Bann bon conseil lor la vie celibataire ek lor mariage
“Mo dire sa . . . pou pousse zot faire seki bon ek pou zot contigne servi le Seigneur, sans ki nanyin distraire zot.”—1 COR. 7:35.
1, 2. Kifer enn chretien bizin rod bann conseil ki trouve dan la Bible, lor la vie celibataire ek lor mariage?
LA JOIE, deception ek tracas—c’est bann sentiment ki souvent nou gagné dan nou relation avek dimoune ki pa mem sexe ki nou. A cause sa, nou bizin rod direction Jéhovah, mais ena lezot raison encore kifer nou bizin rod so direction. Kitfois enn chretien ki satisfait avek so la vie celibataire kapav pensé ki so famille ou-soit so bann camarade pé mette pression lor li pou li marié. Li possible ki enn lot chretien envie marié mais li pankor trouve enn bon partenaire. Ena certain ki bizin conseil pou prepare-zot pou kapav prend zot responsabilité couma mari ek femme. Bann chretien celibataire ek marié toulé-deux, bizin protege-zot pou zot pa tombe dan l’immoralité sexuel.
2 Sa bann situation-la pa affecté zis nou la joie, mais aussi nou relation avek Jéhovah. Dan premier lettre ki Paul ti ecrire bann Corinthiens, dan chapitre 7, li ti donne bann conseil lor la vie celibataire ek lor mariage. Li ti ena l’objectif pou encourage so bann lecteur pou “faire seki bon ek pou zot contigne servi le Seigneur, sans ki nanyin distraire zot.” (1 Cor. 7:35) A mesure ki ou examine sa bann conseil ki Paul ti donné-la, considere ou situation—ki ou celibataire ou-soit ou marié—couma enn moyen pou servi Jéhovah a fond.
Enn grand decision ki nou bizin prend
3, 4. (a) Couma parfois kapav ena bann difficulté kan bann dimoune trop tracassé concernant enn camarade ou-soit enn famille ki celibataire? (b) Couma conseil ki Paul ti donné bizin aide enn dimoune pou ena enn l’attitude equilibré lor mariage?
3 Pareil couma bann Juif dan premier siecle, dan beaucoup culture azordi bann dimoune pensé ki li enn kitsoz important pou marié. Si enn garson ou-soit enn tifi inn arrive enn certain l’age ek li pankor marié, bann camarade ek bann famille kapav tracassé ek pensé ki zot bizin donne sa jeune-la bann conseil. Dan zot conversation, kitfois zot encourage li pou faire plus zeffort pou rod enn partenaire. Li possible aussi ki zot donne bann ti renseignement lor enn kikenn ki zot pensé pou faire enn bon partenaire. Li kapav mem arrivé ki zot manigance enn situation pou ki deux celibataire joinde. Sa fason agir-la kapav faire lezot embarrassé, kass bann l’amitié ek blesse bann sentiment.
4 Paul jamais ti mette pression lor lezot pou zot marié ou-soit pou reste celibataire. (1 Cor. 7:7) Li ti content pou servi Jéhovah mem si li ti celibataire, mais li ti respecté droit ki lezot ena pou marié. Zordi aussi, chaque chretien ena droit pou decidé si li pou marié ou-soit pou reste celibataire. Fodé pa ki lezot mette pression lor sa bann chretien-la pou zot prend tel ou tel decision.
Reussi ou la vie celibataire
5, 6. Kifer Paul ti encourage bann chretien pou reste celibataire?
5 Par bann parole ki Paul ti ecrire bann Corinthiens, nou comprend ki li ti ena enn fason pensé positif lor la vie celibataire. (Lire 1 Corinthiens 7:8.) Mem si Paul pa ti marié, li pa ti considere li-mem pli superieur ki bann ki ti marié, pareil couma bann pretre la chretienté ki celibataire faire. Au contraire, Paul ti mette l’accent lor l’avantage ki beaucoup celibataire ki preche la bonne nouvelle, ena. Ki sa l’avantage-la sa?
6 Enn chretien celibataire souvent pli libre pou accepté bann privilege dan service Jéhovah, ki enn dimoune marié. Paul ti gagne enn privilege special pou servi couma “enn zapotre pou bann nation.” (Rom. 11:13) Lire Actes chapitre 13 ziska chapitre 20, ek suive li ek so bann compagnon missionnaire a mesure ki zot commence preche dan bann nouveau territoire ek etabli bann congregation dan enn l’endroit apré lot. Dan so service, Paul ti endure bann difficulté ki bien tigit dimoune gagné zordi. (2 Cor. 11:23-27, 32, 33) Mais la joie ki li ti gagné pou aide beaucoup dimoune pou vinn bann disciple, montré ki li pa ti endure sa bann difficulté-la pou nanyin. (1 Thess. 1:2-7, 9; 2:19) Eski li ti pou kapav faire tou seki li ti faire si li ti marié ou-soit si li ti ena enn famille? Kitfois non.
