Ou kapav vinn enn enseignant!
1. Ki privilege special chaque proclamateur Royaume Bondié ena?
1 Enn parmi bann aspect dan nou ministere ki faire nou gagne beaucoup satisfaction, c’est pou enseigne enn dimoune la verité. Kan nou trouve li accepté message lor Royaume Bondié ek kan nou aide li vinn proche ar Souverain l’univers, sa c’est enn l’experience ki faire nou extra content. (Jacq. 4:8) L’objectif ki chaque proclamateur Royaume Bondié bizin ena, c’est pou enseigne enn dimoune ki faim la verité ek trouve li commence faire bann grand changement dan so personnalité, dan maniere ki li trouve bann kitsoz, ek dan so conduite.—Mat. 28:19, 20.
2. Kifer certain kapav hesité pou conduire enn l’etude la Bible, ek ki pou aide zot pou surmonte sa probleme-la?
2 Compte lor Jéhovah: Dan le passé, bann serviteur fidele pa ti senti-zot qualifié pou faire travail ki Jéhovah ti donne zot pou faire. Kan Moïse, Jérémie, Amos, ek lezot dimoune ordinaire ti compte lor Jéhovah, sa ti aide zot pou surmonte zot bann doute ou-soit zot la crainte ki zot ti ena ek sa ti permette zot faire enn grand travail. (Ex. 4:10-12; Jér. 1:6, 7; Amos 7:14, 15) L’apotre Paul aussi finn “prend beaucoup courage,” ou-soit dan sens litteral, li ti “koz bien franc.” Couma? Li finn dire li-mem ki c’est “grace a nou Bondié.” (1 Thess. 2:2, note) Oui, nou tou kapav ena confiance en Jéhovah ki Li pou donne nou l’aide, la sagesse, ek la force ki nou bizin pou conduire bann l’etude la Bible ki produire bann bon resultat.—Is. 41:10; 1 Cor. 1:26, 27; 1 Pierre 4:11.
3, 4. Ki formation ki nou gagné pou nou kapav enseigne Parole Bondié?
3 Accepté formation: Nou Grand Instructeur, Jéhovah, donne nou formation grace a enn programme regulier ki basé lor la Bible pou ki nou kapav vinn bann enseignant bien qualifié. (Is. 54:13; 2 Tim. 3:16, 17) Accepté sa formation-la kan ou profite bien tou bann l’occasion ki ou gagné pou augmente ou connaissance lor la Bible ek ameliore ou capacité pou enseigne bann verité ki ena ladan. Mem si c’est l’objectif principal Lekol ministere theocratik ek reunion service, tou bann reunion dan congregation forme nou pou enseigne seki ena dan Parole Bondié.
4 Faire zeffort pou aprann bann fason simple pou enseigne bann verité spirituel ki profond. Livre École du ministère, page 227 dire: “Pou ki lezot kapav comprend ou sujet, fodé ki ou-mem ou bien comprend ou sujet avant.” Kan nou faire bann commentaire dan reunion, sa aide nou fixé bann point important dan nou l’esprit pou nou kapav servi sa plitar. Alors, prepare ou bien, ek ou confiance dan ou capacité pou enseigné pou augmenté.
5. Ki formation nou gagné encore dan congregation pou aide nou progressé pou vinn bann meilleur enseignant?
5 Pena okenn doute ki depuis commencement-mem, bann chretien finn aprann avek zot camarade pendant ki zot travail ensam dan predication. (Luc 10:1) Si possible, accompagne bann proclamateur experimenté, par exemple bann pionnier, bann ancien, ek bann surveillant itinerant, dan bann l’etude. Remarké couma zot servi bann l’exemple simple ek lezot kitsoz simple ki trouve dan bann publication pou enseigne bann verité ki trouve dan la Bible. Demann zot bann suggestion lor fason ki ou kapav vinn enn pli bon enseignant. (Prov. 1:5; 27:17) Ena reconnaissance pou sa formation ki nou bann frere ek soeur donne nou, parski en realité c’est enn formation ki Bondié pé donne nou.—2 Cor. 3:5.
6. Ki nou bien bizin pou vinn enn enseignant Parole Bondié?
6 Compte lor Jéhovah, ek profite formation ki Li donne ou. Koz lor ou bann progré dan la priere. (Ps. 25:4, 5) Ou aussi ou kapav konn sa la joie pou aide enn kikenn pou vinn enn enseignant Parole Bondié couma ou!