Zot “Inn Aprann pou Konn Bondié”—Ki Zot Pou Faire Asterla?
“Zot inn aprann pou konn Bondié.”—GAL. 4:9.
1. Kifer enn pilote verifié enn la liste avant li decollé?
BANN pilote ki conduire enn parmi bann avion ki pli sophistiké ki ena, bizin verifié enn la liste kot ena plus ki 30 kitsoz, avant zot avion decollé. Si zot pa verifié bien sa la liste-la chaque fois, zot augmente bann risk pou faire enn accident bien grave. Eski ou koné ki qualité pilote ki bizin surtout verifié sa la liste-la touletan? C’est enn pilote ki ena bien l’experience! Kifer? Parski kapav arrivé ki li ena enn trop grand confiance en li-mem ek li pa verifié sa la liste-la dan tou detail.
2. Ki la liste enn Chretien bizin verifié?
2 Pareil couma enn pilote ki interessé ar securité so bann passager, ou aussi ou ena enn la liste bann kitsoz ki ou kapav verifié pou faire sur ki ou la foi pou reste solide mem dan bann moment difficile. Li possible ki ou fek prend bapteme ou-soit ki ou pé servi Bondié depuis plusieurs l’année. Mais, n’importe comié le temps ou pé servi Bondié, li bien important ki regulierement ou verifié profondeur ou la foi ek ou l’attachement envers Jéhovah. Si ou pa verifié sa avek serieux ek regulierement, ou kapav tombé lor plan spirituel. La Bible donne nou sa l’avertissement-la: “Si enn kikenn croire li deboute, li bizin faire attention ki li pa tombé.”—1 Cor. 10:12.
3. Ki bann Chretien dan Galatie ti bizin faire?
3 Bann Chretien ki ti vive dan Galatie, ti bizin verifié profondeur zot la foi ek ena reconnaissance pou liberté ki zot ti ena lor plan spirituel. Par so sacrifice, Jésus ti permette bann dimoune ki ti ena la foi en li pou konn Bondié dan enn fason extraordinaire—zot ti pou ena possibilité pou vinn bann garson Bondié! (Gal. 4:9) Pou zot garde sa bann relation special-la, bann Chretien dan Galatie ti bizin rejette l’enseignement certain dan congregation ki ti insisté pou zot suive la Loi Mosaïk. Mais pourtant, dan bann congregation, bann Chretien non-Juif ki pa ti circonci jamais pa’nn suive la Loi. Bann Juif ek bann non-Juif toulé-deux ti bizin faire bann progré lor plan spirituel. Pou progressé, zot ti bizin reconette ki zot pa ti pou kapav vinn juste a travers la Loi Mosaïk.
BANN L’ETAPE KI NOU FINN FAIRE POU KONN BONDIÉ
4, 5. Ki conseil Paul ti donne bann Chretien dan Galatie, ek dan ki fason sa conseil-la important pou nou?
4 Ti ena enn raison kifer Bondié ti faire l’apotre Paul conseil bann Chretien dan Galatie pou zot pa retourne ar bann kitsoz ki derriere. Sa conseil-la pou empeche bann vrai Chretien dan n’importe ki lepok pou pa tourne zot lé-dos ar bann verité ki ena dan la Bible ek retourne ar bann kitsoz ki derriere. Jéhovah ti inspire l’apotre Paul pou encourage tou bann vrai adorateur pou reste ferme, pa zis bann Chretien dan bann congregation dan Galatie.
5 Li bon ki nou tou nou rappel couma nou finn liberé ar l’esclavage lor plan spirituel pou vinn enn Témoin de Jéhovah. Pou nou faire sa, examine sa deux question-la: Eski ou rappel ki bann l’etape ou ti faire pou rempli bann condition pou prend bapteme? Eski ou rappel couma ou finn konn Bondié ek seki ou ti ressenti kan Li finn konn ou?
6. Ki la liste nou pou examiné?
6 Nou tou nou finn suive neuf l’etape pou vinn dan la verité. Sa bann l’etape-la, pareil couma enn la liste spirituel ki nou bizin verifié, zot trouve dan l’encadré “Bann l’Etape ki Amenn Nou pou Prend Bapteme ek Contigne Progressé.” Si nou rappel regulierement sa neuf l’etape-la, sa pou fortifié nou pou pa retourne ar bann kitsoz dan le monde. Enn pilote ki ena l’experience ek ki prudent contigne voyage en securité parski li verifié d’abord enn la liste. Ou aussi pareil, ou pou kapav reste fidele dan service Bondié si ou verifié ou la liste spirituel.
