“Travail Couma Bann Esclave pou Jéhovah”

1. Ki difference ena entre seki beaucoup dimoune pensé lor l’esclavage ek l’esclavage ki mentionné dan Romains 12:11?

ENA enn grand difference entre vinn esclave Bondié ek seki bann dimoune pensé lor l’esclavage. Beaucoup pensé ki enn esclave, c’est enn kikenn ki passe misere, ki so maitre faire dominere ar li ek traite li dan enn fason cruel. Mais kan Parole Bondié koz lor l’esclavage, sa implik enn kikenn ki disposé pou travail volontairement pou enn Maitre ki ena lamour. En realité, kan l’apotre Paul ti encourage bann Chretien premier siecle pou “travail couma bann esclave pou Jéhovah,” li ti encourage zot pou servi Bondié parski zot content Li. (Rom. 12:11) Ki qualité esclavage sa? Couma nou kapav evité vinn esclave Satan ek so le monde? Ek ki bann recompense nou pou gagné si nou servi Jéhovah avek fidelité en tant ki so esclave?

“MO VRAI-MEM CONTENT MO MAITRE”

2. (a) Ki ti pousse enn esclave Israélite pou abandonne so liberté? (b) Ki sa montré kan enn esclave disposé ki so maitre perce so zoreille?

² Dapré la Loi ki Bondié ti donne nation Israël, nou comprend seki sa ti impliké pou vinn esclave Jéhovah. Normalement, enn esclave Hébreu ti gagne so liberté apré ki li ti travail sept an pou so maitre. (Ex. 21:2) Selman, si enn esclave ti vrai-mem content so maitre ek ti envie contigne servi li, Jéhovah ti prend enn bon disposition pou li. Maitre-la ti bizin amenn so esclave pré kot enn laport ou-soit enn montan laport ek perce so zoreille avek enn poinçon. (Ex. 21:5, 6) Kifer li ti faire sa ar so zoreille? Dan langue Hébreu, mot ki servi pou l’obeissance vedir tendé ek ecouté. Alors, kan maitre-la ti perce zoreille so esclave, sa ti montré ki esclave-la ti envie contigne servi so maitre ek obeir li. Sa aide nou pou comprend seki sa impliké kan nou voué nou lavi ar Jéhovah​—nou obeir Li volontairement parski nou content Li.

3. Kifer nou voué nou lavi ar Bondié?

³ Avant nou prend bapteme, nou ti prend decision pou servi Jéhovah, pou vinn so esclave. Nou ti voué nou lavi ar Li parski nou ti envie obeir Li ek faire so volonté. Personne pa ti force nou pou faire sa. Pou bann jeune aussi li pareil. Zot prend bapteme apré ki zot inn voué zot lavi personnellement ar Jéhovah, pa zis pou faire plaisir zot parent. Nou tou nou finn prend sa decision-la parski nou content Jéhovah, nou Maitre ki dan le ciel. L’apotre Jean ti ecrire: “Ala seki vedir lamour Bondié: suive so bann commandement.”​—1 Jean 5:3.

NOU LIBRE, MAIS KAN-MEM NOU BANN ESCLAVE

4. Ki nou bizin faire pou vinn “bann esclave pou la justice”?

⁴ Nou vrai-mem bien reconnaissant envers Jéhovah ki Li’nn permette nou vinn so bann esclave! Grace a nou la foi dan sacrifice Jésus, nou nepli esclave peché. Mem si nou toujours imparfait, nou soumette-nou volontairement ar Jéhovah ek Jésus. Paul ti explik sa bien dan enn lettre ki li ti ecrire. Li ti dire: “Considere-zot couma bann dimoune mor par rapport ar peché, mais vivant par rapport ar Bondié a travers Christ Jésus.” Apré, li ti donne sa l’avertissement-la: “Eski zot pa koné ki si zot contigne presente-zot-mem couma bann esclave ar enn kikenn pou obeir li, zot vinn so esclave parski zot obeir li, soit zot bann esclave peché pou lamor, soit zot bann esclave l’obeissance pou la justice? Grand merci Bondié: zot ti esclave peché, mais zot finn obeir avek zot leker sa qualité l’enseignement ki zot ti gagné-la. Oui, parski Bondié finn libere zot ar peché, zot inn vinn bann esclave pou la justice.” (Rom. 6:11, 16-18) Nou remarké ki l’apotre Paul dire ki nou bizin ‘obeir avek nou leker.’ Alors, kan nou voué nou lavi ar Jéhovah, nou vinn “bann esclave pou la justice.”

