Ini dan Lazwa Avek Zeova ek So Garson
Pu Selebre Levennman Ki Pli Inportan dan Lane, le 28 Mars
1 Kan nu pu selebre Repa Diswar Senyer apre kuse soley le 28 Mars, 2002, nu pu montre ki nu ini dan lazwa avek Bondye Zeova ek Zezi Kris. Dan sa lokazyon byin spesyal la, leres 144,000 pu zwir sa “partisipasyon” spesyal ki zot ena ansam avek bann lezot zeritye Rwayom, avek Papa, ek avek so Garson. (1 Zan 1:3; Efe. 1:11, 12) Bann “lezot muton” pu medit lor privilez extraordiner ki zot ena pu ini avek Zeova ek so Garson, ek ansam zot form enn sel leker ek enn sel lespri pu fer travay Bondye!—Zan 10:16
2 Travay Ansam dan enn Relasyon Byin Pros: Zeova ek Zezi finn tuletan ini dan lazwa. Zot finn frekant zot kamarad pandan enn long peryod ki pa kapav konte avan kreasyon bann dimunn. (Mika 5:2) Kumsa zot finn devlop enn profon lyin lafeksyon ant zot. Antan ki reprezantasyon lasazes, sa Garson premye-ne la finn kapav dir kan li pa ti ankor vinn kuma enn imin lor later: “Mo ti vinn sa kikenn avek ki [Zeova] ti sirtu atase zur apre zur, mo ti tuletan dan lazwa devan Li.” (Pro. 8:30) Lefet ki Garson Bondye finn res byin pros pandan buku-buku letan an konpayni Lasurs Lamur, sa finn ena enn profon lefe lor li!—1 Zan 4:8.
3 Konsyan ki ti bizin sov limanite, Zeova finn swazir so sel Garson ki Li finn kre direk ek ki ti atase sirtu avek bann dimunn, pu donn sakrifis ranson, ki ofer nu sel lespwar. (Pro. 8:31) Parey kuma Zeova ek so Garson ini pu realiz enn lintansyon, nu’si nu res dan linite avek zot ek avek nu bann konpaynon dan bann lyin lamur ki solid, ek nu fer volonte Bondye dan lazwa.
4 Montre Nu Rekonesans Sinser: Kan nu pu prezan dan Memoryal ek kan nu pu ekut byin avek respe, nu kapav montre nu vre lapresyasyon pu lamur Zeova ek sakrifis so Garson tulede pu nu. Dan sa lokazyon la, pu atir latansyon lor legzanp ranpli ar lamur ki Zezi finn done, so fidelite ziska lamor pu donn ranson, ek so reyn antan ki Lerwa dan Rwayom ki Bondye finn etabli, ek usi bann benediksyon ki Rwayom pu amene pu limanite. Pu fer nu rapel usi ki nu bizin kontiyn manifeste nu lafwa, travay avek zel an akor avek volonte Zeova kuma “bann konpaynon travay dan laverite.”—3 Zan 8; Zak 2:17.
5 Ed Lezot pu Partisip Avek Nu: Kolez ansyin bizin fer enn zefor spesyal pu ankuraz tu bann Temwin inaktif dan teritwar pu asiste Memoryal Lamor Kris. (Mat. 18:12, 13) Fer enn lalis bann ki bizin vizite pu ki pa bliye personn ek ki invit zot tu personelman.
6 Eski u konn lezot ki kapav asiste Memoryal? Pa ezite pu fer zot konpran linportans sa lokazyon la. Invit zot salerezman ek fer zot santi ki zot pu byinveni. Anu fer tu seki nu kapav pu invit tu nu bann letid Labib ek bann lezot dimunn ki interese, nu bann fami usi ek nu bann konesans, pu asiste sa levennman pli inportan dan lane la. Tu seki aprann “valer siperyer konesans Kris Zezi” kapav profit ranson. (Fil. 3:8) Bann ki ena lafwa dan sakrifis Kris kapav gayn lesperans solid pu gayn lavi pu tuletan.—Zan 3:16.
7 Zame suzestim lefe ki Memoryal kapav ena lor bann ki sinser. Ena dezan, dan lil Papouasie–Nouvelle–Guinée, 11 dimunn interese finn vwayaz dan enn ti bato pandan 17 ertan lor enn move lamer pu ki zot kapav prezan. Kifer? Zot finn dir: “Nu ti anvi selebre Memoryal Kris avek bann lezot adorater Zeova; donk ti vo lapenn fer vwayaz la.” Pans sa zel ki sa bann dimunn interese la finn montre ek sa lapresyasyon ki zot finn ena pu kapav ini dan lazwa avek Zeova, so Garson ek avek kominote bann frer Kretyin!
8 Ofer enn letid Labib tu bann ki interese. Ankuraz zot pu asiste bann reynion kongregasyon regilyerman ek pu partaz avek lezot laverite ki zot pe aprann. Ed zot pu ‘mars dan lalimyer’ ek pu ‘pratik laverite’ kan zot aplik bann prinsip Labib dan zot lavi. (1 Zan 1:6, 7) Ed zot pu devlop enn relasyon byin pros avek Zeova ek pu kontiyn apresye privilez ki zot ena pu fer so volonte dan linite.
9 Li vremem enn privilez extraordiner pu ini dan lazwa “dan mem lespri, pu lite kotakot kuma enn sel zom pu lafwa labonn nuvel”! (Fil. 1:27, 28) Anu atann avek inpasyans konpayni agreab ki nu pu zwir pandan Memoryal le 28 Mars, ek anu montre nu tuzur rekonesan anver Zeova ek so Garson!—Lik 22:19.