7. Montré par enn l’exemple couma bann Témoins celibataire finn profite zot situation pou faire plus dan zot ministere.
7 Beaucoup chretien celibataire profite zot situation pou faire plus dan zot ministere. Sara ek Limbania, deux pionnier celibataire ki reste Bolivie, ti demenagé pou al reste dan enn village kot bann dimoune pa ti’nn gagne visite bann Témoins depuis plusieurs l’année. Dan sa village-la, pa ti ena courant, eski sa ti pou enn probleme pou zot? Zot ti raconté: “Pena ni radio, ni television, alors nanyin pa empeche bann dimoune pou consacré-zot ar zot passe-temps principal, setadir lire.” Certain dimoune dan sa village-la ti montré sa bann pionnier-la bann publication ki ti publié par bann Témoins de Jéhovah, ki zot ti encore pé lire mais ki ti’nn arrete imprimé depuis bien longtemps. Devant preské chaque la porte, sa bann soeur-la ti joinde bann dimoune interessé, alors zot ti gagne difficulté pou visite tou bann famille dan sa territoire-la. Enn madame agé ti dire zot: “Surement la fin bien pré parski enfin bann Témoins de Jéhovah finn reussi vinn preche dan nou l’endroit.” Certain dimoune dan sa village-la pa ti tardé pou assisté bann reunion.
8, 9. (a) Ki Paul ti pé pensé kan li ti dire ki li bon servi Jéhovah en tant ki celibataire? (b) Ki bann l’avantage bann chretien celibataire ena?
8 Bien sur, bann chretien marié aussi gagne bann bon resultat kan zot preche la bonne nouvelle dan bann territoire difficile. Mais, ena certain privilege dan service Jéhovah ki bann pionnier celibataire kapav accepté mais ki pou difficile pou bann chretien ki marié ou-soit ki ena zenfant, accepté. Kan Paul ti ecrire bann congregation, li ti koné ki ti ena encore beaucoup travail pou faire dan predication. Li ti envie ki zot tou gagne mem la joie ki li. Pou sa raison-la, Paul ti dire ki li bon pou servi Jéhovah en tant ki celibataire.
9 Enn soeur pionnier ki celibataire ek ki reste en Amérique ti ecrire: “Certain dimoune pensé ki li impossible ki enn dimoune heureux si li pa marié. Mais mo finn trouvé ki vrai bonheur depann lor l’amitié ki enn dimoune ena avek Jéhovah. Mem si la vie celibataire li enn sacrifice, li pou enn cadeau extraordinaire si ou konn profite li.” Sa soeur-la ti heureux parski pou li “la vie celibataire li pa enn obstacle mais li enn moyen ki faire gagne la joie.” Li ti ecrire aussi: “Mo koné ki Jéhovah pa refuse personne so l’affection, ki li enn celibataire ou-soit enn dimoune marié.” Azordi, li pé servi dan enn pays kot bien bizin bann proclamateur, ek li gagne beaucoup la joie. Si ou enn celibataire, eski ou kapav servi ou liberté pou faire plus pou enseigne lezot la verité? Ou aussi ou kapav trouvé ki la vie celibataire li enn cadeau ki ena enn grand valeur ki Jéhovah inn donne ou.
Bann celibataire ki envie marié
10, 11. Couma eski Jéhovah soutenir bann ki envie marié mais ki pankor trouve enn bon partenaire?
10 Beaucoup serviteur fidele ki servi Jéhovah decide pou rod enn partenaire apré ki zot finn reste celibataire pendant enn certain temps. Zot koné ki zot bizin direction Jéhovah, alors zot demann Li so l’aide pou ki zot kapav trouve enn bon conjoint.—Lire 1 Corinthiens 7:36.
11 Si ou envie marié avek enn dimoune ki, pareil couma ou, envie servi Jéhovah avek tou so nâme, contigne prié Jéhovah lor la. (Phil. 4:6, 7) N’importe ki quantité le temps ou bizin attann, pa desesperé. Jéhovah koné ki ou bizin, ek si ou faire Li confiance, Li pou aide ou pou faire face ar sa situation-la.—Héb. 13:6.
