vie bien rempli ki faire zot gagne satisfaction. Harold, enn frere ki ena 95 an ek ki jamais pa finn marié, dire: “Mem si mo bien content passe le temps avek lezot ek manifesté l’hospitalité, kan mo tousel, jamais mo senti-moi tousel. Mo croire ki vrai-mem kapav dire ki mo ena don pou reste celibataire.”

² Oui, Jésus Christ ek Paul toulé-deux ti koz lor la vie celibataire couma enn don ki Bondié inn donné. Mariage aussi c’est enn don. (Lire Matthieu 19:11, 12; 1 Corinthiens 7:7.) Mais nou reconette ki pa tou dimoune ki pa marié, ki’nn choisir pou reste celibataire. Parfois a cause bann circonstance, li difficile pou trouve enn bon conjoint. Li possible aussi ki apré plusieurs l’année mariage, certain, sans ki zot ti attann, retrouve-zot tousel a cause enn divorce ou-soit la mort zot conjoint. Alors, dan ki sens la vie celibataire kapav enn don? Ek couma bann chretien celibataire kapav servi bien zot la vie celibataire?

Pena enn lot don coumsa

3. Ki bann l’avantage bann chretien celibataire souvent ena?

³ Souvent enn celibataire ena plus le temps ek plus liberté ki enn dimoune marié. (1 Cor. 7:32-35) Sa c’est bann l’avantage ki enn celibataire ena ki kapav permette li pou faire plus dan so ministere, pou manifesté plus l’amour envers lezot, ek pou vinn pli proche avek Jéhovah. Alors, beaucoup chretien finn commence apprecié bann l’avantage ki ena kan zot celibataire ek finn decide pou “accepté sa,” au moins pendant enn certain temps. Ena lezot ki pa ti ena l’intention pou reste celibataire au commencement, mais kan zot situation inn changé, zot inn reflechi lor la dan la priere ek zot inn realisé ki avek l’aide Jéhovah zot kapav accepté sa changement-la ek reste celibataire.—1 Cor. 7:37, 38.

4. Kifer bann chretien celibataire kapav pensé ki zot complet dan service Bondié?

⁴ Bann chretien celibataire koné ki li pa necessaire ki zot marié pou ki Jéhovah ou-soit so l’organisation apprecié zot. Bondié ena l’amour pou sakenn parmi nou personnellement. (Mat. 10:29-31) Personne ni nanyin pa kapav separe nou ar l’amour Bondié. (Rom. 8:38, 39) Ki nou marié ou-soit celibataire, nou ena bann bon raison pou pensé ki nou complet dan service Bondié.

5. Ki nou bizin faire pou profite bien sa don pou reste celibataire-la?

⁵ Si nou ena enn don pou la musik ou-soit pou enn sport, nou bizin developpe sa don-la. Li pareil aussi pou don pou reste celibataire, nou bizin faire zeffort pou developpe sa don-la pou ki nou kapav servi li bien. Alors, couma bann chretien celibataire zordi—frere ou-soit soeur, jeune ou-soit agé, celibataire par choix ou-soit a cause bann circonstance—kapav profite zot situation? Anou examine deux-trois l’exemple bien encourageant dan premier siecle ek guetté seki nou kapav aprann.

Celibataire kan ou jeune

6, 7. (a) Ki privilege bann tifi Philippe ti gagné dan service Bondié? (b) Couma Timothée ti bien servi bann l’année ki li ti celibataire, ek ki benediction li ti gagné parski li ti bien disposé pou servi lezot dan so jeunesse?

⁶ Philippe, enn evangelisateur, ti ena quatre tifi ki pa ti encore marié ki ti ena mem zele ki zot papa pou annonce la bonne nouvelle. (Actes 21:8, 9) Parmi bann don l’esprit saint ki bann disciple ti gagné par mirak, ti ena don pou prophetisé, ek sa bann tifi-la ti servi sa don-la en accord avek realisation Yoël 2:28, 29.

⁷ Timothée ti enn jeune homme ki ti servi bien so la vie celibataire. Depuis tipti so mama, Eunice, ek so grand-mere, Loïs, ti enseigne li “bann l’ecriture sacré.” (2 Tim. 1:5; 3:14, 15) Mais kitfois, c’est selman kan premier fois Paul ti visite Lystres, la ville kot zot ti resté, vers 47 nou lepok, ki zot ti vinn bann chretien. Deux an apré, kan Paul ti visite zot la ville enn deuxieme fois, kitfois Timothée ti ena environ 20 an. Malgré ki li ti assez jeune ek nouveau dan la verité, bann ancien dan Lystres ek Iconium, enn la ville a coté, ti “rann enn bon temoignage lor li.” (Actes 16:1, 2) Alors, Paul ti invite Timothée pou vinn ar li couma so compagnon voyage. (1 Tim. 1:18; 4:14) Nou pa kapav dire dan enn fason sur ki Timothée jamais pa finn marié. Mais nou koné ki, en tant ki enn jeune, li ti accepté l’invitation Paul avek plaisir ek pendant plusieurs l’année apré, li ti bien content pou servi couma enn missionnaire ek enn surveillant celibataire.—Phil. 2:20-22.

