Eski ou bann divertissement faire ou gagne bann bienfait?

“Contigne verifié seki faire le Seigneur plaisir.”​—ÉPH. 5:10.

1, 2. (a) Couma Parole Bondié montré ki Jéhovah envie ki nou profite la vie? (b) Kan nou considere divertissement couma enn “don ki Bondié donné,” ki sa pou pousse-nou faire?

DAN la Bible, nou trouve bann l’expression ki montré ki Jéhovah pa zis envie ki nou vive mais aussi ki nou profite la vie. Par exemple, Psaume 104:14, 15 dire ki Jéhovah faire “la terre produire mangé, ek di-vin ki faire leker dimoune content, pou faire figure brillé avek de l’huile, ek di-pain ki reconforte leker bann dimoune.” En realité, Jéhovah faire bann plante poussé pou zot produire la grain, de l’huile, ek di-vin pou nou contigne vive. Mais di-vin li aussi faire ’leker bann dimoune content.’ Nou pa bizin di-vin pou vive mais c’est enn kitsoz ki faire nou content. (Eccl. 9:7; 10:19) Oui vrai-mem, Jéhovah envie ki nou heureux, ki nou leker rempli avek “la joie.”​—Actes 14:16, 17.

² Alors, nou pena okenn raison pou senti-nou coupable kan nou prend inpé le temps pou “observe bien bann zoiseau dan le ciel” ek ’bann lis dan karo’ ou-soit pou faire bann lezot activité ki ré-donne nou la force ek la joie. (Mat. 6:26, 28; Ps. 8:3, 4) Enn la vie heureux ek en bonne santé c’est “enn don ki Bondié donné.” (Eccl. 3:12, 13) Kan nou considere divertissement couma enn kitsoz ki forme partie dan sa don-la, sa pou pousse-nou pou detann-nou dan enn fason ki faire Bondié plaisir.a

Fixé bann limite pou different divertissement

3. Kifer eski li raisonnable ki nou accepté ki sakenn kapav choisir so divertissement?

³ Bann ki ena enn l’attitude equilibré lor bann divertissement koné ki zot kapav choisir different divertissement. Mais zot reconette aussi ki zot bizin fixé bann limite. Kifer sa? Pou reponn sa question-la, anou compare divertissement avek mangé. Bann dimoune ki vive dan different l’endroit lor la terre content different qualité mangé. En realité, enn dimoune dan enn l’endroit kapav content mange enn mangé, mais enn dimoune ki reste dan enn lot l’endroit kitfois pa pou trouve sa bon. Dan mem fason, bann chretien ki reste dan enn pays kapav content enn divertissement mais bann chretien ki reste dan enn lot pays pa pou content sa divertissement-la. Li kapav arrivé ki bann chretien ki reste dan mem l’endroit content different divertissement. Par exemple, pou certain, lire enn livre c’est enn kitsoz ki detann-zot, mais lezot kapav trouve sa monotone. Enn dimoune kapav content visite bann l’endroit lor bicyclette, mais enn lot kapav trouve sa fatigant. Mais, pareil couma nou accepté ki bann dimoune kapav choisir zot mangé, nou accepté aussi ki zot kapav choisir zot divertissement ek ki sakenn ena so prop gout.​—Rom. 14:2-4

4. Kifer nou bizin fixé bann limite en rapport avek bann divertissement ki nou choisir? Donne enn l’exemple.

⁴ Mais nou reconette ki mem si nou kapav choisir nou bann divertissement, sa pa vedir ki nou kapav faire seki nou envie. Anou ré-prend l’exemple mangé. Mem si nou content mange toute sorte qualité mangé, nou pa pou mange enn mangé gaté par expré. Li pa pou raisonnable ki nou mange enn mangé coumsa ek ki kapav faire nou tombe malade. Li pareil aussi pou nou, mem si nou kapav choisir plusieurs qualité divertissement, nou pa pou faire bann l’activité ki pou mette nou la vie en danger, ki violent ou-soit ki immoral. Si nou choisir sa bann qualité l’activité-la, nou pou al kont bann principe la Bible, ek nou pou mette nou la santé physik ek spirituel en danger. Pou faire sur ki nou raisonnable ek nou pa depasse limite, li bon ki nou decidé a l’avance si certain divertissement ki attire nou, pou faire nou gagne bann bienfait ou-soit non. (Éph. 5:10) Couma nou kapav faire sa?