12. Kifer enn chretien bizin guette bien avant li accepté enn demann?
12 Enn chretien celibataire ki envie marié kapav gagne enn demann ar enn kikenn ki pena enn bon spiritualité ou-soit-mem ar enn kikenn ki pa Témoin de Jéhovah. Si sa arrive ou, rappel ki, si ou faire enn mauvais choix, sa souffrance ki ou pou gagné-la li pou pli pire ki kan ou ti senti-ou tousel letan ou ti celibataire. Mais pa blié, enn fois ki ou’nn marié, ou pou bizin reste avek sa dimoune-la toute longue ou la vie, ki la vie-la li en rose ou-soit li margoz. (1 Cor. 7:27) Pa bizin ou pressé pou marié parski ou nepli kapav attann, ou pou kapav regretté plitar.—Lire 1 Corinthiens 7:39.
Prepare-ou pou la vie mariage
13-15. Kan deux dimoune pé frequenté, lor ki difficulté zot bizin kozé?
13 Mem si Paul ti encourage bann chretien pou servi Jéhovah en tant ki celibataire, li pa ti meprise bann ki ti decide pou marié. Au contraire, li ti inspiré par Bondié pou donne bann conseil ki ti aide bann couple pou faire face ar bann situation ki zot ti pou gagné dan zot la vie mariage. Sa ti pou aide zot aussi pou faire zot mariage duré.
14 Certain couple bizin faire bann changement concernant seki zot attann pou l’avenir. Pendant zot frequentation, zot kapav ena l’impression ki pena nanyin ki pareil couma zot l’amour; ki zot l’amour li special ek ki c’est enn garantie ki zot mariage pou heureux. Zot commence zot la vie mariage avek sa bann sentiment-la ek zot pensé ki jamais zot pou malheureux dan zot mariage. Li pa realiste pou pense coumsa, parski li pa possible ki nou touletan heureux. Li vrai ki bann moment romantik kapav faire enn couple gagne beaucoup la joie. Mais sa pa pou assez pou aide zot reglé bann probleme ek bann difficulté ki tou couple gagné dan la vie mariage.—Lire 1 Corinthiens 7:28.a
15 Beaucoup nouveau couple etonné ek zot mem deçu kan zot conjoint pa pense pareil couma zot lor bann question important. Parfois, zot pa d’accord lor fason ki zot bizin depense zot kass, lor zot divertissement, lor l’endroit kot zot pou resté ek ki quantité fois zot pou al rann visite zot famille. Sakenn kapav agacé kan li trouve defaut so camarade. Kan deux dimoune pé frequenté, li possible ki zot pa trouve sa necessaire pou koz lor sa bann question important-la. Mais si zot pa faire sa, zot pou kapav gagne beaucoup pression dan zot mariage plitar. Alors li pou bon ki enn couple koz lor sa bann zaffaire-la avant zot mariage.
16. Kifer enn couple bizin tombe d’accord lor fason pou reglé bann probleme ki kapav ena dan la vie mariage?
16 Pou ki deux dimoune heureux ek reussi zot mariage, zot bizin reste soudé kan zot gagne probleme. Zot bizin d’accord lor fason pou discipline zot bann zenfant, ek lor fason pou prend soin zot parent ki’nn rente dan l’age. Tou couple gagne probleme, mais fodé pa ki zot laisse sa divise zot. Si zot applik bann conseil biblik, zot pou kapav reglé beaucoup probleme, supporte bann probleme ki zot pa kapav reglé ek contigne vive heureux ensam.—1 Cor. 7:10, 11.
17. Ki tracas en rapport avek “bann kitsoz ki concerne le monde,” enn couple bizin attann pou gagné?
17 Paul ti koz lor enn lot situation ki ena dan enn mariage dan 1 Corinthiens 7:32-34. (Lire.) En general, bann dimoune marié “tracassé ar bann kitsoz ki concerne le monde,” couma par exemple mangé, linge, lakaz ek lezot kitsoz. Kifer? Kitfois, kan li ti celibataire, enn frere ti consacré tou so le temps ek so l’energie dan so ministere. Mais aster ki li’nn marié, li bizin prend inpé dan sa le temps-la pou prend soin so femme ek coumsa gagne so faveur. Li pareil aussi pou enn femme envers so mari. Dan So sagesse, Jéhovah comprend sa. Li koné ki le temps ek l’energie ki enn couple ti consacré dan So service en tant ki celibataire, zot bizin consacré enn partie sa le temps-la dan zot mariage pou ki zot mariage reussi.
18. Ki bann changement kitfois enn couple pou bizin faire en rapport avek bann passe-temps ki zot ti ena avant zot mariage?