5. Kont ki kitsoz nou tou nou bizin lutté, ek kifer?

⁵ Selman, ena deux obstacle ki nou bizin surmonté pou vive en accord avek voeu ki nou finn faire. Enn ladan, c’est nou prop l’imperfection. Paul aussi ti bizin faire face ar sa obstacle-la. Li ti dire: “Dan mo leker, mo vrai-mem content la loi Bondié, mais, mo trouve enn lot la loi dan mo bann membre ki pé faire la guerre kont la loi mo l’esprit, ek ki pé faire moi vinn esclave la loi peché ki dan mo bann membre.” (Rom. 7:22, 23) Nou aussi nou bizin lutté kont nou l’imperfection. Alors, nou bizin touletan pé lutté kont nou bann tendance pou faire peché. L’apotre Pierre ti donne nou sa conseil-la: “Vinn couma bann zom libre, selman servi zot liberté, pa couma enn voile pou couvert le mal, mais couma bann esclave Bondié.”​—1 Pierre 2:16.

6, 7. Couma Satan faire le monde parette attirant?

⁶ Nou ena enn deuxieme obstacle ki nou bizin surmonté. Nou bizin lutte kont le monde ki influencé par bann demon. Satan, chef sa le monde-la, pé servi tou bann zarme ki li kapav pou faire nou desobeir Jéhovah ek Jésus. Li envie nou vinn so bann esclave kan li tente nou pou forme partie dan sa le monde ki li dirigé-la. (Lire Éphésiens 6:11, 12.) Li faire le monde parette bien attirant ek bien joli. L’apotre Jean ti donne sa l’avertissement-la: “Si enn kikenn content le monde, lamour nou Papa pa dan li; parski tou seki ena dan le monde​—desir la chair, desir lizié, enn kikenn ki faire l’etalage ar seki so moyen permette li ena​—tousala pa sorti kot nou Papa, mais sorti dan le monde.”​—1 Jean 2:15, 16.

⁷ Partout dan le monde, pli allé bann dimoune pé galoupe derriere bann kitsoz materiel. Satan faire bann dimoune croire ki si zot ena enn quantité kass, zot pou heureux. Partout nou trouve bann grand centre commercial. Bann reclame encourage bann dimoune pou ena pli beaucoup kitsoz ek pou amizé autant ki zot kapav. Par exemple, bann agence voyage offert bann voyage dan bann place bien interessant, souvent ensam avek bann dimoune ki ena fason pensé le monde. Oui, le monde encourage nou pou change fason ki nou vive, ek pou vive dapré so fason.

8, 9. Ki danger existé zordi, ek kifer li enn danger?

⁸ Dan premier siecle, Pierre ti mette en garde bann Chretien kont certain ki ti commence pense couma le monde. Li ti dire: “Zot prend plaisir pou amenn enn mauvais lavi pendant li-jour. Zot couma bann tache ek bann defaut, [bann zom] ki prend plaisir pou enseigne bann kitsoz pou embete lezot ek ki en mem temps participe dan bann fête ensam avek zot. Parski zot prononce bann parole ki montré zot l’orgueil mais ki pena okenn valeur; ek zot servi bann desir la chair ek bann pratik immoral pou attire bann ki fek sap dan piege bann dimoune ki dan l’erreur. Alors ki zot promette bannla liberté, zot-mem zot bann esclave corruption. Parski enn kikenn ki soumette ar enn lot, vinn esclave sa dimoune-la.”​—2 Pierre 2:13, 18, 19.

⁹ Si enn dimoune faire tou pou satisfaire “desir [so] lizié,” li pa pou enn dimoune libre. Au contraire, li pou vinn esclave Satan le Diable, maitre invisible sa le monde-la. (1 Jean 5:19) Li vrai-mem enn grand danger si nou vinn esclave bann kitsoz materiel. Si sa arrivé, li pou bien difisil pou sap dan sa qualité esclavage-la.

ENN CARRIERE KI DONNE SATISFACTION

10, 11. Kisannla Satan surtout visé zordi, ek couma bann grand letid kapav vinn enn probleme pou bann jeune Chretien?

¹⁰ Pareil couma li ti faire dan jardin Éden, zordi aussi Satan vise bann dimoune ki pena l’experience. Li vise surtout bann jeune. Satan pa content ditou kan enn jeune, ou-soit n’importe ki, decide volontairement pou vinn esclave Jéhovah. Lennmi Bondié envie faire tou bann ki finn voué zot lavi ar Jéhovah arrete servi Bondié avek fidelité.

