Eski la Bible predire l’avenir?

Sa lartik-la examine bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Eski bann prophetie la Bible zot precis?

Zis enn Bondié Tout-Puissant ki kapav predire l’avenir dan enn fason precis. (Amos 3:7) Par exemple, depuis bien longtemps, Li ti annoncé ki enn kikenn ti pou vini en tant ki Messie ou-soit Christ. Sa Messie-la ti pou enn descendant Abraham, enn zom fidele. Li ti pou enn dirigeant ki pou faire bann dimoune obeissant gagne enn la vie parfait, sans okenn maladie. (Genèse 22:18; Isaïe 53:4, 5) Sa Kikenn ki Bondié ti promette-la ti pou sorti Bethléhem.​—Lire Mika 5:2.

C’est Jésus ki ti sa Messie-la. Plus ki 700 an a l’avance, la Bible ti annoncé ki c’est enn vierge ki ti pou donne naissance le Messie, ek aussi ki bann dimoune ti pou meprise li. Jésus ti pou donne so la vie pou peché beaucoup dimoune, ek li ti pou enterré avek bann dimoune riche. (Isaïe 7:14; 53:3, 9, 12) Plus ki 500 an a l’avance, la Bible ti annoncé aussi ki le Messie ti pou rente dan Jérusalem lor enn bourrik ek ki ti pou trahir li pou 30 piece l’argent. Tou sa bann detail-la ti realisé.​—Lire Zekaria 9:9; 11:12.

2. Eski Bondié ti annonce bann date a l’avance?

Plus ki 500 an a l’avance, la Bible ti annonce l’année exact ki le Messie ti pou vini. Sa periode le temps avant ki li ti pou vini-la ti calculé par bann semaine symbolik, ki ti appel bann “semaine l’année,” kot chaque jour ti represente enn an. Alors, chaque “semaine” ti represente sept an. Ti pou ena 7 semaine plus 62 semaine, en tou 69 semaine l’année. Sa 69 semaine l’année-la ti faire 483 an. Kan eski sa ti commencé? Dapré la Bible, sa periode-la ti commencé kan Nehémia, enn serviteur Bondié, ti arrive Jérusalem ek ti commence ré-construire sa la ville-la. Dapré l’histoire perse, sa date-la ti tombe en 455 avant nou lepok. (Nehémia 2:1-5) Jésus ti baptisé ek ti vinn le Messie 483 an plitar, en l’an 29 nou lepok, exactement couma ti annoncé.​—Lire Daniel 9:25.

3. Eski bann prophetie la Bible pé realisé zordi?

Jésus ti annoncé ki pou ena bann l’evenement extraordinaire dan nou lepok. So prophetie koz lor la bonne nouvelle concernant Royaume Bondié, ki pou amenn enn soulagement partout lor la terre pou bann dimoune ki content Bondié. Sa Royaume-la pou detruire sa mauvais systeme dan ki nou pé vive-la.​—Lire Matthieu 24:14, 21, 22.

Bann prophetie la Bible montré en detail bann kitsoz ki pou ena dan bann dernier jour sa systeme-la. La Bible ti annoncé ki bann dimoune pou endommage la terre, enn kitsoz ki kitfois nou pa ti pou attann dan enn le monde kot ena bann progré. Bann probleme ki ena a cause la guerre, la famine, tremblement de terre, ek bann l’epidemie pou augmenté. (Luc 21:11; Révélation 11:18) Bann dimoune nepli pou vive en accord avek bann principe moral. Dan sa lepok difficile-la, bann disciple Jésus pou preche la bonne nouvelle lor Royaume Bondié dan tou nation.​—Lire Matthieu 24:3, 7, 8; 2 Timothée 3:1-5.

4. Ki pou arrive l’humanité dan l’avenir?

Bondié Tout-Puissant inn reserve bann bon kitsoz pou bann dimoune fidele. Jésus Christ, le Messie, ensam avek bann ki li finn choisir, pou dirige la terre depuis le ciel. Zot forme partie dan Royaume Bondié ki pou dirigé pendant mille an. Bann dimoune mort pou ressuscité ek zot pou gagne possibilité pou montré si zot digne pou gagne la vie eternel. En plus, sa Royaume-la pou gueri tou bann dimoune ki pou vive dan sa lepok-la. Maladie ek la mort nepli pou existé.​—Lire Révélation 5:10; 20:6, 12; 21:4, 5.

Pou gagne plus renseignement, guette page 23-25 ek 197-201 dan livre Ki la Bible enseigné vrai-mem?.