18 Mais sa conseil Paul-la al pli loin. Si enn couple bizin prend inpé le temps ek l’energie ki zot ti consacré dan service Bondié, pou consacré sa avek zot camarade, eski zot pa bizin faire pareil avek le temps ki zot ti consacré pou detann-zot kan zot ti celibataire? Si enn mari contigne passe mem quantité le temps ki li ti passé pou faire sport avek so bann camarade kan li ti celibataire, ki so femme pou ressenti? Ou-soit ki enn mari pou ressenti si so femme passe mem quantité le temps pou detann-li avek so bann camarade ki kan li ti celibataire? Kitfois, mari-la ou-soit femme-la pou senti-li tousel, li pa pou heureux ek li pou pensé ki so conjoint pa content li. Zot kapav evite sa si zot faire tou zot possible pou fortifié zot mariage.—Éph. 5:31.
Jéhovah attann ki nou pur lor plan moral
19, 20. (a) Kifer mem si enn dimoune li marié sa pa vedir ki li pa kapav commette l’immoralité? (b) Ki danger kapav ena si enn couple passe beaucoup le temps loin ar zot camarade?
19 Bann serviteur Jéhovah bien decidé pou reste pur lor plan moral. Certain decide pou marié pou zot evite probleme dan sa domaine-la. Mais selman, enn mariage pa pou protege enn dimoune dan enn fason automatik ek empeche li commette l’immoralité sexuel. Dan lepok biblik, enn la ville fortifié ti protege bann dimoune zis si zot ti reste dan la ville-la. Si enn dimoune ti sorti en dehors la ville kan ti ena bann bandit ek bann voleur ki ti tout autour, bannla ti pou kapav kokin so bann zaffaire ou-soit touye li. Li pareil aussi pou bann dimoune marié, c’est zis si zot respecté bann limite ki Createur mariage inn fixé pou zot en rapport avek bann relation sexuel, ki sa pou protege zot ek zot pa pou tombe dan piege l’immoralité.
20 Dan 1 Corinthiens 7:2-5, Paul ti montré ki été sa bann limite-la. Li ti expliké ki enn femme ena privilege pou gagne bann relation sexuel zis avek so mari; ek enn mari ena privilege pou gagne bann relation sexuel zis avek so femme. Bondié attann ki sakenn donne so conjoint seki “li doit li,” setadir bann relation sexuel ki bann dimoune marié ena droit gagné. Mais certain mari ek femme passe beaucoup le temps loin ar zot conjoint—zot pa prend vacance ensam ou-soit zot pa avek zot conjoint a cause zot travail, lerla sakenn pa reussi donne so camarade seki “li doit li.” Maziné ki mauvais consequence kapav ena si enn dimoune, parski li “pena assez controle,” tombe dan piege Satan ek commette l’adultere. Jéhovah beni bann chef famille ki donne zot famille seki zot bizin sans mette zot mariage en danger.—Ps. 37:25.
Bann bienfait pou obeir bann conseil biblik
21. (a) Kifer li difficile pou prend bann decision lor la vie celibataire ek la vie mariage? (b) Kifer bann conseil ki trouve dan 1 Corinthiens chapitre 7 zot kapav aide nou?
21 Parmi bann decision ki pli difficile pou prend c’est bann decision ki concerne la vie celibataire ek la vie mariage. Ki ou decide pou reste celibataire ou-soit pou marié, ou pou gagne probleme parski nou tou nou imparfait. Alors, mem bann dimoune ki ena benediction Jéhovah pou parfois deçu a cause bann kitsoz ki arrivé dan zot la vie. Si ou applik bann bon conseil ki trouve dan 1 Corinthiens chapitre 7, ou pou kapav evite beaucoup probleme ki finn discuté dan sa lartik-la. Ki ou marié ou-soit celibataire, ou kapav faire Jéhovah plaisir. (Lire 1 Corinthiens 7:37, 38.) Pli grand l’objectif ki ou kapav ena dan ou la vie, c’est gagne faveur Jéhovah. Ou kapav gagne so faveur asterla ek aussi dan l’avenir kan ou pou gagne la vie dan le monde nouveau ki Bondié inn promette. Lerla, pa pou ena okenn pression ni okenn probleme entre bann zom ek bann femme couma ena zordi.
[Note]
a Guette livre Le secret du bonheur familial, chapitre 2, paragraphe 16-19.
Eski ou kapav reponn?
• Kifer fodé pa enn dimoune mette pression lor so camarade pou li marié?
• Couma ou kapav bien servi ou le temps en tant ki enn celibataire ki servi Jéhovah?
• Couma deux dimoune ki pé frequenté kapav prepare-zot pou bann difficulté ki zot kapav gagné dan mariage?
• Kifer enn mariage pa protege enn couple dan enn fason automatik kont l’immoralité sexuel?
[Zimage page 16]
Bann chretien celibataire ki servi zot le temps pou faire plus dan zot ministere, trouve la joie
[Zimage page 18]
Ki bann changement kitfois certain bizin faire apré zot mariage?