¹¹ Anou retourne ar l’exemple sa esclave ki’nn accepté ki so maitre perce so zoreille-la. Kitfois sa esclave-la finn souffert pou enn ti moment; mais apré, tou dimoune inn trouve enn mark ki montré ki li finn decidé pou reste ar so maitre. Li pareil aussi pou enn jeune. Li kapav difisil pou li ena enn conduite ki diferan avek so bann camarade, kitfois-mem sa kapav faire li souffert. Par exemple, Satan faire bann dimoune croire ki si zot faire enn carriere dan le monde, zot pou gagne satisfaction. Mais bann Chretien bizin reflechi lor l’importance pou satisfaire zot bann besoin spirituel. Jésus ti dire: “Heureux bann ki reconette ki zot pauvre lor plan spirituel.” (Mat. 5:3) Bann Chretien finn voué zot lavi pou faire volonté Bondié, pa volonté Satan. Zot prend plaisir pou lire la loi Jéhovah, ek zot medite lor la, la-nuit li-jour. (Lire Psaume 1:1-3.) Selman zordi, si enn serviteur Jéhovah decide pou faire bann grand letid, li pa pou gagne assez le temps pou medité ek pou satisfaire so bann besoin spirituel. Kifer? Parski la plupart bann cour ki li pou bizin suive prend beaucoup le temps.

12. Ki choix beaucoup jeune ena zordi?

¹² Enn maitre ki pa ti enn Chretien ti kapav rann lavi enn esclave Chretien bien amer. Dan premier lettre ki Paul ti ecrire bann Chretien dan Corinthe, li ti demandé: “Eski to ti enn esclave kan ti appel toi? Pa tracassé; mais si to kapav aussi vinn libre, saisi sa l’occasion-la.” (1 Cor. 7:21) Li ti preferab ki enn dimoune ti libre ki li ti enn esclave. Zordi, dan beaucoup pays, bann zenfant obligé al lekol ziska enn certain l’age. Apré, sa bann jeune-la kapav choisir si zot pou contigne lekol. Si enn Chretien decide pou faire bann grand letid pou li kapav faire enn carriere dan le monde, li pou bien difisil pou li prend service a plein temps.​—Lire 1 Corinthiens 7:23.

ENN GRAND L’EDUCATION OU-SOIT PLI BON L’EDUCATION?

13. Ki qualité l’education pou aide plis bann serviteur Jéhovah?

¹³ Paul ti donne sa l’avertissement-la bann Chretien dan lavil Colosses: “Faire attention: kapav arrivé ki enn kikenn entraine zot couma so victime par moyen philosophie ek tromperie ki dan vide ek ki basé lor tradition bann zom, ek lor bann kitsoz de base ki le monde enseigné mais ki pena okenn rapport avek Christ.” (Col. 2:8) Zordi, beaucoup professeur enseigne bann “philosophie ek tromperie ki dan vide ek ki basé lor tradition bann zom.” Bann grand letid mette l’accent lor enn l’enseignement academik, ek souvent bann zeleve pa gagne enn formation pratik, lerla zot pa preparé pou faire face ar lavi toulé-jour. Bann serviteur Jéhovah zot diferan. Zot choisir bann letid ki pou aide zot developpe bann capacité necessaire pou contigne amenn enn lavi simple dan service Bondié. Zot prend compte sa conseil ki Paul ti donne Timothée-la: “Vrai-mem, nou pou kapav tire enn grand profit si nou ena sa l’attachement-la pou Bondié, ek si nou contente-nou avek seki nou ena. Alors, si nou ena mangé ek linge, nou pou contente-nou ar sa.” (1 Tim. 6:6, 8) Au lieu ki zot rod bann grand diplome ek bann titre ki ajouté apré zot nom, bann vrai Chretien travail dur pou gagne “bann lettre recommandation” setadir bann dimoune ki zot finn aidé pou vinn bann disciple Jésus. Zot faire sa kan zot participe autant ki zot kapav dan predication.​—Lire 2 Corinthiens 3:1-3.

