Question 1: Eski mo la vie ena enn but?
ROSALIND, ki’nn grandi en Angleterre, ti bien content aprann. Li ti aussi envie aide bann dimoune. Kan li ti quitte lekol, li ti gagne enn bon travail kot li ti bizin aide bann dimoune ki pa ti ena lakaz, bann handicapé ek bann dimoune ki ti gagne difficulté pou aprann lire. Malgré ki li ti ena enn travail ki li ti content ek li ti pé vive bien lor plan materiel, li dire: “Pendant plusieurs l’année, mo ti demann mo-mem: ‘Kifer nou lor la terre?’ ek ‘Eski la vie ena enn but?’”
Kifer li normal ki nou pose sa question-la?
Bann dimoune pa pareil ar bann zanimo ki pa kapav raisonné. Nou, nou ena capacité pou aprann ar seki’nn arrivé dan le passé, pou faire bann projet pou l’avenir, ek pou rod enn but dan nou la vie.
Ki reponse certain dimoune donné?
Beaucoup pensé ki but principal nou la vie, c’est pou vinn riche ou-soit populaire ek lerla nou pou heureux.
Ki sa reponse-la montré?
Nou fixé nou prop priorité dan la vie. Volonté Bondié moins important ki nou prop desir.
Ki la Bible enseigné?
Le roi Salomon ti ena enn grand richesse ek li ti rod enn quantité plaisir, mais li ti trouvé ki sa bann kitsoz-la pa ti donne li enn vrai but dan la vie. Li ti decouvert seki ti donne li enn vrai but dan so la vie. Guette seki li ti ecrire: “Conclusion, apré ki’nn fini tann tou kitsoz, c’est: Ena la crainte pou vrai Bondié ek garde so bann commandement. Parski c’est sa tou l’obligation ki enn dimoune ena.” (Ecclésiaste 12:13) Ki sa impliké pou garde bann commandement Bondié?
Enn kitsoz ki forme partie dan projet Bondié c’est ki nou profite nou la vie. Salomon ti ecrire: “Pena nanyé ki pli bon pou enn zom ki li mangé, oui, ki li boire ek ki li faire so nâme trouve bann bon kitsoz a cause sa travail dur ki li’nn faire-la. Sa aussi mo-mem mo finn trouvé, ki sa sorti dan la main vrai Bondié.”—Ecclésiaste 2:24.
Bondié envie aussi ki nou content ek nou prend soin nou famille. Remark bann conseil simple ek pratik ki Li donne chaque membre la famille.
“Bann mari bizin content zot femme pareil couma zot prop lekor.”—Éphésiens 5:28.
“Enn femme . . . bizin ena enn profond respé pou so mari.”—Éphésiens 5:33.
“Zenfant, obeir zot parent.”—Éphésiens 6:1.
Si nou applik sa bann principe la Bible-la, nou pou trouve le bonheur ek nou pou satisfait. Selman, kitsoz pli important ki nou kapav faire c’est aprann tou seki nou kapav lor nou Createur ek vinn proche ar Li couma nou Camarade. En realité, la Bible invite nou pou “vinn proche ar Bondié.” Lerla, la Bible faire sa promesse extraordinaire-la: “Li pou vinn proche ar zot.” (Jacques 4:8) Si ou accepté sa l’invitation-la, ou la vie pou ena vrai-mem enn but.
Zordi, Rosalind, ki nou ti mentionné au commencement, pensé ki li finn decouvert enn but dan so la vie. Lor page 10 dan La Tour de Garde 1er novembre 2012, en français, ou kapav lire seki li dire concernant seki finn pousse li pou change so l’attitude.