Abraham—Enn zom ki ti ena l’amour
Abraham pa pé kapav supporte so chagrin. Sara, so madame ki li ti bien content, inn mort. Kan li pé enterre Sara, Abraham commence rappel bann bon moment ki zot inn passé ensam. Abraham senti so leker gros, li commence ploré. (Genèse 23:1, 2) Abraham pa honté pou ploré, au contraire sa bann larme-la permette nou trouve enn parmi bann pli bon qualité ki Abraham ena—so l’amour.
KI SA VEDIR L’AMOUR? L’amour c’est enn l’attachement personnel ki nou ena pou enn dimoune ek ki rempli ar tendresse ou-soit c’est enn l’affection bien profond. C’est enn sentiment ki nou manifesté par nou bann action, mem si nou bizin faire bann sacrifice pou faire sa.
COUMA ABRAHAM TI MONTRÉ KI LI ENA L’AMOUR? Abraham ti montré ki li ti content so famille. Pena doute ki Abraham ti enn dimoune ki ti bien occupé. Pourtant, jamais li pa ti neglige besoin affectif ek spirituel so famille. En realité, mem Jéhovah ti remarké ki, en tant ki chef la famille, Abraham ti prend la tête dan l’adoration. (Genèse 18:19) En plus, Jéhovah ti attire l’attention lor l’amour ki Abraham ti ena. Kan Li ti koz ar Abraham concernant Isaac, Li ti dire: “Garson ki to bien content.”—Genèse 22:2.
Nou trouve aussi l’amour Abraham dan fason ki li ti reagir kan Sara ti mort. Abraham ti ploré. Mem si Abraham ti fort ek ti agir couma enn zom, li pa ti peur pou montré so la peine. Abraham ti manifesté courage ek douceur en mem temps.
Abraham ti montré ki li ti content so Bondié. Toute longue so la vie, li ti manifesté sa l’amour-la. Couma li ti faire sa? Kitfois nou rappel seki la Bible dire dan 1 Jean 5:3: “Ala seki vedir l’amour Bondié: suive so bann commandement.” Kan nou base-nou lor sa definition-la, nou kapav dire ki en rapport avek l’amour pou Bondié, Abraham inn laisse enn l’exemple extraordinaire.
Plusieurs fois, kan Jéhovah ti donne Abraham enn commandement, desuite li ti obeir. (Genèse 12:4; 17:22, 23; 21:12-14; 22:1-3) Sa pa ti faire difference mem si sa commandement-la ti difficile pou obeir ou-soit non, ni si li pa ti koné kifer Jéhovah ti demann li pou soumette ar sa commandement-la. Pou Abraham, sa bann detail-la pa ti ena l’importance. Si so Bondié ti envie li faire enn kitsoz, li ti disposé pou faire sa. Abraham ti considere chaque commandement couma enn l’occasion pou montré so l’amour pou Jéhovah.
KI BANN LESON NOU KAPAV TIRÉ? Nou kapav imite Abraham kan nou manifesté tendresse ek l’affection envers lezot, surtout envers bann membre nou famille. Jamais nou pou envie laisse bann pression ki ena dan la vie prend le temps ki nou supposé passé avek bann dimoune ki nou bien content.
Nou bizin aussi faire zeffort pou developpe enn l’amour sincere pou Jéhovah. Enn l’amour coumsa kapav vinn enn la force bien puissant dan nou la vie. Par exemple, li kapav pousse nou pou faire bann changement dan nou l’attitude, nou parole ek nou conduite pou ki nou faire Bondié plaisir.—1 Pierre 1:14-16.
Li vrai ki li pa toujours facile pou obeir bann commandement Jéhovah. Mais nou kapav sur ki sa Kikenn ki ti aide Abraham-la—ki ti appel li “mo camarade”—pou soutenir nou aussi. (Isaïe 41:8) So Parole, la Bible, promette: “Li pou faire zot vinn solide, Li pou faire zot vinn fort.” (1 Pierre 5:10) C’est vrai-mem enn promesse encourageant ki sa Camarade ki Abraham ti faire confiance-la, faire nou!
[L’encadré page 10]
Eski kan enn zom ploré, sa vedir ki li faible?
Beaucoup pou dire oui. Kitfois, zot pou bien etonné pou aprann ki Abraham, li enn parmi bann zom fort ek fidele ki la Bible dire ti ploré dan bann moment difficile. Lezot, couma Joseph, David, l’apotre Pierre, bann ancien dan congregation Éphèse, ek mem Jésus, ti ploré zot aussi. (Genèse 50:1; 2 Samuel 18:33; Luc 22:61, 62; Jean 11:35; Actes 20:36-38) Li clair ki la Bible pa enseigné ki, kan enn zom ploré, sa vedir ki li faible.