8. Ki ti aide Marc pou poursuive bann l’objectif spirituel, ek ki bann benediction li ti gagné kan li ti faire sa?

⁸ Kan li ti jeune, Marc (ou-soit Jean Marc) aussi ti servi so bann l’année celibataire dan enn bon fason. Li ek so mama, Marie, ek aussi so cousin Barnabas, ti parmi bann premier membre dan congregation Jérusalem. Famille Marc ti surement assez riche lor plan materiel parski zot ti ena enn lakaz pou zot-mem dan la ville, ek zot ti ena enn servante. (Actes 12:12, 13) Pourtant, malgré sa bann l’avantage-la, Marc pa ti egoïste ni li ti rod so prop l’interet. Li pa ti decide aussi pou fonde enn famille ek amenn enn la vie confortable. Li ti frequente bann zapotre depuis boner, ek surement sa ti faire li ena desir pou vinn missionnaire. Alors, li pa ti hesité pou al avek Paul ek Barnabas dan zot premier voyage missionnaire pou aide zot couma enn assistant. (Actes 13:5) Apré, li ti voyage avek Barnabas, ek plitar, nou trouve li avek Pierre dan Babylone. (Actes 15:39; 1 Pierre 5:13) Nou pa koné comié le temps Marc ti reste celibataire. Mais li ti gagne enn bon reputation couma enn kikenn ki ti disposé pou servi lezot ek pou faire plus dan service Bondié.

9, 10. Ki bann possibilité bann jeune celibataire ena zordi pou zot faire plus dan zot ministere? Donne enn l’exemple.

⁹ Zordi aussi, beaucoup jeune dan congregation servi zot bann l’année celibataire pou faire plus dan service Bondié. Pareil couma Marc ek Timothée, zot rann-zot compte ki zot la vie celibataire permette zot pou faire enn “service regulier pou le Seigneur, sans ki nanyin distraire zot.” (1 Cor. 7:35) C’est vrai-mem enn grand l’avantage. Ena beaucoup fason ki bann jeune kapav servi Jéhovah—faire pionnier, servi dan bann l’endroit kot bizin proclamateur, aprann enn lot langue, participe dan construction bann la Salle du Royaume ou-soit bann Béthel, suive cours Lekol formation ministeriel, ek servi dan Béthel. Si ou encore jeune ek celibataire, eski ou pé faire tou pou saisi sa bann possibilité-la?

¹⁰ Enn frere ki appel Marc ti commence faire pionnier avant ki li ti gagne vingt an, li ti suive cours Lekol formation ministeriel, ek li ti gagne lezot affectation a travers le monde. Kan li reflechi lor 25 an ki li’nn passé dan service a plein temps, li dire: “Mo ti essaye encourage zot tou dan congregation, preche avek zot, faire bann visite pastoral kot zot, invite zot pou prend enn repas kot moi, ek mem organise bann moment detente ki encourageant lor plan spirituel. Tou sa bann kitsoz-la finn donne moi beaucoup la joie.” Couma commentaire Marc montré, pli grand la joie ki nou kapav gagné dan nou la vie c’est kan nou donne lezot. Kan nou consacré nou la vie net dan service sacré, nou gagne beaucoup l’occasion pou donne lezot. (Actes 20:35) Jeune, n’importe ki bann kitsoz ou content faire personnellement, n’importe ki talent ou-soit l’experience ou ena dan la vie, ou ena beaucoup pou faire dan travail nou Seigneur.—1 Cor. 15:58.

11. Ki bann l’avantage ena kan nou pa pressé pou marié?

¹¹ Mem si la plupart jeune ti pou content marié enn jour, ena bann bon raison pou zot pa pressé pou faire sa. Paul encourage bann jeune pou attann au moins ziska ki zot passe “fleur la jeunesse,” enn periode kan bann desir sexuel pli fort. (1 Cor. 7:36) Sa prend le temps pou comprend ou-mem ek pou gagne l’experience ki ou bizin dan la vie pou choisir enn bon conjoint. Sa voeu ki enn dimoune faire kan li marié-la, c’est enn decision bien important, enn decision ki pou duré pou la vie.—Eccl. 5:2-5.