BANN KI BONDIÉ KONÉ PÉ CONTIGNE PROGRESSÉ LOR PLAN SPIRITUEL
7. Ki modele nou bizin suive, ek kifer?
7 La liste enn pilote faire li rappel ki ena plusieurs kitsoz ki li bizin bien verifié avant chaque vol. Nou aussi nou kapav regulierement verifié, ou-soit examine-nou-mem ek bann progré ki nou finn faire depuis ki nou finn prend bapteme. Paul ti ecrire Timothée: “Contigne reste attaché ar modele bann bon parole ki to finn aprann ar moi avek la foi ek l’amour ki concerne Christ Jésus.” (2 Tim. 1:13) Sa “modele bann bon parole[-la]” trouve dan Parole Bondié. (1 Tim. 6:3) Bann forme ki enn artiste tracé avant li commence dessiné donne nou enn l’idée general lor so dessin. Li pareil aussi pou ‘modele bann parole la verité,’ sa aide nou pou comprend dan enn fason general seki Jéhovah demann nou. Alors, anou examine bann l’etape ki finn amenn nou pou prend bapteme ek verifié si nou pé suive bien modele bann parole la verité.
8, 9. (a) Kifer nou bizin contigne augmente nou connaissance ek nou la foi? (b) Montré par enn l’exemple l’importance pou progressé lor plan spirituel ek kifer c’est enn kitsoz ki contigné.
8 Premier kitsoz ki trouve lor nou la liste c’est gagne la connaissance. Lerla, nou kapav ena la foi. Mais nou bizin contigne progressé dan sa deux domaine-la. (2 Thess. 1:3) Pou nou progressé, nou bizin contigne faire bann changement. “Progressé” vedir augmenté, vinn pli grand. Alors, apré nou bapteme, nou bizin contigne grandi lor plan spirituel pou ki nou pa reste en place.
Enn pié contigne poussé. Bann Chretien aussi bizin contigne progressé
9 Nou kapav compare nou progré spirituel ar fason ki enn pié poussé. Li possible ki enn pié vinn extra grand, surtout si so bann racine al en profondeur dan la terre ou-soit talé partout. Par exemple, dan Liban, ena bann pié cedre ki grand ek ki kapav mem arrive hauteur enn batiment 12 l’etage. Li ena bann racine bien solide ki rente en profondeur dan la terre, ek largeur so tronc faire apepré 12 metre. (Chant de S. 5:15) Au commencement, pié-la pousse bien vite. Plitar, li contigne poussé mem si nou pa trouve sa. L’année apré l’année, so tronc vinn pli gros ek so bann racine al plus en profondeur dan la terre, ek pié-la vinn pli solide. Progré spirituel enn Chretien aussi pareil. Kan nou commence etudié la Bible, kitfois nou grandi vite lor plan spirituel ek apré nou prend bapteme. Certain dan congregation bien content kan zot remark nou progré. Li possible ki nou mem rempli bann condition pou faire pionnier ou-soit nou gagne lezot privilege. Dan bann l’année ki suive, kitfois lezot pa remark nou progré. Mais kan-mem, nou bizin contigne augmente nou connaissance ek nou la foi pou nou “vinn bann adulte, ek [pou] nou konn enn developpement complet pareil couma Christ.” (Éph. 4:13) Alors, coumadir a partir enn ti bourgeon, nou finn vinn enn Chretien mur, pareil couma enn pié ki bien solide.
10. Kifer li important ki mem bann Chretien mur contigne progressé?
10 Mais fodé pa ki nou bann progré arrete la. Nou connaissance lor Parole Bondié ek nou la foi zot pareil couma bann racine ki faire nou reste solide ek stable. Sa bann racine-la bizin contigne vinn pli solide. (Prov. 12:3) Dan congregation, ena beaucoup frere ek soeur ki contigne faire sa bann progré-la. Par exemple, enn frere ki ancien depuis plus ki 30 an, ti remarké ki li encore pé contigne progressé lor plan spirituel. Li dire: “Mo reconnaissance pou la Bible finn bien augmenté. Touletan mo pé trouve bann nouveau l’occasion pou mette en pratik bann principe ek bann la loi ki sorti dan la Bible. Mo l’amour pou predication aussi pé contigne grandi.”