5. Couma nou kapav koné si nou bann divertissement zot en accord avek bann principe Bondié?

⁵ Pou ki nou bann divertissement faire nou gagne bann bienfait ek faire Jéhovah plaisir, zot bizin en accord avek bann principe bien precis ki ena dan Parole Bondié. (Ps. 86:11) Pou ou koné si enn divertissement li rempli sa condition-la, ou kapav servi enn la liste. Lor sa la liste-la ena trois question: ki qualité, kan, ek ar kisannla. Anou examine enn par enn.

Ki qualité divertissement ou choisir?

6. Ki bann divertissement nou bizin rejeté, ek kifer?

⁶ Avant ki ou choisir enn divertissement, premier question ki ou kapav demann ou-mem c’est: Ki qualité?​—setadir: ’Ki qualité divertissement ki pé attire moi?’ Li bon ki ou rappel ki en general, ena deux qualité divertissement. Premier-la implik bann divertissement ki jamais nou pou faire. Deuxieme-la implik bann kitsoz ki nou kapav faire. Ki nou kapav dire lor premier-la? Nou pé vive dan enn mauvais le monde kot li bien clair ki la plupart divertissement pa en accord avek bann principe biblik ou-soit ki kont bann la loi Bondié. (1 Jean 5:19) Bann vrai chretien rejette tou sa bann divertissement-la. Parmi ena bann divertissement ki sadik ek demoniak, bann divertissement kot ena homosexualité, pornographie, violence ou-soit ki mette l’accent lor bann pratik ki degradant ek immoral. (1 Cor. 6:9, 10; lire Révélation 21:8.) N’importe ki coté nou été, nou montré Jéhovah ki nou “ena degout pou seki mauvais” kan nou refuse choisir sa bann qualité divertissement-la.​—Rom. 12:9; 1 Jean 1:5, 6.

7, 8. Ki kapav aide nou pou koné si enn divertissement li bon? Donne enn l’exemple.

⁷ Deuxieme qualité divertissement implik bann l’activité lor ki nou bizin reflechi parski la Bible pa dire nanyin lor la. Dan sa cas-la, avant nou choisir sa bann divertissement-la, nou pou laisse bann principe la Bible aide nou comprend ki kitsoz Jéhovah trouve bon ou-soit mauvais. (Prov. 4:10, 11) Apré sa, nou bizin prend enn decision ki pou faire nou garde enn bon conscience. (Gal. 6:5; 1 Tim. 1:19) Couma nou kapav faire sa? Reflechi: Avant nou mange enn nouveau mangé, nou pou envie koné ki ena ladan. Avant nou choisir enn divertissement aussi pareil, nou bizin examine bien couma li été.​—Éph. 5:17.

⁸ Par exemple, surement ou content faire sport pareil couma beaucoup dimoune. Enn sport kapav faire nou gagne beaucoup la joie. Mais, ki ou pou faire si ou attiré par certain sport kot ena competition ki faire bann dimoune vinn violent ek ki faire zot prend risk? Certain sport kapav dangereux ek blesse bann dimoune. Ena sport ki encourage bann dimoune pou faire bann fête apré enn victoire, kot zot faire tapage, zot pena okenn controle ou-soit faire zot pensé ki zot pays pli bon ki lezot. Apré ki ou finn examine seki impliké dan sa bann sport-la, surement ou pou trouvé ki sa qualité divertissement-la pa en accord avek fason pensé Jéhovah ek avek message ki nou preché, enn message lor la paix ek l’amour. (Is. 61:1; Gal. 5:19-21) De lot coté, si dan enn certain divertissement ena bann kitsoz ki en accord avek bann principe Jéhovah, alors sa divertissement-la kapav faire ou di-bien ek ré-donne ou la force.​—Gal. 5:22, 23; lire Philippiens 4:8.

Kan eski mo faire sa?

9. Ki nou aprann lor nou-mem kan nou reponn question: ’Kan eski mo pou detann-moi?’

⁹ Deuxieme question ki ou bizin pose-ou-mem c’est: Kan?​—setadir: ’Kan eski mo pou detann-moi? Ki quantité le temps mo pou passé pou faire sa?’ Kan nou demann-nou ki qualité nou bann divertissement été, sa montré ki bann tendance nou ena, setadir ki kitsoz nou accepté ek ki kitsoz nou pa accepté. Mais, kan nou demann-nou kan nou pou detann-nou, sa montré ki nou bann priorité, setadir ki kitsoz ki vrai-mem important pou nou ek ki kitsoz ki pa important. Alors, ki kapav aide nou pou koné ki l’importance divertissement ena dan nou la vie?