Celibataire plitar dan la vie

12. (a) Couma Anne ti faire face ar so changement situation? (b) Ki privilege li ti gagné?

¹² Anne, ki l’Evangile Luc mentionné, ti surement bien triste kan so mari ti mort sans ki li ti attann, selman apré sept an mariage. Nou pa koné si zot ti ena zenfant ou-soit si li ti’nn deja pense pou ré-marié. Mais la Bible dire ki Anne ti toujours veuve kan li ti ena 84 an. Dapré seki la Bible dire, nou kapav comprend ki Anne ti profite so changement situation pou vinn pli proche ar Jéhovah. “Jamais [li] pa ti absent dan temple. Li ti pé offert enn service sacré la-nuit li-jour: li ti garde careme ek li ti faire bann supplication.” (Luc 2:36, 37) Nou trouvé ki bann kitsoz spirituel ti passe en premier dan so la vie. Sa ti demann li beaucoup determination ek zeffort, mais Jéhovah ti bien recompense li. Li ti ena privilege pou trouve Jésus, tibaba, ek pou rann temoignage ar lezot lor delivrance ki sa futur Messie-la ti pou amené.—Luc 2:38.

13. (a) Ki montré ki Dorcas ti bien actif dan congregation? (b) Ki recompense Dorcas ti gagné parski li ti bon envers lezot?

¹³ Dorcas, ki ti appel aussi Tabitha, ti vive dan Joppé, enn ancien port dan nord-ouest Jérusalem. La Bible pa koz ditou lor so mari, alors nou pensé ki li pa ti marié dan sa lepok-la. Dorcas, “ti faire beaucoup di-bien ek beaucoup donation.” Li ti faire beaucoup linge pou bann veuve ki ti bizin l’aide ek pou lezot, ek sa ti faire bannla bien content li. Alors, kan enn coute li ti tombe malade ek li ti mort, zot tou dan congregation ti faire al cherche Pierre ek ti suppliye li pou ressuscite zot soeur ki zot ti bien content. Kan nouvelle ti fané dan Joppé ki Dorcas ti ressuscité, beaucoup ti vinn croyant. (Actes 9:36-42) Par so bonté extraordinaire, li possible ki Dorcas li-mem ti’nn aide certain parmi zot par so bann bon action.

14. Ki pousse bann chretien celibataire pou vinn pli proche ar Jéhovah?

¹⁴ Pareil couma Anne ek Dorcas, zordi, dan bann congregation, beaucoup retrouve zot tousel ou-soit ena lezot ki encore celibataire plitar dan zot la vie. Kitfois certain pa finn trouve enn bon conjoint pou marié. Ena lezot ki’nn divorcé ou-soit zot conjoint inn mort. Parski sa bann chretien celibataire-la pena enn conjoint ar ki zot kapav confié-zot, souvent zot aprann pou compte plus lor Jéhovah. (Prov. 16:3) Silvia, enn soeur celibataire ki dan Béthel depuis plus ki 38 an, considere sa couma enn benediction. Selman li reconette enn kitsoz: “Parfois mo fatigué ki c’est touletan moi ki pé bizin encourage lezot. Mo demann-moi: ‘Kisannla pou encourage moi?’ ” Mais apré li ajouté: “Parski mo ena confiance ki Jéhovah konn plus ki mo-mem seki mo bizin, sa aide moi pou vinn pli proche ar Li. Ek touletan mo gagne l’encouragement, ek parfois sa vinn par bann moyen ki mo pa attann.” Kan nou vinn pli proche ar Jéhovah, Li touletan reagir avek tendresse ek dan enn fason ki rassure nou.

15. Couma bann chretien celibataire kapav “ouvert zot leker bien grand” pou montré zot l’amour?

¹⁵ Kan enn kikenn celibataire, sa donne li enn bon l’occasion pou ‘ouvert so leker bien grand’ dan so l’amour. (Lire 2 Corinthiens 6:11-13.) Jolene, enn soeur celibataire ki dan service a plein temps depuis 34 an, dire: “Mo finn faire beaucoup zeffort pou ena bann bon relation avek tou sorte qualité dimoune, pa zis avek bann ki dan mo l’age. Enn celibataire gagne vrai-mem l’occasion pou faire plus pou Jéhovah, pou so famille, pou so bann frere ek soeur, ek aussi pou lezot dimoune. Plus mo rente dan l’age, plus mo content mo la vie celibataire.” Bann dimoune agé, bann handicapé, bann parent ki elevé zot zenfant tousel, bann jeune ek lezot dan congregation surement bien apprecié l’aide rempli ar l’amour ki bann celibataire donne zot. Oui, kan nou montré l’amour envers lezot, nou ena enn pli bon l’opinion lor nou-mem. Eski ou kapav “ouvert [ou] leker bien grand” pou montré l’amour envers lezot?

