Lafwa Abraam Teste

Abraam ti ansegn so garson Izaak pou kontan Zeova ek pou ena konfians dan tou So bann promes. Me kan Izaak ti ena apepre 25 an, Zeova ti demann Abraam pou fer enn kitsoz ki ti vremem difisil. Ki kitsoz Li ti demann Abraam?

Bondie ti dir Abraam: ‘Silteple, pran to sel garson ki to ena ek al lor enn montagn dan pei Moria. Laba, ofer li an sakrifis.’ Abraam pa ti konpran kifer Zeova ti demann li sa. Me kanmem sa, li ti obeir Zeova.

Landemin gramatin boner, Abraam, Izaak, ek de serviter ti al dan pei Moria. Apre trwa zour, zot ti koumans trouv bann montagn delwin. Abraam ti demann so bann serviter pou atann lamem pandan ki li ek Izaak ti al ofer sakrifis-la. Abraam ti fer Izaak sarye dibwa ki ti pou servi pou fer dife, ek Abraam ti amenn enn kouto ar li. Izaak ti demann so papa: ‘Kot zanimo ki nou pou fer sakrifis-la?’ Abraam ti reponn: ‘Zeova pou donn nou, mo garson.’

Alafin, kan zot ti ariv lor montagn, zot ti ranz enn lotel. Apre sa, Abraam ti atas lame ek lipie Izaak, ek li ti met Izaak lor lotel.

Abraam ti pran so kouto. Dan sa moman-la, enn anz Zeova depi lesiel dir: ‘Abraam! Pa bles sa garson-la! Aster-la, mo kone ki to ena lafwa dan Bondie, parski to ti pre pou sakrifie to garson.’ Apre sa, Abraam ti trouv enn belie. Korn sa belie-la ti tas dan bann pie. Vit-vit, Abraam ti larg Izaak ek li ti sakrifie sa belie-la dan plas Izaak.

Depi sa zour-la, Zeova ti apel Abraam so kamarad. Eski to kone kifer? Parski Abraam ti fer tou seki Zeova ti demann li, mem kan li pa ti konpran kifer Zeova ti demann li sa.

Zeova ti repet promes ki Li ti fer Abraam: ‘Mo pou beni twa, ek mo pou miltipliye to bann zanfan ek to bann desandan.’ Zeova ti osi promet Abraam ki, gras-a enn so bann desandan, Li ti pou beni tou bann dimounn ki fidel.