FAIRE OU L’AMITIÉ AVEK BONDIÉ VINN SOLIDE
11. Couma nou kapav konn Jéhovah pli bien avek le temps?
11 Pou nou kapav contigne progressé, nou bizin aussi vinn pli proche ar Jéhovah ek considere Li couma nou Camarade ek nou Papa. Li envie ki nou senti-nou accepté. Li envie nou koné ki Li content nou ek ki nou en securité, pareil couma enn zenfant senti ki so parent content li ek ki li en securité kan li dan lé-bras so papa ou-soit so mama. Ek c’est sentiment ki nou ena kan nou avek enn vrai camarade ki fidele. Bien sur, sa l’amitié-la pa developpe enn coute coumsa. Sa prend le temps pou aprann konn Jéhovah ek pou content Li. Alors, pou nou aprann konn Jéhovah pli bien, nou bizin bien decidé pou reserve le temps pou lire so Parole toulé-jour. Nou bizin aussi lire chaque numero La Tour de Garde ek Réveillez-vous ! ek bann lezot publication ki basé lor la Bible.
12. Ki nou bizin faire pou Jéhovah konn nou?
12 Bann camarade Bondié progressé lor plan spirituel grace a bann la priere sincere ek bann bon frequentation. (Lire Malaki 3:16.) “Zoreille [Jéhovah] ecoute zot bann supplication.” (1 Pierre 3:12) Pareil couma enn parent ki content so zenfant, Jéhovah ecoute nou la priere kan nou demann Li so l’aide. Alors, nou bizin “perseveré dan la priere.” (Rom. 12:12) Nou pa pou kapav reste camarade ar Jéhovah si nou pa gagne so l’aide. Bann pression ki ena dan le monde, zot trop fort pou nou kapav faire face ar zot par nou-mem. Si nou arrete perseveré dan la priere, nou pou prive-nou-mem ar la force ki Jéhovah disposé pou donne nou. Eski ou satisfait ar qualité ou bann la priere, ou-soit eski ou trouvé ki ou bizin progressé dan sa domaine-la?—Jér. 16:19.
13. Kifer li bien important ki nou assisté reunion pou nou progressé lor plan spirituel?
13 Jéhovah content tou bann ki “rod so protection”; alors, mem apré ki nou’nn aprann pou konn Bondié, nou envie contigne assisté regulierement bann reunion ek frequente bann ki konn Li. (Nah. 1:7) Dan sa le monde ki rempli ar decouragement-la, li bon ki nou passe le temps avek nou bann frere ek soeur ki encourage nou. Ki bann bienfait nou gagné? Dan congregation, ou pou trouve bann Chretien ki pou encourage ou “pou montré l’amour, ek [pou] faire bann bon action.” (Héb. 10:24, 25) Li possible pou montré sa l’amour ki Paul ti mentionné-la, mais a condition ki ena enn congregation. La, nou trouve enn grand famille bann frere ek soeur spirituel, bann adorateur ki ena mem pensée ki nou. Nou manifesté sa l’amour-la kan nou frequente bann lezot Chretien. Alors, kan ou guette ou la liste, verifié ki ou pé assisté ek ou pé participe dan bann reunion regulierement.