Celibataire pou la vie

16. (a) Kifer Jésus ti reste celibataire tou so la vie? (b) Couma Paul ti servi bien so la vie celibataire?

¹⁶ Jésus pa ti marié; li ti bizin prepare-li pou ministere ki Jéhovah ti confié li ek accompli sa ministere-la. Li ti voyage beaucoup, li ti commence so l’activité boner gramatin ek li ti fini tard a soir. Finalement, li ti donne so la vie en sacrifice. Dan so cas, li ti enn l’avantage pou reste celibataire. L’apotre Paul ti voyage plusieurs millier kilometre ek ti faire face ar bann grand l’epreuve dan so ministere. (2 Cor. 11:23-27) Mem si kitfois li ti’nn deja marié avant, kan Paul ti gagne mission pou vinn enn zapotre, li ti decide pou reste celibataire. (1 Cor. 7:7; 9:5) Jésus ek Paul toulé-deux ti encourage lezot pou imite autant ki possible zot l’exemple, dan l’interet zot service pou Bondié. Pourtant, ni Jésus ni Paul pa ti dire ki bann serviteur Bondié obligé reste celibataire.—1 Tim. 4:1-3.

17. (a) Couma zordi certain pé suive l’exemple Jésus ek Paul? (b) Kifer nou kapav sur ki Jéhovah apprecié bann ki faire sa qualité sacrifice-la?

¹⁷ Zordi, certain finn faire enn choix volontaire pou reste celibataire pou zot kapav consacré-zot plus dan zot ministere. Harold, ki nou ti mentionné avant, finn passe plus ki 56 an dan Béthel. Li dire: “Apré ki mo ti’nn passe dix an dan Béthel, mo ti’nn trouve beaucoup couple quitte Béthel a cause maladie, ou-soit parski zot ti bizin al occupe enn parent agé. Moi mo bann parent toulé-deux ti’nn mort. Mo ti tellement content Béthel ki mo pa ti marié pou mo pa riské perdi sa privilege-la.” Ena plusieurs l’année, Margaret, enn soeur ki pionnier depuis longtemps, ti dire: “Mo ti gagne plusieurs l’occasion pou mo marié, mais mo ti decide pou reste celibataire. Mo ti kapav profite sa pli grand liberté ki mo situation ti donne moi-la pou reste occupé dan mo ministere, ek sa finn donne moi enn grand la joie.” Oui, jamais Jéhovah pou blié n’importe kisannla ki manifesté enn l’esprit sacrifice coumsa pou vrai l’adoration.—Lire Isaïe 56:4, 5.

Profite bien ou situation

18. Couma nou kapav encourage ek soutenir bann chretien celibataire?

¹⁸ Tou bann chretien celibataire ki pé faire tou seki zot kapav pou servi Jéhovah, merité ki nou felicite zot ek encourage zot avek sincerité. Nou content zot pou seki zot été ek pou tou bann bon kitsoz ki zot faire dan congregation. Jamais zot pa pou senti-zot tousel si nou vrai-mem vinn zot ‘frere, zot soeur, zot mama ek zot zenfant’ spirituel.—Lire Marc 10:28-30.

19. Ki ou kapav faire pou servi bien ou la vie celibataire?

¹⁹ Ki ou enn celibataire par choix ou-soit a cause bann circonstance, nou souhaité ki sa bann l’exemple biblik ek moderne-la donne ou l’assurance ki ou kapav heureux ek amenn enn la vie bien rempli. Ena cadeau ki nou attann pou gagné, alors ki ena lezot cadeau ki nou pa attann ditou. Ena cadeau ki nou content desuite, alors ki ena lezot cadeau c’est selman avek le temps ki nou trouve zot valeur. Alors, tou depann lor nou l’attitude. Ki ou kapav faire pou servi bien ou la vie celibataire? Vinn pli proche ar Jéhovah, ena beaucoup pou faire dan so service, ek ouvert ou leker bien grand dan ou l’amour pou lezot. Pareil couma mariage, la vie celibataire kapav faire ou gagne bann benediction si ou ena mem pensée ki Bondié lor la ek ou servi sa don-la avek sagesse.

Eski ou rappel?

• Dan ki sens la vie celibataire kapav enn don?

• Couma enn la vie celibataire kapav faire ou gagne bann benediction dan ou jeunesse?

• Ki bann l’occasion bann celibataire ena pou vinn pli proche ar Jéhovah ek pou ouvert zot leker bien grand dan zot l’amour pou lezot?