10, 11. Couma seki Jésus ti dire dan Matthieu 6:33 aide nou pou koné ki quantité le temps nou bizin passé dan enn divertissement?

¹⁰ Jésus Christ ti dire so bann disciple: “To bizin content Jéhovah to Bondié avek tou to leker ek avek tou to nâme ek avek tou to l’esprit ek avek tou to la force.” (Marc 12:30) Alors, nou l’amour pou Jéhovah passe en premier dan nou la vie. Nou montré sa kan nou suive sa conseil Jésus-la: “Alors, avant tou kitsoz, contigne rod le royaume ek so justice, ek zot pou gagne aussi tou sa bann lezot kitsoz-la.” (Mat. 6:33) Couma sa conseil-la kapav aide nou pou koné ki quantité le temps ek ki l’importance nou bizin donne enn divertissement?

¹¹ Remark sa detail-la: Jésus ti encourage nou pou contigne ’rod le royaume avant tou kitsoz.’ Li pa ti dire nou contigne rod zis ’le royaume.’ Li clair ki Jésus ti koné ki a part Royaume Bondié, nou pou bizin rod beaucoup lezot kitsoz dan nou la vie. Nou bizin enn lakaz, mangé, linge, l’education, travail, divertissement ek lezot kitsoz. Pourtant, parmi tou bann kitsoz ki nou rodé, zis enn sel ki nou bizin mette en premier​—Royaume Bondié. (1 Cor. 7:29-31) Si nou bien comprend sa, nou pou mette bann divertissement ek lezot l’activité dan deuxieme place pou ki nou kapav rod Royaume Bondié en premier. Si nou faire sa, enn tipé divertissement pou faire nou di-bien.

12. Couma nou kapav applik principe ki trouve dan Luc 14:28 ar bann divertissement?

¹² Alors, kan nou choisir enn divertissement, li bon ki nou calculé a l’avance comié le temps nou pou passé ladan. (Luc 14:28) Nou bizin koné ki quantité le temps sa pou coute nou. Apré, nou bizin decidé ki quantité le temps li vaut la peine nou passé ladan. Si enn divertissement pou faire nou neglige bann l’activité important couma par exemple, nou l’etude personnel lor la Bible, nou l’adoration en famille, assisté bann reunion ou-soit participe dan predication, li pa vaut la peine ki nou faire li. (Marc 8:36) Mais, si enn divertissement ré-donne nou la force pou contigne rod Royaume Bondié, kitfois nou pou decidé ki li vaut la peine ki nou passe le temps dan sa divertissement-la.

Ar kisannla mo pou detann-moi?

13. Kifer nou bizin guette bien ar kisannla nou detann-nou?

¹³ Enn troisieme question ki ou kapav demann ou-mem c’est: Ar kisannla?​—setadir: ’Ar kisannla mo pou detann-moi?’ Li important ki ou considere sa question-la kan ou choisir ou divertissement. Kifer? Parski, bann dimoune ki nou frequenté ena enn grand l’influence lor choix nou bann divertissement. Par exemple, en general, nou plus apprecié pou mange enn mangé avek bann bon camarade. Li pareil aussi pou enn divertissement, souvent nou trouve plus la joie kan nou faire sa avek bann bon camarade. Alors, nou comprend ki beaucoup parmi nou, surtout bann jeune, content passe bann moment detente en groupe. Mais, pou nou sur ki enn divertissement pou faire nou gagne bann bienfait, nou pou montré-nou sage si avant-mem nou fini choisir kisannla nou pou frequenté ek kisannla ki nou bizin evite frequenté.​—2 Chron. 19:2; lire Proverbes 13:20; Jacq. 4:4.

14, 15. (a) Couma l’exemple Jésus aide nou pou choisir bann bon camarade? (b) Ki bann question nou bizin demann nou-mem kan nou choisir nou bann camarade?

