So bann livre en harmonie
“Jamais bann prophetie finn annoncé par volonté bann dimoune, mais c’est l’esprit saint ki’nn pousse bann dimoune pou zot transmette message Bondié.”—2 PIERRE 1:21.
COUMA ESKI LA BIBLE LI DIFFERENT? Mem bann recit dan le passé, ki finn ecrire dan mem lepok, souvent ena contradiction dan seki zot dire. Li bien rare ki bann livre ki finn ecrire par different zom, dan different l’endroit, dan different lepok, zot d’accord lor tou. Pourtant, dapré la Bible, tou so 66 livre ena enn sel Auteur—zot annonce enn message ki en accord ek en harmonie entre zot-mem.—2 Timothée 3:16.
ENN L’EXEMPLE: Moïse, ki ti enn berger dan 16eme siecle avant nou lepok, ti ecrire dan premier livre la Bible, ki enn “descendance” ti pou vini pou sauve l’humanité. Plitar, sa livre-la ti annoncé ki sa descendance-la ti pou enn descendant Abraham, Isaac, ek Jacob. (Genèse 3:15; 22:17, 18; 26:24; 28:14) Apepré 500 an plitar, prophete Nathân ti faire koné ki sa descendance-la ti pou enn descendant le roi David. (2 Samuel 7:12) Mille an apré sa, l’apotre Paul ti expliké ki Jésus ek enn groupe So bann disciple ki li ti choisir, zot-mem ki sa descendance-la. (Romains 1:1-4; Galates 3:16, 29) Finalement, vers la fin premier siecle nou lepok, dernier livre la Bible ti annoncé ki bann membre sa descendance-la ti pou rann temoignage lor Jésus, zot ti pou ressuscité pou al vive dan le ciel, ek ti pou regne avek li pendant 1,000 an. Sa bann membre-la ensam avek Jésus pou detruire Satan le Diable ek pou sauve l’humanité.—Révélation 12:17; 20:6-10.
KI BANN KI FAIRE COMMENTAIRE LOR LA BIBLE, DIRE: Apré ki Louis Gaussen ti faire enn l’enquete bien approfondi lor 66 livre ki ena dan la Bible, li ti ecrire ki li ti bien impressionné par “grand l’unité ki ena dan sa livre-la, [enn livre] ki finn ecrire pendant mille cinq cent an par sa quantité dimoune-la . . . zot tou pourtant ti ena enn sel objectif, coumadir zot ti’nn tombe d’accord avant, zot ti contigne avancé [dan zot travail] vers sa sel ek mem l’objectif-la: l’histoire Garson Bondié ki’nn sauve le monde.”—Théopneustie ou Inspiration Plénière des Saintes Écritures.
KI OU PENSÉ? Eski ou ti pou attann ki ena l’harmonie dan enn livre ki finn ecrire lor enn periode plus ki 1,500 an, par apepré 40 different zom? Ou-soit eski c’est zis la Bible ki coumsa?
[L’encadré page 7]
“Kan mette tou sa bann livre-la ensam, zot forme enn sel livre . . . Dan tou bann livre ki existé dan le monde, pena nanyé ki ressemblé li [la Bible] exactement, ni mem ki preské pareil couma li.”—THE PROBLEM OF THE OLD TESTAMENT, PAR JAMES ORR