Li exact kan li koz lor science
“Eski longtemps mo pa ti ecrire toi avek conseil ek connaissance, pou montré toi bann verité ki ena dan bann parole ki vrai, pou ki to al dire bann parole ki vrai?”—PROVERBES 22:20, 21.
COUMA ESKI LA BIBLE LI DIFFERENT? Dan bann ancien livre, souvent ena bann l’idée ki pa kapav faire confiance ek ki dangereux, ek la science dan nou lepok inn montré ki zot bien fausse. Mem zordi, bann ecrivain bizin faire bann changement dan bann livre pou ki zot reste a jour avek bann nouveau decouverte. Dapré seki la Bible dire, c’est le Createur ki finn faire ecrire la Bible ek so Parole “reste pou touletan.”—1 Pierre 1:25.
ENN L’EXEMPLE: Lepok Moïse, la Loi ti donne bann Israélite l’ordre pou enterre zot bann malpropté “en dehors camp.” (Deutéronome 23:12, 13) Si zot ti touche enn zanimo ou-soit enn dimoune mort, bann Israélite ti bizin lave-zot avek de l’eau. (Lévitique 11:27, 28; Nombres 19:14-16) Sa lepok-la, bann dimoune ki ti ena la lepre ti bizin reste en quarantaine, ziska ki enn pretre examine zot la peau ek confirmé ki zot ti pou nepli contamine lezot.—Lévitique 13:1-8.
KI BANN RECHERCHE MEDICAL MODERNE MONTRÉ: Enn bon systeme drain, lave la main, ek reste en quarantaine, c’est toujours bann moyen efficace pou combatte bann maladie. Si pena bann latrine ou-soit enn systeme drain pré kot ou resté, enn centre medical américain donne sa conseil-la: “Faire ou besoin au moins 30 metre [100 pied] ar bann place kot ena de l’eau ek apré, enterre ou la selle.” Dapré l’Organisation mondial pou la santé, kan bann dimoune enterre zot bann malpropté loin kot zot resté, zot diminué bann risk pou gagne diarrhée par 36 pour cent. Inn gagne moins ki 200 an, bann docteur ti decouvert ki zot ti infecté beaucoup dimoune ki zot ti pé soigné, parski zot pa ti lave zot la main apré ki zot ti trappe bann dimoune mort. Sa centre medical américain-la contigne dire ki “fason pli efficace pou evite transmette bann maladie” c’est lave la main. Ki nou kapav dire concernant bann dimoune ki ena la lepre ou-soit lezot maladie ki bizin reste en quarantaine? Pa trop longtemps, Saudi Medical Journal ti dire: “Kan enn l’epidemie inn fek commence developpé, sel fason pou controle sa maladie ki kapav contamine lezot-la, c’est mette bann dimoune malade dan enn place kot zot tousel ou-soit en quarantaine.”
KI OU PENSÉ? Eski ou konn enn lot ancien livre sacré ki en accord avek science moderne pareil couma la Bible? Ou-soit eski c’est zis la Bible ki coumsa?
[L’encadré page 6]
“Sa vrai-mem impressionne nou kan nou lire bann precaution bien detaillé lor l’hygiene ki ti ena pendant lepok Moïse.”—MANUEL DE MÉDECINE COLONIALE (en anglais), PAR DOCTEUR ALDO CASTELLANI EK ALBERT J. CHALMERS