Pa Peur—Surmonte Sentiment ki Ou Pena Assez Capacité
1. Kifer certain hesité pou offert enn l’etude la Bible?
1 Eski ou hesité pou offert enn l’etude la Bible parski ou croire ki ou pena assez capacité pou conduire enn l’etude bien? Ena fois bann serviteur fidele dan le passé, par exemple Moïse ek Jérémie, ti ena sentiment ki zot pa ti qualifié pou travail ki ti’nn donne zot. (Ex. 3:10, 11; 4:10; Jér. 1:4-6) Alors, sa qualité sentiment-la li pa nouveau. Couma nou kapav surmonte sa?
2. Kifer fodé pa ki nou limite nou ministere ar predication porte en porte ek laisse lezot faire bann l’etude la Bible?
2 Nou bizin rappel ki Jéhovah jamais demann nou faire enn kitsoz ki depasse nou capacité. (Ps. 103:14) Alors, mission ki nou ena pou “faire bann disciple” ek “enseigne zot,” c’est enn mission ki nou kapav accompli. (Mat. 28:19, 20) Jéhovah pa’nn donne sa privilege-la zis bann ki ena plus l’experience ou-soit talent. (1 Cor. 1:26, 27) Alors, fodé pa ki nou limite nou ministere ar predication porte en porte ek laisse lezot conduire bann l’etude la Bible.
3. Couma Jéhovah qualifié nou pou faire bann l’etude la Bible?
3 Jéhovah Qualifié Nou: C’est Jéhovah ki qualifié nou pou faire bann disciple. (2 Cor. 3:5) A travers so l’organisation, Li enseigne nou bann verité Biblik ki mem bann dimoune ki ena plus l’education dan sa le monde-la pa koné. (1 Cor. 2:7, 8) Jéhovah finn faire garde bann methode l’enseignement nou Grand Enseignant, Jésus, pou ki nou kapav imite li, ek Li contigne donne nou formation a travers congregation. En plus, Jéhovah donne nou bann publication ki nou bizin pou ki nou kapav enseigne la Bible. Li finn donne nou bann zouti, couma livre Ki la Bible enseigné?, ki enseigne la verité dan enn fason logik ek facile pou comprend. Conduire enn l’etude la Bible kapav moins difficile ki nou pé pensée.
4. Kifer nou kapav ena confiance ki Jéhovah pou aide nou?
4 Moïse ek Jérémie finn kapav accompli zot mission grace a l’aide Jéhovah. (Ex. 4:11, 12; Jér. 1:7, 8) Nou aussi nou kapav demann Jéhovah pou aide nou. Apré tou, kan nou pé conduire enn l’etude la Bible, nou pé enseigne enn dimoune la verité lor Jéhovah, ek sa c’est bann kitsoz ki bon devant lizié Bondié. (1 Jean 3:22) Faire bann l’etude la Bible li enn l’aspect nou ministere ki donne nou beaucoup la ek satisfaction. Alors, faire sa vinn ou l’objectif.