¹⁴ Sa pou aide nou beaucoup si nou suive l’exemple Jésus kan nou choisir nou bann camarade. Depuis ki Bondié ti crée le monde, Jésus ti ena l’amour pou bann dimoune. (Prov. 8:31) Kan li ti lor la terre, li ti montré ki li ti ena beaucoup l’amour ek respé pou toute sorte qualité dimoune. (Mat. 15:29-37) Pourtant, Jésus ti faire enn difference entre montré-li amical, ek vinn enn bon camarade avek lezot. En general, Jésus ti amical envers tou dimoune, mais li ti enn bon camarade zis avek bann ki ti rempli certain condition. Kan li ti koz avek so 11 zapotre ki ti fidele, Jésus ti dire: “Zot mo bann camarade si zot faire seki mo donne zot l’ordre pou faire.” (Jean 15:14; guette aussi Jean 13:27, 30) C’est zis bann dimoune ki ti suive li ek ki ti servi Jéhovah ki Jésus ti choisir pou vinn so bann bon camarade.

¹⁵ Alors, kan ou choisir si enn dimoune pou vinn ou bon camarade ou-soit non, li pou sage ki ou rappel seki Jésus ti dire. Demann ou-mem sa bann question-la: ’Eski sa dimoune-la montré par so bann parole ek so bann action ki li obeir bann commandement Jéhovah ek Jésus? Eski li ena mem principe ki basé lor la Bible ek mem moralité ki moi? Eski so compagnie pou encourage moi pou mette Royaume Bondié en premier dan mo la vie ek pou reste fidele envers Jéhovah?’ Si ou sur ki reponse sa bann question-la li oui, ou finn trouve enn bon camarade avek ki ou kapav detann-ou.​—Lire Psaume 119:63; 2 Cor. 6:14; 2 Tim. 2:22.

Eski nou bann divertissement passe sa test-la?

16. Ki nou bizin demann-nou-mem en rapport avek bann divertissement ki nou choisir?

¹⁶ Nou finn guette trois kitsoz en rapport avek divertissement​—ki qualité divertissement nou choisir, ki quantité le temps nou passé dan bann divertissement, ek ar kisannla nou detann-nou. Nou pou gagne bann bienfait si dan sa trois domaine-la, nou bann divertissement zot en accord avek bann principe biblik. A cause sa, avant ki nou choisir enn divertissement, nou bizin testé li. Kan nou guetté ki qualité divertissement nou choisir, nou bizin pose-nou-mem sa bann question-la: ’Ki sa impliké? Eski li en accord avek bann principe biblik ou-soit li immoral?’ (Prov. 4:20-27) En rapport avek quantité le temps ki nou passé dan enn divertissement, nou bizin demann-nou-mem: Comié le temps mo passé dan sa divertissement-la? Eski li bon ki mo passe sa quantité le temps-la ou-soit non?’ (1 Tim. 4:8) Kan nou reflechi ar kisannla nou detann-nou, nou bizin decidé: ’Ar kisannla mo pou detann-moi? Eski zot bann bon ou-soit bann mauvais camarade?’​—Eccl. 9:18; 1 Cor. 15:33.

17, 18. (a) Ki test nou kapav faire pou koné si nou bann divertissement zot en accord avek bann principe la Bible? (b) Ki ou bien decidé pou faire kan ou ena pou choisir ou bann divertissement?

¹⁷ Si enn certain divertissement pa en accord avek bann principe biblik dan enn parmi sa trois domaine-la, sa vedir ki li pa’nn passe sa test-la. Mais, si nou faire sur ki nou bann divertissement zot basé lor bann principe la Bible dan toulé-trois domaine, sa pou honore Jéhovah ek nou pou gagne beaucoup bienfait.​—Ps. 119:33-35.

¹⁸ Alors, kan nou bizin prend bann decision en rapport avek nou bann divertissement, anou faire zeffort pou faire seki bon, dan bon moment ek avek bann bon dimoune. Oui, ki sakenn parmi nou faire tou seki li kapav pou suive sa principe biblik-la: “Kan zot pé mangé, kan zot pé boire ou-soit n’importe ki kitsoz ki zot pé faire, faire tou pou la gloire Bondié.”​—1 Cor. 10:31.

[Note]

Eski ou kapav expliké?

Concernant ou bann divertissement, couma ou kapav applik bann principe ki trouve dan . . .

• Philippiens 4:8?

• Matthieu 6:33?

• Proverbes 13:20?

[Zimage page 11]

✔Ki qualité

[Zimage page 12]

✔Kan

[Zimage page 14]

✔Ar kisannla

[Zimage page 12]

Couma nou kapav suive l’exemple Jésus kan nou choisir nou bann camarade ek nou bann divertissement?