Abraham—Enn zom ki ti ena l’humilité

Alors ki pé faire extra chaud dehors, Abraham pé assizé dan l’ombrage enba so la tente. Pendant ki li pé guette l’horizon, li remark trois zom ki pé visite sa l’endroit-la.a Sans okenn hesitation, li galopé pou al joinde sa bann visiteur-la ek li suppliye zot pou vinn repose inpé ek pou accepté so l’invitation. Li offert zot pou mange “enn boute di-pain,” mais apré, li commence prepare enn grand repas kot ena di-pain ki ti’nn fek cuit, di-beurre, di-lait ek enn bon la viande. Kan li offert so bann invité sa repas-la, Abraham pa zis montré ki li ena enn hospitalité extraordinaire, mais aussi, couma nou pou trouvé, ki li ena enn vrai l’humilité.​—Genèse 18:1-8.

KI SA VEDIR L’HUMILITÉ? Enn dimoune ki ena l’humilité li pa fiere ek li pena l’orgueil. Li reconette ki enn lot dimoune kapav pli bon ki li dan certain domaine. (Philippiens 2:3) Li ecoute suggestion lezot, ek li disposé pou faire bann travail ki parette pena valeur, pou aide zot.

COUMA ABRAHAM TI MONTRÉ KI LI ENA L’HUMILITÉ? Abraham ti content pou servi lezot. Couma nou ti mentionné au commencement, kan Abraham ti trouve sa trois visiteur-la, desuite li ti faire tou pou donne zot seki zot ti bizin. Sara, so madame, ti degazé prepare enn repas. Mais remarké kisannla ki ti faire pli grand travail: Abraham ti galopé pou al joinde bann visiteur-la, li ti offert zot kitsoz pou mangé, li ti galopé pou al dan so troupeau pou choisir ki zanimo pou touyé, ek li ti servi so bann visiteur. Au lieu ki li ti laisse so bann serviteur faire tou, sa zom humble-la ti faire seki ti necessaire. Li pa ti considere sa couma enn kitsoz degradant pou servi lezot.

Abraham ti ecoute suggestion bann dimoune ki ti enba so l’autorité. La Bible raconte zis deux-trois conversation ki ti ena entre Abraham ek Sara. Pourtant, deux fois nou lire ki Abraham ti ecoute Sara ek ti faire seki li ti dire. (Genèse 16:2; 21:8-14) Dan enn sa bann l’occasion-la, Sara ti donne Abraham enn suggestion ki “pa ti faire Abraham plaisir ditou.” Mais kan Jéhovah ti koz ar Abraham ek ti dire li ki suggestion Sara ti bon, avek humilité Abraham ti cedé ek ti faire seki Sara ti dire.

KI BANN LESON NOU KAPAV TIRÉ? Si nou vrai-mem humble, nou pou content pou servi lezot. Nou pou trouve la joie pou faire tou seki nou kapav pou rann zot la vie agreable.

Nou kapav aussi montré ki nou humble par fason ki nou reagir kan lezot donne nou bann suggestion. Au lieu ki nou rejette enn l’idée zis parski c’est pa nou ki finn gagne sa l’idée-la, li pou sage ki nou accepté commentaire lezot. (Proverbes 15:22) Si bann dimoune ki ena enn certain l’autorité ena enn l’esprit ouvert coumsa, sa pou aide zot. John, enn kikenn ki ena l’experience ek ki ena bann dimoune ki travail enba so responsabilité, dire: “Mo finn trouvé ki enn bon responsable crée enn l’environnement kot bann dimoune senti-zot libre pou exprime zot-mem.” Li ajouté: “Sa demann l’humilité pou reconette ki enn kikenn ki travail enba ou l’autorité kapav ena enn pli bon fason pou faire enn travail ki ou. Mais encore enn fois, personne pa tousel pou ena bann bon l’idée, pa mem enn kikenn ki responsable.”

Kan nou imite Abraham, nou ecoute suggestion lezot ek nou faire bann travail ki parette pena valeur pou aide zot, nou gagne faveur Jéhovah. Apré tou, “Bondié kont bann ki ena l’orgueil, mais Li donne so faveur ki personne pa merité, bann ki ena l’humilité.”​—1 Pierre 5:5.

[Note]