14. Kifer enn Chretien bizin contigne repenti ek retourné?
14 Pou nou vinn enn Chretien nou ti bizin repenti ek retourné, setadir arrete faire peché. Selman, nou bizin contigne repenti ar nou bann peché ek faire bann changement. En tant ki bann dimoune imparfait, bann peché ki nou ena en nou, zot pareil couma enn serpent ki pré pou morde nou couma li gagne l’occasion. (Rom. 3:9, 10; 6:12-14) Alors, anou reste lor nou garde, ouvert nou lizié bien grand ek pa ignore nou bann faiblesse. Heureusement, Jéhovah ena patience avek nou a mesure ki nou pé faire zeffort pou lutte kont nou bann faiblesse ek faire bann changement ki bizin. (Phil. 2:12; 2 Pierre 3:9) Seki kapav aide nou beaucoup c’est kan nou controle fason ki nou servi nou le temps ek nou la force, ek kan nou rejette bann l’objectif egoïste. Enn soeur ki ti elevé dan la verité, ti ena enn fason pensé different lor Jéhovah ki la plupart Chretien. Li ti pensé ki li ti bizin ena enn grand la peur pou Jéhovah, ek ki jamais li ti pou kapav faire Li plaisir. Li pa ti senti-li proche avek Jéhovah ek li ti faire bann erreur. Li dire: “Sa pa ti arrivé parski mo pa ti content Jéhovah, mais parski mo pa ti vrai-mem konn Li. Mais, apré bann la priere bien profond, mo ti commence faire bann changement.” Li ti ajouté: “Mo ti trouvé couma Jéhovah ti guide moi [pareil couma enn papa guide] so zenfant, Li ti aide moi pou reglé mo bann probleme enn par enn. Avek beaucoup tendresse, Li ti montré moi seki mo ti bizin faire.”
15. Ki Jésus ek so Papa remarké?
15 “Contigne dire le peuple” message concernant la bonne nouvelle. C’est seki enn ange ti dire Pierre ek lezot zapotre apré ki li ti faire enn mirak pou libere zot dan prison. (Actes 5:19-21) Oui, enn lot kitsoz ki nou bizin verifié lor nou la liste, c’est guetté si chaque semaine nou sorti dan predication. Jésus ek so Papa remarké ki quantité la foi nou ena ek si nou content nou ministere. (Rév. 2:19) Enn ancien ki nou finn cité avant, dire: “Nou ministere bizin ena enn grand l’importance dan nou la vie.”
16. Kifer li bon ki nou reflechi lor voeu ki nou finn faire ar Jéhovah?
16 Medite lor voeu ki ou finn faire. Kitsoz ki ena pli grand valeur dan nou la vie c’est nou relation personnel avek Jéhovah. Li konn bann dimoune ki pou Li. (Lire Isaïe 44:5.) Dan la priere, examine qualité ek profondeur bann relation ki ou ena avek Jéhovah. En rapport avek sa, rappel date important ki ou ti prend bapteme. Sa aussi pou aide ou pou pa blié ki ou bapteme c’est pli grand decision ki ou finn prend dan ou la vie.
NOU BIZIN ENA L’ENDURANCE POU RESTE PROCHE AR JÉHOVAH
17. Kifer nou bizin ena l’endurance pou nou kapav reste proche ar Jéhovah?
17 Kan Paul ti ecrire bann Chretien dan Galatie, li ti mette l’accent lor l’importance pou enduré. (Gal. 6:9) Zordi aussi, enn Chretien bien bizin ena l’endurance. Ou pou gagne bann l’epreuve, mais Jéhovah pou aide ou. Contigne prié pou ou gagne l’esprit saint. Ou pou senti-ou soulagé a mesure ki Jéhovah pou remplace ou chagrin par la joie, ek ou tracas par la paix. (Mat. 7:7-11) Reflechi lor la: Si Jéhovah prend compte bann zoiseau, eski ou pa pensé ki Li pou prend ou compte, ou ki content Li ek ki finn voué ou la vie pou servi Li? (Mat. 10:29-31) N’importe ki pression ki ou kapav gagné, jamais pa retourne en arriere, jamais pa abandonné. Nou gagne bann grand benediction parski Jéhovah konn nou!
18. Ki nou pou faire asterla ki nou finn “aprann pou konn Bondié”?
18 Alors, si ou fek aprann pou konn Jéhovah ek ki ou fek prend bapteme, ki ou pou faire asterla? Contigne aprann pou konn Jéhovah pli bien, ek progressé pou ou vinn enn Chretien mur. Si sa faire plusieurs l’année ki ou finn prend bapteme, ki ou pou faire asterla? Ou aussi ou bizin contigne approfondi ek augmente ou connaissance lor Jéhovah. Fodé jamais nou pensé ki nou’nn konn Bondié assez ek ki nou pa bizin ameliore nou relation avek Li. Au contraire, nou bizin ré-guette nou la liste spirituel de temps en temps pou faire sur ki nou pé contigne progressé dan nou relation avek Jéhovah—nou Papa, nou Camarade ek nou Bondié.—Lire 2 Corinthiens 13:5, 6.