14. Dapré Philippiens 3:8, couma Paul ti considere privilege ki li ti ena pou vinn esclave Bondié ek Christ?

¹⁴ Anou examine l’exemple l’apotre Paul. C’est Gamaliel, enn professeur la Loi Juif ki ti enseigne li. Nou kapav compare l’education ki Paul ti gagné ar bann cour ki gagné dan l’université zordi. Mais couma Paul ti considere sa l’education-la kan li ti compare sa avek privilege pou vinn esclave Bondié ek Christ? Li ti ecrire: “Mo considere tou kitsoz couma enn perte parski connaissance lor Christ Jésus, mo Seigneur, ena enn grand valeur.” Apré li ti ajouté: “A cause li, mo finn accepté perdi tou kitsoz ek mo considere tousala couma enn tas saleté, pou mo kapav gagne Christ.” (Phil. 3:8) Seki Paul ti dire kapav aide bann jeune Chretien ek zot parent ki ena la crainte pou Bondié pou faire bann bon choix en rapport avek l’education. (Guette zimage.)

GAGNE BANN BIENFAIT AR PLI BON L’EDUCATION

15, 16. Ki l’education l’organisation Jéhovah donné, ek ki so l’objectif?

¹⁵ Ki qualité l’environnement ena dan bann l’université kot bann jeune al faire bann grand letid? Dan beaucoup pays, parfois c’est dan sa bann place-la ki bann mouvement revolutionnaire kont bann gouvernement ek lezot organisation, commence formé. Kitfois aussi, bann etudiant commette l’immoralité sexuel, boire beaucoup ek soutenir theorie l’evolution. (Éph. 2:2) L’organisation Jéhovah bien diferan, li donne pli bon l’education dan bann congregation, dan enn l’environnement kot ena la paix. Nou tou nou kapav gagne bann bienfait chaque semaine ar Lekol Ministere Theocratik. En plis, ena aussi enn lekol pou bann frere pionnier ki celibataire (Lekol Biblik pou Bann Frere Celibataire) ek enn lekol pou bann couple pionnier (Lekol Biblik pou Bann Couple Chretien). Tou sa bann lekol theocratik-la aide nou pou obeir Jéhovah, nou Maitre ki dan le ciel.

¹⁶ Nou kapav fouillé pou gagne bann tresor spirituel dan Index des publications des Témoins de Jéhovah ou-soit dan Watchtower Library lor CD-ROM. L’objectif principal sa l’education-la c’est pou adore Jéhovah. Sa l’education-la enseigne nou couma nou kapav aide bann dimoune pou reconcilié avek Bondié. (2 Cor. 5:20) En retour, sa pou aide zot pou enseigne lezot dimoune.​—2 Tim. 2:2.

RECOMPENSE ENN ESCLAVE

17. Ki recompense nou gagné kan nou choisir pli bon l’education?

¹⁷ Dan parabole Jésus lor bann talent, sa deux esclave ki ti fidele-la, ti merite bann felicitation. Zot ti heureux pareil couma zot maitre ek li ti donne zot plis travail. (Lire Matthieu 25:21, 23.) Kan nou choisir pli bon l’education zordi, sa faire nou gagne la joie ek bann recompense. Anou prend l’exemple Michael. Li ti travail tellement bien dan lekol ki so bann professeur ti invite li dan enn reunion pou koz lor bann possibilité ki li ti ena pou al dan enn l’université. Zot ti bien etonné kan Michael ti choisir pou prend enn cour ki pa ti pou prend beaucoup le temps, dan enn lekol technik. Sa ti faire li gagne enn travail ki ti permette li faire pionnier permanent. Eski li ena l’impression ki li’nn rate kitsoz? Li dire: “L’education theocratik ki mo ti gagné en tant ki pionnier​—ek asterla en tant ki ancien dan congregation​—inn bien utile. Bann benediction ek bann privilege ki mo’nn gagné ena beaucoup plis valeur ki tou larzan ki mo ti pou kapav gagné. Mo bien content ki mo pa’nn choisir pou faire bann grand letid.”

18. Ki pousse ou pou choisir pli bon l’education?

¹⁸ Pli bon l’education enseigne nou pou faire volonté Bondié ek aide nou pou travail couma bann esclave pou Jéhovah. Li donne nou l’esperance ki nou “nepli pou esclave ar seki pé detruire [nou]” ek dan lavenir, pou “gagne liberté extraordinaire bann zenfant Bondié.” (Rom. 8:21) Pli important ankor, sa l’education-la enseigne nou pli bon fason ki nou kapav montré nou lamour pou Jéhovah, nou Maitre ki dan le ciel.​—Ex. 21:5.